نتمنى تفيدوني وتساندوني

[مشكلتي]

السلام عليكم
نتمنى تفيدوني وتساندوني لان حاسا روحي وحدي
مشكلتي عندها عام
انا متزوجة وعندي عام غضبانا في دارنا راجلي لي يجيبلو ضربة دار طلب الرجوع الى البيت الزوجي
دار الباطل فيا وخدعني وهربلي بالقش ورحل الى مكان مانعرفوش
من بعد قالك لازم ترجعي هو انسان مشكاك يشك في حوايجو عقليتو علة مرض كوشمار
هو من النوع ليشكي بزاااف جا لدار قال لبابا طيتني مرا ماطيب ماتخدم ماهي متربية
مع انو جامي طلع مني العيب متهليا فيه يخرج نقي لابس حوايجو محدين
الماكلة غير وش يحب والله لراني نزيد في كلمة كنت احسن زوجة وتحملت الشك والكلام ليقولوا في حقي طيلة فترة الحمل وجازاني بالاسوء نضريت منو بزاااف
وصلت بيه الدرجة مد نيميرو لصاحبو جربني ولقاني مخلصة دار شحال من حاجة في حقي
باطلة لكن اليوم كيفاه نرجعلو وانا بركان ممكن نتفجر في اي لحظة
الناس رفدتني بلسنتها بالهدرة قال طلقها قال رمالها حوايجها التليفونات على راسي رجعتي لدارك ولا مازال راكي تسكني عند يماك نضريت ياعباد ربي
ودوك ضاربت مع خويا قالي ماتخرجيش تخدمي برغم انا معي شهادة خبرة وخدامة
قالي والو هدرت الناس باب والعايلة الكل واقفة معايا الا هو جا ضدي
بعد ماقررت ندير الخلع عاودت وليت في رايي وقلت نرجع لهداك المصيبة لي
باصيت بيه
رايو علي باسكو راني مشوشة نرجع ولالا نفسيا راني مدمرة ماقدرش نفكر مليح
وحتى القرار بالرجوع علابالي غالط مية بالمية لان انسان مريض نفسيا وعن قريب يردني كيما هو
طولت بصح لوكان بيدي كون زدت حكيتلكم العجب
​

 

[روز]

بسم الله

اذا كان ممكن ترجعيلو وتنحي من راسك الحساسية وتعيشي معاه بقلب ميت
فأنا أنصحك بالرجوع لانو عندك أولاد على حسب مالمحتي
البقاء في بيت أهلك الظاهر انو رايح يتعبلك نفسيتك اكثر من البقاء عند زوجك
زوجك يلزم تحاولي كفاش تصلحي منو
اللسان الحلو يرضع اللبة كما يقولو حاولي تكسبيه بالسياسة خليه يحس انك تغيرتي وحاولي تمشي معاه بعقليتو يعني كي يقلك حاجة قلو ايه صح وانا معاك في كلامك ووش قلت وعندك الحق وو
لانك لما تعملي هاكذا رايحة تغلقي ابوب المشاحنة والمشاكل بينكم
حاولي تشوفي المفتاح لعقله وقلبه
حاولي تعيشي معاه بقلب ميت والقصد هو قلب مايتحسسش ومايقعدش يعلق على كل شي
عامليه كما الاطفال وطاوعيه وخلاص
وتذكري انو الطلاق يهتز له عرش الرحمن وطلاقك منو مش رايح يحل أي مشكلة بالعكس رايحة تلقاي اخوك في وجهك يعني كيف كيف

وربي يهنيك وانصحك قبل كل هذا وذاك بصلاة الاستخارة مفعولها عجيب سبحان الله ماكانش حاجة احسن من انك تستخيري وتستشيري ربنا سبحانه
ربي يهدي سرك ويجعلك قرة عين زوجك
،
تمت الموافقة
الكلمة الطيبة صدقة !
​

 

[R@MA]

وعليكم السلام
هدا مجتمعنا اليوم المشاكل الغيرة الشك الوسواس
سبب خراب البيوت
الله يكون في عونك كيما قاتلك الاخت روز صلاة الاستخارة تبينلك طريق الصح
وتروح السحابة ان شاء الله
بالاك خوك راه متوتر ولا عندو مشاكل خلاتو يعارضك جيبيه بالعقل
وفهميه ولا خلي الوالد يحكي معاه مادامو مش معارض ومتأكدة ماراحش يعارضو
ربي يفرج همك

​

 

[رابح66]

السلام عليكم
نسأل الله أن يكون الصلح بينكما
أنا لست أدري من منكم المخطئ
أول كلامك قلت : راجلي لي يجيبلو ضربة
هذه محسوبة عليك سيدتي
أما ماتلا من حكايتك هو مخطئ
نهاية كلامك حتى في داركم ماقبلوكش بالخير
ترى هل راجعت نفسك لعل العيب فيك سيدتي مع كل إحتراماتي
ربي يقدر الخير بينكما
تقبلوا تحياتي

 

[اسيل عاصمية]

شوفي اختي حاجة الاولى لي ديريها في بالك انو الانسان لازم يشوف عيوبه كيما يشوف عيوب الاخرين بالك زوجك عندو حق ..... من رايي ترجعي لزوجك راجعي نفسك واذا كان زوجك يشتكي واش رايك تعالجي شكواه رجعيله وقوليله نعم كنت مخطئة اختي كيما يقولو لسان الحلو يطلع الحية قوليلو انت علمني وانت ساعدني واش يطلب قوليلو ايه متخالفيهش الراي طلبي رايو ابتسمي في وجهه حتى وان كنت انت الاصح فالحياة تحتاج لتضحيات على الاقل من اجل ابنائك وصدقيني مكانش شهر يبدى يتبدل وردي بالك تهدري على ماضي واذا عالى جال اخوك فعنده حق محبش ناس يزيدو يهدرو عليك راهو شايف صوالح مراكيش شايفتهم وتذكري ابغض الحلال الى الله الطلاق راني طولت ربي يسرلك

 

[ماكانش]

أنا من رايي ماترجعيلوش مريض نفسيا ويمد نيميروك للرجال هذا كاريثة كبيرة ماترجعيلوش واتوكلي على الله وماتتراجعيش ...
​

 

[شاعرة المستقبل]

ما ترجعيش واشكي بيه علىالاهمال العائلي
وخوك يروح يزمر شدي خدمتك واكري دار وعيشي وحدك وحافظي على اخلاقك وكرامتك

 

[anissa 13]

ربي معاك راكي مراة ونص قدرتي تصبري على كامل هاد الحقرة
لوكان جيت في بلاصتك مانرجعلوش نقعد عند والديا نخدم على روحي ونعرف والديا يتهلاو فيا
نتي زيدي خممي طلبي منو يتبدل شوفي والديك يهدرو معاه بلاك يحشم منهم
فهاد الوقت راكي تشوفي النسا غي كلمة تاع والو تزعف وتروح لدارهم وتقولو طلقني نتي مشاء الله عليك بنت فاميليا
صبرتي معاه ومزال تخممي ترجعيلو
القرار يرجع ليك وحدك المهم خممي مليح من قبل وربي يفرحك ان شاء الله ويرزقك اللي تتمناي​

 

[زيزي احمد]

صلي صلاة الإستخارة و اطلبي العون و الصبر من الله و اعلمي أن الله لا يغير ما بقوم حتى يغيروا ما بأنفسهم
ربي يكون معاك و يهدي زوجك و يجعل خير معين لك في هذه الدنيا
تقبلي تحياتي

 

[طائر الخير]

السلام عليكم

ربي يهدي راجلك اختاه

وحبيت نقول للشباب الفوق "ان ابغض الحلال عند الله الطلاق" ما تتسرعوش و تقولولها ماترجعيش الطلاق خلوه اخر حل.

و ننصحك اختي حاولى تفهمي منو سبب هاد الشك الزايد و العفايش اللي راه يدير فيهم طبعا لازم تخيري الوقت اللي يكون فيه هادي و لازم تعرفي كيفاه تساليه بطريقة ماتقلقوش.

و طبعا رايي انو تصلي الاستخارة و تشاوري المولى عز و جل وايضا كثري من الاستغفار و الدعاء له كي يصلح الله حاله ولازمك تستنفذي كل الطرق اللي تقدري عليها باش تحلي المشكلة بلا طلاق دخلي عايلتك و عايلتو طبعا لازم انتقاء اشخاص واعيين و حقانيين للاصلاح بينكم و تفكري دايما الاية

ربي يقدر اللي فيه الخير

وفي امان الله

:regards01:
​

 

[وردة أوراسية]

واش رح نقولك ختي

و الله مشكل كبير خاصة الغيرة و الشك و عدم الثقة راها تقتل

توصل لزوجك اقرب الناس ليك و لي خيرتيه تكملي معاه حياتك و خليتي داركم على جالو يشك فيك و ميوثقش فيك ؟؟

هادي صعيبة بصراحة بلاصتك راني درت حل من الاول ماشي حتى يفوت عام بصح معليهش

ربي يفرج عليك

اذا لمستي منو تغيير في كلامو و حاسة بيه رح يتبدل توكلي على ربي يو ارجعي و تكون الفرصة الاخيرة

و اذا العقلية مازال كيما راها يا ختي واش رح نقولك

ديري لي يريحك و يريح ضميرك

انت المهم صافية بينك بين ربي و درتي لي عليك و عائلتك معاك خاصة الاب

انا نظن مادام الاب موجود اخوك مع احتراماتي ماكان ما دخلو و الوالد الكريم موافق على عملك


و الله اعلم ربي يفرج عليك

صل صلاة استخارة و شاوري الناس لكبار و ربي يسهلك ان شاء الله
​

 

[ازهار الربيع]

لا انصحك بشيء بقدر ما الح عليك بــ:
**الدعاء ثم الدعاء ثم الدعاء لك وله بالهداية
**اكثري الاستغفار صدقيني يفتح به الله ابوابا لا علم لنا بها
الله يهدينا يارب

 

[سهام2014]

وش راح نقولك يا اختي الحال من بعضو راني كيفك لا طايلة سما ولا أرض مرة نقول نطلق و مبعد نتراجع ونقول نرضى بنصيبي راجلك مشكاك و راجلي متخلي عن كامل مسؤولياته بصح نقلك حاجة ما دام حاب يرجعك ممكن راح يصلح نفسه و يتبدل معاك و لوكان عندك اولاد تصبري على جالهم.

 

[mina12]

ربي يهدييييييييييييييييييييييييييييييييييييييييييييييييييييييييييييييييييييييييييييييييييييييييه​

 

[foued1986]

على حساب ما راكي تحكي ما بقات رجعة اختي انا نقولك
الا عندك دراري معاه الله يحسن عونك بصح الا ما عندكش غي كملي هذه القصة بالطلاق أو الخلع

"ان ابغض الحلال عند الله الطلاق"

راك غالط صحبي هذا حديث ضعيف وانما ربي هدر على الطلاق لانها نعمة منه و راني نهدر على الطلاق اللي تتوفر فيه شروط الطلاق رانا عارفين مشي اللي يجي يطلق مي هادا مهبول واش من قعدة معاه و بويسك راكي خدامة أكري و توكلي على ربي لانه هو الحافظ
ما تقوليش لا الطلاق حرام او يوسوسولك راسك لان ربي دار الطلاق لتفادي استمرارية المشاكل بين الزوج و الزوجة
و الخيار لك
ربي يسهل ان شاء الله