خطيبي و الهاتف

[مشكلتي]

السلام عليكم
انا فتاة في 23 من العمر تم خطبتي مند شهر و عملت المراكنة و خطيبي لا اعرفه من قبل و الان بحكم انني خطيبته تبادلنا ارقام الهاتف و مند ان انخطبت تكلمنا مرة واحدة قال لي انا لا احب الكلام في الهاتف كثيرا خوفا من ان تحصل بننا نقاشات لان جل اصدقائه انفصلوا عن زوجاتهم بسبب كثرة الكلام لدلك اخد هاته النظرة وانا اريد ان اتعرف عليه من خلال الكلام معه لكن في الحدود المسموح بها لاني كبيرة وفاهة انوا كثرة الكلام كدلك ماشي مليحة بزاااف لكن كيف اخبره بدلك :s:s و خطيبي مشاء الله ولد فاميلة متربي و قالي نحشم سبوغ صا ميكلمنيش الله يخليكم ساعدوني​

 

[زيزي احمد]

رد: خطيبي و الهاتف

السلام عليكم و رحمة الله و بركاته أما بعد :
بما أن خطيبك إنسان متربي كما تقولين فلا تبحثي عن شيئ آخر
دعيه و لا تحدثيه حتى يتصل هو بك ثم اطرحي عليه بعض الإنشغالات التي تهمك و من خلال ما يقوله سوف تتعرفين عليه تدريجيا
لا تعتقدي أنك ستتعرفين عليه جيدا مدة الخطبة بحديثك معه هذا مستحيل
دعي ذلك للزمن و اعلمي أنك و بعد الزواج ستتعرفين عليه و سيتعرف عليك من خلال المعاملة المتبادلة بينكما
وفقك الله و سدد خطاك و أتمم زواجك بكل خير و هناء إن شاء الله آمين :bravo01:

 

[Ma$Ter]

رد: خطيبي و الهاتف

السلام عليكم
هكدا احسن اختى
ادا حابة تحكى معاه فقط فى حدود ترتيبات الزواج اما الكلام الاخر ما فيهش خير
وبما انك واثقة فيك وقلتى متربى ولد فاميلة فلا تخافى
ربى يكملكم وربى يهنيكم
بالتوفيق اختى
​

 

[ماكانش]

رد: خطيبي و الهاتف

ربي كمل ختي ان شاء الله
المشكل اذا راح اطول وقت الخطوبة هنا الي مشكل
نتي حاولي تتحكمي فيها ولا فهميه بلي يجيو مشاكل وادا مافهمكش وو
ققلي انتي وماتصمطيهش ولا تتجاهليه كي يتاصل بيك ولكن خليك رزينة

 

[♥♥سارة♥♥]

رد: خطيبي و الهاتف

ربي يكملك فالخير هكذا يبالي خير تكلمي معاه غي فالحاجة ضرورية و ربي يوفقك

 

[وزني ذهب]

رد: خطيبي و الهاتف

السلام عليكم

كلشي مبروك اختي ربي يتمم بالخير
يا اختي اللي انتي فيه تتمناه اخريات .. كثرة الكلام و لو احاديث بسيطة عن الاحداث اليومية ما تستفيدي منها شي..ممكن تقولي حابة نعرف عقليته نستكشف امور ممكن تكون مخبية من حقك تخافي و كل البنات مثلك لكن عليك اولا بالتسليم المطلق لاختيار الله عز و جل و ذلك بالاستخارة يوميا حتى يوم الزواج ربي سبحانه وحده يعلم من الافضل لك.. ثانيا ما تدري حكايا التلفون تعطيك اجابات صحيحة او لا كله بالمعاشرة و بالمقابل خلي اسئلتك وااااضحة اهم شي في فترة الخطوبة الوضوح ماذا تريدين ما تتوقعين مالا تحبين كلو يكون واضح عندك حتى تنقلي الصورة مباشرة لخطيبك ... اما وش كليت؟ و ها وش فعلنا اليوم وين خارج غدوة... هاذو محادثات ما عندها اي هدف الآن خليها لوقتها افضل حتى تلقاي وش تحكي اذا حفظتيه و حفظك واش بقى من حلاوة استكشاف الآخر؟؟
ربي ييسرلك امورك
سلام​

 

[يونس الصديق]

رد: خطيبي و الهاتف

السلام عليكم

مبروك مسبقا
أرى ان خطيبك شخص راكز وحكيم ماشاء الله
أغلب النقاشات ستجلب مشاكل لا تحتاجونها قبل زواجكم
أرى ان معه حق
وانصحك بعدم المبادرة حتي يبادر
موفقة ان شاء الله

 

[ام@الاء]

رد: خطيبي و الهاتف

السلام عليكم
الاخوة كلامهم درر
انا نقلك ربي يكملك على خير ويهنيك
و الاهم يجمع بينكم في ااااالخير يا رب
بالتوفيق اخية
​

 

[amel 2]

رد: خطيبي و الهاتف

بما ان قلتي وليد فاميليا ومتربي خليه على هواه ماتعيطيلوش
الا ادا كان حاجة مهمة , وباماه تعرفي عقليتو ختي لازم تعيشي معاه
لان كاينين بزاف يحكو فالهاتف و يخرجو مع بعض مي مبعد الزواج يتقلبو
يعني ربما خطيبك وليد فاميليا و مربي صح :s:sو الكلام الفارغ مايجيب
غير المشاكل :down: ربي يوفقك اختي العزيزة و يكملك طريقك على الخير :up::up:

 

[TeNtOuNa]

رد: خطيبي و الهاتف

لالا اختي العزيزة ما يتمسخروش بيك هادا راه عمر
ماطيشيش روحك لاي واحد
بلاك راهو مدمن مخدرات بلاك مريض نفسي بلاك عندو عقد في حياتو...
لازم تحكي معاه وتعرفيه مليح خاصة فالامور الاساسية
قبل مايطيح الفاس فالراس ... ياما زوجو بيهم قبلك ولقاوهم مراض ومعقدين ولا مدايرين كاش مصايب
انا مانشجعكش على الهدرة التافهة تاع التمسخير بصح كاين نقاط لازم تتحط على الحروف قبل الدخول في الجد
​

 

[aljentel]

رد: خطيبي و الهاتف

عنده مشكله والا ليه ما يكلم خطيبته !!!
الا اذا كان خبل ترى كثير ناس دلوخ مايعرفوا الصح من الغلط ...
لكن لاتعتبريها مشكله ولاتهمليها إسألي عنه زين كثير ناس ابناء عوائل محترمه وهم دلوخ ..

 

[داليا الشيح USA]

رد: خطيبي و الهاتف

السلام عليكم اختي انا تاني مخطوبة منذ شهر ولم اتكلم الى خطيبي لحد الساعة لسبب خوفي من المشاكل لانو عندي بنت تقربلي كانت تحكي مع خطيبها و عقدت ومن بعد ايام زعق معاها بكلمة هي نواتها ايا تخاصمو وطلقها

وخطيبي قالي بعد العقد اي لازم ديري كيفنا حنا اوك حنونة

 

[أم البتول مارية]

رد: خطيبي و الهاتف

ربي يتمملك اللي فيه الخير اختي
لم افهم جيدا ما تقصدينه بالخطبة كاين اللي يديرو عقد شرعي(الفاتحة) و يسموها خطبة اذا فتح عليك راكي زوجتو و يحقلك تقعدي و تحكي معاه باش تتعرفو شوية على بعضاكم و تتوضح الكثير من الامور قبل ما تروحي عندو فالكثير من العاقدين بطلو من اجل عدم التفاهم في بعض الامور المهمة و التي لا يمكن تجاوزها
اما ان كانت خطبة فقط بدون عقد فهو يعد اجنبي عليك اختي و الكلام معه في الهاتف له حدود و شروط و بالاك هو راه يتجنب الاتصال لهذا السبب و الحمد لله انو عارف حدودو لانو الهدرة بزاف تجيب لخسارة ....

 

[Dr.CrAzY]

رد: خطيبي و الهاتف

الهدرة في التيليفون بزاف مش ملاحة.....
ربي يسهلك أختي

 

[ضحکَة خچڸ ღღ]

رد: خطيبي و الهاتف

السلام عليكم
اولا وقبل كل شئ
ربي يهنيك ختي وربي يسخرلك ويتمملك على خير

اختي انا مرنيش نشوف بلي كاين مشكل
والاخوة والاخوات هنا ما قصروش معاك بالعكس جاوبوك ونعم الاجابات ونعم النصائح

انا نضيف انت احكي معاه وكامل مرينا بهاد الطريق
لانو لازم تحكي معاه حتى تتعرفي عليه
مي ما شي كل دقيقة وكل وقت
يعني كلامكم يكون له وقت محدد باش ماتسماطوش على بعض وتاني باش ما يكثروش المشاكل بيناتكم

ربي يهنيك اختي والعقوبة للي مازالوا ما تزوجــــــــــــــــــــــــــــــــــوش
​

 

[serinee]

رد: خطيبي و الهاتف

السلام عليكم
اختي مدام قلتي عليه انو انسان متربي و وليد فاميليا واش ديري بكثرة الحديث معاه
اصلا هكد احسن
كثرة الحديث في الهاتف تجيبرلك غير المشاكل
و ربي يسهلك
​

 

[صبااح]

رد: خطيبي و الهاتف

اذا كنتو مخطوبين برك راه ممكن مش حاب يحكي ويكثر فالهاتف لانو ميجوزش واذا كنتو عاقدين الهاتف ماتقدريش تعرفي منو العقليه وراجلك متعرفيهش حتان تعاشريه مليح مليح
انا كنت مخطوبة وقارية الفاتحة كيما يقولو ونقدر نقولك بلي من خلال تجربتي السابقة بلي الهاتف متقدريش تعرفي بيه عقلية الراجل مليح وكاين بزاف رجال كيما خطيبك ميحبوش يكثرو لحكايات فالهاتف وانا نعرف وحدة راجلها محكاش معاها حتى لسمانة قبل العرس

 

[فتاة حساسة]

رد: خطيبي و الهاتف

ربي يكملك اللي فيه الخير اختي ..عندك حق تخافي ...مي الهدرة بزززاف ماش مليحا ..ربي يجبلك اللي فيه الخير

 

[ام سحر و لؤي]

رد: خطيبي و الهاتف

salam 3likoum
hanouna kan 3andi nafs lmouchkil ta3ak kbal ma natzawaj rajli ma kanch yhad y3ayatli bezaf kount dima nkoulou w 3lach hakda ki nchouf hbabati kamel y3aytolhoum les fiancails ta3houm w houwa dima kan yarfad w ykouli lhadra machi dork wma ranich hab ntmalou khalina nakou3dou 3zaz wma nkamlouch lhadra darwak hata natzawjou w dork 3andi 3amin w nos zwaj w lhamdoulah nahmad rabi 3la li ma hdartch mazalt nhas rohi 3rossa jdida
w diri mlih f balak houwa rahou mahtarmak beazaf ki darlak hada
rabi ytamamlak belkher hanouna

 

[دعاء19]

رد: خطيبي و الهاتف

ماعرفت مانقولك ولكن في نظري لازم تتفاهمو قبل زواج لان قديم زواج كان هكا خطب وتزوج بدون مفاهمة اما دابا تبدل الوقت الى متفاهمتو من قبل فبعد زواج تقدرو تختالفو فشحال من حاجة
ولي نقولك مبروك خطوبة ربي اكمل عليك بالخير