بما انو قريب رمضان الكريم ادخلو راح تعرفو

[ويبـقى الأمــل]

مساء الخير واش راكم

بأننا ان شهر رمضان المبارك راهو قرب حبيت نديرلكم موضوع انو نتكلمو على تحظيرات الرمضان واش توجدو وتخبو

حيث انو لكل ربة بيت عاداتها وتحضيراتها لهاد الشهر الكريم في مجال الطبخ يعني واش توجد من لوازم واش تجمد......الخ وكل واحدة فينا تمد فكرة معينة باه نستفادو من بعض
وتاني راهو صيف مانقدروش نقعدو يوم كامل واحنا في كوزينة والله نموتو من السخانة :-o

راح نبدا نحكي انا

نوجدو الجلبانة والتمر كامل نضفوهم ونحطوهم في مجمد وثوم نقشرو كمية كبيرة ونخبوها
وساعات نعملو طماطم مرحية نجهزها هيا تاني

ونتوما ؟؟؟

ان شاء الله يعجبكم موضوع ونلقا فيه تجاوب

​

 

[ايمان الهدى]

رد: بما انو قريب رمضان الكريم ادخلو راح تعرفو

احنا اختي تحضرنا معنويا وربما الميناج اما التخزين فلم نقم بتخزين اي شيئ كل شيئ في وقته نشروه وموضوع جميل ومزيد من المشاركة للعضوات وبالتوفيق للجميع

 

[nada242008]

رد: بما انو قريب رمضان الكريم ادخلو راح تعرفو

وعليكم السلام
اللهم بارك لنا في رجب وشعبان وبلغنا رمضان
انا عايلتي صغيرة مانكونجلي مانحضر حتى حاجة اصلا لي نطيبها تقعد ومانكثرش وخصوصا رمضان في الصيف يعني نكثرو من العصائر والمشروبات والفواكه اكثر من الاطباق المالحة والحلوة
وايضا مانفضلش الخضر المجمدة تنقص قيمتها الغذائية وتحكم لبلاصة في الكونجيلاتور
خلينا في الفراش ههه قصدي الطازة احسن وافيد.

 

[ام الحلوين]

رد: بما انو قريب رمضان الكريم ادخلو راح تعرفو

مشكورة اختي على الموضوع
انا عن نفسي ماشي موالفة نوجد نشري كلشي في وقتو بحكم عندي الثلاجة صغيرة و المجمد تاني
لكن هاذ العام باذن المولى حبيت نحضر شوية لوازم لي ياخذو الوقت ،هاذ العام راني نربي و لولاد يجيهم حالهم مع وقت الطياب
و تاني يكون عندنا وقت لقراءة القران

قلت نوجدو لاصوص تومات بالزيادة و نكونجليها
و الحميس تاني مع رمضان ماشي كل يوم نشوي في الفلفل
نخدم مقروض و نكونجليه
و اللحم مرحي مانحبش نكونجليه ماشي طايب دايما نطيبو بالبصل و الثوم و التوابل كيما تاع البوراك و كي نستحق نخرج كمية منو مثلا للبوراك و لا كروكات و لا مع باستا لولاد

هذا واش تفكرت

حبيت نسقسيك موالفة تكونجلي ( التمر ) ؟؟؟؟؟
موالفة نجيبو من البلاد و نخليه في البوتاجي و يحماض نرميه

 

[nada242008]

رد: بما انو قريب رمضان الكريم ادخلو راح تعرفو

ام الحلوين التمر يتكونجلا واجبدي كل يوم قيس صحن يذوب مممم يقعد معسل كالجديد

 

[ام الحلوين]

رد: بما انو قريب رمضان الكريم ادخلو راح تعرفو

مرسي ام ندى ان شاء الله المرة الجاية نكونجليه
مشكورة مرة اخرى

 

[ويبـقى الأمــل]

رد: بما انو قريب رمضان الكريم ادخلو راح تعرفو

بارك الله فيكم على ردود

صراحة ماكنش الى من الطازج بصح ساعات نحب نوعو كيما جلبانة وكيما عصير تشينة صراحة ماجربتوش

اكثر شي نعملو هو نكلونجو التمر والله يبقى كانو جديد

بارك الله فيكم مرة اخرى على ردود

 

[ام ريهام]

رد: بما انو قريب رمضان الكريم ادخلو راح تعرفو

شكرا على الموضوع
انا كنت صح نوج كما الجلبانة والقرنون نشري ونكونجلي بصح هاذ العام قالي اخطيني من الكونجلي ايا والله ماني دايرة حاجة سوا التمر لانو مستحيل اجيبو طازج اكيد حتى لي يتباع راه كونجلي امالا انا كونجليتو وهو طازج ومن النوعية الجيدة وما يصرالو والو والباقي كلشي يجي في وقتو

 

[رنيم الصمت]

رد: بما انو قريب رمضان الكريم ادخلو راح تعرفو

انا مذا بيا نطيب و نحطهم في الطباسا و نغلفهم و نكونجليهم و نجبد للميكرو اوند للطابلة ديراكت هههههه

 

[ندى الورود]

رد: بما انو قريب رمضان الكريم ادخلو راح تعرفو

وعليكم السلام
يعطيك الصحة سامية على الموضوع
انا ما نوجد والو نكونجلي الجلبانة برك نحب نديربيها سلايط ونحتاجها في كل الاوقات يعني ماشي لرمضان برك
والباقي ولا حاجة نكوجليها نحبو كل شي جديد


​

 

[ام ريهام]

رد: بما انو قريب رمضان الكريم ادخلو راح تعرفو

رنيم يسما انت تحبي في رمضان ترقدي كي يلحق وقت الفطور تجبدي ودخلي في الميكرواند وتاكلو هي صح والله هايلة بصح شكون لي يقبل بيها ههههههههههههه

 

[ملكًة الاحسآس]

رد: بما انو قريب رمضان الكريم ادخلو راح تعرفو

وعليكم السلآآم
اممم بالنسبة لينآ نكونجليو الجلبآنة شويآ برك
يآربي نطيبوهآ مرة لبآبآ برك ، امآ الشي لآخر نكملو بيهآ تلوين السلطآت ^^
عندك البطآطآ والبصل كي يقرب رمضآن بوحد 4 ايآم نشروو بزآف ونخلوهآ
بويسك أكره حآجة عند بآبآ في رمضآن قوليله جيبلنآ البصل ولآ البطآطآ مآلآ رجع وحده يجيبلنآ تآع الشهر كآمل
حنآ مآنكسرولوش رآسه كل يومين بويسك نستهلكوهم بزآف ، وهو يتهنى
الشي لآخر كلش طآزة قآلوهآ لي قبلي ، وربي يقدرنآ عليه ان شاء الله

​

 

[hadda0425]

رد: بما انو قريب رمضان الكريم ادخلو راح تعرفو

انا نكونجلي الجلبانة برك وهذا العام كونجليت الفراولة تاني وعصير الليمون وقشور الليمون والبرتقال اول مرة نجربهم كي نستخدمهم نردلكم لخبر
وراني ناوية نكونجيلي البرتقال
​

 

[حاملـة المسك]

رد: بما انو قريب رمضان الكريم ادخلو راح تعرفو

السلام عليكم
كما قالو الاخوات لقبلي من غير الجلبانة مكنجليت حتى حاجة
و لا راني موجدة عصائر مركزة ...
السخانة سخانة .. بزيادة علينا كاس لبن بقر و تمرات
مغيرفات شربة .. بوركا ... و لله الحمد
السهرة مقرقشة و أيس كريم .. و الف حمد ..

‫اللهم بلغنا رمضان وانت راض عنا ... ​

‎

 

[ام سراج الدين وملك]

رد: بما انو قريب رمضان الكريم ادخلو راح تعرفو

السلام عليكم ورحمة الله
موضوع مليح مشكورة أختي
أنا تحضيري لرمضان ندير ميناج كامل للدار ونشري لفريك هذا مكان ورمضان كريم للجميع​

 

[اوراق الصييف]

رد: بما انو قريب رمضان الكريم ادخلو راح تعرفو

حنونة متنسايش بلي في رمضان السعار تولع وعلى هذا السبب نغتنم الفرصة ونخبي البصل مرحي الطماطم تشويها وتنقيها وترحيها ومثلها مثل الفلفل والثوم كذلك الفلفل المصبر الجلبانة الحمص كذلك كل مايخص طاجين الحلو ويكون كل نوع من الخضروات في كيس بلاستيكي اي بورت مونجي وحدوا كذلك اللحم المرحي وغير المرحي وهكذا تبقاي تشري حاجات قليلة فااغلب الحاجات تكوني وجدتيهم حتى رب السرة ميتأثرش من الناحية المادية

 

[نبض الحياة]

رد: بما انو قريب رمضان الكريم ادخلو راح تعرفو

وعليكـــــــــم السلآلآم حبيبتي
وينتآ درت هآد الموضوع ومآ بيبيتيليش
يعطيك الصحة حبوبة
فكرة هآيلة
القنبلة رقم 2 :p
نستفآدوا من البنآت
شخصيآ انا وماما مآ نوجدوا والوا ما نخبوا ما نحضروا
كل شيء في وقتوا
برك ممكن كآش ما نجهزوا مآعن وخلآص
بابا يكثر البطاطا والبيض ودوك السقآيط: فرمآج ومآيونيز ويآغوورت وجمآعتهم
واكديلي على البوراك خخخخ
​

 

[ويبـقى الأمــل]

رد: بما انو قريب رمضان الكريم ادخلو راح تعرفو

وعليكـــــــــم السلآلآم حبيبتي
وينتآ درت هآد الموضوع ومآ بيبيتيليش
يعطيك الصحة حبوبة
فكرة هآيلة
القنبلة رقم 2 :p
نستفآدوا من البنآت
شخصيآ انا وماما مآ نوجدوا والوا ما نخبوا ما نحضروا
كل شيء في وقتوا
برك ممكن كآش ما نجهزوا مآعن وخلآص
بابا يكثر البطاطا والبيض ودوك السقآيط: فرمآج ومآيونيز ويآغوورت وجمآعتهم
واكديلي على البوراك خخخخ
​

نعجبك انا صح هههههه احم احم :p
تعجبيني كي تقوليلي قنبلة بصح بلاك نتغغر ههههههههههه
والله العظيم كيفك نحضرو غير الجلبانة وتمر يكونو قلال بزاف وتعرفي الغلاء
زيد طماطم ساعات نشروها ونروحها
وكيما قلتي السقايط هذيك لازم قبل رمضان يكون لزيليمون معمر :-r
​

 

[ام اشراق]

رد: بما انو قريب رمضان الكريم ادخلو راح تعرفو

السلام عليكم
مشكورة اختى على الموضوع القيم كيما قالوا الاخوات طبعا الميناج ومشتريات ولاوزم جدد للكوزينة على حسب الامكانيات .راس الحانوت والفريك الطماطم نشرى كتكون رخيصة نفورها ونرحيها والى المجمد الطرشى الحمرا ء بنفس الطريقة جى هايلة فى الشربة والجلبانة كل مانشرى نلقا ها مليحة نخبى شوية .مانستعملهاش بزاف وزيد مولى بيتى مايحبش الكونجلى ( من ورا ظهروا ) ههههه وزيد فى قضيان الشهر ديما ندير كيلو ولازوج سكر زيادة طماطم مصبرة الزيت اللى نعرف نستهلكها بزاف فى رمضان . ونشروا البصل وبطاطا وسميد والفرينة
واللحم تاع الشربة شيخى يبعثلى حقى نقسمو فى صاشيات ونديروا فى المجمد كيكمل نشرى وفى رمضان نشرى الخضر اللى نسحقها اللحم مرحى قد ماندير والمقلشات كيما قال وليدى العصائر وقلب اللوز والمايوناز الخ ........
ان شاء الله يدخل علينا بالهناء ويو فقناربي الى مايحبه ويرضاه

 

[أم رزق الله]

رد: بما انو قريب رمضان الكريم ادخلو راح تعرفو

يعطيك الصحة اختي على لموضوع

انا ما نكونجلي والو كي يبقاو يومين ولا 3 ايام على رمضان نشري لفريك و ليزيبيس و لعينة و زبيب و لجاج انقيه و نقطعو طراف و ندير فساشيات تاع لكونجيلاتوغ كل ساشي ندير فيها 2 طراف باش كي نجي نطيب نجبد قيس قيس و لحم تاع الشربة تاني كيف كيف ولا السكالوب و اللحم لمرحي و لحوت و الديول و لخضرة و حتى لفاكية و لمشروبات نشري كل حاجة جديدة

و ان شاء الله يا ربي يبلغنا رمضان و نصوموه و نقوموه كما ينبغي