ما قدرتش نعرف علاه ندير هاكا :'(

[Sariita]

السلام عليكم ..
هادي أول مشاركة ليا في هاد المنتدى الأكثر من رائع .. قرأت العديد من المواضيع و أعجبني التعامل بين الأعضاء و المساعدات اللي يقدموها بارك الله فيهم ..
حبيت نعرض مشكلتي.. ما قدرتش نفهم روحي واش نحب و واش نكره .. عندي شخصية غامضة واحد ما يفهملي شخصية متقلبة المزاج بل متقلبة فكلش ..
زعما نحب يامات نرياح وحدي نهرب من كامل الناس و في الفايسبوك نحذف الأصدقاء و على ساعتين هاكاك نتبدل و نولي حابة الأصدقاء .. مام فالجامعة نحب نريح معاهم منبعد لالا نبدل بلاصة ولا نخرج ..
مرات مثلا نتوب و نتسقم في صلاتي و نحبس الأغاني وو و و و و يا ربي نهار يجوز نرقد نود ننسا كاش كنت البارح و يروحلي هاداك الإحساس و نولي كيما كنت ..
بسيف ما نتخذ القرارات و جابلي ربي مارانيش دايرة الثقة ف نفسي و مرات نقارن روحي بالناس بزااف.
و مثلا نكون حابة نروح عند ماني مه لافامي نلبس حوايجي و كلش و والله نجو خارجين يدور فيا الحال نقولهم مانجيش !!!! و هاكا صراتلي خطرة كنت رايحة للجامعة و وصلت للحافلة و قبل ما تديماري حبطت و وليت للدار .... ما فهمتش روحي دقيقة نبدل رايي وعلاش :'( :'( و بزاف حاجات وحدوخرين طولت عليكم اسمحولي..
ان شاء الله تعاونوني و واش رايكم ؟ و إذا كاين فيكم لي كيما أنا هههه باش ما نحسش روحي وحدي هاع هههه..
سلااااام

 

[بنت الـ25]

السلام عليكم اختي
مكيش وحدك ههههه
نرجعلك ان شاء الله

 

[Sariita]

السلام عليكم اختي
مكيش وحدك ههههه
نرجعلك ان شاء الله

و عليكم السلام
أيا مليح كي مارانيش وحدي الدنيا و ما فيها ههه

 

[ميلاد انثى]

انتي مافهمتيش روحك بصح انا فهمتك
راني نرجعلك ....

 

[همس الوُرود]

هههههههههههه السلام عليكم أختي
هههههه ضحكتيني هايلة هاديك توصلي للبيس وتهبطي ههههههههههههه أنا نوصل نقرا ونفتح الكراس ونزيد نقفلو مانقدرش نقرا فالدار هههه لازم قبل الامتحان بيوم باش نجبد نقرا :d هادا واش نشبهلك فيه ههههههههه
ماعليش أختي لازمك تبقاي تصلي وتفاصي الأغاني هوما الي يجيبولك فالشر وقبل ماترقدي أقراي القرآن ولا أسمعي القرآن
وماتبطليش الصلاة ويلا بطلتيها وماقدرتيش عاقبي روحك ماعلاباليش أنا تحبي ماكلة ماتاكليش أضربي روحك ههه أي حاجة لازمك تحكمي صلاتك هي الحل الوحيد باش تطمأني وتدعي ربي وتكوني قريبة منو غير هو الي يحل مشكلتك ماش الغنا
سلام أختي ربي يفرج ههههههه
​

 

[nanoche]

لا ما راكيش وحدك راكي في وسط اخواتك و عايلتك الكبيرة
برك حاولي ما تسمعيش لروحك كي يكون عندك هاداك الميول للعزلة و الانطواء
وهو أكيد عندك شي راهو يدور بينك و بين روحك على هاداك تحبي تكوني وحدك وواحد ما يقطع عليك هاداك الحبل اللي تكوني متمسكة بيه و هذا نوع من الاكتئاب النفسي، وفي بعض الحالات الخوف الاجتماعي أو الخوف من التجمعات والأماكن المفتوحة والمتسعة.
دونك انا ننصحك تحتكي بالغاشي حتى و لو بطريقة غير مباشرة مثل ممارسة الرياضة في القاعات الرياضية وتسيي تشغلي وقتك في حاجات اخرى و ما تمديش لروحك فرصة باش تنعزلي
ربي معاك اختي
​

 

[Mr Brahim]

على السريع و بكل صراحة ما عندكش شخصية و ايمانك ضعيف اختي مع الاسف و لي عودة ان شاء الله :regards01:

​

 

[Sariita]

هههههههههههه السلام عليكم أختي
هههههه ضحكتيني هايلة هاديك توصلي للبيس وتهبطي ههههههههههههه أنا نوصل نقرا ونفتح الكراس ونزيد نقفلو مانقدرش نقرا فالدار هههه لازم قبل الامتحان بيوم باش نجبد نقرا :d هادا واش نشبهلك فيه ههههههههه
ماعليش أختي لازمك تبقاي تصلي وتفاصي الأغاني هوما الي يجيبولك فالشر وقبل ماترقدي أقراي القرآن ولا أسمعي القرآن
وماتبطليش الصلاة ويلا بطلتيها وماقدرتيش عاقبي روحك ماعلاباليش أنا تحبي ماكلة ماتاكليش أضربي روحك ههه أي حاجة لازمك تحكمي صلاتك هي الحل الوحيد باش تطمأني وتدعي ربي وتكوني قريبة منو غير هو الي يحل مشكلتك ماش الغنا
سلام أختي ربي يفرج ههههههه
​

و عليكم السلام ... أولاااا قبل كلش أنا ما شي قصدي نحبس الصلاة بعيد الشر قصدي ما نخشعش فيها و الأغلبية تاع الناس ما يخشعوش كيما رانا عارفين .. بصح عمري فحياتي ما خليت صلاة و الحمد لله
و الأغاني الحمد لله عوضتهم بأناشيد ماهر زين إنجليزي بدون إيقاع هههههه
و الحمد لله أختي مواظبة على الأذكار و كلش ما تفهموش غالط هههه يعطيك الصحة إن شاء الله ربي يفرج علينا كامل ..

 

[Sariita]

على السريع و بكل صراحة ما عندكش شخصية و ايمانك ضعيف اختي مع الاسف و لي عودة ان شاء الله :regards01:

​

خويا نحترم الرأي ديالك و الشخصية ديالي موافقة ماراهيش قوية بصح ما تقولش على الإيمان ضعيف ربي لي علابالو بالقلوب و علابالو واش حابة ما تحكمش عليا بلا ما تعرفني و الإيمان عند أغلبية الناس يطلع و يحبط و أنا راني نجاهد .. مع تحياتي سلام خويا

 

[Sariita]

لا ما راكيش وحدك راكي في وسط اخواتك و عايلتك الكبيرة
برك حاولي ما تسمعيش لروحك كي يكون عندك هاداك الميول للعزلة و الانطواء
وهو أكيد عندك شي راهو يدور بينك و بين روحك على هاداك تحبي تكوني وحدك وواحد ما يقطع عليك هاداك الحبل اللي تكوني متمسكة بيه و هذا نوع من الاكتئاب النفسي، وفي بعض الحالات الخوف الاجتماعي أو الخوف من التجمعات والأماكن المفتوحة والمتسعة.
دونك انا ننصحك تحتكي بالغاشي حتى و لو بطريقة غير مباشرة مثل ممارسة الرياضة في القاعات الرياضية وتسيي تشغلي وقتك في حاجات اخرى و ما تمديش لروحك فرصة باش تنعزلي
ربي معاك اختي
​

حاولت نندمج مع الناس بصح من بكري نحب العزلة منحسش روحي مرتاحة معاهم و مرات نحب نكون معاهم و نكره العزلة ههه و كيما قلت عندي الخوف الإجتماعي و الإكتئاب على ما أظن .. راح نسي كل مرة ان شاء الله باش نشد فرأي واحد يهطيك الصحة

 

[M3TaZ eLLMa]

السلام عليكم

أولا نرحبو بيك في منتداك وبيتك الثاني اللمة

وثانيا نقلك مرحبا بيك في أي وقت وبدون أي ازعااج

ثالثا نشكرك على الثقة وعلى صراحتك وهاذ إن دل أنه يدل على نبلك وإخلاصك

ندخل في الموضوع :

شوفي أخت كثيرة هي أمثلتك سواء لرجال ونساء لكي لا تقلي أني منفردة بهذه الشخصية لا يوجد والكثير أيضا .

المهم شوفي أخت بكل صراحة ونقلهالك بأنو لاباس عليك مشكلتلك هي تشوش الافكار عندك وهذا هو لب الموضوع

وأيضا استسلمت شوي للأحزان أثرت عليك بزاااف وما يخفاكش الشيطان لعنة الله عليه عندما يجد إنسان استسلم للظعف يعملوا طبخا مليحة ويزينها ويمشي في خطوا ..

وهذا كله لا يعتبر مشكل أو مرض نفسي لا بل هو ناتج عن قلق داخلي اتبعك من طفولة وهذا قلق عليه .

نحللوا شوي شخصيتك

تملين للأحزان كثيرا وخاصة الموسيقى الحزينة .

تحبين أن تملكي كل شيء في لحظة واحدة .

سريعة القلق . وسرحانة على طووول .

عصبية حتى في اتفه الاشياء حويلك تشربي القهوة بزاااف كيما حالتي ههههه وحنونة للأقصى دراجة .

لا علينا

ندخل في خلاصة

سيدتي الكريمة وأخت الطيبة حاولي ان تنضمي أفكارك وتسعيني بالله والاكثار من الدعاء إليه نعطيك حاجة لكن بشرط اعمليها شوفي في حالة ما قلقت وحبيتي تعملي شيء مثال تحذفي صدقيات من الفايس بوك شهدي وستغرفي وتراجعي وخليهم ما تحذفهمهش وليس فايس بوك فقط اي امر اترجاعي عليه وخليه بشرط شهدي وستغفري لأنو شيطان لعنة الله عليه في تلك اللحظة راه جنبك ويزين في الطبخة أنت ألعنيه وشهدي وستغفري برك .

وعودي نفسك على هذا الامر بشوي بشوي إن شاء الله راح تخرجي من محنتك الامر كامل راه في ايدك وأكثري من الدعاء لله وقرئي القران كثيرا لأنه دواء لنفس .

وما تقليش بأني راني مريضة ووووو لا لاباس عليك .. لأنو لي ولف روحوا ويقول راني مريض وووو راح يدخل رحوا في دوامة صح صح ويمرض روحو بالفعل لهذا تجنبي هاته الشكوك .

وما عندي ما نزيد

ولي رجعة إن شاء الله لموضوعك وديري حسابك راني من متتبعي حالتك حتى تبراي اخت الطيبة

وفي الاخير نقلك

ربي يخرجك من محنتك وربي يحميك ويعطيك ما تتمني يارب

وربي يوفقك في كل شيء

وتقبلي شكري وتقديري موفقة
​

 

[همس الوُرود]

و عليكم السلام ... أولاااا قبل كلش أنا ما شي قصدي نحبس الصلاة بعيد الشر قصدي ما نخشعش فيها و الأغلبية تاع الناس ما يخشعوش كيما رانا عارفين .. بصح عمري فحياتي ما خليت صلاة و الحمد لله
و الأغاني الحمد لله عوضتهم بأناشيد ماهر زين إنجليزي بدون إيقاع هههههه
و الحمد لله أختي مواظبة على الأذكار و كلش ما تفهموش غالط هههه يعطيك الصحة إن شاء الله ربي يفرج علينا كامل ..

أه أوكي أسمحيلي بالاك غلطت مالا مي ثوجور حاولي تزيدي تتقربي بزاف من ربي وأدعي ربي غير هو الي يحللك هاد المشكلة ان شاء الله
ربي يوفقك ههههههه ماتكونيش متسرعة بزاف فقراراتك أختي حاولي تتحكمي في نفسك وأفعالك
سلام أختي
​

 

[Mr Brahim]

خويا نحترم الرأي ديالك و الشخصية ديالي موافقة ماراهيش قوية بصح ما تقولش على الإيمان ضعيف ربي لي علابالو بالقلوب و علابالو واش حابة ما تحكمش عليا بلا ما تعرفني و الإيمان عند أغلبية الناس يطلع و يحبط و أنا راني نجاهد .. مع تحياتي سلام خويا

اولا نشكرك على رحابة صدرك :regards01:
ثانيا الكلام لقلتو ما كانش انتقاص منك بقدر ما كان تشريح للوضع
و بخصوص الايمان له علامات من اجملها الصبر على كل حال مهما كان هذا امر
الامر الاخر المؤمن لا يترك صلاته باي حال من الاحوال
النقطة الموالية صحيح الايمان درجات لكن من يترك فروضه * الصلاة الركن الثاني في هذا الدين و و من اهم ما يميز هذه الامة عن غيرها *
نرجعوا لقضية الشخصية ببساطة انت تحاولي ترضي الناس يعني تكون كيما يحبوا هم يشوفوك و انا نقلك فقط كوني انت :up:
​

 

[الحق سلاحي]

وعليكم السلام ههههههههه
عجبتني هادي خطرة كنت رايحة للجامعة و وصلت للحافلة و قبل ما تديماري حبطت و وليت للدار
عليك ان تفتخري بشخصية مثل هذه :d برك ديري حدود باه ما تمرgيهاش في الصلاة

​

 

[الخاشية ربها]

اناكيما نتي في حوايج ياسر حاولي برك تتغلبي على نفسك لخطر هي السبب في هاذ الوسوسة وما تنسايش الاذكر الصباحية والمسائية فهي الحامية باذن المولى عز وجل سلام اختي ومتنسايش الدعاء وانت ساجدة

 

[־●ـ‗غمــــوض ــالــورد_ـ●־]

اهلا بيــــــــــــــك اختي ساريــــــــــ،،،ــــــــتا،،
عندك بروبلام كبير علبالك ههههههههه متخافيش برك نقصر معاك ،،
شوفي حنونــــــة هاد لمشكلة راكي انت لي درتيها لروحك بلا ماتحسي بيها،،
حتى حكمت فيك اوليتي تعيشي بيها ديما،، والسبب الرئيسي لي يخالي لواحد متقلب المزاج
هو انك تسمعي لروحك بزاااف وتخلي بالك يفكر ويتعمق في سيجيات مكنهمش،،
يعني نقصد انك تفكري في حوايج بلا فايدة وبلا سبة،، يعني حاجة تافهة اديريها في بالك وتقعد تخمي واديريلها حسابات وهي معندها حتى هدف ومعنى والتفكير هداك بزاف يخليك تحسي بالقلقلة بلا ماتفيقي وتم تم يتبدل مزاجك واكيد راح تبدلي معاه رأيك ومتكونيش متحكمة فلاشوز لي تبغيها، يعني ملزمك تبقاي تفكري في حوايج مايفيدوكش كيما قلتي تحبي تقعدي مع صحاباتك ومن بعد تبدلي رايك وتروحي وحدك ولا تقعدي وتجيك فكرة تسيبريمي ليزامي،، هدي معندها حتى معنى انت لي تبقاي اديري في بالك انك تبغي لعزلة تقعدي وحدك ومبعد تقولي لا خلي نكون معاهم وتبقى هاد ليدي في راسك واكيد لكونسونتراسيون تاعك تروح وافكارك يتشوشوا ومن لقلقة متعرفيش وش اديري تولي تمشي فالزهر،، والخوف تاني والاكتئاب راهم يديروا هاد لحالة لي تجيك يعني كي نقلك تخافي من حاجة يعني تكوني في حالة توتر ومتقدريش تواجي هديك لاشوز ،، لاسولسيون لي لازمك اديريها باش تولي نورمال هي انك تقعدي وحدك وتحكي مع روحك لازم عليك اديري نفسك صحبتك انديري راه كاين واحد معاك مي راكي تحكي مع نفسك ، لازم عليك تسقسي روحك على الافكار هدي لي تجيك ، وتسقسي روحك علاش راكي تتبدلي كيما هك ، اواش هوما ليشوز لي يقلقوك كي اديريهم ولا كي تشوفيهم،وتسقسي روحك وش هوما ليشوز لي بغيتيهم ومقدرتيش اديريهم و و و وجاوبي روحك ومبعد حطي في بالك انك باغية تبدلي الامور هدوما وحطي روحك انك عندك عزيمة قاوية وارادة كبيرة بش تواجهي كلش لازم عليك تعودي تحبي روحك وديري كونفيونص في روحك ،، ولحاجة لمهمة لي راح تخليك تتبدلي هي انك تحطي في بالك بلي كان تبقاي كيما هك مكيش راح توصلي للهدف لي تبغيه وبالتصرف هدا تاع حطي بلي راك راح تنصدمي من الناس لي راكي تصادفيهم وراح يسيئوا ليك بحاجة مقصدتيهاش وراح يقيسوك ويجرحوك وسيرتوا كي تكون نيتك صافية راكي بالطريقة هدي توجعي روحك باسكوا انت كي تكوني نورمال ومتعرفيش تتحكمي في روحك ومشاعرك ومتعرفيش وش راكي باغية بعد راكي اكيد راح اديري تصرفات بلا معلبالك والناس لي حداك راح تشوفك بنظرة غريبة وتحكم عليك بحوايج مقصدتيهمش وسيرتوا دركا كاين شي ناس يتساببوا غير يشوفوك تبدلتي شوي وبلا مايعرفوا السبة يشعلوا فيك ويهينوك و و و يديروا حوايج اكيد راح تتأتري بيهم وهاد ليشوز بعد يبقاو في بالك وتولي لنفس لمشكل وتعودي تفكري فيهم وتقولي نبعد على الناس خير ونبقى وحدي وتزيدي تكبري لبروبلام تاعك اكتر...انا ننصحك تحاولي زيماه تتبدلي باش تقدري تعيشي مرتاحة والله لوقت هدا ميرحمش يبغي لواحد عندوا كونفيونص في روحوا ويعرف يتحكم في روحوا ولازم يواجه كلش متخليش ليشوز لي دايرين بيك يسيطروا عليك ن لازم انت لي تعودي تسيطري على كلش ، لازم تقولي نبغي هاد لحاجة نبغيها منبغيهاش منبغيهاش اديري لي حاجة لي تريحك انت قبل متريح واحد خلاف هكداك تعودي تحسي بلي عند كونفيونص فروحك وديري لحاجة لي تبغيها...اوكي حنونة ايا كوراج كوراج ههههههه علبالي بلي راح اديريها باسكوا كي جيتي وكتبي على مشاعرك اواش عندك راها عندك ارادة وعزيمة وقلبك ونيتك صافيين وتقدري اديري كلش تبغيه باسكوا واحد كي يحاول يدير اي حاجة راه عندوا كوراج ... وننصحك تاني بحاجة متخليش لفراغ يسيطر عليك عودي ديما لازمك تكوني متاصلة بناس تتواصلي معاهم وحتى انت كي تتواصلي معاهم مدي رايك ونظرتك ولاشوز لي تعرفيها حاولي اديرها هكداك تولي عندك اينارجي بلي راكي تقدري اديري كلش وتحسي انك مرتاحة بلاشوز لي درتيها وايدا حسيتي بتوتر ولا قلقة ولا حسيتي بلي راكي تعبانة وحازنة روحي روبوزي ومتعبيش روحك ولا فرغي قلبك ابكي ولا عيطي ليسونسال ديري حاجة تخرجلك وش كاين داخلك متخبيش في قلبك خلاه....وانشاءالله بربي تزول عليك لحالة هدي وتعودي تعرفي زيماه تتصرفي وتتعاملي مع روحك ومع مشاعرك...وادخلي للمة راها مليحة تنحيلك على بالك ههههههه باسكوا ديفوا كي تدخلي وتقراي مواضيع على وحايد وتعرفي بلي كاين تاني شي ناس عندهم حالات اكتر من حالتك وتاني ايدا حتى انت درتي دي باساج ليهم وعاونتيهم راح تحسي بالراحة كيما راها صايرتلي دركا هههههههههههههههه
ومتقلقيش روحك حنونـــــــــــــة خلاه محنة خفيفة وتزول وبربي تولي مليحة
​

 

[سجل أنا جزائري]

انت تعاني ما تقدريش تأخذي القرارات و هذا راح يأثر فيك مبعد

سارتو في امر زواج كيفاش راح ديري :s

 

[مايا الجزائرية]

سلام
شخصيتك متناقضة بزاااف
انا عندي تناقض تقريبا كيفك بس نتغلب عليه
كي شغل عندك صراع بين النفس اللوامة والنفس الامارة بالسوء
وانت لازم تقدري على النفس الامارة بالسوء وتخيري الحاجة لي في صالحك
ان شاء الله تفمي واش قتلك
تهلاي في روحك اختي

 

[Sariita]

السلام عليكم

أولا أريد أن أشكر الجميع لي عاونوني و اقترحوا عليا و فهموني ..

معتز اللمة : و الله يا أخي استفدت من كلامك بزاااف و خاصة كي حللتلي شخصيتي و الله كلش صح غير القهوة أنا ما نشربهاش هههههه و كيما قلت الأمر راهو بيدي و بالأول باذن ربي سبحانو بارك الله فيك ..

salsabil4ever : ماكاش مشكل ختي برك حبيت نفهمك و ان شاء الله راح نسيي نتكالما و ما نتسرعش هههه مالgري سييت شحال من مرة ههههه ان شاء الله المرات هادو نحكم فروحي سلام ..

mr. brahim : لا شكر على واجب أخي و أنا قلت بلي ماشي نحبس الصلاة أبدا بصح مرات نصلي بخشوع و نزيد نوافل ووو و مرات لالا نصلي برك باش كيما يقولو نقوم بالفرض لي عليا .. و كيما قلت صح مرات نسيي نرضي الناس بصح منا و رايح ان شاء الله رح نكون أنا و الله استفدت من عندكم بزاف...

ذات القبعة البيضاء : شكراا للمشاركة ختي هههههه وي شخصية كيما هادي مفقودة لازم نفتخر بيها كيما قلتي ههه

الخاشية ربها : ان شاء الله ختي رح نحاول نحافظ كل يوم على الأذكار ربي يوفقك و يسهلك نتي تاني ..

amani Nokati : و الله يا ختي غير عندك الحق أنا صح دايرة هاكا ههههه و سييت ريحت و حبيت نفهم روحي بصح يجوز شويا وقت ننسا واش كمن نهدر و نتفاهم مع روحي ههه ناقصة ذاكرة و تركيز واقيل هههههه بصح لازم كل مرة نحاول و بربي ان شاء الله نجيب نتيجة و كيما قلتي نتبدل على الناس خطرة كنت مع صاحبتي وراتلي واحد الروبة قلتلها ماشي شابة و على سمانة زدنا جزنا قلتلها شوفي هاد الروبة شحال شابة ههههههه ما فهمت فيها والو و والله أنا متقلبة حتى فالأذواق لازم نسكت قدام ناس خيرلي ههههههه المهم يعطيك الصحة على التحليل و النصائح أختي سلام .

سجل أنا جزائري : وي ما نقدرش نتخد قرارات بسهولة هه ان شاء الله منا لوقت الزواج نكون تبدلت :p

مايا الجزائرية : ان شاء الله ختي نولي كيما تني و نتغلب على نفسي الأمارة بالسوء بارك الله فيك ..

شكراا للجميع ..

 

[benabid sifeddin]

مشكلة تاعك كيما تاعي مي هادي مشي مشكلة
نورمالمو تفتاخري بروحك على خاطر راكي مشي كي ga3 الناس
عندك عقلية مختلفة عليهم .
ختي انا نعطيلك نصيحة شابة :
اللي عجبك اقعدي معاه واللي ماعجبكش ماتحوسيش تعرفيه
​