يا خاوتي عندي مشكلة مع امي
عندنا تقريبا مدة طويلة موليناش نتفاهمو خلاص
جامي ولا دار بيننا حديث مثل اي ام وبنتها
ديما نتفاتنو مع بعض ماكانش يوم يمر علينا بسلام
والمشكلة هي دايما تخلقلي الف سبة باش تحط كلش على راسي وتحطني انا ماشي مليحة
من لي نشفالها تصبح تعاير وتمسي تعاير
لا على الشغل ولا على الميكرو ولا على الخرجة
انا صراحة مانحبش نخرج بزاف نفضل نقعد في الدار نلقى راحتي اكثر
وهي كون تلقى كل يوم جرجرني معاها وكي نقولها نروحو في الطوموبيل تقولي لالا نروح نمشي
نخرجهها تمشي وكي نتناولو الحديث دايما يدخل بينا كلام يفسد كلشي وهي ماتعرفش تهدر كيما ناس لازم تهدر وصوتها منا للهيك ينسمع
وصراحة تتسببلي بالاحراج مع اني كبيرة وعيب ديرلي هكدا برا وقدام الناس خطرة يا خاوتي صدقوني
كنا برا نتمشاو وجبدنا نحكيو وكي العادة تحاكمنا وترفد يدها وتعطيني كف قدام عيون الناس
مالقيتش واش ندير والدموع حبسو في عينيا ووجهي احمر من الخجل وماقلت حتى شي وواصلت المشي
وهادي ماشي اول مرة ديرهالي
حتى في الدار كي نجبد نهدر ونفرغلها قلبي تتسرع وتضربي مع اني وحيدتها
نقول كي مانحكيلهاش ليها لمن نحكي؟؟؟؟
راكم تقولو واش هو سبب هاد المشاكل لي قايمة بيناتكم
والله يا خاوتي انا وماعلاباليش صدقوني عمري مانسمعلها كلام يخليها تثور عليا
هي ديما متسرعة في لمعاير في الضرب وبلا ماتسيي تفهم وتسمعني للاخير.....
ماعرفتش طبيعتها هكدا او انا لي ماشي مليحة ومانعرفش كيفاش نحكي معاها
عمرها ماحكاتلي حوايج ولا تجبد وتنصحني وتعلمني
خطرات كي نروحو لمرت خويا حتى نسمعها تحكي في امور انا اولى بيهم
صحيح هي تاني وحدة من العائلة لكن كيفاش تفضل تحكي لعروستها وماتحكيش لبنتها
حبت تخطب لخويا وقالها على وحدة تشوفهالو والله ماسمعت حتى فاتو ايام سمعتها تحكي لمرت خويا
يعني حاطتني صغيرة ولا خايفة عليا نروح نحطها في الجورنال؟ وهادي اصلا هدرة تافهة وماقدرتش تقولهالي
كي نروحو للدار ونسقسيها وعلاش ماتحكيليش تقولي بهاد العبارة
وعلاش نتي يخليك الميكرو تسقسي وتهدري كيما الناس؟ دارنا صغيرة وغير انا وهي وبابا وخويا يجو غير في الليل واش نقعد ندير كي مانقعدش في الميكرو؟
نقعد معاها؟ نفضل نقعد في الميكرو ونحي شوية عزلة مع كاش احباب في الفيس او في اللمة احسن من نقعد معاها ونرجعو للمشاكل
وماحبستش غير هنا بزاف امور ماحكيتش عليهم قلبي واجعني بزاف منها وحياتي في الدار اصبحت وكانها جحيم علابالي ماتحسوش بيا
وتقولولي هادي امك وتعرف مصلحتك و و و.... لكن انا حابة امي تكون قريبة ليا تنصحني توريلي بالعقل في حاجة نغلط فيها ماشي تتسرع
تهاجمني بالكلام والشتم والضرب
ماوليتش نستحمل الشي لي راهي دير فيه معايا والله كرهت وساعات نكرها ونقول كون غير ماجاتش امي
نبكي حتى نشبع ونفرغ قلبي وبالخف ننسى كلشي ونولي ليها ونطلب السماح وساعات تسبني تقولي روحي تقول قاع ماكيش بنتي
قولولي لوكان ماتحنش عليا امي وتقربني ليها شكون عندي من غيرها يحن عليا ويساعفني ؟؟؟؟
نحب نقصر مع بابا وخويا لكن دايما مشغولين ويجو غير في الليل
خويا غير نقولو حاجة اما مايردش عليا واما يقولي بركاي من الدصارة
بابا نحب نحكي معاه نروح كاشما نقولو يقولي اسكتي خليني نتفرج الاخبار هادي العام يدور وهو بيها
عندي عائلة ولكن للاسف نحس اني يتيمة مايحكيو معايا مايفرحوني بكاش عفسة كيما كامل لبنات
وليت مريضة نفسيا من المشاكل هادي ومشاكل غيرها وليت مانحكيش بزاف مانحبش نخرج ونهدر مع الناس
نقول بالاك انا صح ماشي مليحة انا مانعرفش نهدر مع الناس ونقربهم ليا
ربي يخليكم قولولي الحل واش ندير؟؟
على خاطر راهي مع الام ورايحيين يقولولنا الام تعرف مصلحتك اكثر و الخ 
