اغسل قلبك

[دعوني وربي]

http://img02.**********/uploads/image/2012/10/02/0d364d4261f605.gif




http://img06.**********/uploads/image/2013/04/17/0c37414d60f005.jpg


​

عارفين قصة شق الصدر للنبى صلى الله عليه وسلم النبى صلى الله عليه وسلم اتغسل قلبه مرتين
مره فى الصغر والمره الثانية فى حادثة الإسراء
النبى صلى الله عليه وسلم والحديث فى الصحيحين قال : " بينما أنا فى الحطيم مضطجعا أتاني آتٍ قدم بين هذه إلى هذه
يعنى راح شق صدر النبى صلى الله عليه وسلم
مابين هذه إلى هذه فاستخرج قلبى ثم أوتيت بطُست من ذهب مملوء إيمانًا
عرف منيين صلى الله عليه وسلم ؟؟
أُخبر النبى صلى الله عليه وسلم أن هذا الإناء اللي جاي من ذهب مليان إيمان
قال : فغسل قلبى بماء زمزم "

عايزين نغسل النهاردة القلب
عايزين نغسل القلب ده علشان تتحط فيه المعانى العليا
علشان عايزينه يهتف بقى
عايزينه يحس بقى عايزينه يبقى مستشعر لمعاني الإيمان

أحد الشباب بيقول لي وهو بيصلي في قيام رمضان
بيقول : أنا واقف ورا الشيخ والناس يمين وشمال ومتفاعلين وبيحسوا بالآيات تأتى آيات العذاب تأتي الآيات اللي ترج قلب أى حد
يقول لي: والله أنا بقيت حاسس كأني عايز أجيب مُرزبه ولا حاجه تكسر الحجر اللي على قلبي
قلت : آه إحنا محتاجين فعلا ده
إحنا محتاجين فعلا نغسل القلب من كل شئ يفسده
من كل شئ يحول بينه وبين ربنا سبحانه وتعالى

عارفين النبي صلى الله عليه وسلم كان من دعائه أن يقول " اللهم باعد بيني وبين خطاياى "
ايوه الذنوب الكبيرة والصغيرة اللي اتكلمنا عليها في الحجب دي
يارب باعد بيني وبين خطاياى
يارب ما تفكرني
يارب تتمحي من ذاكرتي
يارب ما يبقاش في قلبي رواسب الجاهلية
يارب مفتكرش الحاجات اللي كنت بشوفها وأنا لسه مش عارف طريقك يارب
يارب أمحي من قلبي كل شئ يغضبك
كل شئ لا يرضيك
يارب عايز أعمل بتعبير أهل الكمبيوتر عايز أعمل فورمات للقلب أشيل خالص الحاجات اللي واقفة بيني وبين ربنا سبحانه وتعالى

" اللهم باعد بينى وبين خطاياى كما باعدت بين المشرق والمغرب "

مفتكرهاش متجيش على بالي متجيش فى خيالي

" اللهم اغسلني "

هو ده بقى محل الشاهد
"اغسلني من خطاياى بالماء والثلج والبرد "

بكل مطهر اغسلني من خطاياى بالماء والثلج والبرد
" اللهم طهرني من خطاياي كما يُطهر الثوب الأبيض من الدنس "

عايزينه كده قلب طاهر أبيض زى ما النبى صلى الله عليه وسلم وصفه إن الحسنه تنزل فيه تنوره
يبقى عامل زى الصفا يبقى عامل زي اللبن فى البياض
فلما القلب يبقى أبيض ينفع فى يوم تبيض وجوه
الوجه يبيض يوم تبيض وجوه

عايزين نغسل النهاردة القلب ونطهره من المُفسدات


فى خمس حاجات ابن القيم ذكرها:

قال: إنها تُفسد القلب خمس حاجات

النهارده هنآخد خمس مفسدات للقلب

المفسد الأول من مفسدات القلب ركوب بحر التمني:

ركوب بحر التمني يعني إيه بقى ؟
عايزين كلام نفهمه ؟!
ركوب بحر التمني ده
اللي هو حضرتك وأنت قاعددلوقتى وبقول لك خد القرار عايزك تبقى كذا تبقى كذا
تقولي آه والله كلامك زى الفل تصدقوا أنا فعلا كان نفسي إن أنا أختم ختمة قرآن فى شهر
تعرفو أنا والله نفسى جدا أحفظ قرآن
تعرفو هى تقول والله أنا نفسي جدا أروح التحق بمعهد من معاهد اللي بيبقى فيها إعداد الدعاة وأتعلم العلم الشرعي
تعرفو نفسي والله ألبس نقاب
تعرفو نفسي والله
نقعد بقى في نفسي دي للصبح !!
اللي هو ربنا سبحانه وتعالى وصف بيها حيلة الشيطان قال

" يَعِدُهُمْ وَيُمَنِّيهِمْ ۖ "


يا عم عيش حياتك شويه عيش شبابك شويه في إيه يعني هى الدنيا قفش كده ليه ؟!
لسه قدامك حبتين تلاته عيش واتمتع وبعد كده تبقى ساعتها يا عم لما تخلص كل الأمور​

وتتجوز وتخلف وببقى عندك خمسين ستين سنة ساعتها أقفل بقى على نفسك خالص وروح تعبد وأعمل حج وعمره وهتبقى زى الفل

" يَعِدُهُمْ وَيُمَنِّيهِمْ ۖ "
​

　
وصدقنى هتبقى فى الفردوس الأعلى
وصدقني ربك غفور ورحيم ورحمان
وحيغفر لك كل الذنوب دى كلها لأ كمان هيبدلها لك حسنات وهتبقى من أولياء الرحمان !!

"وَيُمَنِّيهِمْ ۖ "
يقول لك آه والله تصدق هو ده أنا إن شاء الله حعمل الكلام ده
بس أخلص المشاكل اللي عندى دى الكام سنه بتوع الشباب دول نخلصهم
"وَيُمَنِّيهِمْ ۖ "

ربنا قال إيه بقى ؟!
" وَمَا يَعِدُهُمُ الشَّيْطَانُ إِلَّا غُرُورًا "

بيغره علشان كده ربنا وصف الشيطان وسماه إيه ؟
قال " وَغَرَّ‌كُم بِٱللَّهِ ٱلْغَرُ‌ورُ‌ "
الشيطان شغلته إيه ؟
يغُرك ، يخدعك ،يخليك ايوه تسمع الكلام ده وتبقى شبهة جواك قفلة بينك وبين ربنا سبحانه وتعالى
فالأمانى دي
هبقى
سوف
إن شاء الله بعد كذا
الأماني دي شئ ورا شئ ورا شئ تفسد قلبك
يبقى أول مفسد من مفسدات القلب سموه إيه ؟
ركوب بحر التمني
زى اللي ماشى فى البحر كده وهو مش عارف هو ممكن ينجوا ولا لاء ولا تيجى عاصفه شديده وأمواج عاتيه تقلب السفينه عليه وهو لسه عايش فى البحر وعايش فى غمرات التمني
ولسه بيقول هبقى وسوف

الأمر الثاني من مفسدات القلب كثرة المخالطة:

شوف النبي صلى الله عليه وسلم بيقول في الحديث " الذى يخالط الناس ويصبر على آذاهم خيرًا ممن لا يخالط الناس ولايصبر على آذاهم "

الاخطلاط بالناس علي أربع مراتب واكتب معايا:

في ناس ابن القيم بيشبههم فى كتاب " مفتاح دار السعادة "

بيقول الناس أربع أصناف:

* ناس مخالطتهم كالماء
* وناس مخالتطهم كالداء
* وناس مخالطتهم كالدواء
* وناس مخالطتهم سُم

ماء ، دواء ، داء ، سم
مين دول ؟!!!

أول واحد هتخطلت بيه مخالطته كالماء تقدر تعيش من غير مياه ؟
تقدر تعيش قد إيه يعني ؟
يومين مثلا الإنسان ميقدرش يتعدى قد إيه المدة اللي بعديها لازم حيفنى ، لازم يشرب
الماء دول أهل الايمان الصالحين
لو ما اخطلتش بيهم قلبك يموت ، يموت فى الحال
لازم يبقى ليك صديق ولازم تعرف حد يآخد بإيدك
تتصل بيه تقول له حالي تعبان فيقول لك تعالى نروح نحضر الدرس الفلاني
تعالى المقرأة الفلانية
تعالى نخرج نعمل كذا من أعمال الخير
يساعدك وتجد عونًا على الطاعة
والراجل الصالح الداعية ده ولا العالم ده تروح تسأله فى دينك ويفهمك تمشى إزاى وتفهم عن ربنا إزاى
لو ده مش فى حياتك
قلب ميت وأنت مش داري !

لازم واجب عملي تتخذ قرين وصديق صالح
يبقى لازم فى أجندتك أسماء الناس دول علشان تلاقيهم وقت ما قلبك تحس إن هو بيضيع
فدول مخالطتهم كالماء

في بقى النوع التانى اللي هما إيه ؟!
مخالطتهم كالدواء

طب ما الدواء ده يبقى هو العلماء ؟!
لا لاء
هو الدواء أنت بتآخده كل يوم ؟
يعنى الدواء بتخدوا أمتى ؟
لما تبقى عيان
صح ؟؟
يعنى بتآخده عند الحاجه
الدكتور يقول لك 3 معالق
معلقه الصبح ومعلقه بعد الضهر ومعلقه باليل
الحبايه دى تآخدها كل 12 ساعه
ينفع تآخد أنت من مزاجك كده بزيادة شوية الجرعة ؟
ممكن تجيب آثار جانبية
مش كده ؟!
هو ده
فى ناس تحتك بيهم على قدر الحاجه
أنت شغال فى مصلحة معينة أو فى شركه معينة لازم هتخطلط بـ سين و صاد و عين
سين و صاد و عين دول فيهم الخير وفيهم اللي فيهم

فأنت لما تبقى مزودها حبتين فى الاختلاط بيهم ممكن قلبك يضيع بسبب الخُلطة دي

فعلشان كده متفسدش قلبك بإنه الناس دى لابد إن أنت تحتك بيهم

أنت لازم هتعدى على المكان الفلانى اللي بتشترى منه حاجاتك

لازم هيبقى فى واحد من الناس دى هتحتك بيه اللي هيوصلك للمكان الفلاني

لازم هتحتك بسائق ده بتاع الميكروباص ولا السائق ده بتاع التاكسى ولا

حتحتك بفلان اللي فى البنزينه علشان خاطر عربيتك

يعنى فى ناس أساسيين لازم حيبقوا في الحياة
دول معاملتك معهم على قدر الحاجه
متزودهاش لأنك لو ذوتها ممكن يفسدوا عليك قلبك

باقى اتنين
اللي مخالطته داء قالوا أهل الدنيا

عارف أهل الدنيا الل هو إيه ؟
أنت مثلا جاى تقول والله أنا كنت لسه امبارح سامع واحد وكان بيتكلم وقاعد يتكلم كده في معاني حلوة وحب ربنا ووو...
تصدق الواحد فعلا عايز يركز شوية وعايز يعمل
يقول لك لاء مشفتش ده نزل موبايل امبارح باوبشن يا نهاار أبيض حاجه بقى مفيش
عارف خدمة البي جي إس ؟!
وعارف اللي مش هعارف إيه ؟ وعارف إيه ؟
تلاقى نفسك أنت توهت فى حتة تانية خالص
على إنه بيتكلم فى كلام عادى

أذكر إن احد الشيوخ قالوا: إن واحد من الشباب كان من طلبة العلم و نحسبه كان على خير
إيه اللي حصل ؟
قال لي : أنا عايز أروح اشتغل وأصرف على نفسي
قلت له : طبعا أكيد مفيش مشكلة خالص
راح قعد اشتغل فى مول من المولات
الشباب بيتلموا باليل يقول له تصور فلان راح تاجر استيراد وتصدير وبتاع
راكب BM دلوقتي في سنة ونص !!
صاحبنا قال BM في سنة ونص ..... !!!!

العملية كده ؟!!
سيبك بقى من اللي بيقول لك العلم واللي قاعد يقول لك أحفظ قرآن يا عم استناني

BM فى سنه ونص !!!

طبعا بعد شوية راح ودخل غمار الدنيا ولغاية النهاردة مفتون ومنتكس وأهله يقولوا ربنا يعافيه

شوفتم المشكلة فين ؟!
كلمة على إن الكلمة دي أنت لما تسمعها فيها مشكلة ؟!
هو ماراحش قال له ده البنات بتعمل والكلام مش عارف إيه
مقالش ذنوب
ده بيقولوا دنيا
الدنيا قفلت القلب
ويقولوا ده في فلان بيآخد كذا والتاني قلبه بيتقطع وفلان راكب مش عارف إيه وساكن فين واتجوز واحدة يا أخي ده مفيش
إحنا حظنا عامل كده ليه ؟!
الــــدنـــــيـــــا تــــقـــــفــــــل
ده اللي مخالطته داااء

الرابع اللي مخالطته سم
ده بقي اللي بيتكلم في المعاصي
ده يقول له نص كلمة
ده يقول له إيه ؟
تعرف ده بيقولوا نزل في الموسم ده فيلم بتاع فلانة الفلانية وطالعة بتعمل كذا كذا
وهو كان خلاص ربنا تاب عليه ومبقاش يسمع الكلام ده

قاعد بقي في خياله كانت بتعمل إيه ؟ طيب إزاي ؟ ده مش عارف إيه ده راحت فين
ودماغه راحت وسااحت في كلام تاني خاالص
رمى له حتة
واحد تاني يقول له تعرف ده أنا حطيت فلوسي فى البنك الفلانى بيدينى دلوقتى فوايد 16 % و18 %
طب هو كان لسه سامع إن النبي صلى الله عليه وسلم يقول " درهم من ربا اشد عند الله من ستٍ وثلاثين زانية "
يعني ربع جنيه ، ربع جنيه ؟!
حاجة كده متتسواش

جنيه ربا يا سيدي
أشد عند ربنا من واحد واحد يزني 36 مرة
يا نهار أبيض !!!!

بس صاحبنا بيقول له ده الألف جنيه جابت عليها 160 جنيه في قد إيه وبتاع كذا كذا
ده أنت تحط لك تحويشة العمر اللي معاك وبعد كده يا عم تبقى تشوف لك فيها
وبعدين ده في ناس قالت وناس عادت ومتحبكهاش و متقفلهاش
سيبك من المتشددين وسيبك من مش عارف إيه
هــو ده الــســـم
يسم قلبه وما شابه بقى

واللي يتريقوا عليها أول ما تلبس الحجاب يقولوا لها إيه يا بنتي أنتي بقتي عامله زي الشاويش كده ليه ؟!
هو إيه اللي حصل لك ده أنتي ولا هيبص لك راجل ، ده أنتي فين عشان كذا
وأنتي يا اللي لابسة خيمة والكلام ده
سم سم ...فيفسد القلب

وتلاقي الواحد عايش في المعاني فللأسف الشديد عمر ما القلب ده يطهر وعمر ما القلب ده ينفع يتحط فيه معنى من معاني الإيمان اللي إحنا بنتكلم عليها

المفسد التاني كان إيه ؟
كثرة المخالطة
وقلنا المخالطة على الأربع أنواع
وعرفنا كل واحد مين اللي ينفع تختلط معاه قد إيه ومين اللي تزود قوي ومين اللي تبعد عنه خالص ومين اللي تقفل عنه تمااااااامًا
كل واحد من الأصناف الأربعة دول

المفسد الثالث التعلق بغير الله:

دي مشكلة مين بقي ؟
دي مشكلة اللي معلق قلبه بالدنيا اللي معلق قلبه بالغرام والهيام والصحوبيات والعشق
معلق قلبه بغير ربنا سبحانه و تعالى
لا ياريت تكون كده بس ده ممكن يكون معلق قلبه بحاجة من ضمن الأشياء اللي هى واجبة عليه زي زوجته مثلا
بس زوجته هى اللي قاطعه بينه و بين ربنا
وزوجها هو اللي قافل بينها وبين ربنا
عارف ليه ؟!
لأن الواحد كل حد كده بيتعلق بيه بيبقى زي ما اتكلمنا كده في الاختلاط بيبقي له حدود
يعني الحب الجبلي والغريزي ده مفيش مشاكل لكن يقولك ده أنا بحبها وطبعا كلمة مينفعش تتقال بس يقولوا كده في الأفلام و المسلسلات
أنا بحبها حب عبادة
أنا مقدرش أعيش من غيرها أنا من غيرها مسواش
أنا عندي استعداد أعمل أي شئ اجيب لها لبن العصفور
بس متبعدش عني
صاحبنا ده بقي يفسد قلبه
شوفوا القاعدة دي و اكتبوها
" من أحب أحد سوي الله عُذب به ولا بد "

وأسألوا اللي مر بتجربة عاطفية مؤلمة
اسألوه يعني إيه عذاب ويعني إيه ألم ؟!
و اسألوا اللي عمل وسوى وفي الآخر خالص موفقش وخُذل
وللأسف الشديد اللي كان يتمناه ضاع من بين إيديه وبقي عايش على ذكريات الماضي

" اللي يعلق قلبه بحد سوي الله عز وجل عُذب به ولابد "

يعني أنت عايز تفهمني إن إحنا منحبش ؟!
لا لا،، مش المعني كده
في حب أنا قلت عليه حب جبلي لازم هتحب أبنك و لازم هتحب مراتك ولازم حتحب والدك وتحب والدتك وتحب أخواتك وتحب أهلك وتحب عشيرتك

لكن حب ميقطعش بينك وبين ربنا حب يزودك بتحبهم وبتخلص ليهم وبتفي ليهم

بتعمل الكلام ده كله عشان خاطر دول يبقوا طريقك ويبقوا سبيلك لله سبحانه وتعالى بتطيع الله عز وجل فيهم
" فمن أحب أحد سوى الله عُذب به ولا بد "

المفسد الرابع فضول الطعام:

يعني واحد يزود أكلة دسمة شوية ويعني يزود الطقة حبتين تضيع قلبه
أكلة ؟!
يعني إزاي ده ؟!
آه ما يجيله بِطنة يعني يبقى عنده تخمة
فتيجي بقى يبقي متثاقل جدًا يلا عشان نصلي كذا تلاقيه تقيل ، مش حتصلي قيام ؟
أصل أنا لسه متعشي أنام لي حبة ساعتين شوية كده عشان نعرف نصلب طولنا شوية يروح نايم لو حصل الفجر يبقي كويس أوي وهــكــذا بيستمتع
أنا بسمع بيقولوا كده الشباب اللي لسه متجوزوش
روح جآي واحد منهم يقول لي ما هو يا شيخ ما هو بص بقى يعني متقفلهاش علينا من كل حتة ليه
تقولي بنات مينفعش وكلام مينفعش إحنا متعتنا كلها بقت دلوقتي في الأكل أطلع من هنا على هنا وبقيت كذا وبقيت كذا
وبعد كده يفسد عليه حاله
ما هو بحسب ابن آدم لقيمات يقمن صلبه
مفيش مشكلة كل وأشرب بس ميبقاش بإسراف
" وَكُلُوا۟ وَٱشْرَ‌بُوا۟ وَلَا تُسْرِ‌فُوٓا۟ ۚ "

يبقي المسألة كده
ثلاث كما قسمها النبي صلى الله عليه وسلم كذلك " لنفسه وشربه وأكله "

يبقى المسائل فيها نوع من الإتزان فاللي يفسد عليك قلبك ممكن يكون كذلك عشان كده هناخد واجبات عملية على كل مفسد من المفسدات دي في آخر الحلقة إن شاء الله عشان نبقى عارفين نتعامل إزاي مع هذه المفسدات

المفسد الخامس من هذه المفسدات كثرة النوم:

النوم الزيادة يفسد القلب ؟!
آه ...
الواحد المفروض ينام ازاي ؟؟
ينام في الوقت اللي هو يحتاج فيه جسده للنوم
النبي صلى الله عليه وسلم قال للتلاتة اللي قال أقوم ولا أنام
قال: ولكنني أقوم وأنام
يبقى في وقت لهذا ووقت لهذا
لما تبقي تعبان نام وخد قسطك من الراحة بس تأدب بآداب النوم
ونام علي طُهر و قول أذكار النوم عشان النوم ده يتكتب لك في ميزان حسناتك

يا جماعة خدوا بقى من هنا
إحنا قلنا أهو إن في حاجات الخمس حاجات دول بيفسدوا القلب
تعالوا نآخدها من تحت
أنا عايزك تآخد في ميزان حسناتك ثلث عمرك
مفكرتش فيها دي ؟!
ثلث عمرك مش المتوسط اللي العلماء بيتكلموا فيه إن أنت بتنام 8 ساعات
طيب الـ 8 ساعات دول مفكرتش يعني لو إحنا حنعيش
النبي صلى الله عليه وسلم بيقول " أعمار أمتي ما بين الستين و السبعين "
وأنت بتُكلف وإنت عندك قول 15 سنة ماشي
يبقى أنت حتعيش قد إيه ؟
عندك من 45 فما فوق
قول يا عم 45 سنة
قسمها كده 45 سنة ثلثهم يعني 15 سنة نوم !!
مش بتنام 8 ساعات ؟!
الـ 8 ساعات دول ثلث اليوم
يبقى أنت الـ 15 سنة دول اتكتبوا فين ؟!
مفكرتش فيها دي ؟
ما هو النبي صلى الله عليه وسلم بيخبرنا إن الشيطان يبيجي علي الواحد ويضرب على قافية أحدكم ويقول عليك نوم طويييل فأرقد
نام...، نام واتغطى
عشان يغفل عن الذكر
أنت عارف لو أنت نايم علي طهر و قلت الأذكار ونايم وأنت في نيتك أنا بنام بس عشان إيه الوقت بتاع الليل ده عشان إن شاء الله نلحق نصلي الفجر
أو حنام الوقت ده عشان نعرف نأدي الواجبات اللي علينا
فنايم بنية
الـ 8 ساعات ثلث عمرك يكتب في ميزان حسناتك

يبقى أول حاجة
عايزين نتأدب بآداب النوم عشان نحول ده نآخد الـ 15 سنة دول أو أكتر في ميزان حسنتنا

تاني حآجة
عايزين نُكثر من الصيام عشان قول لنا فضول الطعام فيبقى في مقابله الصيام ونآخده بنية " عليك بالصوم فإنه لها مثل له "
قالوا لا مثل له في الأجر وقالوا لا مثل له في كل شيء
فيحفطك من الشهوة " عليكم بالصيام " كما أخبر النبي صلى الله عليه وسلم " إلا الصوم فإنه له وجاء "
يحفظه من خطر الشهوات

تالت حآجة التعلق بغير الله
عايزين ندعي و نتضرع ونبتهل لله تعالي بالدعوة اللي بنتواصى بيها أول الحلقة

يارب لا تجعل في قلوبنا حبًا إلا لك ولا تعلق إلا بك
يارب قلبي ما يتعلق بغيرك
ونحفر في قلبنا وفي عقولنا المعني ده
" مينفعش تحب حد سواه إلا عذبت به "

في موضوع الاختلاط
قلنا من هنا ورايح في حدود في التعاملات
كتر من اللي مخالطته ماء وخليك محجم في اللي علاقته علاقتك بيه واختلاطك بيه كالدواء وأبعد تمامًا وانصرف تمامًا عن الداء وعن السم

وآخر حاجه بطلنا وبقى شعارنا
مينفعش سوف من هنا و رايح مفيش سوف

عشان نقفل حتة ركوب بحر التمني


http://img02.**********/uploads/image/2012/10/02/0d364d4261f70c.gif


​

 

[نسمات إيمانية]

أحسن لله اليكِ أخيتي
على نقل الموضوع القيم
وجزاكِ المولى خير الجزاء على نشاطكِ وحرصكِعلى دينك ثبتكِ الله على الحق ​

 

[دعوني وربي]

أحسن لله اليكِ أخيتي
على نقل الموضوع القيم
وجزاكِ المولى خير الجزاء على نشاطكِ وحرصكِعلى دينك ثبتكِ الله على الحق ​

بوركَ فيكِ أخيه
اسال الله ان يعلمنا وينفعنا ويجعلنا ممن يستمعون القول فيتبعون احسنه
وجزاك ربي خيرا على دعائك ولكِ بمثل أخيتي.