الميناج كومبلى

[ام اشراق]

السلام عليكم

اخواتى اللمويات حبيت ندير ميناج كومبلى هذ ليمات قبل ماتبدا السخانة ورمضان راه قريب ان شاء الله اجينا بالخير والهناء . جاتنى فكرة قلت علاه مانعرضهاش عليكم .منها نشجعوا بعضنا كل واحدة تمدلنا البرنامج الى تبعو ا فى الميناج وكيف تقسم بين الميناج والتنظيف اليومى وماهى مواد التنظيف اللى تستعملها وكاش عفايس جدد فى التنظيف والترتيب . بالصور اذ امكن ها واش قولكم .نبداو على بركة الله

 

[ام عبد الرؤوف]

رد: الميناج كومبلى

السلام عليكم اختي والله فكرة عجبتني بزاف لي عودة رغم انني هاذ العام ناقص عليا الميناج راني راحلة لداري بعد رمضان وبغيت نوفر صحتي وطاقتي كامل للرحيل ان شاء الله

 

[السيدة إلهام]

رد: الميناج كومبلى

السلام عليكم

موضوع هايل

لي عودة إن شاء الله

 

[ام اشراق]

رد: الميناج كومبلى

السلام عليكم اختي والله فكرة عجبتني بزاف لي عودة رغم انني هاذ العام ناقص عليا الميناج راني راحلة لداري بعد رمضان وبغيت نوفر صحتي وطاقتي كامل للرحيل ان شاء الله

وعليكم السلام ياختى تدخلى دارك بربح والهناء معليش اختى نشارك ولو بمعلومة اوتدبيرة نفيد ونستفيد و

وكل واحدة وظروفها وقت ماجاء الخير ينفع

 

[ام اشراق]

رد: الميناج كومبلى

السلام عليكم

موضوع هايل

لي عودة إن شاء الله

وعليكم السلام ياخت الهام نحن فى الانتضار

 

[ام اشراق]

رد: الميناج كومبلى

السلام عليكم

بما اننا مع الانتخابات ونهاية الاسبوع . اجلت حملة التنظيف الى بداية الاسبوع اذ الله اراد لانو العبد فى التفكير والرب فى التدبير .
انا بيتى متالف من 3غرف وصالون ومطبخ وحمام
التنظيف يبدا ياما من الغرف ثم نخرجوا للكلوار اوالعكس وكاين الى يبدا من الكوزينة ويكمل كل واحدة وطاقتها وكل واحدة وبرنامجها فى التنظيف .

انا كل مرة وكيفاه نبدا على حسب المورال

هذه المرة نبدا من الكوزينة نقسم كل نهار واش ندير .كنت من قبل كنوض ندير الميناج لازم كل شيئ فى ضربة لكن حسيتو استنزاف للطاقة .على حساب صحتى واولادى
برنامجى نبداه كالتالى ; نهار ننظف الثلاجة تنظيف عميق من الداخل والخارج . اليوم الثانى الفرن تنظيف جيد واذا كفانى الوقت نزيد الادراج واليوم الثالث للاليمون وتحت البوطاجى والنهار الرابع لغسل الحيطان والسقف والباب والنافذة والنهار الخامس للبالكون الملحق للكوزينة .وكل واحدة وخاطرها .

مع التنظيف ندرجوا تفاصيل اكثر . والويكند مانديرش الميناج . تنظيف يومى وخلاص

بالمناسبة قريت بزاف لاخوات فى منتديات كثيرة وتعلمت منهم كثير ربي يجازيهم كل خير وكل هذا بفضلهم لانهم سهلوا علي كثير . بلا ماننسى منتدنا الحبيب اللى اصبح جزء من حياتى اليومية . شكرا جزيلا

لى عودة اذ الله اراد

 

[ام عبد الرؤوف]

رد: الميناج كومبلى

السلام عليكم اختي انا الكزينة نخليها في الاخير خلاص يكون رمضان لحق ونوجد مرة وحدة الماعن الخاصين بيه باش ما نعاودش الخدمة كل مرة نبدا بالصالة نحي الريدوات ونغسل الزرابة ونغسل النوافذ ونفوت مسحة على الحيطان وطبعا البيبليوتاك نخرج الي فيها ونغسلو كامل ونشيحو مليح ونردو لبلاصتو مع تغيير الديكور طبعا ووووو هذا نلشغل نخصصلو يوم واحد خاتر تبقى امور الدار من غداء واولاد من جيها اخرى وايضا باش ما نتعبش بزاف
لي عودة

 

[السيدة إلهام]

رد: الميناج كومبلى

صباح الخير عليكم

حسبت الموضوع هادف نلقاه نوصل للصفحة 15 ومثبت لآهميته في حياتنا اليومية ؟؟

المهم أنا نبدا الميناج بغسل الحيوط ندير سطلة ماء وصابون وندير جفافة على الفريطوار ونطلع ونهبط ونحاذر كي نعود عند اقفال الكهرباء لاني اصلا نغلق الكونتور ونجفف بجفافة جديدة ونمسح مليح باه مايبقاش أثر للصابون

نحي السدّة على زوايا السقف حتى وتكون ماكاش باه نمنع التصاق التراب فيه ونروح لاقفال الكهرباء ثاني نمسحهم بفوطة جافة ونمسح الابواب والنوافذ وماننساش مقبض الباب والنافذة

كي نكمل كل البيوت طبعا مش في يوم واحد نخدمهم كل يوم دارين ( الدار مش كبيرة بزااف )

نرجع للزور الا كنت بصحتي نغسلهم في الدار نديرهم على بسينة كبيرة وندير ماء سخون وصابون وبرجليا نعبّز عليهم ونبدل الماء والصابون حتى نشوف الماء يخرجلي نقي نديرها على كرسي ونفتح تيو عليها حتى يروح الصابون كامل ونعصر مليح ونخليها على كرسي حتى يقطر الماء ونديرها تشيح والا نبعثهم للافاج يغسلهملي

كي نكمل نلمدهم في درا ومن بعد في ساشي نيلون من النوع الكبير ونخبيهم في بلاكاغ المفروشات

نغسل الريدوات وتابيات الأرض ونابخون ونمسح المابل عندي

أخر شي نجفف الأرض ونرجع كل حاجة لبلاصتها

كما قالت أخت قبلي الكوزينة أخر شي نبدا بالثلاجة كويزينيار سلل المواعين والسنّي ومواعين القهوة ثم المواعين اليومية المهم كوزينة من سقفها لارضها نخليها تشعل وكي يقرب رمضان ندير فيها المواعن الجدد ونعبي التوابل ونعبي بلاكاغي بمصروف رمضان ( زيت ، تمر ، فواكه مجففة ووووو .... )

ان شاء الله نكون افدتكم ولو بالقليل ونزيد نرجع الا قدرت نصّور

 

[ام الحلوين]

رد: الميناج كومبلى

السلام عليكم
اختي فكرة مليحة ان شاء الله نفيدو و نستفادو
انا عن نفسي ماعنديش وقت للميناج لا قبل رمضان و لا بعدو،المهم كل مرة نقي بلاصة قصدي مرة نقي الكوزينة من الفوق للتحت و الفريجيدار و الكوزينيار و (الكارثة ) لي نلقاوها موراها هههه ،و يوم نقي الصالون و يوم لي شومبر عندي 2 نقيهم و نمسح غبرة و نخمل الخزاين و نغسل التواقي و البيبان و يوم للحمام عندي مع المرحاض يعني نقيهم مع بعض و كل مرة نعاود يعني نبقى 10 ايام حتى 15 يوم و نعاود ،هكذا مايتوسخوش بزاف و تاني كي نقي مانتعبش و ماعنديش حاجة نظل نحك فيها

 

[ام الحلوين]

رد: الميناج كومبلى

و شغلي اليومي كي نوض الصباح نوجد القهوة لمخلوقي و وليداتي و كي يخرجو يقراو و باباهم يروح يخدم نرجع انا نغسل الماعن و نقي الكوزينة و في نفس الوقت نطيب الفطور و العشا و في اغلب الاحيان نطيب غير العشا في الفطور نكون وحدي و نفتح التواقي باش الدار تتهوا و على 11 نكون تهنيت من الكوزينة نروح نخمل الصالون غير شوية اذا لولاد حطو حاجة في لرض و عادة نخملو في الليل كي يرقدو و نروح تاني لي شومبر نسقم الفراش و نغلق التواقي و نبقى قااااااااعدة حتى يجو لولاد من مدرسة يشربو حليبهم و نغسل الكيسان نستى وقت العشا نسخنو و نزيد سلاطة و بعد العشا نغسل الماعن و نمسح الكوزينة و نروح نرقد

حكيتلك حياتي كاملة ههههه

 

[ام اشراق]

رد: الميناج كومبلى

السلام عليكم
مرحبا بجميع الاخوات اللى تدخلو ا بمشركاتهم لاثراء هذا الموضوع اليوم بديت بالثلاجة نضفتها تنظيف عميق غدوة رايحة نزل الصور ونتكلم مع اكثر تفاصيل
مرحبا بالاختين ام عبد الرؤوف و السيدة الهام واهلا باخت ام الحلوين بارك الله فيكم راكم جايبينها زيدو واصلو باه نعمم الفائدة وكل الى يدخل يستفيد . لى عودة ان شاء الله

 

[ام اشراق]

رد: الميناج كومبلى

السلام عليكم واهلا بيكم مرة اخرى كيما وعدتكم نبداو على بركة الله :

قلت بيما انو نهاية الشهر والثلاجة فارغة نبدا بيها . نحيها من لابريز نفرغ جميع المحتويات ونغسلها بالازيس والجافيل ولاماكن الصعبة بفرشاة الاسنان نمسحها بالماء والخل ونفس الطريقة للكونجيلاتور . نحى اغراض من فوقها لانو اي حاجة تتودر نلقوها فما مفاتيح . بريكى .دواءالخ..... انا نمسحها لانى نغطيها .
نغسل الحيط الى موراها ونشفو ونغسل الارض بالازيس غبرة خل وشوية ماء ونحك انا عندى قرانيطو او ناخذ نص حبة قارص نحط عليها مغرفة صغيرة ملح الليمون ونحك ثم نمسح الارض بالماء والجافيل والصانيبو وازيس . نرجع الثلاجة مكانها. نكمل التسياق . نفرشوا ورق الالمنييوم فى الكونجيلاتور ومتحت االفراش البلاستيكى نعاود نرجع كل حاجة مكانها فيما يخص الخضر توضع فى علاب بلاستيكية بعد مانفرش فيها ورق المطبخ والجرائد المكتوبة بالفرنسية لكن انا نفضل ورق اللى يفرشوه على الطاويلات راه يتباع بالميزان.
فرشوا الورق ونستفو الخضرة اومبعد نغطيها من فوق ونغلق هذ الطريقة نستعملها للجزر البيتراف القارص
تحكم اكثر من شهر فيمايخص اللوبيا الخضرة .الطرشى .الخيار .الفول والحشاوش نفس الطريقة لكن المدة اقل . الطماطم نفرشولها ونغطيها لكن مانغلقش عليها فيما يخص الشفلور الكرنمبيط والبذنجان نغلفوهم
بالبلاستيك الغذائى الشفاف film alimentaire اما الجلبانة نفضل نقيها ونديرها فى زجاجات بلاستيكية والى المجمد وطريقة التفوار وان شاء الله كل واحدة اومبعد تعطيلنا طريقتها فى حفظ الخضروات فى المجمد بيما انو رمضان على الابواب ان شاء الله
والاكياس الى تفرغى منهم الخضرة هاهى الطريقة رايحة تحتاجيهم الى الملتقى

 

[ام اشراق]

رد: الميناج كومبلى

السلام عليكم : ;وين رحتوا قاع يالفحلات وقيلا ا الربيع شفتو الحال شباب رحتو قاع ترقدو وخليتو الميناج ايا شوية نشاط باه نكملوا.

اضافة الى ماقيل من قبل نكملوا مع الكوزينة الليليمون نفرغوا منو الماعن نغسلهم ونحطهم على جهة

نمسح السقف بالماء والجافيل نشفوه مليح . نمسح فوق الخزانة اوالاليمون بالماء والخل وشوية ازيس غبرة نشفوا ونعاود نغلفوا باوراق الجرائد او قطعة بلاستيك ونثبتها بدبابيس لازم يتغلف لانو يرفد بلاوي كثيرة

من الدهون والغبار نغسل الجوانب واالابواب ونشفهم بقطعة قماش بعد ماغطسنها فى شوية زيت الزيتون والقارص او فازلين ماتستعمليهاش والاحسن من هذو لlingettes bébé يسوو الهوايل تمسح الخزائن التلفاز طاويلات الخشب الخ..... اومبعد نكمل نمسح زجاج بمنظف الزجاج وقطعة جينز النوع اللين نعم الجينز ماتضلى تحوس على جرنان ماوالو . نمسح المواعن واللى مانستعملهومش كل يوم نغلفهم ب film
alimentaireراها فكرة التغليف تنقص عليك شحال ونرجع كل حاجة بلاصتها

فيما يخص الفراش( كوفيرتات تابيات ....) كيما قالت الاخت الهام الى منجمة وعندها وين تنشر تغسل الكمية

الى تقدر عليها ولا كي حالتى بروبلام تاع النشير وزيد الماء كل مايجينى الماء نغسل بالزوج حتى نكملهوم

لى عودة ان شاء الله

 

[ام اشراق]

رد: الميناج كومبلى

السلام عليكم

معذرة اخواتى لانى ماكملتش معكم ملف الميناج لظروف اضطرارية . لكن فى الايام المقبلة رايحة نكمل معكم التقرير وبالصور ان شاء الله

 

[ضيوف وسـنغادر]

رد: الميناج كومبلى

ان شاء الله غدوا نحكي على الميناج بيسك درك راح الحال
والطاقة فابلة
نحكي ان شاء الله على الميناج مع ماما وكم انا شاطرة في ذلك هههه
تحياتي

 

[أم بسمة]

رد: الميناج كومبلى

مشكورة اختاه على الموضوع المهم هدا ما يحير ديما المراة لكن الأهم هو الميناج يأجل حتى يخلصو لولاد لقراية لازم نوفروهم وقت كافي باش نعاونوهم و ما نفرفدوهمش خاصة لي عندها يعقبو شهادة التعليم الأساسي او المتوسط أو الباكالوريا الميناج يتبع فينا يتبع مكانش هربة أنصحك أختاه باه تبداي بالغرف تغسي ملابس الشتاء وكدلك الأفرشة و الأغطية فرغي الغرف و أغسلي الحيوط و السقف بعد ما تنشفيهم ولي للمابل من مسيح و رجعيه لبلاصتو بعد تغيير في الديكور باش تكسري الروتين ثم ولي للصالون نفس الشئ أخيرا الكوزينة باش تبقى نظيفة لوقت رمضان ربي يعطينا الصحة برك

 

[ام اشراق]

رد: الميناج كومبلى

ان شاء الله غدوا نحكي على الميناج بيسك درك راح الحال
والطاقة فابلة
نحكي ان شاء الله على الميناج مع ماما وكم انا شاطرة في ذلك هههه
تحياتي

اهلا بيك ياشطورة ربي اخليك لولديك

مشكورة اختاه على الموضوع المهم هدا ما يحير ديما المراة لكن الأهم هو الميناج يأجل حتى يخلصو لولاد لقراية لازم نوفروهم وقت كافي باش نعاونوهم و ما نفرفدوهمش خاصة لي عندها يعقبو شهادة التعليم الأساسي او المتوسط أو الباكالوريا الميناج يتبع فينا يتبع مكانش هربة أنصحك أختاه باه تبداي بالغرف تغسي ملابس الشتاء وكدلك الأفرشة و الأغطية فرغي الغرف و أغسلي الحيوط و السقف بعد ما تنشفيهم ولي للمابل من مسيح و رجعيه لبلاصتو بعد تغيير في الديكور باش تكسري الروتين ثم ولي للصالون نفس الشئ أخيرا الكوزينة باش تبقى نظيفة لوقت رمضان ربي يعطينا الصحة برك

منورة ياخت بسمة ويلا تبعتنى من البداية انا قلت كل واحدة تمد معلومة . طريقتها فى الميناج مواد التنظيف الى تستعملهم وهكذا ندوا معلومات على بعضناوكيما قلت من قبل كل يوم حاجة تنظيف عميق مع التنظيف اليومى ماتحسيش . وبنسبة للفراش كل خاطرة نقص كوفيرطة ولا زوج وهكذا حتى نكملهم
وكيما قلتى الميناج مامنوش هربة .راها نفس الخدمة تتعاود الطريقة والمعلومات للافادة فقط. ا . وكل واحدة وخاطرها واللى يناسبها

سلام

 

[جوهرة الهناء]

رد: الميناج كومبلى

السلام عليكم و رحمة الله تعالى و بركاته
الموضوع هايل بصح fatigant .انا في الحقيقة بما اني نخدم ما زال ماخممتش في الميناج pour le moment بصح علابالي يجوز على يديا دوك نحكيلكم كيفاش راني رايحة ندير بادن الله .
بما ان دارنا كبيرة تتكون من chambres7,cuisine,2 couloires,et le sanitaire
لازم شهر باش الواحدة تكمل ههههههه اول حاجة نبدا ان شاء الله ب الweek end نغسل الفراش كل مرة شوية (زرابا مخايد couvertures)

نروحو للكوزينة لازملها يومين النهار الاول نقي الثلاجة و الفرن ب produit تاعو ينحي كامل السبك . نظف les éléments avec leur produit parce qu' ils sont blancs donc c'est difficile de les nettoyer.
نغسلو الاواني لي فيهم و نشفوهم . نغسلو غطاء الطاولة و تاع النافدة و تاع الباب . نغسل سلة تاع الاواني .
اليوم الثاني نغسلو الجدران تاع الكوزينة نحكو "فايونس" و نظفو تحت البوتاجي.
في ما يخص sanitaire في نهار نظفو الفايونس ب النظاف و le sol ادا كاين اماكن صفراء في الطرف تاع la dalle de sol نستعملو فيها "روح الملح" خاصة للمرحاض
نروحو للكولوار نغسلو الفايونس بالنظاف و لا نديرلو رغوة هادا في يوم واحد
اففففففففففففففف عييييييييت
ومبعد نروحو للغرف كل نهار نظف 2 غرف نرتبو الخزاين لي بلاكار نمسحو الغبرة نمسحو الرتيلة هههه ادا لقيناها نظفو المرايات تع الخزاين وتاع الكولوار ...
يبقاولنا ليبالكون نديرولهم نهار مع الدروج و la cour نغسلو الجدران تع البالكون و نزيد معاه البيبان و النوافد من برا نغسلهم برغوة و نمسحهم و نحكو الدروج و لاكوغ
و بهدا نكونو كملنا الحاجة الكبيرة كاينة حاجة هاد الخدمة مانديرهاش وحدي نتعاون انا و اختي

 

[ام اشراق]

رد: الميناج كومبلى

السلام عليكم و رحمة الله تعالى و بركاته
الموضوع هايل بصح fatigant .انا في الحقيقة بما اني نخدم ما زال ماخممتش في الميناج pour le moment بصح علابالي يجوز على يديا دوك نحكيلكم كيفاش راني رايحة ندير بادن الله .
بما ان دارنا كبيرة تتكون من chambres7,cuisine,2 couloires,et le sanitaire
لازم شهر باش الواحدة تكمل ههههههه اول حاجة نبدا ان شاء الله ب الweek end نغسل الفراش كل مرة شوية (زرابا مخايد couvertures)

نروحو للكوزينة لازملها يومين النهار الاول نقي الثلاجة و الفرن ب produit تاعو ينحي كامل السبك . نظف les éléments avec leur produit parce qu' ils sont blancs donc c'est difficile de les nettoyer.
نغسلو الاواني لي فيهم و نشفوهم . نغسلو غطاء الطاولة و تاع النافدة و تاع الباب . نغسل سلة تاع الاواني .
اليوم الثاني نغسلو الجدران تاع الكوزينة نحكو "فايونس" و نظفو تحت البوتاجي.
في ما يخص sanitaire في نهار نظفو الفايونس ب النظاف و le sol ادا كاين اماكن صفراء في الطرف تاع la dalle de sol نستعملو فيها "روح الملح" خاصة للمرحاض
نروحو للكولوار نغسلو الفايونس بالنظاف و لا نديرلو رغوة هادا في يوم واحد
اففففففففففففففف عييييييييت
ومبعد نروحو للغرف كل نهار نظف 2 غرف نرتبو الخزاين لي بلاكار نمسحو الغبرة نمسحو الرتيلة هههه ادا لقيناها نظفو المرايات تع الخزاين وتاع الكولوار ...
يبقاولنا ليبالكون نديرولهم نهار مع الدروج و la cour نغسلو الجدران تع البالكون و نزيد معاه البيبان و النوافد من برا نغسلهم برغوة و نمسحهم و نحكو الدروج و لاكوغ
و بهدا نكونو كملنا الحاجة الكبيرة كاينة حاجة هاد الخدمة مانديرهاش وحدي نتعاون انا و اختي

شكرا اخت جوهرة على المرور وربي اقدرنا ان شاء الله . نصيحة ياخت جوهرة اياكى واياكى روح الملح فالفايونص ولا داد دوسول راه ياكلهم فى دار عجوزتى حتى عاودوا قاع salle de bain والرحاض اكرمكم الله ابهدل الدنيا الكرلاج قاع يتحفر . الخل دريه فى الاماكن الصعبة مع شوية ازيس غبرة وحكى بحلفة تاع حديد . كى يتنقى لازم مرة على مرة نديروا الخل فى الليل وصباح نغسلوه باه مايزيدش ادير ذيك الطبقة الصفراء دمتم

 

[جوهرة الهناء]

رد: الميناج كومبلى

merci beaucoup pour ton conseil