لا ادري ان كانت مشكلة

[مشكلتي]

السلام عليكم
ولا مرة كنت نتوقع تكون عندي مشكلة نطرحها على الناس
المهم نحكي حكايتي باختصار انا فتاة ابلغ من العمر 20 عاما تعرفت بشاب بالصدفة في احد المنتديات كنا نحلو مع بعض تمارين ونراجعو الدروس جوزنا الباك والحمد لله ديناه كيف كيف هو الحمد لله يسكن بعيد علينا بزاف
ورا الباك قعدنا نحكو مع بعض عادي الى ان جا وحد اليوم قالي يابنت الناس راني نحبك وانا هاد العلاقات خاطيتني و مانحبش علاقات من هاد النوع انا بطبيعة الحال رفضته بدا يقولى وعلاش وانا راني ناويك للحلال ومانلعبش ببنات الناس بصح انا اصريت على موقفي وحدفت حسابي من الفيسبوك ومن بعد اشهر حليت حساب جديد واجوتيته فيه
بصراحة يمكن الشيطان لعب بيا قلت هاد الشخص مين راه ناوي للحلال ماتفرطيش فيه رحت قلتله انا راني معجبة بيك وياريت مانطقتها قالي الوقت فات وانا راني مع وحدة اخرى ومانجمش نلعب ببنات الناس قلت ماعلينا ماعليش الله يتمم بيناتكم بالخير

مين جا العيد قلت انا نعيد عليه قلتله صحا عيدك وكل عام وانت بخير
ايا ابدا يحكي معايا ودخل في مواضيع لا حيا لاحشما فالدين ندمت اللي حكيت معاه وتعلقت بيه تمنيت الارض تنشق وتبلعني سايرته شويا بصح من بعد ندمت اشد الندم و الندم ماينفعش كنت حاسباته بصح راجل بصح انا تاني بهلولة كان عندي مبادئ خليتها على جاله الحمد لله اللي وصلت غير هنا وخلاص
المهم اددعولي الله يهديني ومايخلينيش نعاود نتواصل معاه نخاف الدعوة تكبر بيناتنا
ادعولي خاوتي ربي يصلح حالي

 

[راضية حامدة]

تم الاعتماد

و الله يصلحلك الحال كيما قلتي

راكي عارفة الخطأ تاعك
ما تبعيش نفسك و الشيطان و اخطيك

 

[ماكانش]

ابلوكيه وبدلي الفايس بوك تاعك وماتزيدي تعاودي
الندم توبة

 

[ضيوف وسـنغادر]

ياو اول حاجة هادي خدمة الفايسبوك
والطفلة لازم ديماتحط حدود واحد ماينحيها
انت غالطة وغالطة بزااف مي استغفري ربي وادعيلو يغفرلك واش درتي شرط ماتعوديش لديك الطريق
واعرفي بلي اي وااحد ورا الشاشة الالكترونية هادي مافيهش لامان سواء ذكر او انثى الا من رحم ربكــ يعني الصرامة ديما موجودة
وايضا اعرفي بلي انت وحدة رايحة تكوني لواحد برك ايبا خلي سيرتك مضيفة حتى يجي داك النهآر
سلآم​

​