هي تستاهل كل خير و انا خدعتهااااااااا

[مشكلتي]

جمعتني بها اللمة من خلال مواضيعها...منيش عارف واش لي خلاني نتقرب منا المهم فاللخر علبالي بلي كنت نتمسخر و خلاص...و ظلمتها معاياااا....عرفتها على أساس صداقة و على حساب المواضيع تاعها اكتشفت بلي عندها مشاكل كنا نحكيو بالرسائل هنا فالخاص...حتى اليوم لي بعثتلها رقمي...و رجعنا نحكيو بالهاتف ....كانت تحكيلي كل حاجة ....كانت دايرتني كي خوهااا..تشاورني...و استشارتني حتى فالحاجة الكبيرة لي صرات معاها...و انا الوحيد لي قالتلو عليهاااا.....يعني قدرت في مدة اني نرجع كل حاجة في حياتها على اساس صديق....انا حسيت روحي بلي حبيتها صارحتها و هي دات وقت و رجعنا نحبو بعض....يعني انا منعتبروش حب على قد منعتبرو....فوت الوقت بيها....عام و نص و أنا معاها ذرك نعرف عليها كل حاجة صغيرة و كبيرة...المشكل انو كانت معايا صريحة لاقصى درجة في كل حاجة متعلقة بالماضي تاعها...قاتلي محبيتش نخدعك...و المشكل انو رجعت وثقت فيا و مخممتش انو أنا قادر نعاود نديرلها نفس الحكاية....انا خنتها و اكتشفت هاذ الحاجة و لا نقول ربي كشفني قدامهااا....سامحتني و فتنا الحكاية...انا استمريت لابكذب عليها في أتف الاشياء...معلبليش اذا هاذي حاجة فيا و لا كنت نستمتع بيهااا...لأانو كذبي كان في حوايج متستاهلش...انا قتلها حتى عندي مرض خطير و بكات علياااا...مي كانت تقولي ديمااا...كي تكذب عليا نحس و كانت تكشفني....حتى في هاذ المرض كذبت عليها مرتين...مرة صرا بينا مشكل...هي شربت الدوا و حاولت تنتحر و ربي نجاها...تلاقيت معاها اخر مرة وعدتها بلي شهرين رايح نخطبها يعني الاسبوع الاول تاع العيد....هي راهي مستنيا هاذ الحاجةةة....و انا معلبليش كي راح نخليها واش راح تكون حالها....راني نكتب في هاذ الحاجة و انا علبالي بلي قادر تدير حاجة في روحها صح...أني ظلمتها أني خدعتها و أني غلطت بزاف في حقهاااااا....معنديش سبب مقنع باش نتخلى عليها لأني منقدرش نحاسبها على الماضي و هي حتى مخباتوش عليا...هي كانت تقولي منخدعكش باه ربي ميخدعنيش في دنيتي...كانت تقولي نتا اكثر واحد وثق فيه...مي أنا راجل في عمري 30 سنة و راني نبني في داري و بدراهمي يعني لوكان نحب نخطبها معنديش حجة...مي هاذ الأيام زدت درتلها كذبة...قتلها عندي عرق مبوشي في قلبي...و بلي هي السبة كيعاد تقلقني..و رجعت نسبب عليها كي تقولي كلمة و حتى نسبهاااا....معلبليش اذا ندير هكاااا باه تخليني و لا باه نلقا حجة و نقولها مكيش نتيا المرأة لي نكمل معاها حياتي....يعني انا الحاجة الوحيدة لي هي متمسكة بيها و علبالي انا لي راح نحطمهاااا...كلمة ليها بلاك تفوت منا و تشوفها و ربي يقدر بعدها عليا قبل منزيد ناذيها و كلمة ليااا على خاطر مرة وكلت عليا ربي و قاتلي هاذا لي راح نديرو معاك....

 

[حكيك]

تم الاعتماد

 

[راضية حامدة]

معناها موضوعك هنا هو رسالة ليها تصارحها بحقيقتك مش مشكلة تحوس لها حل بما انه قرارك راه متخذ

وش نقولك
ما عرفتش اذا نخلي موضوعك و لا نحذفو

لكن نخليه باش يشوفو البنات حقيقة العلاقات لي تجي من النت كيفاش تكون نهايتها و شكون هو الضحية
نخليه ربما يعتبرو من كلامك لانك مثلت كثير من الرجال او بالاحرى الذئاب البشرية لي تعيش باش تضر الناس

نخليه باش يلقاوش اعذار و ما يحلموش بفارس الاحلام لي جي هكا صدفة في عالم افتراضي

و هذه المخلوقة انت راك متأكد بلي رح تقرا الموضوع نقولها ربي معاك لكن هذه هي الثمار لي تجنيها بعد سذاجتك و سهولة استغلال الناس ليك

الله يهديكم كامل يا اولادي

 

[السلطانة]

وعليكم السلام يااخي زين نيتك

واستغفر ربي لي حب الحلال يدخلو من بابو ماش تبقى معاها وتقرر هاكداك برك درك لازم تحسم الامر والقرار

كي الطفلة وصلت تنتحر راهي صعيبة الحالة


ربي معاكم

 

[أم راضية ~_]

السلام عليكم مافهمتش وعلاش ادا من اللول ماهيش الستيل الي تحوس عليه نتا واش دخلك فيها وعلاش تحوس تنصحها ونتا علابالك بلي هي دايرة فيك كونفيونص كبير؟؟؟
وتقولها ونورمال؟؟ عيييييييييييب سيغتو كي قلت راكي كبير عندك 30 !!!
سبحان الله
بصح دنوبها يخرجو فيك ما تخممش
وربي يعطي على حساب النية
وكلمة ليها ربي يغفرلك ويهديك ويعوضك بما هو احسن ليك و ماشي اي واحد تديري فيه الثقة كاين بزاف ناس فارغين شغل و يحبو الحكايات وماعندهمش جداتهم يحكولهم مالا يروحو للبنات الصغار الي ما لقاوش الي يحتويهم و يجوزو بيهم الوقت
حسبنا الله ونعم الوكيل..
ربي يهدينا جميييييييع​

 

[prince of love]

السلام عليكم

ربي يهديك والله غير نحشم كي نلقى كاين عباد كيما هكدا

وزيد راك كبير الله يبارك نت راك قدوة 30 سنة ( قراف بزااف ) يعني نت علابالك من الاول بلي راك تلعب بيها

وتزيد توعدها بالزواج واش تحب نقلك .. دعاوي الولايا راهم صعاب بزااف يا خويا

معليش خويا كامل نغلطو يا اخي ننصحك قبل ما يفوت الوقت اطلب السماح منها واخبرها الحقيقة

واذا كنت راجل صح وراك نادم على واش درت احفظ اسرارها وما تفضحهاش مع الناس

وحبيت نقول للاخت لي راهي تقول بلي نت تمثل كثير من الرجال بلي راهو فرق كبير بين الرجل والذكر

وربي يهدينا ان شاء الله
​

 

[medscd]

والله ما عرفت كيفاه نرد عليك

كنت حاسب راه عمرك وحد 18 سنة خلعتني خويا كي قلت 30 سنة

وراك قاعد تلعب هذا اللعب الله يهديك

أنا صغير عليك بزاف وضك نقولك واش كاين في راسي واتمنى عدم تجاهله

نقولك كونك راجل وقد المسؤولية واخطيك من هذو الامور

واهتم بعائلتك وعس روحك بزاف عس روحك بزاف عس روحك بزاف

وراني نعاودلك في الكلمة عس روحك بزاف

راه الوقت يجري وبلا ماتحصي ضك راك 30 ترمش عينك تصيب روحك 40 سنة

ومازلت قاعد تضيع في الوقت

تولي كيما شي ناس نعرفهم ولاو يشار لهم بالاصابع لا مستقبل لا والو

امالا سقم روحك خويا

خلاصة الكلام نقولك تاع عثمان عريوات

((( راك كبير واحشم على روحك )))
​

 

[قَطٌر❀ الٌنَـدَى]

بصح والله لضك مفهمتش علاااااااااش علاش درتلها هكا يعني عندم عادي تجيب بيها عام من حياتها كذب وزيد انا توقعت تكون واحد يكون في عمرو يا ربي 22 بصح ثلاثين سنة وتلعب ببنات الناس الادهى انها المخلوقة دايرة فيك النية ولامان وانت كاذب في كلشي ووصلت بيك باه توعدها بالزواج بالكذب برك
ايه يا الدنيا وقت بزاف صعيب لي وصلنالو
الله يهديك وربي يعوضهاماخير منك
​

 

[الحلم الوردي]

والله صح انت كي كنت مع الاول كامل تفووت في الوقت علاش دير لبنت الناس هكدا
جابلي ربي راك راجل باسكو عمرك 30سنة صافي راك كبير وهد العفايس نورمالمو جازو عليك وكملتهم
وزيد الي كيما في عمرك راهم متزوجين :s
والله ربي يهدي ماخلق
وعلاش ماحسبتش هدا قبل ماتتمسخر ببنات الناس وزيد
كما تدين تدان
والله عيب الواحد قدك في العمر نورمالمو تكون قدوة
مي الله غالب
ان شاء الله ربي يهديك
هدا مكان
​

 

[largo19]

لا حول و لا قوّة إلاّ بالله ٫٫٫ بكل صراحة 30 سنة نورمالمو راك كبرت بزّاف على هاذو الحوايج ٫٫٫ التفسير الوحيد لماقمت به مع هذه المسكينة هو أنّك قمت باستغلالها في لحظة ضعف منها الله يهديك ٫٫٫ و هذا ليس خطأ مرحلي بسيط لأنّك تماديت معها كل هذه المدّة الطويلة و أنت تعلم يقينا بأنّ الأنثى ضعيفة من الناحية العاطفيّة فقمت باستغلال هذا الضعف ٫٫٫

بكل صراحة ٫٫ تصرّفك هذا عمل شنيع و لا يمتّ للمروءة و لا للرجولة بشيء ٫٫ الرجل المؤمن مجبول على الغيرة على أعراض كل المؤمنات ٫٫ كما قال النبي صلّى الله عليه و سلّم لا يؤمن أحدكم حتّى يحبّ لأخيه ما يحب لنفسه ٫
فكما أنّك لا تحب أن يفعل هذا الأمر أحدهم مع ابنتك أو أختك و أهلك فكان الأحرى بك أن لا تفعل هذا مع ابنة و أخت مؤمن آخر ٫٫٫ و تأكّد بأن العرض دين يسدّده الله في الدنيا قبل الآخرة و هذا تمام عدله تعالى و انظر لمن حولك ممن تعرفهم فستجد أمثلة كثيرة
كما أنّك ظلمتها حقّا بفعلك هذا و الظلم ظلمات يوم القيامة و لو إحتسبت و دعت عليك مخلصة لله فالإحتمال الأكبر بأن يستجيب الله دعاءها فدعوة المظلوم مستجابة و النّبي صلى الله عليه و سلّم يقول ( إتّقوا دعوة المظلوم فإنّه ليس بينها و بين الله حجاب) ٫٫٫
ربي يهديك خويا و يصلح أحوالك ٫٫ و ننصحك باش تشوف حل مع هاذي الأخت ٫٫ ولاّ أجبد روحك و صارحها و ما تضيّعش وقتك و وقتها و تزيد تربح ذنوب كبيرة

أكيد أنت ما طرحتش مشكل لتجد حل ٫ لكن كتبت هذا الموضوع كرسالة وجّهتها لهاذي الأخت ربي يفرّج عليها ٫

 

[yani thiziri]

هههههههههههاي قالك العشق من الانترنت

نعشق خيالي ومانعشقش من الانترنت

كون جيت مول 18 سنة كامام.... مانلوموكش بزاف

مي راك شايب يا عمو 30 سنة راهم بولادهم

مام هي حابسة عشقتك من الانترنت ودارت فيك الكونفيونص

شوفو يا بنات العشق الافتراضي شراه يدير

ولي تتدنى ليا من الانترنت نديرلها كتر منو والله غي نديرلها كتر منو

راني ذيب ومنرحمش الطفلة اذا كانت غبية

دوك نرجعو ليك يا عمو شوف انا هاذ الشي لي قلتولك باش نحسك بغلطتك

ننصحك صارحها معليش الحقيقة تودجع مي باش تصلح شوية من غلطتك

وولي لطريق ربي راك كبير وشوف كاش وحدة روح ديراكت لباباها

وانشاء الله برك ماتكونش شايخ بينا​

 

[miida]

لا حول ولا قة الا بالله ................حسبنا الله ونعم الوكيل وقت لحقنا ليه

 

[MISS ROSE]

السلام عليكم
عادتي كي ندخل مواضيع مشكلتي نكون اكثر لباقة اكثر احترام وبالاك ذات نقد بناء مي اليوم ما لقيتش وش راح نقولك اباغ كما تدين تدان كاين ربي ماتخافش البروبلام راك مش حابها وخليتها قاعدة معاك انانية منك هاذ الحاجة تنقص منك وطيح بيك المرا كون تكسبها في جنبك تخم عليك تحبك ديرك في عينها واذا ظلمتها يظلمك ربي
انا ننصحك لوجه الله صارحها ذرك ماتخليهاش مسكينة تتعلق اكتر فيك حرام عليك وينك من ربي ابن عمي خاف ربي فيها
وش قالو ناس بكري وين كانت النية يشوفها ليلة عرسو والعشرة دوم والاحترام قالو كلشي بالسيف الا الزواز وفي حالتك المحبة بالكيف
نقولك من الاخير بويسك طولت اجرحها بصراحتك وماتظلمهاش معاك
انا هاد لي سوجي يقلقوني تقبل مروري سلام
والله ربي راح نتعقد من هاذ الحكايات ابن عمي تفكروا خوتاتكم اتقوا الله في خوتات الناس​

 

[FARAH-31]

حسبي الله و نعم الوكيل
يا اخ اتقي الله في نفسك و نتي ثاني ختي و الغلطة راهي فيكم في زوج بصح لي بسلها و مرقها راهو نتا لاخاترش بالاك شيرة صغيرة و راهي عاد في سن المراهقة و ماثعرفش الصواب من الخطاء بصح نتا راك عرعووور يا عمي كونك غير شويا راجل و صارحها نيشان علا خاترش راك دير زوج غلطات الاولى انك خدعتها و ثانية انك فضحتها
و كما تدين تدان غير قارعلها

 

[medscd]

هههههههههههاي قالك العشق من الانترنت

نعشق خيالي ومانعشقش من الانترنت

كون جيت مول 18 سنة كامام.... مانلوموكش بزاف

مي راك شايب يا عمو 30 سنة راهم بولادهم

مام هي حابسة عشقتك من الانترنت ودارت فيك الكونفيونص

شوفو يا بنات العشق الافتراضي شراه يدير

ولي تتدنى ليا من الانترنت نديرلها كتر منو والله غي نديرلها كتر منو

راني ذيب ومنرحمش الطفلة اذا كانت غبية

دوك نرجعو ليك يا عمو شوف انا هاذ الشي لي قلتولك باش نحسك بغلطتك

ننصحك صارحها معليش الحقيقة تودجع مي باش تصلح شوية من غلطتك

وولي لطريق ربي راك كبير وشوف كاش وحدة روح ديراكت لباباها

وانشاء الله برك ماتكونش شايخ بينا​

الكتبة المقصودة راني لونتها بالاحمر في ردك

علاه امالا انت كي تشوف واحد يخطئ ماشي تنصحه انت تكمل عليه

يعني هو مسكين في حالة انت تزيد عليه

وقلت انا ذئب ما نرحمش

علاه انت حيوان حاشا خليقتك ياك الله عز وجل خلقك واعطالك العقل

باه تفرق بين الخطأ والصواب وتتدبر في امور الدنيا لما يصلح للفرد نفسه وللمجتمع .........الخ

امالا غير عاود دير كونترول في مخك راهي الخيوط مخلطة شوي عندك
​

 

[المخلصة لله]

السلام عليكم
في الحقيقة انت راك في30 سنة نورمالمو راك كبرت على هادو العفايس وهي عندها الحق باه تندم خاطرش كذبت عليها اكثر من مرة نقولك روح استغفر ربك ان شاء الله يسامحك ويغفر لك ذنبك ونتمنى منك ماتزيدش تغلط نفس الغلطة
وان شاء الله يكون في عون الاخت

 

[vivian20]

الكتبة المقصودة راني لونتها بالاحمر في ردك

علاه امالا انت كي تشوف واحد يخطئ ماشي تنصحه انت تكمل عليه

يعني هو مسكين في حالة انت تزيد عليه

وقلت انا ذئب ما نرحمش

علاه انت حيوان حاشا خليقتك ياك الله عز وجل خلقك واعطالك العقل

باه تفرق بين الخطأ والصواب وتتدبر في امور الدنيا لما يصلح للفرد نفسه وللمجتمع .........الخ

امالا غير عاود دير كونترول في مخك راهي الخيوط مخلطة شوي عندك
​

ارق تحية لك اخي الكريم


ربي يهدي ما خلق واش رح نقولو

 

[عا مـــــــــــر]

بقالك تعشق من مواضيع و ردود راك كبير
الله يهديك و هي إن شاء الله تفهم روحها و تفيق لعمرها ​

 

[Moha le sage]

.......................
​

 

[yani thiziri]

الكتبة المقصودة راني لونتها بالاحمر في ردك

علاه امالا انت كي تشوف واحد يخطئ ماشي تنصحه انت تكمل عليه

يعني هو مسكين في حالة انت تزيد عليه

وقلت انا ذئب ما نرحمش

علاه انت حيوان حاشا خليقتك ياك الله عز وجل خلقك واعطالك العقل

باه تفرق بين الخطأ والصواب وتتدبر في امور الدنيا لما يصلح للفرد نفسه وللمجتمع .........الخ

امالا غير عاود دير كونترول في مخك راهي الخيوط مخلطة شوي عندك
​

ديجا هي واش داها للبلى علاش تتبلى باش يضروها

وديجا هاذ الشيئ لي قلتو مانديروش في الصح

مانيش فارغ شغل باش نشيخ بطفلة ونضيع وقتي معاها

الهدرة لي قلتلها باش نوصلهم الفكرة كفاش راهم يخممو الذراري

راني طفل ونعرف الذراري على واش مستركبين

وفي لافان نقول للبنات متقربوش للكاري ديزويت تاع الذراري

سيغتو الانترنت راه الاغلبية فيهم السم يقطر منهم ومايرحموش

ولي متاخوذش الراي نقلها شههههه تستاهلي

وصحا فطورك خويا