اين المجربات للوحم

[ام براءة2014]

السلام عليكم
اولا عيد سعيد الي كل العاملين والعاملات
اخواتي انا منذ بداية الوحم لم اكتب في هذا المنتدي لاني في حالة الله وحده اعلم بها وحامي فيه غثيان ودوخة واغماء انقطاع تام للشهية حتي الماء واصبت بجفاف مما ادي الى تشقق قدمي بشكل فظيع والطامة لكبرى انني لم اعد اطيق رائحة ابني ولا كلامه
فهل من منجد وهل من مجرب وهل من مدبر*بعد الله*طبعا افيدوني جزاكم الله خيرا

 

[nanoche]

رد: اين المجربات للوحم

فترة و تجوز أختي ربي يقدرك عليها
أنا في الوحم كرهت حتى رائحة زوجي و الحمد لله أنه كان متفهم
اصبري يا اختي ياك ماشي اول مرة ؟
​

 

[AWDIESL]

رد: اين المجربات للوحم

اصبري ختي هادي فترة صح صعيبة بصح ان شاء الله ماطولش و تقدري تجاوزي هاد الحالة

انا كان الوحم تاعي صعيب تان ندوخ بزاف تاع وجهي نركب فالطوموبيل و نديبلاسي + نتقيا بزاف حاشاك

مي كي لحقت 4 شهور خلاص عليا كلش

و نتي نتمنالك نفس الشي

حكيتلك باش ماتحسيش روحك وحدك ههه
كاين لي بالاك اكتر منك

بالتوفيق اختي​

 

[وردة أوراسية]

رد: اين المجربات للوحم

و عليكم السلام و رحمة الله و بركاته

مبروووك عليك الحمل ربي يسلك وحالك على خير

انا مجربتش لكن شفت ختي و دكا فاتت هذه المرحلة صح تعبت بزاااف كيما تقولي وصلت حتى للصيروم و السبيطار كي قطعت الماكلة
منخلعكش لكن هادي حاجة طبيعية المهم البيبي راه بخير حاولي تاكلي و معليهش كي تردي
راها فترة و تفوت كي يتناصف الثالث تدخلي للرابع ترجعي بخير ان شاء الله
انا تاني ختي قطعت الما متشربوش خلاص لكن عوضاتو بالفواكه و دكا الحمد لله ربي يسلكها على خير
و اذا عندك الحريق كولي الجزر مليح
بالشفا عليك
​

 

[وردة أوراسية]

رد: اين المجربات للوحم

نسيت نقولك ختي كرهت خويا الصغير متحملوووووووش كي يقعد معانا تنوضو تقولو روح بدل وجهك عليا

^_^

اذا وليدك زين معليهش راه تجيبي كيفو​

 

[أم بسمة]

رد: اين المجربات للوحم

مبروك عليك أختاه الوحم هو صعيب بصخ يختلف من مراة الى أخرى كاينة لي يجيها بالرقاد و لي يجيها بالهوشة تكره واحد من العايلة و تحب تتهاوش وكاينةلي تكره ماكلتها و ريحة الطياب بزاف لحوايج يصراو للمرأة أنصحك بالصبر و تخطي المرحلة بكل جدارة و تحدي لخاطر كل هدا حالة منتهية مدتها 4 أشهر و 10 أيام
أنصحك في الصباح متنوديش من السرير حتي تاكلي تفاحة و تريحي حتى تتنحالك الدوخة و تفرظيش على روحك الماكلة تناولي سيروا خاص بالإرجاع ربع ساعة قبل الأكل و كولي غير الماكلة لي تحبيها و غيري المكان مثلا روحي لداركم او اي مكان للتغيير فقط تتحسن نفسيتك أو أشغلي نفسك بأي عمل غير مجهد

 

[AMANITA]

رد: اين المجربات للوحم

salam alaikm okhti om baraa.....ana rani nshof bili raki fi shahrak lowil..... w sralak hada kaml .....ma3nato raki tkhami bizef fi hamlk hada ci pour sa sralk hak......halak w aalaho a3lam ...t'essayé tansay shwi anki haml w tani thawli dayml tlati rohk .........w kima galolk koli les fruit et les salad lakhatr fihm l ma........w matansaysh khti bili haltk hadi rayha tdhor le bébé ....... ana nitmanalk tirtahi b l khof ...... wrabi m3ak

 

[hasna.m]

رد: اين المجربات للوحم

يا اختى واش نحكى واش نخلي ... الوحم ما عندو حتى دوا غير الصبر

وتذكري انو راح يجيك طفل ينسيك كل هذاك الهم ... لازملك تاكلى على جال البيبي

وربي يسهلك رانى حاااآآ سة بيك
​

 

[سماح4]

رد: اين المجربات للوحم

انا ثان راني تقريبا كيفك كرهت ريحة بنتي وكل الروائح والاكل ودايما فالمشاكل مع زوجي ...بصح زوجي مش عارفة يمكن مش حاس بيا لاني في الحمل الاول كان اخف. ربي يعينا.

 

[souso mano]

رد: اين المجربات للوحم

السلام عليكم أختي أنا عضوة جديدة في المنتدى اليوم وين قريت الموضوع نتاعك حبيت نقولك كل شيئ مبروك وربي سلك وحلك على خير انشاء الله الوحم واعر تسوفري المرأة مسكينة مي كل واحدة كيفاه كيما أنا 9 أشهر كاملة ماخطانيش الوحم وكرهت راجلي والحمدلله كان علابالو وصبر معايا وعاوني مالقري كنت قلوقة بزاف في فترة لوحم والحمدلله جاز على خير واش حبيت نقولك لازم راجل ايكون متفهم باه هكذا ايجوز على خير أوماتقلقيش لخاطر أنا كنت قلوقة خرجة في بني خرج خفيف وقلوق

 

[chichima]

رد: اين المجربات للوحم

انا عكسكم عندي شهر حمل و مجانيش الوحم غي شوية نعاس وعياء متقييت موالو وعندي شوية الم في البطن السفلى ومعنديش دم احمد لله

 

[iman13]

hadi haja normal ana rani f 7eme mois w rajli kon nsib manchofofch mais lhamdoulah matfahamni psq machi b yadina hadi lhaja

 

[asma2090]

يا اختي ولله حالتي كيما حالتك ربي يخرجنا من هذا الوحم ولله انا بنتي كلما تقرب ليا نتقيا تالي راجلي منيش حاملاتو طول و راهم غايضيني ياسر بصح الله غالب واش نديرو ربي معنا برك

 

[RoseBonbon]

رد: اين المجربات للوحم

الحمد لله الوحم مكانش صعيب بزااف

كنت نرد حاشاكم بمجرد ما نوض مالفاراش الصباح... نروح نجري للتواليت

وكرهت فترة البصل.. واللحم.. راني فالشهر الخامس لكن معندي حاجة فاللحم والدجاج

نحب الخضار وكان جايني ثاني على القرنون المغلي ونغمسو فالقارص بالزيت


ما كرهت حتى واحد بصح وليت بلخف نتقلق ونحب نزقي على الناس ههههههههه

 

[أم لينة]

رد: اين المجربات للوحم

الحمد لله الوحم مكانش صعيب بزااف

كنت نرد حاشاكم بمجرد ما نوض مالفاراش الصباح... نروح نجري للتواليت

وكرهت فترة البصل.. واللحم.. راني فالشهر الخامس لكن معندي حاجة فاللحم والدجاج

نحب الخضار وكان جايني ثاني على القرنون المغلي ونغمسو فالقارص بالزيت


ما كرهت حتى واحد بصح وليت بلخف نتقلق ونحب نزقي على الناس ههههههههه

السلام عليكم اختي ربي يسلكك على خير ان شاء الله .. راكي كيفي كيما كنت نتوحم لكن انا زيادة عليك كرهت العطور تاع راجلي ..

 

[RoseBonbon]

رد: اين المجربات للوحم

شخصيا ما كرهتش العطور تاع راجلي

مي وليت نشم مليح.. كي البارجي آلمون هههههه

وكي نطيب.. غدوة منذاك الصباح نبقى نشم ريحة الطياب نتاع الليل

مع أن زوجي يقولي مكاين حتى ريحة

جاني برك على الشلايظ والخضرة

 

[أمنياتي]

رد: اين المجربات للوحم

ماينفع أي شيء غير الصبر فترة وتفوووت ، ربي يكملك أختي وتفرحي بمولودك.