حب من طرف واحد

[مشكلتي]

سلام انا وحده عمري 15 سنة
مشكلتي اني حبيت ولد في ليكول تاعي حتى الجنون
هدا الولد تبارك الله عليه قراية ونظافة وادب وخلق
وما حبيتش نرتبط بيه ولا ندير معاه اي علاقة على جال اخلاقه
فقط حبيت انو يحس بيا ويحبني هو تاني ونوليوا في حب من الطرفين لاككن بدون اي علاقات محرمة
خاصة واني صغيره على الامور هذي
كنت باغية نعترف له بصح حشمت
واكيد رح يبدل نظرتو تجاهي ويولي يتجنبني
كنت حابة نعترفله ونوصفله شعوري ونبعد عليه وما نهدرش معاه قاع بعد الهدرة هاديك
ويولي شعور متبادل عالاقل بصح خفت يكون هذا القرار خاطئ
جيت نقوللكم مشكلتي اليوم باش تقترحوا عليا افضل حل
ودي :regards01:

​

 

[روز]

رد: حب من طرف واحد

السلام عليكم
وكأن الحياة لا يوجد فيها إلا الحب !
وكأن الحياة بلا حب لا تطاق !وكأن مشاكلنا صارت تنحصر في الحب فقط

صغيرتي هدا ليس حبا مازالت الحياة أمامك وأمامك أشياء كثيرة
أهم من أن تعترفي بحبك المزعوم لهذا الطفل الصغير
أمامك دراستك وسمعة أهلك وسمعتك
حافظي عليها لأنها أهم بكثير مما تشعرين به
الله المستعان

​

 

[lina malak]

رد: حب من طرف واحد

Slm
khtii rana f l'age wa7éd 7ata ana sratli 3afsa kima hadi w ndémt bzzzf Ms maté7kilouch tbanli khiir psq ghadi yésraw swalé7 mayé3éjbouch ida 7kitilou ana tbanli 5aliha f 9albék w m3a l wa9t ténsayou
rabi yséhél​

 

[ياسين بخوش]

رد: حب من طرف واحد

والله أنا حاير فيكم , اختي كملي قرايتك و خليك من هاذي الأمور , مازلتي صغيرة .​

 

[وردة أوراسية]

رد: حب من طرف واحد

ختي لحبيبة

هذا مش حب راكي في سن المراهقة و كامل فوتنا هاديك المرحلة

صدقيني اقراي قرايتك و خليك من اللعب

و اذا حبك هو من بعد رح ترضاي تكونو بلا علاقة ؟؟ مستحيل

تقولي ندخل في علاقة بصح منديرش هكا و منديرش هكا من بعد ديري

راها الحاجة تجر الحاجة مالا انتبهي ختي

راكي في سن متعرفيش واش هو الحب الحقيقي

الحب اسمى من المظاهر لي رانا نشوفو فيها دكا باسم الحب

مالا خليك انت نظيفة و متوسخيش روحك بقذارة هذه الايام

و متنسايش الثقة لي حطوها فيك والديك و متطعنيهمش في الظهر

بعثوك تقراي ماش تحبي

متزعفيش راني نشوف كي ختي الصغيرة منخيلهاش في هاد الموقف
​

 

[nanoche]

رد: حب من طرف واحد

واش من حب اللي يجي في سن 15 سنة يا بنتي خافي ربي
هذا مجرد اعجاب و انتي طورتيه و في عقلك الباطن رسمتيه بليك هو فارس الاحلام اللي لازم تعيشي معاه
والله من غير الشيطان اللي راهو مكبرولك في راسك و في قلبك
15 سنة نوغمالمون راكي تخمي كيفاش تقراي باش تحقي حلم في المستقبل ولا ما عندكش احلام رجع هو الحلم ديالك
وكيفاش حبيتي تدوسي على الانوثة ديالك و تخمي باش انتي اللي تروحي ليه و تعترفيلو بحبك صدقيني لن يزيده هذا الا احتقارا لك و بالاك رايح يدير حاجات قدامك تحطملك قلبك و تسمحي في قرايتك على جالو
اخطيك يا بنتي من الحب راهو مازال الحال و يجي نهار وين تتصادفي و تعرفي بليك الحب ماكانش منو
​

 

[لاجودان شاف]

رد: حب من طرف واحد

السلام عليكم
وكأن الحياة لا يوجد فيها إلا الحب !
وكأن الحياة بلا حب لا تطاق !وكأن مشاكلنا صارت تنحصر في الحب فقط

صغيرتي هدا ليس حبا مازالت الحياة أمامك وأمامك أشياء كثيرة
أهم من أن تعترفي بحبك المزعوم لهذا الطفل الصغير
أمامك دراستك وسمعة أهلك وسمعتك
حافظي عليها لأنها أهم بكثير مما تشعرين به
الله المستعان

​

أختي روز
البنت في عمرها 15 سنة


​

 

[لاجودان شاف]

رد: حب من طرف واحد

السلام عليكم
اهلا بيك ختي الصغيرة
يبدو عليك أنك بنت متأدبة ومتخلقة ومتربية في دار ناس وعايلة
اول مرة نسمع وحدة حبت او حست باعجاب على اساس الأخلاق والدين والأدب والنظافة
كاين في سنك بزاف لي يحبو على أساك الدراهم والسيارات
لكن ختي مازالك صغير بزاف
والطريق طويل باه يوصل اليوم وتتخرجي وتقدري تتفرغي وقتها للزواج
ومستحيل تكوني معاه في علاقة طوال هاد الفترة بزاف

+
حيرتيني قد يكون الشاب هدا هو ثاني عندو مستقبل مليح وراح يكبار ويبقى كيما راهو بأخلاقو وأدبو
عييت وش نقولك
لكن اعلمي
عمرها المعصية ما جات بتوفيق أو رزق طيب
ربي فرج عليك

​

 

[NonOutà OussàMà lOvE]

رد: حب من طرف واحد

ســلام
يا بنتي جربي تعيشي حياة بـلآ حب أقسم بالله غير La Belle Vie
أختي أنت ماتصارحيه ما والو أخطيييك وتأكدي راح يصراولك مشاكل صدقيني
أنتي مازلتي صغيرة 15 سنة باه تخمي في هذو صوالح أنا كنت نتيجتك كنت نلعب بليبوبي صدقيني وظك وما زلت نلعب بيهم
صدقيني تكبري وتتفكري وترجعي تضحكي على روحك تقولي كيفماه كنت جايحة
أختي أنتي قلتي حب من طرف واحد وهذا حلم لآ يتتحقق

(عذاب القلب لي صار الحب من طرف واحد
الحب من طرف واحد
إن من العذاب أن تكتب لمن لايقرأ لك .. وأن تنتظر من لايأتي
لك .. وأن تحب من لايشعر بك ..وأن تحتاج من لايحتاج إليك ..
ومن المؤلم أن تحب بصدق ..وتخلص بصدق ..وتغفر بصدق .. ثم
تصدم في النهاية بموت كل الصدق الذي قدمته ..
ثم تكتشف أن أجمل العمر كان سرابا )
ربما ستقنعك هذه الكلمات
حفظك الله يا أختاه
​

 

[adel._dz]

رد: حب من طرف واحد

من كثرة قرائاي عن الحب
قلبي الصغير رهف وأصبح لا يتحمل

ترقبو قريبا موضوع احكي لكم فيه سعيدة الحظ التي سأحبها وبالطبع لأنني ساخبها ستعدبني

يا مولات 15السنة أخشى عليكي ان تصطدمي بالواقع
لا أقول لا يوجد حب لكن أقول ماتبنوش الساس وتصبو الدالة وتجيبو الولاد في أحلامك عيشو كل يوم بيومو

 

[الحق سلاحي]

رد: حب من طرف واحد

السلام عليكم ورحمة الله
اهلا بيك
بسبب دمج البنات مع الاولاد في الدراسة توقعي في الغالب مشاكل هكدا
ومش تزمت و تعقد ان يفصل بينكم بالعكس من الوعي
يعني الحل في راي حاولي تتجنبيه وانشغلي بقرايتك
سلام =)

 

[حاملـة المسك]

رد: حب من طرف واحد

السلام عليكم

ذكرتيني بالداعية أحمد عبده عوض و اتصال جاه من ام مفجوعة ..
قاتلو : يا شيخ ابني عمرو 15 سنة و عايز يتزوج
قالها : امال مين لراح يدرس..؟:d
الام من الغش قاتلو :أنا يا شيخ

هدا وش ربحنا من الاختلاط ..

بنتي اتلتاي بقرايتك و متحمليش نفسك حب انت في غنى عنه ..
نصيحة من أم ​

 

[عاصفة الورود]

رد: حب من طرف واحد

السلام عليكم

اختي الصغيرة راكي غير 15 سنة
راكي في سن باش تقراي وتلعبي وتعيشي حياتك بكل تفاصيلها
عيشي كل لحظة مع صحاباتك مع عائلتك , عاوني ماماك فالدار , اتعلمي طيبي حوايج فالعطلة , ما نقدرش نوصفلك الفرحة لي تجيك كي يذوقو داركم الماكلة لي درتيها اول مرة ويقولو بنينة (خخخ خرجت على الموضوع )
كيما قتلك اختي عمري راسك بحوايج يفيدوك من بعد في حياتك أخطيك من سيرة الحب هذا لي يعطيه ظربة ماخلا والو فالغاشي
ضرك قوليلي فاش رح يفيدك الحب هذا ؟ جاوبيني ؟ معندكش جواب ؟ لخاطر معندو حتى فايدة ومعندك واش ديري بيه سيرتو فاللاج تاعك
ضرك نجيو للهدرة لي نحذرك بزاااف منها

كنت حابة نعترفله ونوصفله شعوري

وش نقولك حذاري وحذاري ثم حذاري ... ختي رانا في دزاير برك ماشي في اوروبا ولا امريكا ,علابالك اذا درتيها راكي رح تولي مسخرة ومهزلة وتديري لروحك تبهديلة كبيرة قدام الطفل هذا وقدام زملاءك وممكن حتى يسمعو داركم
علابالي هدرت بزاف
ملا اديها نصيحة من عند اختك الكبيرة انسايه الطفل علابالي تجيك صعيبة فالاول بصح مش مستحيلة
اخطيك من تكسار الراس راكي مزلتي صغيرة وجاية للدنيا
والسلام .

 

[nanou726]

رد: حب من طرف واحد

صغيرتي وثقي علاقتك بالله و ليكن حبك لله سبحانه و تعالى ، وجهي عواطفك لمن هم أقرب أليك والديك ،إخوتك و أخواتك، الحب لا يطرق بابك في هذا السن المشوار طويل أمامك ، و ما دامت الأخلاق تبهرك فتأكدي أنك إذا كنت على خلق ستبهرين غيرك، لا تنسي أن ما تقولين ليس من أخلاق المسلمين في شيئ، ترددك في الاعتراف له هو دليل البذرة الطيبة التي يحملها قلبك الصعير البريئ، كوني أكثر ثباتا و عزما ووفقك الله

 

[علي الفاضلي]

رد: حب من طرف واحد

سلام انا وحده عمري 15 سنة

العمدة : يا بنتي هذه الفترة من العمر حساسة للغاية .. وتكثر على الانسان احلام اليقظة .. ويظل النهار كامل يحلم ويتخايل .. وكل تبسيمه من واحد يقراها .. بعاطفية كبيرة .. ويزيدلها من الرومانسيات متاع
المسلسلات والافلام ..وتولي قصة حب وهيام وجنون .
...................

مشكلتي اني حبيت ولد في ليكول تاعي حتى الجنون.

العمدة : يابنتي هذا راه مجرد اعجاب وميلان .. ويدل على حاجتك الشديدة لملأ الفراغ العاطفي ..
الحب تضحية ونسيان للذات ،، لمن يستحق .. ويكون مبني على اسس واقعية وعقلية ..

حولي اعجابك به وحبك المتوهم الى من يستحق ذلك شرعا وعرفا وعقلا .. ابويك .. اخوتك .. صديقاتك .. اشخاص كبار في السن قدوة كالعلماء ..

..................................
هدا الولد تبارك الله عليه قراية ونظافة وادب وخلق
وما حبيتش نرتبط بيه ولا ندير معاه اي علاقة على جال اخلاقه.

العمدة : واين اخلاقك انتي ؟؟ راكي تبغي تفسدين عليه اخلاقه واخلاقك ..
فعوضا عن انشغاله بالدراسة .. سيصاب بالهذيان ان وقع في وهم الحب والاعجاب .. وراحت القرايه والنظافه والاخلاق .. والسبب هو انتي .. وتكوني عليه قاضية ومصيبة ؟ ردي بالك.

..........................................
فقط حبيت انو يحس بيا ويحبني هو تاني ونوليوا في حب من الطرفين لكن بدون اي
علاقات محرمة خاصة واني صغيره على الامور هذي.

العمدة : هذه العلاقة اللي تبغيها انتي .. راهي محرمة .. والدليل انو واحد ما يرضالك هذا الشيء
بداية بالوالدين .. الاخوة .. اساتذتك .. ونحن هنا في اللمة ..
وراكي قلتي راني صغيرة .. خلاص هذا حكمك وهو صحيح ..
انشغلي الان بالدراسة فقط . واخرجي موضوع الحب من فاموسك .كل شيئ له وقت ..
ربما اذاطال عمرك بعد الجامعة ان شاء الله تعالى ..ربما يصح اطلاق المشاعر بضوابط. .

.......................................................
كنت باغية نعترف له بصح حشمت
واكيد رح يبدل نظرتو تجاهي ويولي يتجنبني.

العمدة : اكيد .. وىرما هو مهموم باخرى .. وعلى العموم كل مبذول مهان .. وكل عزيز مكرم .
اتمسكي بالحياء والحشمة هذي ما تفرطي فيها .. كل واحد يبغيك يحوس على هذا الصفة .
وفقدانها .. يجعل الانثى بلا انوثة ..

..........................................

كنت حابة نعترفله ونوصفله شعوري ونبعد عليه وما نهدرش معاه قاع بعد الهدرة هاديك
ويولي شعور متبادل عالاقل بصح خفت يكون هذا القرار خاطئ.

العمدة : قرارا خطئ مية بالمية ... والدليل كل الاخوة والاخوات اللي نصحوك كانوا على رأي واحد .
فلا فائدة من اخباره .. ولن تتوقف الامور عند الحد الذي تعتقدين ..فالشيطان يوسوس ويغري
خصوصا في هذا الباب ..

.............................
جيت نقوللكم مشكلتي اليوم باش تقترحوا عليا افضل حل
ودي :regards01:

​

ربي يهدينا واياك .. ويبصرنا بعيوبنا .. ويثبتنا على الحق ..

 

[omarwa]

رد: حب من طرف واحد

يابنتي مزالة صغيرة على الحب هذا غير سن المراهقة برك تلهاي بحاجة اخرى خير سورتو قرايتك لا تبعتي هاذ الامورة راح تطفر غير فيك حنونة

 

[عفيفة الحبوبة]

رد: حب من طرف واحد

يا اختي شدي في قرايتك احسن دوك تكبري شوية تفهمي باللي هاد الاحاسيس مجرد فترة مراهقة و تزول
و بلا عليك ما تقوليله خير ما تخسري كرامتك​

 

[lilia25]

رد: حب من طرف واحد

اذا قلتيلو و بعد عليك هدا معناه راكي خسرتي كرامتك ادا كان هو يحبك راح يقلك

وانتي مزلتي صغيرة درك تكبري وتلقاي لي خير منو ولي يحبك و يديك في الحلال ما لا متفكري في حتى حاجة غير قرايتك

 

[Miina Der]

15 sna w ta3cha9 w 9an3a b ro7ha w tahki fiha comme probléme , rabi yahdina

yaa okhti telhaay b 9rayték w staghfrii moulék khirlék hedi hya nassi7ti lik

 

[نور الأوراس]

أختي العزيزة ما تشعرين به مجرد إعجاب لا أكثر أنتي تمرين بفترة المراهقة حاولي أن تشغلي وقتك بشئ نافع وأهتم بدراستك تفوقي ونجاحي ثم سيأتي الحب والزواج لا تستعجلي صغيرتي كل شيئ وله وقت فلا ترمي بنفسك في دوامة قد لا تستطعين الخروج منها فمن في سنك يسهل التلاعب بمشاعرها لتقع فريسة سهل لمن لا يخشي الله تقبلي مروري صح فطورك.