ادخلو تتعجبوا وتعاونوني نكبر قلبي

[سمية25]

السلام عليكم ورحمة الله وبركاته
قلبي راه معمر وراه باغي يطرطق
ماعنديش ليمن نفضفض ونخرج اللي في قلبي غير ليكم لانني عندي ثقة كبيرة فيكم بلي رايحين توقفوا معايا ولو بكلمة حلوة
حبيت نسقسيكم علاش الناس يفرحولك برك كي تصرالك حاجة ماهيش مليحة
عندي وحد لافامي الله يحفظ ويستر منهم برك كي تخطبت المرة الاولى زعفو مني وماجاو باركولي لاوالو ونهار الخطبة وصلو هوما التوالا مالقري يسكنو لاصقين فينا ومن ذاك اليوم ماشفتش ضحكتهم وجامي سقساوني على جهازي وووووو
المهم كي انفصلت على خطيبي الاول رجعو نورمال معايا يضحكو ويقصرو وقالولي درك خلاص راكي كيما حنا ههههه والله تخير فيهم تاع الصح
ايا انا ماطولتش قاع قعدت شهر ونص واتخطبت مرة ثانية والحمد لله والله ماتتصوروش ردة فعلهم كي سمعو بيا حتى امهم اللي هي عمتي ماولاتش تشوف ليا وكي نروح عندهم تخرج وماتخلينيش نسلم عليها :-o
ايييييييه وكبرت قلبي وقلت كبيرة ومانزعفش وانا رايحة رايحة من هنا وهوما اللي خاسرين ماشي انا
ودرك كي قلت شكون اللي يروح معايا في عرسي لقالمة قالولي قاع لالا مانروحوش ننضروا زعمااااااا وقلت لعمتي نتي نخلصلك طيارة نديك فيها قالتلي في وجهي لالا يالوكان ديري واش ديري
انصدمت من جوابها وحتى بناتها مكاش اللي نطقت وقالت كلمة مي كنتها والله غير حشمت من هذا الجاست اللي داروهلي وقالتلي انا ماننضرش واديني معاك نورمال قلتلها نديك ومافيها والو
ودرك عندهم قريب 20 يوم ماجاوش عندنا وماهدروش معايا هذا كله كي سمعو بتاريخ العرس وقيلة حسبو كيما الاول ننخطب ونبطل ..................
انا نقول ربي يهديهم وعلاش انا اللي راني محبستلهم مكتوبهم ولا زواجهم ياك حتى انا ماكنتش نعرف هذا الراجل وحتى اذا نعرفو ياك ماجاش ليهم واديتيلهم
حننح قولولي كيفاش ندييير
والله غير هنا اللي صايبة روحي مليحة وراني تعرفت على بزاف ناس ساندوني في وقتي الصعيب اللي جوزتو من قبل وهاتفوني واطمئنو عليا بالهاتف
نشكر كل من يعرفني وحاجة وحدة غايضتني هي انني بعد الزواج ماعنديش نت صافي رايحة نبعد عليكم يا ناس الخير وراني كي نجي لدارنا ضيفة راني ندخل ونسقسي عليكم ونقوللكم على اخباري
ميرسي يا حوجي انا راني درك وين ريحت كي خرجت اللي في قلبي
ربي يخليكم ليا ان شاء الله​

 

[sahiko hamza]

تصرى الغيرة نورمال
اخطيك برك من السحر والعياذ بالله
جات في تشنيفة وماتجيش في حاجة اكبر منها
باينة هاذي
انتي درتي لي عليك والباقي على ربي سبحانوا ..

ربي يصلحلك الحال .
​

 

[سمية25]

ميرسي اخي على كرم الرد وتعطيرك صفحتي بكلماتك الجميلة
شكراااااااااااااااااااااااا

 

[hadil2044]

كي انفصلت على خطيبي الاول رجعو نورمال معايا
حطي عشرين خط هنا هوما غايرين منك يا لطيف يا ربي استرنا

اختي مدامك انتي قلبك صافي ودايرة الخير وهادي فاملتك وكلنا نحبو فامليتنا
ننصحك تبقاي معاهم بالحسنى وهوما الله يسهللهم بويسك درك تتزوجي وتبعدي عليهم مام تكوني درتي الخير وما يهمكش فيهم وتبقى صورة مليحة عند الناس كامل ما ديرش كيما هوما
وما تخافيش ربي يسلك

بعد الزواج ماعنديش نت صافي رايحة نبعد عليكم يا ناس الخير
ماراحش تبعدي علينا اللي في القلب في القلب
المهم انتي تكوني مهنية وربي يسعدك مع راجلك هاديك الفايدة وما تعمريش راسك بيهم حنونة

اختك هديل
ربي يفرحك حبيبتي
​

 

[Sariita]

السلام أختي .. هادي راهي غيرة باينة الله يستر و يحفظ يا ختي الحاجة الأولى لي نقلك هي قلبك راهو كبير بزاف الله يبارك معليش كيما يقولك ليس من الحكمة أن أعض كلبا عضني .. أبقاي توجور مليحة قد ما قدرتي و ما تقاطعيهمش لوجه الله .. و نوصيك تقراي الأذكار و خاصة المعوذتين صباح و عشية 3 مرات باش ان شاء الله ما تتقاسيش بالعين .. الله يوفقك أختي واش تحبي نقولك الصبر ثم الصبر سلااام ..

 

[رحاب ملاك]

اسمعي خيتو انت ما تحوسيش عليهم

حتى واذا كانو لافامي نتاعك خاطرش نتي درتي اللي عليك وهوما مقسحين راسهم

وعامليهم كيما يعاملوك باش يحسو بيك من بعد

ويقول المثل
اللي جافاني جافيته واللي باعني ما شريته
توكلي على ربي وبالبركة عليك وعقبة للذرية الصالحة

 

[ام الحلوين]

ربي يهنيك اختي و عادي ماشي نتي الاولى دايما بنات العم و العمات يغيرو عكس الخالات،
و نتي علاه راكي حابة تديهم معاك ياختي ادا مادارولك والو يعينوك و العين كاينة منها ، شوفي اختي ماتعايبيهمش بسكو كلشي يفوت غير العيب لي يبقى ، روحي نتي و ميمتك و خواتاتك ادا عندك و هدا ماكان .

 

[־●ـ‗غمــــوض ــالــورد_ـ●־]

اهلا بيــــــــــك اختي سوســــــو نتمنى تكوني مليحة،،
شوفي نقلك حنونة متقلقي روحك ماوالوا بزاف لي راه صيرلهم هاد لبروبلام،،
وانا وحدة من الناس هدوما تعرفي عماتي كان لقاو يقتلوني ومشني عارفة للدركا علاه
تالموا والله راني مليحة معاهم وغير انا في الدار لي نروح نطل عليهم ونفاقدهم ونسقسي عليهم
مي الله غالب دمك هو همك كيما يقولوا ،، الور متخليهاش في قلبك حنونتي راني عارفة بلي صح تشوكي هاد لجاست كي تجيك من واحد قريب ليك مي انت مادام قلبك راه صافي ماديري والوا في بالك ليسونسيال انت يبقى بالك مهني وضميرك مرتاح ،، انت خليهم متقيسيهمش وكيما قلتي راكي رايحة رايحة لدارك وراح يبقى غير لعيب وديري في بالك واحد كي يكون يكرهك ويغير منك وتبقاي ديما تضحكيلوا في وجهوا وتعامليه مليح راكي راه تقتليه والله تخلي قلبوا يحرق لداخل ميلقاش وش يدير وتبقاي ديما في بالوا ،،واكيد راح تبقى انت صورتك مليحة فلافامي كامل متخليش وحدة ملفامي تفسد عليك كلش ،، وتبقى هدي شخصيتك وهوما شخصيتهم وحدها مش ايدا هوما عاملوك بالقباحة مام انت اديريها فقلبك وتتبدلي وتولي كيفهم لا،، لازم عليك تتمسكي بصفاتك ليك وحدك لازم ديما انت تبقاي مليحة وتخلي قلبك صافي ولي نيتوا صافية راهوا هو لي يربح ديما ويعطيه ربي على قلبوا ،، هدا راه مجرد امتحان خفيف ليك برك باش يشوفك ربي اسكوا راكي صابرة ولا لا وانا نشوف فيها مشها حاجة كبيرة لي تخليك تتقلقي هكا باسكوا راها باينة بلي غيرة راهم يغيروا يغيروا ومباعد يفيقوا بلي هوما لغالطين ،، الور نحيهم من بالك خلاه حنونة وفكري في حياتك الي خلاك خليه ولي قاسك وكلي عليه ربي ومتقيسيهش راح تجيبي حقك منوا،، ودوركا راه قريب فرحك انشاءالله تتهناي وربي يكملك هداك هو الرسمي متقلقيش روحك برك وتخبي فقلبك ،، ومراكيش راح تبعدي علينا حنونة كيما قلتي راكي ديما معانا وفي قلبنا وانشاءالله متغيبيش علينا ونسمعوا اخبارك ونفرحوا بفرحك انشاءالله يالحبيبة تهلاي فروحك حنونة سلاااااااام..
​

 

[la_safa]

السلآم عليكم و رحمة الله و بركآته ،

اختي أولآ ربي يكملكـ على خير ان شآء الله ،
+ احمدي ربي لي جآتكـ هكآ و مآجآتكش من عبآد عآيشين معآكـ في دآر وحدة
ديمآ ديمآ الوآحد يقول هكذآ ولآ أكثر .. انت مآ تديريش عليهم ..
خممي في عرسكـ قريب و تروحي و تزوجي .. دونكـ كبري قلبكـ و عقلكـ ..
و مآتخليش حوآيج هكآ تعكرلكـ مزآجكـ و تفسد عليكـ أهم حآجة في حيآتكـ
لي هي عرسكـ ..
كيمآ يقلكـ ابعد على الشر و غنيلو ..
و دومآ ادعي ربي يكملكـ على خير + وكلي ربي و مآتخمي في وآلو ..

ربي يهنيكـ اختي سمية .. ~
​

 

[السلطانة]

وعليكم السلام

بعد شهور قليلة وسمية تعود قالمية
:-r
متقلقيش روحك بيهم
انتي درتي لي عليك وهوما ربي يسهل عليهم
المهم ماجاتش منك جات منهم
الغيرة قتلتهم
انتي درك تبداي حياة جديدة
وقليل وين راح تشوفيهم هادو لافامي
دونك طيشي عليك
لي جا مرحبا لي ماجاش مرحبتين

​

 

[فتاة حساسة]

اييييييييييييييييييه ياختيوة ا خطيك منهم باينة الحكاية كيفاه ..غارو منك كي تخطبتي ......هادي هيا ..اكي قريب تتزوجي ووتهناي ..ربي يهنيك
​

 

[ابن سينا]

السلام عليكم ورحمة الله وبركاته
قال الله تعالى‏:‏ ‏{‏‏وَمَن يَتَّقِ اللَّهَ يَجْعَل لَّهُ مَخْرَجًا وَيَرْزُقْهُ مِنْ حَيْثُ لَا يَحْتَسِبُ وَمَن يَتَوَكَّلْ عَلَى اللَّهِ فَهُوَ حَسْبُهُ إِنَّ اللَّهَ بَالِغُ أَمْرِهِ قَدْ جَعَلَ اللَّهُ لِكُلِّ شَيْءٍ قَدْرًا‏} ‏[‏‏
قد انعم الله عليك بنصف دينك فاتقي الله في النصف الآخر ولا ترين بحول الله وقوته الا ما يسرك
بارك الله لكما وبارك فيكما وجمعكما على الخير ورزقكما الذرية الصالحة والعيش الهنيء الرغد
الف مبروك​

 

[FATIMA 19]

صح هاذو دي جاست يقلقو
سيرتو كي عادو قراب منك بزااااااف
مي واش اديري
هاذو مايستاهلوش الزعل نتاعك
نتي درتي اللي عليك والله يسهل عليهم
وهاذو الايام اكيد يكون حساسين
يعني قريب يقرب العرس
وماتخليش هذا المشكل يأثر من نفسيتك
ولازم تكوني مستراحة
نتي درتي اللي عليك .
المهم عندك شكون يحبك صح ويعزك وفي هذا الوقت عرفتي
اللي يفرحلك من اللي يحبلك الحزن

وأخيرا نقولك ألف مبروووووووووك.
وان شاء الله عقبال الذرية
اديني برك ضرك نروح معاك وما تزعفيش
مايهونش تزعفي من عباد خسارة فيهم أنك تخمي عليهم.

​

 

[ahlam02]

ماتعمري راسك ماوالو هوما الخاسرين وراهم يضحكوا في الناس عليهم

 

[أم أمين23]

ربي اكلمك بنتي وما يهمش ما جاوش ما جاوش ربي يسهل ما يجيوش خير الا هاد الحقد والغيرة كامل يقعدو في ديارهم خير كاين بزاف فاميلا هكا ربي يهديهم وربي اوقفلك ديما ولاد الحلال غدوة تنساي نهار يتخطبو يرجعو يحبوك ما لا ما تكسري راسك لا والو التي في روحك وعرسك وما تنسايش صلاتك والدعاء والذكر وربي يبعد عليك الحساد ان شاء الله

 

[بنت الجسور المعلقة]

ناس زمان واش يقولو نبات مضلومة ومنبــاتش ضالمة نتي لي راكي تباتي هانية
مديريش في بالك والغيرة تنقط
ربي يكمللك أنساي حكايتهم خلاص كي ديري في بالك راكي تخلقي المرض لروحك بيعد الشر
صح كي تشوف عينك حاجة تقيس وتجرح القلب بسييف باه تبرا
والله لخير ولينا نلقاوه في حباب ربي والبراني كتر على لفامي
موفقة حبيبتي ورانا معاك ومايدوم غير الصح
ربي يزنلك ايامك
​

 

[EL General]

هادي هي الناس كيفاش ولت تفكي يا اختاه

الناس الكل تولي تفكر بالسلبي

وقتنا مايرحمش و عبادو اكثر

الله يسترك
​

 

[سمية25]

شكرا لكم جميعا على كرم المرور ومواساتي ونصحي ولو بكلمة طيبة ان شاء الله يجعلهالكم في ميزان حسناتكم يوم القيامة
مازالني مصدومة منهم والله ماعرفت واش ندير
مرات نقول نروح ليهم بنفسي ومرات عزة نفسي ماتخلينيش باسكو جات من عندهم مشي من عندي
ربي يهديييهم ويهدينا
شكرااااااااااا

 

[ЯǾᵯẫḭṧşẰ]

والله يا انت هكدا معندكش ليمن تحكي وانا وين رحت
حبيبتي الغالية متعمريش راسك بهادوك الغاشي
وكيما قالك العام في 12 شهر الناس تهدر 6 شهور وتسكت 6 شهور
ربي يهديهم
هادوك غاشي حسادين مغيارين وميحبوش الخير لناس متخافيش حنونتي جاية دالتهم
وكيما قالك الدنيا دوارة والبغلة عثارة
انت عيشي حياتك ومطليعيهمش كامل في راسك
سلام حبوبتي
:regards01:

​

 

[بنـ MaPa ـت]

يا اختي هادي غيرة وحسد
الله يهديهم...عندي مرت خويا عماتها هكدا
بورتون متزوجين وبولادهم لاباس بيهم
مي كي يشوفوها مهنية وتلبس مليح
مايعجبهمش الحال يولو يشوفو بيها بوحد الشوفة يا لطيف
واش نقولك يا ختي شدي حدرك منهم
وربي يهنيك

سلآمي
​