سلسلة عوايد و فوايد .. ( غير الجبال الي ما يتلاقاوش )

[أم راضية ~_]

السلام عليكم ورحمة الله وبركاته
إن شاء الله لاباس وبخير؟
---
"غير الجبال الي ما يتلاقاوش " هادا هو العنوان :-r
وصح الدنيااا هادي صغييرة و قد ما تبعد و تربح العيب و تقول ما نزيدش نتلاقى بشي عباد , إلاّ ما يجي نهار و يلاقيك المكتوب بيهم .

***
نبدا بالحكاية الي هيا صرات لخويا قرا وكمل و جاب الماستر تاعو وقعد يحوس على الخدمة بارتو بوغتون الاختصاص تاعو " ميكانيك "نورمالمون يلقى خدمة فاسيلمون مي راكم تعرفو الخلاص و ليكسبريونس و البلاصة وو الخ
ألوغ وحد المرة كان يدور فالحومة كي العادة تلاقى ببنت جيرانا تاع بكري وهي تقري فالسيام فرونسي مالا كلمة تجيب كلمة قاتلو واحد البروف خرجت مالادي تقري المات - الرياضيات - ادا حبيت تدخل في بلاصتها
خويا ما يحبش يقري والسيام والدراري صغار ما خدمهاش في مخو بزااف مي هكداك و خرج لي pاpي اللازمين و راح ادا الدوسيي بويسك السيام والبلدية قراب لينا (قالك مادام قريبة ليا نسيي )
اداهم للمدير قالو ايه تقدر تدخل اليوم ادا حبيت هوا دخل للكلايص تعرف على التلاميد نصهم ولاد الحومة :d
لقى صعوبات مع اللول مايعرفش كيفاش يدير تحضير نص الدراري كان يلعب معاهم ماتش فالحومة بالجمعة مور العصر ههههههههه
و زيد لقى روحو يعيطولو شيخ هههههههه
مي السيام الي راح يخدم فيه هو نفسو السيام الي قرينا فيه انا وخويا لوخر و هو والاساتدة شافيين علينا كامل مالا تلاقى بالاساتدة تاوعو وفرحو بيه و الكلاصة الي يدخلوها يقولولهم بلي هاداك راهو تلميذي ههههههه
وكانت وحد الاستادة قراتو الرياضيات وكانت تحبو بزااف و تعزو ومام هو , مالا عاوناتو بزااف بزاااف كيفاش يحضر الدروس , مام حضر عندها حصة باش شاف كيفاش يمشي الدرس فالكلاصة
و حكاية يومين والف الريتم و ولى يحضر فالدروس وهوا قرايتو ماكانش يحضرها - جامي شفتو قعد فوق كرسي مع الطابلة يقرا :d -
والدراري تاوعو يحبوه ونهار النتائج تاع البيام رايح جاي , داخل خارج يسنى فالريزيلتا تاع ولادو كيما قالت ماما ههههههه و فالعيد يجوه , و نهار عيد ميلادو لي كادو اشكال وانواع , و راهم دي زامي فالفيس بووك يعطيهم تمارين زيادة فيه ههههههه "حببهم فالقراية "
ونهار ولات الشيخة تاعهم واش بكاو عليه ودارولو حفلة فالمسيد
لي صونصيال عاش تجربة في حياتو و يا سعدو بيها
---
القصة تاع خويا فيها فوايد بزااف كنت حابة نصيغهالكم انا بصح كيما يقول القانون نخليو الاعضاء يستنتجوها و يجبدوهالنا :-r
شكرا ليكم على حسن الاصغاء :regards01:

***
سبحانك اللهم وبحمدك أشهد أن لا إله إلاّ أنت أستغفرك وأتوب إليك
واللهم صل على محمد وعلى آله وصحبه أجمعين
و السلام عليكم ​

 

[بنت الـ25]

اهلا بيلدز
قصة خوك قمة فالروعة عجبتني بزااااف:up:
توضع اولا ضمن :سلسلة عوايد وفوايد

الفوائد اللي فيها بزااااف
نحاول نحصرها كامل :d

الانسان ما لازمش يفقد الأمل ويخلي ايمانو بربي كبير ويتكل عليه فهو نعم الوكيل
مالازمش الواحد فينا يخلق صعوبات وعراقيل قبل ما يجرب يا سيدي جرب
ولا ما عجبتكش ما خاسر والو وانا نقولها نكره الناس السلبيين

ثالثا: التواضع خوك ما شاء الله كان استاذ متواضع عرف كيف يتعامل مع
ولادو خخخخخخ ويحببهم فيه وبالتالي حببهم فالقراية بطريقة سلسلة وخلى انطباع حسن بعدما خرج من السلك
الانسان لازم يكون كحامل المسك ان لم تشتر منه وجدت عنده رائحة طيبة

مشكووورة على القصة الروعة يلدز
الف تحية لك:regards01:

​

 

[أم أمين23]

اول حاجة ممكن نقولها عسى ان تكرهو شيئا وهو خير لكم يعني هو ما كانش حاب يقري وبالنهاية ولى استاد شاطر
ثاني الحباب والناس الملاح ديما تلقايهم وكون ماشي هو مداير الخير في هاد الناس وكان ناس ملاح معاهم ماكانوش ردولو خيرو وساعدوه

 

[قلمي سلاحي]

غير الجبال الي ما يتلاقوش لكن البشر يتلاقوا قصة رائعة بكل الوقائع ديالها

محلاها لحظات من عمرنا نهار نشوفوا أساتذتنا في الصغر وأحنا زملاء لهم في العمل

رائع هاداك الاحساس الي فات على خوك ربي يخليهولك ويوفقه​

 

[أمــ وليــد الجزائرية]

انا نقولك شكرا على القصة الي فعلا تأثرت بيها

و نقولو لخوك مساعدك

هاو ستنيت باه تلقى خدمة وفي الاخير ربي بعثلك لحاجة لي جامي ستنيتها

متعرف الخير منين ايجيك

و رانا نشوفو ولدت محبة بينتهم

:regards01::regards01:
و الاخلاص في العمل سر النجاح

ربي يلقينا بناس كما هذو

يعطيك الصحة اختي
​

 

[أم راضية ~_]

اهلا بيلدز
قصة خوك قمة فالروعة عجبتني بزااااف:up:
توضع اولا ضمن :سلسلة عوايد وفوايد

اهلا بيك دايما تنوريلي مواضيعي بردودك :$ :regards01:​

الفوائد اللي فيها بزااااف
نحاول نحصرها كامل :d

ايه بزاااف ان شاء الله نستفادو منها كامل :-r​

الانسان ما لازمش يفقد الأمل ويخلي ايمانو بربي كبير ويتكل عليه فهو نعم الوكيل

صحيح ===> هادي وحدة 1 :-r​

مالازمش الواحد فينا يخلق صعوبات وعراقيل قبل ما يجرب يا سيدي جرب
ولا ما عجبتكش ما خاسر والو وانا نقولها نكره الناس السلبيين

ايه لازم الواحد ما يقطعش نصيبو بيدو و بالسلبية تاعو كيما قلتي ===> هادي زوج 2 :-r​

ثالثا: التواضع خوك ما شاء الله كان استاذ متواضع عرف كيف يتعامل مع
ولادو خخخخخخ ويحببهم فيه وبالتالي حببهم فالقراية بطريقة سلسلة وخلى انطباع حسن بعدما خرج من السلك

انا ما انتبهتش لهاد النقطة :d ههههههههه ===> نحسبوها تلاتة 3​

الانسان لازم يكون كحامل المسك ان لم تشتر منه وجدت عنده رائحة طيبة

وهادي ===> اربعة 4 :up:​

مشكووورة على القصة الروعة يلدز
الف تحية لك:regards01:

​

انتي المشكورة على الدعم و التشجيع و المشاركة وإنارة مواضيعي بردودك النيرة و الواعية
ملايين التحايا ليك وحدك :-r :$ :regards01:​

 

[أم راضية ~_]

اول حاجة ممكن نقولها عسى ان تكرهو شيئا وهو خير لكم يعني هو ما كانش حاب يقري وبالنهاية ولى استاد شاطر

اهلا بام امين الطيبة :-r
صح نقدرو ناخدوها من باب عسى ان تكرهوا شيئا و هو خير لكم كيما قلتي :up:​

ثاني الحباب والناس الملاح ديما تلقايهم وكون ماشي هو مداير الخير في هاد الناس وكان ناس ملاح معاهم ماكانوش ردولو خيرو وساعدوه

ايه الحباب ينصابو وقت الشدة هادي تانيت ما انتبهتلهاش انا :d ههههههههه
صحيتي بزااف ام امين نورتيني :-r :regards01:
​

 

[أم راضية ~_]

غير الجبال الي ما يتلاقوش لكن البشر يتلاقوا قصة رائعة بكل الوقائع ديالها

اهلا بيك اختي قلمك سلاحك :-r
^_^ صح الواحد ما يعرفش بيمن يتلاقى بعد سنين ومليح الواحد ما يربحش العيب ​

محلاها لحظات من عمرنا نهار نشوفوا أساتذتنا في الصغر وأحنا زملاء لهم في العمل

ايه شحال كان فرحان كي ولا زميل الاساتدة تاوعو سيغتو كي ولى يحضر مجالس الاقسام معاهم و يتناقشو في امور التلاميذ :-r ووحد الاستاذ قراه و قراني انا تانيت كان يدخل للكلاصة تاعو ويقولو تلميذي بني حبيبي زميلي وغدا نسيبي هههههههههه ​

رائع هاداك الاحساس الي فات على خوك ربي يخليهولك ويوفقه​

ايه احساس رائع نقدرو نقولو الفايدة منو ما تعرفش الخير منين يجيك
صحيتي اختي على الردّ والمرور ومشاركتي موضوعي :regards01: تحياتي ​

 

[أم راضية ~_]

انا نقولك شكرا على القصة الي فعلا تأثرت بيها

و نقولو لخوك مساعدك

الشكر ليك اختي ​

هاو ستنيت باه تلقى خدمة وفي الاخير ربي بعثلك لحاجة لي جامي ستنيتها

متعرف الخير منين ايجيك

صحيح :-r​

و رانا نشوفو ولدت محبة بينتهم

:regards01::regards01:
و الاخلاص في العمل سر النجاح

ايه كاينة منها كان يضل يخمم فيهم و يخدم معاهم من قلبو ​

ربي يلقينا بناس كما هذو

يعطيك الصحة اختي
​

آميين يا ربي
الف شكر وتحية ليك اختي ​

 

[stella.m]

صحيتِ على القصة الرائعة والموضوع الباهي
الدنيا مازالت بخير
الفايدة
دير الخير وانساه ودير الشر وتفكرو اكيد رايح يرجع ليك الخير الي درتوا هذاك الزمان
وانت في ضيق
عسى ان تكرهوا شيئا وهو خير لكم ما يحبش يقري مي طلعت اجمل ايام عمرو وبلاك ما حبش يفارقهم خلاص
كي تجينا الفرصة في هذي الدنيا مانحوسوش على الماديات برك لازم نعرفوا كيفاش نغيروا الناس ونخلوهم احسن
التواضع من اهم الصفات الي تخلينا محبوبين :$
​

 

[أم راضية ~_]

صحيتِ على القصة الرائعة والموضوع الباهي
الدنيا مازالت بخير

تعيشي نعيمة
ايه مازالت بخير مالgري توو :-r​

الفايدة
دير الخير وانساه ودير الشر وتفكرو اكيد رايح يرجع ليك الخير الي درتوا هذاك الزمان
وانت في ضيق

ايه و لابد :up:​

عسى ان تكرهوا شيئا وهو خير لكم ما يحبش يقري مي طلعت اجمل ايام عمرو وبلاك ما حبش يفارقهم خلاص

صح نهار ولات البروف تاعهم داقتلو و ديgوتا كي حبس بورتون خدم ست شهور واقيلا بلا ما يخلص ما عندوش الكارطة تاع لارمي مي وهكداك كان حاب يكمل يقري
​

كي تجينا الفرصة في هذي الدنيا مانحوسوش على الماديات برك لازم نعرفوا كيفاش نغيروا الناس ونخلوهم احسن

ايه مالازمش الانسان يكون مادي ويخمم غير واش رح يتوشي والحمد لله كان يخدم بضمير
​

التواضع من اهم الصفات الي تخلينا محبوبين :$
​

التواضع رفعة :-r
تعيشي اختي على المرور والردّ :regards01:​

 

[سمسم السمسومة]

احساس رائع نهار صح ميكون استاذك في الصغر زميلك فالعمل......حاجة تشرف صح.....مليحة الدنيا كي تدور و نتلاقاو صح.....و تبقى النية و الطيبة و التواضع حوايج توصلنا لبعيد

 

[فتاة حساسة]

الانسان لازم يصبر ويرضى باللسي اللي كاتبلو ربي..وماعلابالوض الخير منين..هاكي شفتي كان ماحابش يخدم في السيام وكي خدم والا عندو اصدقاء واكتسب اخوة وكل شي..:d..شكرا ..تقبلي مروري ​

 

[أم راضية ~_]

احساس رائع نهار صح ميكون استاذك في الصغر زميلك فالعمل......حاجة تشرف صح.....مليحة الدنيا كي تدور و نتلاقاو صح.....و تبقى النية و الطيبة و التواضع حوايج توصلنا لبعيد

اهلا بيك سمسم
كنت نسنى فيك تقولي واحد الفايدة ما قالوهاش قربتي ليها و ما قلتيهاش ههههههههه
صح النية الحسنة تثمر ثمار طيبة
يعطيك الصحة على المرور والرد اختي ​

 

[أم راضية ~_]

الانسان لازم يصبر ويرضى باللسي اللي كاتبلو ربي..وماعلابالوض الخير منين..هاكي شفتي كان ماحابش يخدم في السيام وكي خدم والا عندو اصدقاء واكتسب اخوة وكل شي..:d..شكرا ..تقبلي مروري ​

ايه يا سعدو الي مسلم امرو لربي وماشي بالنية
صحيتي نجوولة على المرور والردّ الجميل...​

 

[فتاة حساسة]

ايه يا سعدو الي مسلم امرو لربي وماشي بالنية
صحيتي نجوولة على المرور والردّ الجميل...​

بغير مزيا ختيوة...ربي يخليك

 

[serinee]

اهلا بك طاطا
و شكرا للموضوع الرائع
يا سبحان الله
عسى ان تكرهوا شيئا و هو خير لكم و عسى ان تحبو شيئا و هو شر لكم
اخوك في الاول كان ضد فكرة التدريس مع العلم انو كان بدون عمل
لكن عندما جربها لقاها هايلة
اوووووه انا نقول يا سعدو
و خصوصا ربح باكبر نتيجة هدو الاطفال لي اصبحو كامل يحبوه
ان شاء الله يعود لنفس المدرسة للمرة 2
و شكرااا
​

 

[سمسم السمسومة]

اقتباس

اهلا بيك سمسم
كنت نسنى فيك تقولي واحد الفايدة ما قالوهاش قربتي ليها و ما قلتيهاش ههههههههه
صح النية الحسنة تثمر ثمار طيبة
يعطيك الصحة على المرور والرد اختي ​

و تخليهالي في قلبي محقكش....قوليها برك ربي يعيشك

 

[أم راضية ~_]

اهلا بك طاطا

وين طاطا هادي ؟؟؟؟؟؟ :$​

و شكرا للموضوع الرائع

الشكر ليك اختي​

يا سبحان الله
عسى ان تكرهوا شيئا و هو خير لكم و عسى ان تحبو شيئا و هو شر لكم
اخوك في الاول كان ضد فكرة التدريس مع العلم انو كان بدون عمل
لكن عندما جربها لقاها هايلة
اوووووه انا نقول يا سعدو
و خصوصا ربح باكبر نتيجة هدو الاطفال لي اصبحو كامل يحبوه

ايه صح يحبوه ويحبهم ​

ان شاء الله يعود لنفس المدرسة للمرة 2
و شكرااا
​

هههههه ماشكيتش يولي للمدرسة نفسها واقيلا يطلع مع ولادو لليسي ههههههههه على خاطر الي قراهم فالبيام يجو ليه يفهمهم الدروس تاع الليسي
الشكر كله ليك اختي :-r
​

 

[serinee]

هههههه ماشكيتش يولي للمدرسة نفسها واقيلا يطلع مع ولادو لليسي ههههههههه على خاطر الي قراهم فالبيام يجو ليه يفهمهم الدروس تاع الليسي
الشكر كله ليك اختي :-r
​

اووه غاليتي كي شفت هدا الامور بسم الله مشاء الله عليه قلت وليدك
ربي يرزقك مثلو يا رب
ان شاء الله يروحو مع اطفالو لليسي و اتمنالو التوفيق
و قيليلو ميتفشش بززاف متعرف وين تصيب راحتك
​