قصة للاطفال (انا و الذئب )

[عاشقة الاسم المفقود]

كان يامكان في قديم الزمان
كانو 4 كباش يغيرو من وحد الكبش وهذا الكبش كان دايما يستحفظ على الصوف انتاعو وهوما يغيرو منو
وكل مايشوفوه يضربوه ويبعدوه على الماكلة باش مايكلش ويبقى جيعان
يشد الطرف ويبقى يبكي
وفي الطرف الثاني من الغابة كان وحد الذيب منبوذ من اهلو قااع مايحبوهش باسكو يكره الصيادة ويكره الدم لذا اتافقو جميع الذئاب باش ينفوه من القطيع حتى يولي يصيد ويجيب الصيادة ويولي معانا
امالا هو قرر باش يروح يصيد هاذي المرة وراح في الغابة
يمشي
يمشي يمشي
حتى اتلاقا مع القطيع انتاع لكباش كل مايدنى يقبض كبش يهربو ومايلقى والو ( مايعرفش )
وبقى يحاول ويحاول عدة مراات
امالا جاتو فكرة في بالو
يلزم يكلخلهم وراح لجيفة نحالها الصوف انتاعها ولصقو في لحمو باش يبان كبحال كبش وادخل في وسطهم وولى يمشي بلعقل
والذيب ياكل غير لي يكون وحيد متخلف على الركب
كي وصل لعندو صابو يبكي
قالو واش بيك يالكبش
قالو انا محقور انا وحدي واحد مايحبني ولكباش لخرين كامل يحقروني ويضربوني
قالو انت راك كيما بحالي انا ثانيت هاكذاك
الكبش اخصر فيه وقالو انت اشكون انا مانعرفكش
انت ماشي منا
قالو انايا مولايا الراعي انساني اهنا وغدوة بالاك يجي يديني خليني معاك لهنا باش ماياكلونيش الذيابا برا
وولاو يلعبو كيف كيف يجرو ويلعبو ومن بعد قالو كول ملي جيت ماشفتكش تاكل
قالو الذيب المتنكر انا مانكلش لحشيش قالو امالا واش تاكل ياك لكباش ياكلو كامل لحشيش
قالو لالا انايا مولايا يوكلني القرط الحشيش اليابس والخبز انا جامي ماكليت هذا
قالو ماعليش ايا معايا نديك لعند الراعي انتاعنا دايما نشوفو يجيب معاه الخبز والفطور مي كول بالستر بلا مايشوفك
كي كانو رايحين شافو ذاك الراعي حط ليزار وحط مورصوات انتاع الخبر والماكلة والما وراح يغسل يديه قبل ماياكل
ثما قالو اجري روح كول قبل مايولي وكي يجي انقولك باااااااااااع:p
امالا الذيب راح باش ياكل الخبز مي شم ريحت اللحم لي كانت فوق الجواز اسرقها وهرب
وقال لصحبو ايا نروحو ابدا يقول الكبش باع باااع مي انت علاه ماراك اتقول والو ؟؟؟ قالو لالا نخاف نبعبع يضحكو عليا باسكو مانعرفش
قالو انا نعلمك قالو لالا انا ليوم انروح نحوس على مولايا الا جا ولا ماجاش
وكي نولي علمي
غير راح جاو هاذوك لكباش القباح يضربو الكبش لحنين وضربوه وضربوه مسكين وهو يعيط ويقول بااااع باااع مي صحبو ماسمعووش لانو كان مع الغرابة
وهاذيك الغرابة قاتلو يالذيب رايس الذيابا قالك ارواح نستحقك
قالها واش يحوس ؟ قالها ماعلاباليش كي تروح تعرف
امالا هو راح
شافهم كامل متلميين وولى يهدر الرئيس
جاني الخبر من عند الغراب يقول فيه انو كاين واحد الذيب معانا يلبس كشغل كبش ويلعب مع لكباش
اشكون فيكم ؟ الذيابا سكتو قااع وولاو يهدرو بصوت واحد احنا ذيابا ناكلو الكباش مانصاحبوهمش واش ياسيدنا راك تتمسخر بينا
قالهم كاين الشاهذ لي شاف هذا الذيب ويعقلو فيكم
والا عقلو راح نعدمووه وقعدو يستناو هذا الغراب وقتاش يجي مي بطى ماجاش
والذيابا تقلقو وجاعو
وقالولو احنا نروحو ونرجعو على ساعة لهنا ولا واحد فينا راح يتخلف على الميعاد
امالا هو عاود ولا لصحبو الكبش صابو مضرووب ويسيل منو الدم
قالو شوف واش صرالي دارو بيا وضربوني
قالو اقعد اهنا ضرك انا نوريلهم
حطو عند وحد الصخرة وولى ليهم ذوك لكباش مي اداورو عليه
وقالولو انت الكبش الصغير المشيان تضربنا احنا
اليوم نظربوك كيما اضربنا صاحبك
وناضو مضاربين والذيب يضربهم بالمخالب اديالو حتان وين سالهم الدم ونتفلهم شعرهم وهربو
بعد ماضربوه بقرونهم وسيلولو الدم
كي ولى عند صحبو قلب عليه وماصابوش كي كان يقلب يسمع صوت الذيب يعوق للاجتماع ابدا
راح يجري صابهم كامل يستناو في الدالة
وهاذاك الغراب بسوطي من راس لراس ويغزر والشاف انتاع الذيابا يقولهم
لي يقعد فوق راسو الغراب هاذاك الذيب الخاين
كي وصلت الدالتو الغراب عقلو وجا باش يحط فوق راصو ومن بعد يعاود يطير واقعد هاكذاك شي عشر دقايق
الرايس قالو يالغراب اغصب تبقى ثم الا هو قولنا والا لالا خلاص
قالو لالا ماعقلتوش هو يشبهلو مي هذا عندو اكس في راسو ( يعني الوشم انتاع الكباش كيما ضربوه) امالا قالهم فضو هذا االجتماع الخاين ماشي منا واليوم انا جبتلكم العشا
وقدملهم هذا الكبش هدية وهو صحبو الكبش المحقور
كي جاو باش ياكلوه هو سوطا عليهم وقالهم هاذا صاحبي ماتاكلوهش
وناضو يضربو فيه ويقولو روح يالخاين وضربوه حتى وين مات هو وصحبو
في ذاك الحين كان الراعي حايب المكحلا والكلبة انتاعو وجايين يحوسو على كبشهم
كي وصل شاف الذيابا متلمين تيرا في السما وهربو الذيابا كي غزر قال سبحان الله عمري ماشفت
الذيب فوق الكبش يحمي فيه
كي راح باش يدي الكبش انتاعو صابحهم شادين يديهم مع بعض متشابكين
امالا ارفدهم في زوج واداهم للدار وداوا الكبش وداوا الذيب
وعاش الذيب في ذيك الحظيرة ومن بعد ذاك الذيب اتزوج مع ذيك الكليبة
وجابو هاذاك النوع لي احنا نعرفوه شيان لو(Chien-loup )
واقعد هذاك الرمز انتاع اكس في راس الفصيلة ليومنا هاذا

بقلمي
عاشقة الاسم المفقود​

 

[أمــ وليــد الجزائرية]

رد: قصة للاطفال (انا و الذئب )

روعة روعة هذي القصة
و أنا نقرى كل سطر نستمتع فيه كثر
و في الأخير كانت نهائية رائعة
عجبتني طريقتك في سرد لحكاية
يعطيك الصحة
متحرميناش من حكاياتك
تحياتي ليك

​