السلام عليكم جميعا
اللهم يحفظكم يا حباد ربي حتى لوكان قصتي طويلة نحلفكم بالله تقراوها وتنصحوني بالاك هنا نقدر نتبدل ونرجع كيما كنت
بعد ما تسكرت غاع الابواب في وجهي جيتكم هنا تعاونوني وتنصحوني
يا جماعة اخير الله يستركم راهو راسي رايح يحبس من التخمام والهم
المهم انا شابة جزائرية عندي 21 سنة السنة الاخير تاعي في الجامعة
تربيت وسط عايلة ما شاء الله الناس كامل تسهد ب سيرتها
مشكلتي او بالاحرى مشاكلي بدات ملي تزوجو خاوتي في 2010
زوجنا 4 في عام واحد خاوتي الحومة كامل تهدر عليهم وعلى زينهم واخلاقهم وهاد الشي خلانا عرضة للسحر والعين لدرجة ولينا نلقو في السحور عند باب دارنا خاوتي تزوجو وتبدلو علينا و جاو في صف نساهم مع العلم اني طفلة وحيدة بين 6 خاوتي
كي شفت خاوتي تبدلو بعد ما تزوجو حبيت ننتقم من روحي كيفاش كانو ظاغطين عليا مخلاونيش حتى نتنفس لدرجة دارولي الجلباب وانا مش مقتنعة بيه وانا على قدر عال من الجمال
بديت نخرج الطريق مي كنا نقرى ف ليسي بحذا دارنا منقدرش نخرج بزاف شريت تيليفون ودرتو درقة عليهم وربي يغفرلي وش درت بيه و وش هدرت بيه
المهم في مارس 2011 انا جبت الباك و طلعت للجامعة وين لقيت حريتي
درت حوايج راني نادمة عليهم درك
الهم في عامي الاول خويا دخل سطاج تاع les officiers de police
تعرف على صحاب تم في ديسمبر 2011 انا كنت قاعدو مع خويا جا permission قاعد يوريلي في لي فوتو نتاع صحابو جات عيني في فوطو تاع اقرب صاحب ليه عجبني بزاف ومحبش خيالو يفارقني
قعدت سمانة وانا نخمم وش ندير وليت سرقت نيميروه من عند خويا وعيطتلو اتصلت بيه
حكيت معاه 3 شهور من بعد صارحتو بلي انا اخت فلان هو خرج معايا راجل وقالي يا بنت الناس مانقدرش نخون صاحبي وانا راني في سطاج و معلاباليش مصيري وش راح يكون و انا حبيتو بزااف كان في عمري 18 سنة
في جانفي 2012 وكنت سنة اولى جامعي تاني جاو خطبوني بزاف ودارنا كرهو وانا نقولهم لا مانقبلش على خاطر قرايتي
حتى جا خطبني واحد وقالي نقبل بيك وبشروطك هو من نفس منطقتي انا من الشرق مي هو يسكن في تلمسان
دارنا سيفوني عليه وقالولي تقبلي بيه
وانا بقيت بين نارين وعشت مرحلة نفسية متدهورة جدا
الانسان لي حبيتو ما ديتوش المهم بقيت 4 اشهر وانا مخطوبة ومشكلتي نخون في خطيبي ونحكي مع صاحب خويا لي نحبو ونخون في صاحب خويا ونحكي مع رجال الاخرين كنت في قمة النذالة
في ماي 2012 صارحت اللي كان خطيبي وقتلو عندي انسان في حياتي
حطمتو باختصار بلا ما نحكيلكم المشاكل لي صراولي فسخت خطوبتي منو
من ماي 2012 حتى ل ماي 2013 وانا من راجل لراجل
نخليهم يحبوني ويطيحو فيا من بعد نليكيديهم نسيت صلاتي نسيت بلي لابسة الجلباب نسيت تربيتي وهدا كامل كان عندي هدف واحد هو الانتقام
في افريل 2014 عاودت الاتصال ب صاحب خويا كانو خلصو السطاج هو وخويا وبقاو على اتصال
اتصلت بيه وقتلو راني توحشتك برك عيطت هو حكم النيميرو
وبقى يعيطلي من بعد شهر قالي ديري موبيليس باش نديرك favoré
ونحكو .. خطيت الناس كامل وقلت صايي لازمني نتوب لربي
بعد 4 اشهر يعني في جويلية وبعد رمضان جا خطبني ودارهالي surprise
دارنا قبلو وانا قبلت وفرحت والحمد لله
في اكتوبر2013 درنا le fiancaille
كذبت عليه قتلو ما درتش قبلك وخرجتش مع حتى واحد وحلفت
انا فdebut
كنت حابة ننتقم لا اكتر مي كي شفت نيتو صالحة زدت حبيتو اكتر
مشكلتي درك راني نادمة على الباصي تاعي بزاف .. ومن نهار تخطبنا وانا فالمشاكل معاه surtout هاد 3 شهور الاخرة
وصلت اني قستو و وليت نخون فيه ف الشات
و skype
و هو شرالي ميكرو بورتابل باش نقرى بيه
منيش نصلي وليت نخرج مع صحاباتي ونكذب نقولو راني نقرى
يقولي ما ديريش الماكياج ندير ونخرج
نستيكي روحي ونخرج
والله عندي هاد 2 semaines والله راني نبات نبكي في الليل وحدي هو يوقلي غير قوليلي برك وش بيك
مسكين ما بخل عليا ب والو مقلشني يبعثلي ف دراهم
مخلاني ناقصة والو ... قالي بالاك بيك سحور ولا عين
منيش نصلي والديا وليت نرجعلهم الكلام
هو تاني يقولي كلمة نرجعهالو 10 و هو راجل و واعر
السمانة هادي قالي صايي
ستحملتك بزاف قلت راكي صغيرة و نربيك على يدي قالي مي وليتي قبيحة
هو مسكر بورتابلو وكي يفتحو نعيطلو ما يريبونديش
يا ناس راني رايحة نهبل قولولي وش ندير برك
الله يستركم يا خاوتي انصحوني
:cray01::cray02: حابة نتوب حابة ننسى اللي فات
ونعيش مع راجلي في طاعة الله
الله يستركم عاونوني راني رايحة نهبل راني ماني ناكل ما نشرب
دارنا حايرين فيا surtout ماما تبكي معايا
الله يستركم وش ندير اعطوني حل
ربي يجازيكم كل خير
وانا نقولو منيش مليحة مانيش عارفة ضميري يأنب
