السلام عليكم
اولا شكرا على هذه الزاوية الافتراضية التي تسمح لنا بطرح مشاكلنا و التي تكون غالبا صعبة البوح و الايصال واقعا
تعريف مختصر انا فتاة ابلغ من العمر 28 سنة اعمل و متحصلة على شهادة الدكتوراه
من العنوان واضح موضوعي من كثرة الخطاب قعدت بلا زواج هاذي انا .. وحيدة رأيي ضد كل من حولي اهلي.. صديقاتي .. لان مجتمعنا يشوفني "بايرة" و نشوف روحي " لن اعيش في جلباب رجل !!!"
أفصًل..
مانيش مراة حديدية او متكبرة اكيد فكرتوا هكذا لاااااا لسنوات و انا اطالع عن الحياة الزوجية و قواعدها دورات و دروس و استشارات... حب التطلع كاغلب الفتيات في سن الزواج فادتني كثير في معرفة الفروقات الشخصية و العقليات الدوافع و التوقعات و موازنة الحقوق مع الواجبات و حتى حل بعض مشاكل القريبات ...و اللي يسمعني نحكي يقول خبيرة او دارسة وحدة من اثنين
بالمقابل عندي نظرية تقول انو "كل رجل خائن و اذا كان غير خائن فهو غير مسؤول و اذا كان غير خائن و مسؤول فراح يمحيني حتى يكون وحده في الصورة*"- اسمحولي يا رجال اللمة على هذا التعبير و اعذروا رأيي-
تقدملي العشرات من مختلف الطبقات الاجتماعية و دائما رفضي يسبق و في مرات تكون محاولة مني اني افتح ملف هذا السيد او ذاك لا تمييز بينهم لانو الهنا عندي ما يتقاس بشهادة او مال او نسب
كل ملف ما يبقى مفتوح اكثر من 3 ايام لانو نخاف ربي يحاسبني اني "مطَمعة" السيد و انا عارفة انو نرفض في الاخير
تقولوا تحدثي معاه ميًزي العقلية.. ما نحبش لغة التلفون و لا الالتقاء لانو الخطَاب رطَاب و يحاول يمتلك بكل الوسائل ..و انا احب الوضوح اي كذبة بالنسبة لي تسقط صاحبها من عيني و لو كانت صغيرة
مش حابة نعيش كاغلب النساء حرب التمسك بالرجل بعد الزواج ها شاف ها خرج ها ماولاش
خايفة من اللي يعيشني في عقدة النقص لانو شهادتي منافستو
مش حابة نخمم على كل شي ( لانو هذا طبعي اصلا) و هو متهني الزواج عندو حقووووق فقط
في الاخير نوضح شي... عارفة اني مش كاملة الكمال لله سبحانه و عيوبي ما انكرها و ماني نحوس على سيد مثالي - لا.. شكرا افلاطون- استخرت مراااااات و مراااااااات لكن حدسي دايما يقولي مش هذا اللي تكملي معاه حياتك تستاهلي خير
الى متى هذا الصراع الداخلي بين انثويتي و فكري.. ؟؟
يا ريت تفهموني قبل ثم تجاوبوني و كل اجابة رايحة نقدَرها و نعطيها وزنها الف شكر مسبقا
آخر تعديل بواسطة المشرف:
