1-متى تبدأ التحضيرات الخاصة بالمنزل للشهر الفضيل بالنسبة لكِ؟
بالنسبة لي وتحضيراتي للشهر الفضيل تبدا قبل بدايته ب10ايام لازم نشري ولو حاجة جديدة للمطبخ واكيد المناج رغم اني مش من لي يخلو المناج للمناسبة عندي ميناج في كل وقت نشوف حاجة في داري موسخة لازم نغسلها في الحين والمطبخ عندي كل 10ايام الثلاجة والكوزنيار نجبدهم ونغسل الفاينس لي قريب للطباخة راكي تعرفي واش نلقاو مراها هههه هكذا كي جي اي مناسبة ما نتعبش غير على الخفيف يكون ميناج خفوفي برك.
2-بالنسبة للطعام،هل تُنظمين قائمة المأكولات قبل رمضان أو تتركينها حتى يدخل الشهر الفضيل ؟
بالنسبة للطعام صح قبله باسبوع او حتى 15 يوم كاكثر تقدير نوجد الريفتايما وهي عبارة عن طماطم علب شمبنيون ون ما يونيز البرقوق المجفف المشمش المجفف الزبيب الكيوي المجفف والاناناس كنت نجيب االمجفف لكن لقيت المعلب احسن لطاجين الحلو زيت كورنيشو ذرة والزيتون الكاسي وزيتون بدون نواة راني كنجليت شوية جلبانة للماسيدوان والباقي كلشي يكون طازج فلون المهم هذه قائمة لازم تتشرى قبل رمضان
3-هل تسكنين في بيت مُستقل مع زوجك وأولادك ؟ أو مع بيت عائلة زوجك ؟
اما السكن والحمد لله اسكن في بيت مستقل مع زوجي وبناتي
4-ممكن افادتنا بتجربتك خلال شهر رمضان من التنظيم إلى التنظيف إلى الطّبخ ؟
وخلال شهر رمضان في الصبيحة عاذي اشغال البيت مسيح الغبرة والتسياق واذا كانو ملابس متسخة تتغسل صباح واكيد بعدها دوش باش نتبردو ونقرا ما تيسر من القران الكريم من بعد قيلولة ومنها يجي الشقا لكبير والتخمام واش راح نطيب نوجد البوراك و لي باركات او اي نوع من المقبلات ونبدا في تحضير الفطور واكيد رايح يكون قليل لانو مع السخانة مكاش لي ياكل غير حاجات بارددين وخفاف وربي يقدرنا عليه جميعا ان شاء الله
هذه لمحة بسيطة على التحضيرات قبل واثناء الشهر الفضيل
تنظيف البيت اولا اقوم بمناج كومبلي لكل البيت معدا المطبخ اتركه لقرب رمضان اما الامور الاخرى مثل الفريك اقوم بشراءه حب واغسله جيدا ثم املحه واضعه تحت اشعة الشمس حتى يقرمش ثم ارحيه واسيره معرفتهاش باللغة الفصحى ثانيا الثوم اقوم بتقشيرها وفرمها لكن قبل ان اقشرها اضعها في الماء هذا يسهل عملية التقشير وقبل فرمها اضعها في الكونجلي تتجمد ثم اطحنها واي افادات اخرى انا في الخدمة والسلام عليكم وجزاك الله الجنة
5-نصيحة تُقدّمينها لكل سيدة بيت فيما يخص العناية بالمنزل والمطبخ في الشهر الفضيل ؟ يعني باش تكون شاطرة وتقضي شغالاتها ليه ليه
نصيحتي لي نقدمها لكل سيدة بيت باش دارها تبقى دائما في منزل نظيف خلال شهر رمضان وحتى خلال طول السنة هو استيقاضها مبكرا خاصة في فصل الصيف مثلا 6تاع الصباح تخدم اشغالها اليومية مسيح الغبرة وتسياق وترتيب الاسرة والخزانة وخزانة الاحذية هذا كيد راهي صلات في وقتها وكي تكمل تتحمم وتقرا شوية قران وتقيل وكي تنوض تبدا في تحظير الفطور بهاذ البرنامج والله البيت يكون دائما في قمة النظافة وزيد حتى واذا جاك ضيف الغفلة ما تنحرجيش ابدا
يمكن نخرج شوية على الموضوع لكن حبيت نبه بعض السيدات لي عندها اولاد اكيد هذا يمس باب وهذا حيط وهذا ريدو تاع التاقة .......الخ ويلطخو باي حاجة تكون في يدو ما تظربيش عليها النح وتقولي خلي كاش نهار نغسل لالا سيدتي اغسليها في الحين واذا كان ريدو نقي مكلاه تنحيه كامل وتغسليه انما يكفي شوية ماء في ذاك المكان الملخ وتروح البقة في حينها وتبقى دارك نقية على خاطر اذا خليتي بقعة اليوم ويزدوها غدوة بقعة اخرى وما بعدها رايح اولي الحيط لوحة متسخة من صنع الاطفال وعلى العكس كي تغسليها وتمسحيها في وقتها رايحة ما تديلكش وقت بزاف
6-كلمة ل سيدات اللمة وآنساتها بمناسبة شهر رمضان
بمناسبة الشهر الكريم اتمنى ان يبلغنا الشهر ولنكثر من العبادات لا من النوم وكلمتي لا للتبذير لا لطبخ اصناف متعددة من الماكولات ولا تاكل وترمى في المزابل لالا للاسراف نطبخ قيس ما تاكله العائلة في يومه نوعين من الاطباق تكفي لانه مكاش لي راح ياكل مع هاذ السخانة وانما نشتهي ولا ناكل عصائر وفاكهة واطباق خفيفة صيفة باذن الله نفوز باجر الصيام والثواب واجر عدم الاسراف .
