السلام عليكم
كنت في وقت فات ندخل للقسم نقرا المواضيع ونتفاعل معها واليوم لقيت روحي هنا قصدتكم للنصيحة والمشورة .
- أنا فتاة بنت الـ24 عام،تعرفت هاذي ثلاث سنوات على شاب يسكن في ولاية غير ولايتي يعني تقريبا جيران ،تكلمنا في الهاتف مدة بعد مدة من تعارفنا غيّر مكان عمله وإنتقل لولاية أخرى ولما شفتو تبدل إفترقنا بالتراضي وجبدت روحي بشكل نهائي ونورمالمون هنا خلاصت الحكاية هاذي مع (ف).
- بعد هاذيك المدة عندي صديقة في ولاية أخرى عرفتني على خوها (م) بنية الزواج المهم رضينا على بعض وخواتاتو وأمو عارفين و انا حكيت لأمي وخواتاتي حتى بابا عطاتو ماما لمحة عن الموضوع انو كاين واحد حاب يخطبني للحلال.
- المهم اليوم اللي هو أول أيام العيد جاني إتصال من رقم غير مسجل عندي هزيت لقيت السيد (ف) يعيّد ويعاود قلتلو شكون انت قالي مش راح يعيطلك واحد مايعرفكش هنا عرفتو من لهجتو قلتلو بحيرة ومستغربة فلان ؟؟ قالي إيه.....و يشهد عليا ربي أني حسبتها وحدة تخدم معايا رقمها ينتهى بنفس رقمو اللي ماتذكرتوش إلا بعد ما سمعت الصوت. المهم هناني وسقساني إذا فيه جديد قلتلو قريب ان شاء الله قالي كل عطلة فيها خير .. :s
وبدا يقولي أنو مهما المدة اللي فاتت مانساش وبقيت في بالو وفهمت كي شغل بلي راح حاب يرجع .. المهم عرفت كيفاه نخرج من الموضوع والسلام سلام.
- بالإضافة لهاذو كاينين زوج وحد أخرين يخدمو معايا .. والله ياخاوتي مالقيت حسابي كامل نخمم بقلبي نقول (م) نحسبها من جهة أخرى نقول حاجة خلاف ..
كاين واحد من هاذوك اللي يخدمو معايا يغيضني مسكين يضال يتبع فيا قلتلو خطرة مانحب نعطي أمل لحتى واحد قالي نسحقو حتى ولو أمل كاذب نستناك، ضاقت بيا عيطت لصحبتي نشكيلها واش قالتلي بالحرف الواحد " ي الجايجة أهدري واللي تحكم معاه هذاك هو راهم كامل عادو يديرو هك ونتي بقاي قوليلي مانقدرش" والله العظيم تنشعت عمري مادرتها هاذي تاع نتمسخر بولاد الناس ومانقدرش نديرها حتى لوكان نقعد وحدي ومايكون من نصيبي حتى واحد فيهم .. المهم يكون ضميري مرتاح ومادرتش حاجة خايبة نندم عليها إيلا مش اليوم .. يوما ما
- خاوتي حابة الحلال، مالقيت حسابي ، وليت ديما شاردة نخمم راسي راح يطرطق ووزني غير ينقص زيد من القلقة دارلي الكولون العصبي،علما اني صليت صلاة الإستخارة بالشخص (م) في العشرة الأواخر من رمضان ..
- ديما كي يجوني يجو ضربة وحده .. وتتكرفس حوالي وتولي حالتي حالة
- صدقوني والله راني في حالة مايعلم بيها غير الواحد وحدو،قولولي،نصحوني كيفاش ندير،واش الحل؟ ربي يستركم ويفتح عليكم كامل
جيتكم هنا على خاطر ماعندي لمن نحكي ونفضفض راني غير أنا فالدار خواتاتي وخاوتي كامل تزوجو ومانحبش نقلق امي ولا نخليها تحس بحالتي على خاطر تتقلق وتتحير علي الضعف على واش راني نحس انا
راني نستنى في ردودكم بفارغ الصبر.
