رد: طورطات من مطبخي
بالنسبة لوصفة البافاروا بلفراز او القرص الاحمر كيما سماتو حدة
يتكون من 3 طبقات
الطبقة الاولى جينواز خدمتها ب
2 حبات بيض + 60 غ فرينة + 60 غ سكر + رشة ملح وزاست ليمون
نطيبها في بلاطو ونقطعها بالمول الدائري وهذي اول طبقة
نسقيها بسيرو ونخليها بجهة
الطبقة الثانية
نغسل حبات الفراولة ونقطعهم مكعبات ونضيفلهم السكر حسب الرغبة والذوق وعصرة ليمون ونرحيهم بالميكسور
الكمية لي نتحصل عليها تقريبا تكون حوالي 3 اكواب فراولة مرحية
نذوب 4 م ك جيلاتين غبرة في شوية ما دافي ونضيفها لخليط الفراز ونحطهم على النار ونخلط حتان تهز الغلية ونطفي عليها
نقسم كمية الفراز ..نخلي كوبين للطبقة 2 وكوب واحد للطبقة الاخيرة ونخليها تبرد مليح
نخفق 2 كوب كرام فراش ومن الافضل تكون ماركة مليحة ..نخفقها بالباتور وطبعا حسب الذوق اضافة السكر
نخلط الكريمة المخفوقة مع 2 كوب الفراز لي كنا خليناهم وطبعا برفق واذا لقيتو لونها باهت ضيفو شوي ملون احمر شوية برك باش مايخرجش فاقع ونرجعها للثلاجة
الطبقة 3
كوب الفراز لي احتفظنا بيه نصفيه مليح ونخليه لاخر مرحلة
المونتاج ..نجيب المول لي فيه الجينواز ونحط انصاف حبات الفراولة على الجوانب
نصب خليط الكريمة والفراز ونحطها في المجمد لنصف ساعة
بعد ماتحكم روحها نصب الطبقة الاخيرة ولي هي كوب الفراز المصفى ونرجعها للثلاجة
من الافضل تركها ليلة كاملة في الثلاجة
