المرا الخدامة متعوبة

[nanoche]

واش راكم يا حبابي و حباب قلبي ان شاء الله تكونو كلكم بخيييير

حبيت اليوم نحكي في واحد الظاهرة اللي تعاني منها خصوصا المرا العاملة
المرا تنوض في الصباح بكري توجد القهوة للأولاد و الزوج ديالها و تبدى من الواحد للواحد ايا نوض راهو الوقت تروح و ترجع حتى ينوضو

تقهويهم و تلبسلهم و تبدا تتسابق مع الوقت اذا كانت تدخل على الثمانية
ينوض الراجل تحطلو القهوة ديالو و يخزر في الطابلة يشوف باش يشربها اذا بحاجة سخونة حضرتها المرا مع الصباح أو اي نوع من الحلوى و ما يعجبوش الحال اذا لقاها بلاش او بالقاطو ديال البوايط ههههههه (بيمو)

هو ينوض يروح يلبس و هي تروح للطابلة باش تخملها و اذا كان الشغل قريب يروح و يخليها و اذا كان بعيد يخرج للسيارة و يهرج الناس بالكلاكسون باش تهبط و لما توصل لعندو يغسللها وذنيها بكاش كلمة

يروحو للعمل و العشية كي تخرج المرا من الشغل تشري واش يخصها و ترجع للدار هاذا اذا وصلها قدام الدار و راح راهو اعمل مزية هههههه
و اذا ما نفحتلوش يقوللها روحي في الطرونسبور عندي شغل (يروح يقعد في القهوة هذا هو الشغل)

هي ترجع للدار تدخل للكوزينة ديغاكت تغسل واش خلات في الصباح

و يا ربي اذا عملت كاس قهوة باش تفتح عينيها من التعب واكيد تشربو و هي واقفة تبدا تحضر في العشا حتى يجيو الاولاد من المسيد اللي تغسلو و اللي تلبسلو و اللي تحطلو الحليب و مبعد هوما يروحو يراجعو او يتفرجو او يخرجو يلعبو و هي راهي يد في الكوزينة و يد في التسياق و يد ترتيب الغرف بعد ما دخلو الاولاد و غيرو ملابسهم....الخ
في العشية يدخل الراجل يكون قريب العشا و يكون ديجا استقهوا

يبدل حوايجو و يحكم التيليكوموند و يبدا يزاpي

أو يروح يكوناكتي ويحط عند الباب سونس انتاغدي

ههههه
كي يوجد العشا تبدا المرا تاني تعيط بالواحد باش تعشيهم و ترجع للكوزينة تغسل المواعين و ترتب و تسيق الكوزينة باش في الغد تلقاها مرتبة و ماتجي تخلص تكون هي قريب تخلاص المسكينة وكي تحط راسها على المخدة تروح الروح

و اذا قالت راني عيانة يقوللها الراجل علاااش واش درتي؟؟؟
شفتو المرا قداه تتعب يا رجال ايمالا قدروها شوية و علاش ما تتعاونوش و تقسمو الشغل بيناتكم ولا الراجل يقسم مع المرا غير الشهرية
اليكم الخط وقولولي واش رايكم ؟؟؟ و يا رجال ما تقولوليش المرا بلاصتها في الدار لأنو حتى اللي قاعدة في الدار هي تاني تتعب ولا واش قلتو

​

 

[حفيد هواري بومدين]

تسما هادي عايلة هايلة يا ننوش مدام الراجل يكونكتي والقهاوي والمرى تخدم في دار برك
:-r

 

[nanoche]

تسما هادي عايلة هايلة يا ننوش مدام الراجل يكونكتي والقهاوي والمرى تخدم في دار برك
:-r

لالا هو يخدم مي كي يرجع يروح للقهوة و يسميها شغل ههههههههه و يرمي المسؤوليه كلها على المرا رغم انهم بين زوج خدامين و اذا اشتكات يقوللها واش راكي اديري
شكرا لاعتماد الموضوع
​

 

[ماكانش]

حنا يما فالدار ومالحقتش مسكينة
وأنا نحير فلي يقلك خدامة وقايمة بدارها
​

 

[nanoche]

حنا يما فالدار ومالحقتش مسكينة
وأنا نحير فلي يقلك خدامة وقايمة بدارها
​

مرحبا بيك خويا
شغل الدار بزاف صعيب و يتعب مي الراجل غالبا ما يحسنش العون و تلقى المرا اللي تخدمها في الصباح تعاودها في العشية و تلقى الشغل ما يكملش خلاص
​

 

[SOFIANE020]

سبحان الله مغير الاحوال

 

[serinee]

اهلا بك
و الله ربي يكون في عونها
المسؤولية ماهيش ساهلة خصوصا ادا كانت ملقات عل جبهة واحدة
تصيب المراة تعمل برا البيت و داخلو وعلاش مايعونهاش وعلاش ادا عاونها واش رايح يصرالو
المراة سواء القاعدة بالبيت او العاملة تتعب بززاف ربي يكون في عونها ان شاء الله
مشكورة اختي على الموضوع
​

 

[nanoche]

اهلا بك
و الله ربي يكون في عونها
المسؤولية ماهيش ساهلة خصوصا ادا كانت ملقات عل جبهة واحدة
تصيب المراة تعمل برا البيت و داخلو وعلاش مايعونهاش وعلاش ادا عاونها واش رايح يصرالو
المراة سواء القاعدة بالبيت او العاملة تتعب بززاف ربي يكون في عونها ان شاء الله
مشكورة اختي على الموضوع
​

هاذاك اللي حبيت نوصل ليه انهم يتقاسمو المسؤوليه في الدار كيما هي تخدم و تعاونو
والمفاهمة بيناتهم هي الصح
نورتي حبيبتي شكرا على المرور
​

 

[Eva dz]

يعطيك الصحة اختي على الطرح الجميل

و ربي يحسن عوانهم اللي الله غالب عليهم

مي اسمحيلي اختي كاين لي هيا تحط نفسها فهاد الموقف كاين لي راجلها خدام و لاباس بيه يعني ماراح ينقصها والو و يقوللها ايلا تقعدي فدار عايشة بيان و تقولو لالا انا نخدم يعني تخدم باه تخدم ماشي على نقص مادي

و انا هنا مانيش نقول الراجل ما يعاونش مرتو مي كاين لي يقول لمرتو انا نصرف عليك وووو و عليك تكوني ربة بيت و لكن كاين لي هكدا الراجل تولي فيه غي زعفة كي مرتو تعارضو و يخليها تخدم يحط عليها المسؤولية كاملة و ما يتفهمش


و في الاخير يا اختي هادو عقليات صعيب واحد يفهم عقول جميع البشر و ربي يعين كل سيدة سواءا داخل او خارج البيت خاطش الكل يتعب و ماهيش ساهلة المسؤولية

و السلام عليكم


"""" و عذرا على الازعاج مي حبيت نعطي رايي انا تاني ،،،،، :d شكراااا على حسن الضيافة

 

[قناص الغرام]

شكرا اختي على هذا الطرح المتميز و السرد الجميل
بصح انا من وجهة نضري مادام راجلها خدام و عندو كروسة يعني لاباس بيه
مالا هي علاه تخدم هي حبت كيما هك
و اذا كان الراجل قادر على تحمل مصاريف بيته لوحده نورمال علاه راهي تخدم هي
​

 

[nanoche]

يعطيك الصحة اختي على الطرح الجميل

و ربي يحسن عوانهم اللي الله غالب عليهم

مي اسمحيلي اختي كاين لي هيا تحط نفسها فهاد الموقف كاين لي راجلها خدام و لاباس بيه يعني ماراح ينقصها والو و يقوللها ايلا تقعدي فدار عايشة بيان و تقولو لالا انا نخدم يعني تخدم باه تخدم ماشي على نقص مادي

و انا هنا مانيش نقول الراجل ما يعاونش مرتو مي كاين لي يقول لمرتو انا نصرف عليك وووو و عليك تكوني ربة بيت و لكن كاين لي هكدا الراجل تولي فيه غي زعفة كي مرتو تعارضو و يخليها تخدم يحط عليها المسؤولية كاملة و ما يتفهمش


و في الاخير يا اختي هادو عقليات صعيب واحد يفهم عقول جميع البشر و ربي يعين كل سيدة سواءا داخل او خارج البيت خاطش الكل يتعب و ماهيش ساهلة المسؤولية

و السلام عليكم


"""" و عذرا على الازعاج مي حبيت نعطي رايي انا تاني ،،،،، :d شكراااا على حسن الضيافة

منورة يا بريق العيون وراكي تعرفي الضيف ما يتشرطش ومول الدار ما يفرطش
هههههههه انا قلت لوكان قعدتي تتعشاي
شكراحبيبتي على المرور مي في هاذ الوقت عمل المرأة أصبح ضرورة وما تعرفي الدنيا كيفاش بين ساعة واخرى تدور
​

 

[nanoche]

شكرا اختي على هذا الطرح المتميز و السرد الجميل
بصح انا من وجهة نضري مادام راجلها خدام و عندو كروسة يعني لاباس بيه
مالا هي علاه تخدم هي حبت كيما هك
و اذا كان الراجل قادر على تحمل مصاريف بيته لوحده نورمال علاه راهي تخدم هي
​

مرحبا بيك يا قناص
واذا كانت عندو السيارة ماشي معناتها كاينلو و بالاك تعاونو مع بعض و شراوها او حتى جابها فاسيليتي ههههههه
لما يكونو بين زوج يخدمو اكيد يتعاونوعلى هم الزمان خصوصا في وقتنا الحالي و اذا طاحت بواحد التاني يرفدو
شكرا اخي على المرور
​

 

[afkaar]

يا ختي أنا مانيش كونطر لمرا لي تخدم و تكون متزوجة ,,,,,,خصوصا لاكان راهي تخدم باه متبقاش فريسة للزمان الخداع ,,,,,,,إذا مثلا راجلها خانها ,,,,,أو طلقها,,,,, أو غير ذلك ,,,,,,,,بصح الحاجة لي تحيرلي فيها هي و علاش تكتر لولاد؟
علاش تروح تولد ربعة و خمسة و من بعد تجي تقول كلش طايح على راصي ؟
حبيت نقلك بلي دبرتها لاكان في آخر اليوم ترقد رقدة كيما هادي هههههههههههههههههههههههههههههه (وكي تحط راسها على المخدة تروح الروح)
هادي رقدة الأمراء و السلاطين يحطو راصهم على لمخدة و خلي الدنيا تاكل بعضاها​

​

 

[nina usma]

باختصار المرا العاملة تستحق التقدير

:regards01:​

 

[هبة الرحمان2]

مارسي بوكو حنونة سيجي فور

 

[SETIF étudiant]

يعطيك الصحة نانوش والله يكون في عونك وموضوعك مليح وعليه نرد :d
الرجل يعاون زوجتو في بعض امور البيت علاش لا وذلك اقتداء بالنبي صلى الله عليه سلم (سنة حسنة) حيث كان يخدم اهله ونفسه يخصف نعله ويخيط ثوبه.... انا فرونشمون يما وختي الصغيرة على شغل الدار وما لحقوش تلقايهم بار فوا يدومونديو منا الرونفور :d

مي انا نقلك أمون افي شغل الرجل نخلوه للرجل خير ... وشغل المراة للمراة احسن (الزوجة راعية في بيت زوجها و ولده و هي مسؤولة عنهم و والله لا اجرها وخيرها اكبر واكبر في امومتها وفي تربية جيلها الصالح).... اما الحياة فراهي متكاملة بيناتهم المراة تقول للرجل ما عليك غير تحضرلي برك وخاطيك الشغل :d

 

[أم أمين23]

كيما جا في رد بعض الاخوة الا المرا ممكن راجلها اوفرها الامكانيات وماكانش حاجة لشغلها علاش عليها هاد التعب وحجة انو الخدمة حماية للزمان ما عندها حتى معنى قادرة تبقى تخدم وهي متزوجة ويكتبلها ربي وتصرى حاجة وما تكونش خدامة يعني الله ما يضيع عبادو وفي ميزي المرا الي تخون راجلها وتقول نخدم مايدريش العبد واش يكون غدوة راهي تكون عايشة في ستراس اكثر يعني بين الخدمة والدار وزيد قلة الامان
اسمحيلي الا خرجت على مساق الموضوع بصح جات وجات على السيرة
مشكورة على الطرج طيعا

 

[souhila_95]

والله غير يحسن العون

 

[־●ـ‗غمــــوض ــالــورد_ـ●־]

اهليــــــــــــــــــــــن بيـــــــــــــــــك حبيبتي نانــــــــ،،،ـــــــــو نتمنى تكوني مليحة،،
- ايه عندك لحق حنونـــــــــــــــة لمرا مسكينة كلش يجي في راسها ،،
وكي ادير غلطة صغيرة تولي مهيش مليحة وتتعاير،،
ولمرا لخدامة احنا منهدروش عليها راها في cas spéciale،،
وش تشوف لمغبونة من التعاب والستراس لي يحكمها،،
كي تكون فالدار راها تفكر فالخدمة وكي ترجع للخدمة كابوس الدار تلقايه ملاحقها ،،
تبقى غير تخمم لمسكينة مخها يتشلفط من التخمام والتعب ههههههههه،،
لافيريتي الدنيا هدي صعيبة بزاف تخدم لمرا ورجلها اولادها ويربي يلحقوا ههههه
يعني الدنيا دوارة واحد جامي قال عندي مشها راح ادور بيا كيما شي رجال قالوا لنساهم متخدموش وبطلوهم ملخدمة ومبعد جات وقت الشدة وخصوا ، انا منيش ضد لمرا لي تخدم ايدا لقات روحها مع الدار ولخدمة نورمال وعلاش متخدمش ،،ولايزعف منها رجلها كي تخدم ،، نورمالموا يتعاونوا في كلش فلمليحة ولقبيحة سيرتوا فالوقت هدا صعيب بزاف،، مي ايدا كانت لمرا ملحقتش على شغل الدار وكتروا عليها ليشوز مش اوبليجي عليها تخدم تبقى لاتية بدارها اولى من كلش ،، باسكوا انا راني مع لمرا لخدامة وضدها في نفس الوقت ،، يعني انا ضد هدومكا لي يحوسوا غير يخدموا على جال لخرجة وكي تروحي لدارها تلقايها كارتة متحوس عليها متحوس على رجلها متحوس على ولاده ومبعد يصراولها دي بروبلام كبار وعلاه كيما هك نهني روحي فالدار ولا ايدا بغيت لخدمة ومنيش قادرة على مسؤولية الدار وراجلي وولادي غير نهني روحي منتزوجش نبقى مع لخدمة ونحكم فرد حاجة نربح فيها وخلاه علاه التعاب هدا كامل ونضيع حياة ناس معايا...
مي ايدا كانت قادرة على كلش وعلاش لا يريحوا بعضاهم هي تعاونوا في مصروف الدار وهو يعاونها في شغل لبيت يعني مقلناش يدير كلش مي مهما كان ميضغطش عليها هدي اقل حاجة يديرها ،، وكاين حوايج خفاف يقدر يعاون بيهم مرتوا كي يكون فارغ شغل يعني مقلناش يخلي خدمتوا ويعاونها هدا ميصلحش كل حاجة وبلاصتها نحكي كي يكون يتفرج ولا يروح يدور لبرا بلا فايدة وهو معندوا حتى خدمة ،، والله مليحة كي راجل ومرتوا يتعانوا في كلش مكانش كيفها هوما بعد يزيدوا يحبوا بعضاهم ويعتامدوا على بعضاهم وهكداك حاجة متخصهم اكيد راح يتهناو من كل النواحي ،، مي كاين شي رجال ربي يهديهم قالك منعاونش مرتي خدمة النساء للنساء وعلاه ياك واحد مايطل عليك ويعايرك كي تعاون مرتك هدي حاجة نورمال ،، وش تحبي كل واحد وعقليتوا وكل واحد وش عطالوا ربي هدي هي الدنيا رانا غير نهدروا كي ميبغيش ربي يعطيك حاجة ميعطيهلكش ..وش نقولوا ربي يهدينا ويفرج ويسهل علينا برك ..
-- ومشكورة حنونتي على الموضوع الباهي واسمحيلي ايدا طولت عليك--



​

 

[nanoche]

يا ختي أنا مانيش كونطر لمرا لي تخدم و تكون متزوجة ,,,,,,خصوصا لاكان راهي تخدم باه متبقاش فريسة للزمان الخداع ,,,,,,,إذا مثلا راجلها خانها ,,,,,أو طلقها,,,,, أو غير ذلك ,,,,,,,,بصح الحاجة لي تحيرلي فيها هي و علاش تكتر لولاد؟
علاش تروح تولد ربعة و خمسة و من بعد تجي تقول كلش طايح على راصي ؟
حبيت نقلك بلي دبرتها لاكان في آخر اليوم ترقد رقدة كيما هادي هههههههههههههههههههههههههههههه (وكي تحط راسها على المخدة تروح الروح)
هادي رقدة الأمراء و السلاطين يحطو راصهم على لمخدة و خلي الدنيا تاكل بعضاها​

​

شكرا أختي على المرور
مي هاذي هي الحقيقة الزمان غدار و ما ينفع غير الصح المرا تنفعها خدمتها و خصوصا أنها يجي نهار وين تتعب تلقى منحة التقاعد ديالها و بخصوص الأطفال هههههههه والله ما نخالفكش الرأي صحيح انو المال و البنون زينة الحياة الدنيا مي كان زمان وين المرا تولد عشرة و تلقايها شادة اليوم كي تلحق لثلاثة تروح صحتها و تلقاي اسنانها بداو يطيحو
و الرقدة هاذيك ديال التعب و الارهاق اللي لحقتلو و ما تنسايش بليك من هنا تبدا المشاكل الزوجية
​