ماقدرتش نحمل أكثر من هكاا

[مشكلتي]

السلام عليكم
أولا شكرا على قبول الموضوع مسبقا
سامحوني رح ندخل في الموضوع ديراكت باسكو راه راسي بلوكا ماقدرتش نحمل أكثر
عندي 9 أشهر زواج تقدرو تقولو 9 أشهر نكد وغمة
راجلي انسان مليح عاقل ويحبني مي المشكل بزاف حوايج تفاهمنا عليهم قبل الزواج اختفو بعد الزواج مالقيت أثر ليهم
مثلا شرطت داري وحدي بعد الزواج ب 3 أيام لقيت كل العائلة عندي
شرطت ثانيك الخدمة دارولي ألف بروبلام على الخدمة
كي تزوجت انتقلت لولاية أخرى لأنو زوجي يخدم بولاية ثانية مش ولايتي واقترحت عليه اني ندير تحويل ف الأول وافق وبدينا في اجراءات التحويل حتان واحد اليوم وانا نجري مع أوراق التحويل فاجأني انو بطل ومش حابني نخدم وانو مايقدرش يحمل كلام الناس بأنو يستغل مرتو وانها هي تخدم باش يدي دراهمها قتلو وشكون قالك رح يقولو الناس هاذ الكلام والنسا كامل يخدمو ويعاونو رجالهم وهاذ الدنيا يدي وحدة ماتصفقش ويخي شرطنا الخدمة من الأول ولا نسيت ؟ قالي لالا بدلت رايي خممت فيها مليح مااقتنعتش تقعدي في الدار احسن ونعيشك أميرة
ايا قتلو اوكي وقلبي يتقطع
بعد مدة لقيت أهلو كامل كل مرة يجي واحد يفقوت ويكاند ولي يفوت 15 يوم
الدار ماتفرغش عجوزتي ربي يبارك تحب تعرض الناس كامل تخرجهم يحوسو وخيتكم تقعد بونيشة في الدار ليسونسيال يجيو يلقاو الغداوات والعشاوات واجدين
كرهت حسيت الدنيا كحلة في عينيا
راجلي مانشوفوش خلاص بحكم مهنتو نشوفو فقط في الليل ونشوفو راقد في أغلب الأحيان لأني نبقا في الكوزينة لوقت متأخر من الليل
حتان هاذ ليام جاتني فرصة وحدة ماتحلم بيها
لقاتلي أختي بلاصة نخدم لكن في ولايتي
كي قتلو ماحبش ويماه ثاني قاتلو تخدم يا اانا ياهي في هاذ الدار
وباين كايقدرش يخيرني انا وامو هي الي جاباتو ورباتو وتعبت عليه حياتها كامل ومانقدرش نلومو لأنها أمو ومانقدرش نكون سبب في قطع رحمو
امالا قتلو اوكي نقعدفي ا لدار بصح حاسة قلبي اكحل عليها وحاسة روحي كرهتو وكرهتها وكرهت الناس كامل
مانيش مليحة خلاص سيرتو كي زاد طاحلي البيبي (كنت حامل ومن القلقة ضيعتو)
يعني كي تتلم المصايب تتلم مرة وحدة
الحمد لله على كل حال
قولولي وش ندير مع انو عرض العمل مازالو قايم وزوجي مش حابني نخدم بسبب أمو
تعبت فعلا حتى لو ماساعدتونيش بحل ساعدوني بدعاء
سلام

 

[روز]

رد: ماقدرتش نحمل أكثر من هكاا

تمت الموافقة
ربي يهونلك أمورك ويسهلك
تذكري انو مستحيل تلقي زوج متفاهمين
الا والدرك يكون على واحد فيهم
​

ان شاءلله يفيدوك الاعضاء ولا يبخلوا عليك بنصائحهم
الكلمة الطيبة صدقة​

 

[nanoche]

رد: ماقدرتش نحمل أكثر من هكاا

السلام عليكم و رحمة الله
ما نقلكش انو مشكلتك راهي صعيبة و الراجل ماشي حق عليه يوعدك و يخالف ....الخ
أنا نقلك يا أختي على حساب الشوفة راهو عقلك كبير و تبانلي راكي رزينة ديجا كان من الممكن انتي اللي تحطي زوجك في الخيار بينك و بين يماه باش ربما تتخلصي منو مي راني نشوف بليك انتي راكي واعية بواش معناتها الأم اللي مهما عملنا على جالها ماشي رايحين نرجعولها خيرها
شوفي يا اختي اذا راجلك راهو قايم بيك و حاجة ماراهي خاصاتك علاش تحوسي على الخدمة خليك في دارك و اصبري (ان الله مع الصابرين)
وحكاية يماه ممكن تتغير لأن الله مغير الأحوال واذا راكي حاسة روحك بونيشة في دارك واش عليه راكي تصدقي على ذراعك قالك مول الذراع الوافي ما يحافي يجي يوم وين ربي يعوضك صدقيني
ما تهديش دارك على جال تفاهات ممكن تتجاوزيها و الدار اللي يقصدها الضيوف بزاف هاذيك دار الخير و يحبها ربي سبحانه و تعالى
راكي في بداية حياتك ما تقفليهاش على روحك و الشيطان راهو يزيد يضخملك في الأمور العنيه و صلي لربي و خلي ديما ديما ثقتك بيه و يجي يوم و بالاك تعودي بدارك يا العزيزة و ترجعي صح فيها أميرة و سلطانة زمانك و ربي يرزقك الذرية الصالحة ان شاء الله
​

 

[wiwi loly]

رد: ماقدرتش نحمل أكثر من هكاا

ربي يكون في عونك و ان شاء الله تفرج عليك​

 

[عفيفة الحبوبة]

رد: ماقدرتش نحمل أكثر من هكاا

ماكانش وحدة تتزوج و تصيب كلشي مليح في حياتها
و لا بد يكون كاين نقائص و مشاكل
قصة الخدمة راني معاك اشرطتيها نورمالمون تخدمي لكن راجلك قال لا لا طيعيه و اتبعي امره
اما عزوجك و الضياف و منا و ملهيه فيا اختي خليهم لربي و ديري لي عليك في سبيل الله و احتسبي الاجر
ادا زوجك يحبك و موفرلك كلشي فادن هدي نعمة احمدي ربي عليها
و ربي يهنيك ​

 

[hassina]

رد: ماقدرتش نحمل أكثر من هكاا

سلام عليكم على بالي ميحس بالجمرة غير اللي كواتو .ربي معاك ختي اللي تمري بيه ماشي ساهل مي الحل الوحيد انك تاخذي قرار او تبدلي افكارك بهذي الحياة لانه ليس دائما تجري الرياح بما تشتهي السفن .فاحلام العزوبية ستتغير حتما بعد الزواج .لانك ستعيشين في عائلة غير عائلتك و ولاية غير ولايتك .المهم اختي بالنسبة لي لازم تتخلصي من القلق اللي فيك و التوتر اللي عايشة فيه لانه سبب لكي المشاكل و افقدك روحا ستنير حياتك و تغير الهم و النكد و الروتين الذي تعيشنة المهم غيري اهدافك و كوني بشخصية قوية حاولي تكسبي زوجك او تفهميه المعانات اللي راكي عايشة فيها و تكسبي عطفوا عليك صدقيني الحل راه بين يديك الخدمة و العيشة وحدك ماشي هي السعادة الحقيقية الحل هو انك تنجبي اطفالا ينيروا حياتك او ينوروها لانه هذا هو الهدف الحقيقي من الزواج المهم عندك ربي سبحانو عارف بمعاناتك شدي فيه هو اللي ينصرك على كل اللي ظلمك او ربي معاك نتمنا نكون نصحتك او افدتك و خففت عليك ولو بالقليل اختكي في الله حسينة اخصائية نفسانية

 

[علي الفاضلي]

رد: ماقدرتش نحمل أكثر من هكاا

كان الله في عونك ..

ورزقك سعة البال ..

شدي على نصائح من سبوقنا ففيهم الكفاية.

 

[!≈[سُِـِيٌــِـِفّ اٌڷِخً‘يٌـرُ]≈!]

رد: ماقدرتش نحمل أكثر من هكاا

كان الله في عونك

هدا ما يستطيع أن نفعل لك سوى دعوة صادقة

لربما تتحسن الامور
​

 

[chahinez la brunette]

رد: ماقدرتش نحمل أكثر من هكاا

الله يكون في عونك اختى و الله انا بحكم سني ما نجمش نعطيك اي فكرة و لكن سقسيتلكماما العزيزة بحكم تجربتها في الزواج 24 سنة قالتلك ان المراة كي تتزوج لازم تكوون صبورة و حاجة طبيعية تحسي روحك ما كيش مليحة كلشي جديد عليك ولاية اخرى و ناس وخدخرين تعاشريهم هادي هي البنت على كل حاال و كيما يقوللك بخصوص الضياف و الملوماات ما تخميش على انك بونيشة و لا انك تخدمي عليهم لا لا خمي بوجة نظر ايجابة اكثر يااك يقولك الضيف حبيب الله و من الواج ب الاكراام ادي اجرك و توكلي على مولاك و الله يعاونك كيما يقولك الشقى ما يكتلش التخماام السلبي و هو الي يدمر الواحد و من جهت زوجك راكي تفهمتيه من جهة امه و هذا وااجب عليك لان الامهات بعد ما يتزوجو ولادهم يصيروو حساسين بزااف كيما​

يقولو ساعف المريض حتى يبرى ​

و من جهت العمل يا اختى اذا كان راجلك موفر ليك الي تحتاجيه وعلاش لا حتى دينا الاسلامي كرم المراة ب الاسرة و ب الزوج الي يوفر ليها كلشي و ااش ديري ب الخدمة من الاحسن تاني تدعي و تستغفري كل ما تضيق بيك الدنياا و الله يعطيك ما تتمنى و نفرحو ليك ببنت و لا وليد هاذي انا ام شهينااز​

 

[اوراق الصييف]

رد: ماقدرتش نحمل أكثر من هكاا

ماكانش وحدة تتزوج و تصيب كلشي مليح في حياتها
و لا بد يكون كاين نقائص و مشاكل
قصة الخدمة راني معاك اشرطتيها نورمالمون تخدمي لكن راجلك قال لا لا طيعيه و اتبعي امره
اما عزوجك و الضياف و منا و ملهيه فيا اختي خليهم لربي و ديري لي عليك في سبيل الله و احتسبي الاجر
ادا زوجك يحبك و موفرلك كلشي فادن هدي نعمة احمدي ربي عليها
و ربي يهنيك

 

[JAWHARA25]

رد: ماقدرتش نحمل أكثر من هكاا

السﻻم عليكم اختي،انا في الخدمة منقدرش ننصحك ﻻاني ماخداماش ،بصح نعرف حاجة وحدة ،انك تمدي شروطك مالاول وهو تاني ،هادي معروفة ،ولزم عليه الالتزام بيها ادا وافقتو ،وعلى حسساب مافهمت انو ولى في رايو ،، تبقى ليك انتي درك اﻻ رضختي للامر وﻻقنعتي قناعة رضى منك وحب وطاعة لزوجك ،ﻻرضختي للامر الواقع ،راو ماش مليح ﻻليك ﻻليه ، ﻻنك رايحة تكوني كارهة وتلومي فيه ،وووو اما ادا قنعتي وشفتي بلي راجلك مهنيك وما يخصك والو ،وطيعي في راجلك حبا فيه واحتراماةله ،خﻻص عيشي حياتك عادي كاي زوجة ، ونحي عليك الوساوس ، ،وهدا هو الزواج ياختي لعوام اااولى ،راكي عاد عروس جديدو عادي يكثرو عليكم الضياف ، يحبو يشوفو طيابك ههه يشوفو فحالتك ، راي مكانش وحدة فينا زوجت وما عداتش على هاد المرحلة ،، عادي نحي عليك ، وقرري نتي واش حابة من الزواج ،،تم تعرفي تعيشي حياتك،

 

[MISS ROSE]

رد: ماقدرتش نحمل أكثر من هكاا

السلام عليكم
اختي الغالية ربي يكون في العون
اولااااا ماتحسيش روحك نتي برك لي عيانة رانا كامل عندنا مشاكل وكيما يقولو المهني في القبر انا ننصح اختي بالصبر اذا راكي تحبي راجلك اصبري ديري لملاحة وادعي ربي والله مايخيبك
بالنسبة للدار وش راح نقولك اذا لم تستحي افعل ماشئت هادوما لي يخليو ديارها ويجيو للناس مش ضياف حابين يسكنو المشكل مش فيك فيهم الله يهديهم
والعمل راجلك خير من الوزارة طيشي عليك الفكرة هادي فهميه بلي تمنيتي تخدمي باه تعيشو ولادكم مليح حاولي مرة وزوج والا خليك من هاد السوجي عيشي حياتك ومام تعبانة اضحكي وازهاي وربي يرزقك بالذرية الصالحة لي تخلي زوجك يتبدل للاحسن ماتبينيش على روحك بلي كرهتي هكذا هوما يزهاو ويوالفو يقلقوك واذا على عجوزتك ديريها كي يماك مام وش دارت قابليها بالملاحة ونصيحتي ليك اذا تعبتي بزاف روحي فوتي ايامات في داركم ارتاحي وارجعي لبيتك في الاول والاخر نتي مولاتو والصابر ينال اكيد ربي يفرج عليك يا غالية

 

[samah06]

رد: ماقدرتش نحمل أكثر من هكاا

اذا كان قايمك وما مخليكش نفسك في حاجة معليهش اقعدي في البيت
ويماه دريها يماك وطيشي موراك يجي نهار اللي تتهناي منها
والدار اذا شفتي روحك في دار عايلة وكبيرة طالبي بيها ومتسكتيش خاصة هو اللي وعدك بيها
راح يخي نهار تتهناي وتفهمي عقليتو وكونيلو جاريو يحطك ملكة
متشوفينيش انا كيفاه نتعامل مع راجلي لازم نقضيلو حاجتو هي الاولى باه نكمل شغل الدار
وديري كيفي تلقاي روحك متخدميش في دار العايلة بزاف متضليش في الكوزينة
واذا تعب راجلك من الخدمة انت تريحيه مش يرقد يرتاح
وانت حنونتي وطريقتك
المهم مازلتي جديدة في دار غريبة عليك راح يخي نهار وتوالفي الحياة لجديدة ويكونو عندك اولاد يملاو دنيتك

 

[راضية حامدة]

رد: ماقدرتش نحمل أكثر من هكاا

السلام عليكم و رحمة الله
اولا اختي
هدي نفسك يا اختي فلكل مشكلة حل باذن الله
من خلال كلامك فهمت بلي منع زوجك لك من العمل مش منو و لكن من اهله
لانه في البداية وعدك و هنا باين بلي نيتو كانت صافية و لكن لما تزوجتو و خاصة انو عايش مع الاهل اكيد لقى صعوبة باش يوفي بالوعد تاعو خاصة لما امه صرحت ياهي يا انت
الراجل راه في موقف صعب
خمي بعقلك و حطي نفسك مكانه
وش تقولي؟ ما يقدرش يدير و كانو الناس ما كانش او امه ما كانش و لا لالا؟

ثانيا
قضية شغل البيت لكل شيء حدود و الواحد لازم يعرف قدر نفسه
اعطي قيمة لنفسك
اذا كان شغل البيت بطريقة عادية و بدون ضغط عليك او عمل في حدود طاقتك و الواجب لا باس
لكن اذا كنت تلعبي دور الشغالة في بيت فيها نسا لالا
يعني اخدمي في حدود طاقتك و الواجب عليك دون افراط و لا تفريط
و عادة الزوجة لما تكون في بيت العايلة تكون تخدم اكثر من انها تسكن وحدها لكن اذا كان هناك من يتقاسم معاطك شغل البيت ما تخدميش في بلاصتو
و وش خلاني نقول هذا الكلام هو قولك انك ما تشوفيش زوجك الا ليلا لانك تقضي ساعات طوال في الكوزينة
خطا كبير يا اختي
شوفي لهذه النقطة حل
الراجل نهار كامل خدام و كي يدخل يزيد يستناك حتى تكملي يا درى وش من ساعة؟ لا ديري حل
ما نقدرش نوجهك في هذه النقطة لاني ما نعرفش تفاصيل بيتكم


اخير اختي حبيبتي
اخيرا و الاهم من كل شيء
ما تربطيش سعادتك بامور معينة
ما تتخيليش بلي اذا خدمت تكوني سعيدة و اذا لا ما تكونيش
الخدمة رزق و الرزق من عند الله و زوجك و اهله كلهم اسباب
اذا ربي راه كاتبلك خدمة ماكانش حاجة تحبسك عليها
و لهذا لازم تفهمي بلي كله من عند الله و الله سبحانه تقدري تزعفي عليه؟ جل جلاله
اكيد لا و اكيد فيها خير ليك انت ما كيش تشوفيه
عمرك ما تربطي سعادتك بحاجة معينة حتى تكون باش تكوني سعيدة هذا خطا كبير
الحمد لله عندك زوج مليح و مستورين الحمد لله هذاك هو الصح و شوفي كيفاش تحافظي عليه
ما كان اي فايدة لوكان تكوني خدامة و زوجك متمرد و صعيب معاك و ما تكونيش مهنية
الخدمة مش امر لي تربطي به سعادتك ابدا


اما عن شغل البيت حاولي تستمتعي و انت تخدميه
يعني في بلاصة لي تخدميه و انت مجبرة و من فوق القلب
اخدميه لانك حابة تشغلي وقت الفراغ
لانك تحتسبي الاجر عند ربي سبحانو
اخدميه لانك ما تحمليش تشوفي الحالة قدامك مرونة و فوضوية
اخدميه و انت مبتسمة مش و انت مكشرة و قوليلي النتيجة

اختي العزيزة حافظي على سعادتك باستغلال وقتك و الاستمتاع به
ما تيضيعيش وقتك و عمرك و انت تبكي على حالك لاني كاين امور ما نقدروش نغيروها و راكي عارفة هذا الشي
الحل الوحيد انك ترضاي بحياتك و تستمتعي بيومك و حياتك و زواجك و حملك ان شاء الله و عايليتك وووووو

ماكانش لي لقاها كاملة من كل النواحي
رؤبي ما يعطيكش كل شي لازم تكون امور ناقصة
و الانسان باش يرضى لازم يشوف لي تحتو
شوفي للبات لي ما تزوجوش
للي ما حملوش
لي ما عندهمش شهادة
لي ما لقاوش السكن لا عند الاهل و لا غيره
لي زوجها خائن و بخيل و متمرد
لي الفراغ قتلهم
ووووووو
احمدي ربي راكي في نعم كثيرة
احمدي ربي باش تدوم
و اشكريه باش يزيدك من فضله

ان شاء الله ربي يفتح عليه بحمل جديد ان شاء الله و بيت مستقل ان شاء الله
اما الخدمة اذا كان فيها خير ليك ربي يرزقك بها ان شاء الله اما اذا كان العكس وش نقولو ربي يبعدها عليك و يبعد عليك كل ما هو شر لك


ان شاء الله تبشرينا قريبا جدا انك غيرت طريقة تفكيرك و انك لقيتي السلام و السكينة في عقلك و نظمت وقتك و اكتسبت امور ايجابية

 

[محبة الدراسة]

رد: ماقدرتش نحمل أكثر من هكاا

شوفي حبيبتي الطلاق هو الحل الوحيد
فرصة العمل لا نعوض
أما الراجل تقدري تلقاي واحد ولد فاميليا و الفاميليا نتاعو ناس اصل و عندهم كلمة
وخير من تبقاي تحت الامرة تاعهم

 

[fugi]

رد: ماقدرتش نحمل أكثر من هكاا

شوفي حبيبتي الطلاق هو الحل الوحيد
فرصة العمل لا نعوض
أما الراجل تقدري تلقاي واحد ولد فاميليا و الفاميليا نتاعو ناس اصل و عندهم كلمة
وخير من تبقاي تحت الامرة تاعهم

ياختي الناس تبني ماتهدمش ..​

 

[عاشقة الصمت 13]

رد: ماقدرتش نحمل أكثر من هكاا

ختي نتي راكي باغية العنب ولا تدابزي مع عساسه؟؟
ماتخليش حاجة كيوالو تخربلك دارك ..قالك لالا سي لالا ماشي تبدي تدي وتردي
احكمي الصح اللي هو راجلك
وحاجة اللي ماراهش راضي بيها ماديريهاش
خمي معا راسك وشوفي واش راكي حابة الخدمة ولا راجلك
ماكانش في زوج خاص وحدة منهم هادي هي المراة تتنازل على حاجة باه تكسب الرضا ​

 

[Melia azedarach]

رد: ماقدرتش نحمل أكثر من هكاا

يا ختي ننصحك أنو تخدمي وما تعنّيش
وربي راح يجازيك بأشياء ما كنتيش تحلمي بيهم

نعرف وحدة سكنت مع بيت شيخها .. وخدمتهم 20 سنة .. دارت شيخها وعجوزتها في عينها وسكرت عليهم ..رغم المذلة والمهانة ..
شاتية رقدة ولا راحة ..مي صبرت
رضاو عنها وماتو على اديها وهي تخدم فيهم..
وضرك ربي فتح عليها ودارت دار واحد ما يحلم بيها وولادها نجحوا وتزوجو..وكل يوم يبوسولها راسهم ويدورو بيها وشمن هدايا وو عرضات ..
وسلافاتها يلي هربو من نعمة الخدمة ربي قلبهالهم لا ولاد صالحي ولا ناجحين ...
كما تُدين تدان
املا خليك صابرة واخدمي وضحكة على وجهك
والله غير يعزوك ..
وممكن ربي يفتح عليك وتجيك خدمة لباب دارك ..
ويرزقك ذرية صالحة وناجحة..
وتلقاي هذا كلشي غير كلام ..
وتندمي لأنو الدّنيا راهي دار عمل والله والناس مراهيش باقية لبعضاها
​

 

[souhas]

رد: ماقدرتش نحمل أكثر من هكاا

واشي هاذا خلعتيني ههههههههههههههههه
قوليلها تشد دارها و تصبر ياك يما و يماك صبرو باش جابونا و كبرونا
ربي يفرج علينا اجمعين

 

[Happy Girl]

رد: ماقدرتش نحمل أكثر من هكاا

المشكلة الحقيقيةهي زوجك لانه متعلق بعائلتو بزاف الحل هنا انك حاولي تكسبيه باي طريقة دون اهانة عائلتو او تخليه يحس بلي هوما سبب مشاكلكم ولا تنسي ان الزوج هو أيضا رزق من عند الله و أي رزق زوج بار بوالديه و يصل رحمه ربي يخليهلك و لاتجعلي الخروج من المنزل للعمل هو الحل لمشاكلك تحلي بالصبر فباذن الله و بالدعاء "مثل ان تقولي بعد صلاة ركعتين في الضحى او في جوف الليل اللهم ياملك الكون و السموات و الارض سهلي امري و صبرني و لينلي زوجي كما لينت الحديد لداود عليه السلام و اطلبي ماشئت"و كثرة الاستغفار فاعلمي ان الله لا يرد دعوة المومن خاصة المظلوم و ان استجاب فانتظري ما هو الانسب و الاخير لك حتى لو لم تعملي وبقيت عايشة مع دارهم فان دوام الحال من المحال وديري في راسك ديمة انه بعد العسر يسر مهما طال الزمان و الله أعلم