السلام عليكم و رحمة الله وبركاته
اليوم على الغدا اعملت خبز السندويتش وهاذي طريقتي الخاصة في صنعه ما على باليش اذا كاين اللي يعملوه بنفس الطريقة مي هاكدا تعلمت نخدمو من عند يما الله يطول في عمرها
اسمحولي ما صورتش الطريقة من البداية
نبدابمقادير العجينة
01 كلغ فرينة - ملعقة أكل سكر -الملح على حسب الرغبة انا حطيت نصف ملعقة اكل- نصف فنجان صغير زيت- 02 مغارف كبار غبرة الحليب - ملعقة قهوة محسن الخبز- 02 ملاعق كبار خميرة الخبز - حبة بيض
ماء دافيء و سمسم للتزيين + صفار بيضة ممزوج بقليل من الحليب
الحشو
صدر دجاج - حبة بصل كبيرة - 02 حبات طماطم - 02 فصوص ثوم - زيتون مقطع رقيق - من 02 الى 03 حبات فلفل طرشي مشويين ومقطعين رقيق- ملح - فلفل اسود وزيت وفروماج مراpي وملح حسب الرغبة
طريقة التحضير
نخلطو كل المقادير مع بعض ونلمو بالماء الدافيء ، ندلكوها مليح حتى تتداخل المكونات مع بعضها ونحطوها في مكان دافيء ونغطوها حتى تختمر
ونروحو نوجدو الحشو
نقطعو البصل ونحطوه في مقلاة مع شوية زيت و ملح نزيدو معاه صدر الدجاج المقطع الى قطع صغيرة ونحركو مليح حتان يبداو قريب يطيبو نضيفولهم الفلفل الحلو المقطع و الطماطم والفلفل الاسود ونخلوهم على نار هادية حتان يطيبو و تنشف منهم لاصوص
بعد ما تخمر العجينة نعملوها كرات صغيرة كيما كرات المسمن ونرمدوها في الفرينة اومبعد نبداو نعمرو فيهم بالحشو ونزيدو الفرماج ونشكلو اما حرابيش كيما الخبز واما خبزات كيما خبز الدار ونصفوهم في صينية الفرن كي نكملو ندهنو بصفار البيض الممزوج مع الحليب ونرشوهم بالجلجلان و نخلوهم شوية يختامرو . بعدها ندخلوهم للفرن اللي يكون مسخن من قبل وهادوما بعض الصور مع شكلهم النهائي
ملاحظة: اللي يحب الحار يستعملو انا نفضل نحطو على الطاولة وحدو
يا ربي يكونو ساندويتشاتي عجبوكم
