أعاني من قلة الثقة في نفسي وفي شكلي

[مشكلتي]

سلام عليكم بنات
مالقيتش كبفاش نبدا الموضوع ....... المهم فتاة جامعية 22 سنة العام هدا شهادة الليسانس ان شاء الله
مشكلتي هي نفسي ... دك نفهمكم
ممكن ماشي انا اللي نقول ولكن الكل تعجبهم عقليتي و قلبي الابيض و عمري ماعرفت نحقد الحمد لله
لكن شكلي انا ماشي مقتنعة بيه و الله في كتير من الاحيان مانحبش نشوف فالمرايا غير للضرورة متلا نسقم خيماري ولا
لكن انتقد شكلي كتيير مع العلم دايما نحمد ربي سبحانو عالنعمة اللي عطاهانا ربي و لله الحمد
علابالي بلي الشكل تاعي مقبول ماشي لدرجةصامطة مي البعض يقولولي و الله نتي حلوة
ومع العلم حتى الان لم يتقدم لخطبتي اي شحص حقيقة راني حابة نكم الدراسة مارانيش حابه نتزوج درك مي على الاقل
خطبة و تكون فترة حتى نكمل نقر ا او ..



مي الله غالب مكتوب ربي ولله الحمد
شكرا لهاد المنتدى اللي خلاني على الاقل نفرغ وش كاين في قلبي اللي واحد ما سمعو
مع العلم وفي اغلب الاحيان قبل مانرقد و الله نبكي بكاء ربي يعلم بيه
سلام

 

[روز]

السلام عليكم

عزيزتي لو كان الشكل هو لي يحدد مصير أو محتوى أي شخص لكانت الدنيا هذه توقفت !

أحيانا نشوفو أناس تقولي سبحان الله في شكله وحتى في أخلاقه يعني بشع
ولكن يسخرلو ربي الانسان لي يحبه

و أنا غير مقنعة بان هناك فتاة غير جميلة
كل بنت جميلة اذا لم تكن في صورتها ففي أخلاقها
ففي صوتها المنخفض وأدبها في الكلام ورقتّها
اذا لم تكن كذلك فهي شاطرة في أمور البيت وكل اصبع بصنعة
وااذ لم تكن كذلك هي فتاة متدينة خلوقة متربية على الصلاة والدين والقرآن
ولو ماكانتش هكذا هي فتاة روحها حلوة وتضحك وكلامها مايتشبعش منو..وهلم جرا

عزيزتي لا تحكمي على نفسك من مظهرك
شوفي الامور لي فيك مليحة
شوفي نجاحك في أعمال البيت في صداقاتك في حب الناس ليك
في رضا أمك وأبوك عليك
الحياة مش شكل ولون وعين زرقا ولون بشرة أبيض أو,,أو,,
بل الجمال جمال الروح
في بنات كثار جمالهم خارق ولكن فقط تقعدي معاها تتمني وقتاه تنوضي من جماعتها
وفي بنات جميلات ولكن مايعرفو يعملو ولا شي

عززّي ثقتك بنفسك وحاولي تشوفي الامور لي نجحتي فيها
شوفي اخلاقك لي بنات بزاف تخلاو على اخلاقهم
شوفي تربيتك لي بنات بزاف مش متربيات
شوفي احتشامك ووقارك وشطارتك
شوفي حب صديقاتك ليك
الشكل ممكن ييعطيك ثقة ولكن ياترى وراء هذ الشكل وش كاين ؟؟
هل كاين إمرأة يعتمد عليها ؟
دللي نفسك ، البسي تزيني لنفسك وقولي الحمدلله لي فضلك على كثير من خلقه
ورزقك الصحة والعافية والأهل والسمعة الطيبة
في ناس كثار متمنين ولو حاجة وحدة من لي قلتها
فكري مليح في كلامي

الكلمة الطيبة صدقة
ان شاءلله يفيدوك الاعضاء الكرآم بالنصيحة
​

 

[حكاية قمر]

عمر الشكل ما كان يحدد مصير الانسان ومكانته في المجتمع بالعكس الجوهر ومكنون النفس هو لي يخليك ديري بلاصة في قلوب الناس
ونت راك قلت بلي مقبولة ابا اقتنعي واعرفي بلي نصف الجمال هو اقتناع المرء بجماله وثقته بنفسه
والا خت قبلي كفات وفات وان شاء الله نكون فدتك ولو بقليل
​

 

[Silent Hill]

السلام على من اتبع الهدى
ههههههههههههههه
الحمد لله ، مشكلتك محلوله
اسال الله العظيم رب العرش العظيم
العليم الحليم الحكيم
ان يرزقها زوجا صالحا حسنا طيبا عاجلا
برحتمك يا كريم
و صل الله على محمد و على آله اجمعين
دمتي بخير اخيه ( يا البوقوسه ) ...​

 

[♫الباحثة عن الحظ♫]

اهلين زينة

شكون قالك ماكيش شابة

والي راه يحاول يقولك هكا راه يغير منك

الله يبارك راكي جامعية و راكي تقولي بلي كل

يقولولك حلوة وتهبلي ايه معناها راكي بوبونة و الله يبارك

اما شكل ميهمكش الاخرين يا زينة انت لازم تشوفي روحك شابة

و تقنعي نفسك وراح تكوني احلى وحدة

وواحد مش راح يقدر يبدلك حبك لنفسك

لازم توثقي في روحك و وراح تشوفي كيفاه تولي تحسي بنفسك

اما في مايخص الخطبة اعلاه ياغالية انت في رايك الي مش جاوها خطاب مش زينة جامي

انا تاني واش يخصني جامعية و متحصلة على شهادة ليسانس

وراني نحضر ان شاء الله لشهادة ماستر تاعي

نهبل و بوقوصة بنسبة لروحي و مش يهمني راي الاخرين

مي مزال ما تقدملي حتى اي واحد يعني انا مش مليحة

مستحيل قضية ثقة في النفس برك

و الزواج مش اول و اخر حاجة راكي

مزالكي صغيرة كملي قرايتك

و حققي احلامك و مكتوب يجي وحده اوك

متزديش تحطي افكار هادو في بالك


نزيد حاجة ربما طريقة لبسك و لا مش عرفة هيئتك تشوفي لبنات مثلا احلى منك ولا حاجة راني نقول ربما الا هاك ساهلة تقدري تبدلي لوك تاعك و تحسني مظهرك
هادي في يدك يا اختاه ووحدة ما تقدر تقول انا شابة عليك
كل واحد راه يشوف روحه لروحه حطي بالك حاجة متحسبيش للناس برك

تحياتي
​

 

[ROUAKIMOURAD]

وعليكم السلام اختى التى تعانى من قلة الثقة في نفسها وفي شكلها
اولا اسالى نفسك هل انت من العبادات الى الله واتبع خطوات التقرب من الله والاهتمام بتربية الروح وراح ينحل المشكل

 

[حُلم عابرْ]

نظن أنا فهمتك ربطتي عدم خطبتك ان شكلك ممكن معجبش الشباب

شوفي الزواج رزق ربي كاتبولك لا شتيتي ملكة جمال العالم لا شتيتي عرجاء وحولة ولا حتى محروقة ربي كي يحب يسخرلك العباد يسخرهملك امالا ابقاي انت هي انت ماتحاوليش تقنعي نفسك ان الشكل مهم هو ليه دور بصح مش دور اساسي ولا هو كلش

حطي في بالك '' رزق الله لا يأتي بمعصية '' ياسر بنات يحسبوا مزير ولا ماكياج راه شطارة ويوقع شباب روحي شوفي مولات المزير على واش طاحت طيح على واحد كيفها وماتقوليش الجميلة لي تفتن الشباب بجمالها امورها ماشية وتتزوج (( اذا شفت عبد على معصية وامورو سهلة راه استدراج ويا ويل اذا مافاقتش ))

حسيت روحي فاهمة مشكلتك لان لي جارة تخمم بهاذ التخمام واسفة الا خطأت التقدير

ربي يحفظك خيتي

 

[adel._dz]

ماتخافيش ياسر
طريقة تفكير الرجل والمراة مختلفتين جدا
ومكتوبك راهو يستنى فيك

 

[Hakan]

يا حسراه عليك انت تاني زعما ماراناش نشوف في الزين بصح ياااع يوجع القلب كي شغل حبة بانان بصح مصنوعة من البلاستيك ماشي اللي مغروزة ونايضة من عند ربي سبحانو يااختي واش نقلك راكي غير توسوسب في روحك ومسئلة الزواج ما تقلقيش كاين بنات راهم في سن ال 28 وما خمموش في الزواج لكن هذا وش حاب ربي والزين هذا عند الجميع كي الراجل كي الطفلة وما تقلقيش روحك ما يوصلك غير مكتوبك سلام.​

 

[M3TaZ eLLMa]

السلام عليكم

أخت الطيبة أولا نرحبوا بيك في منتدى اللمة الجزائرية بيتك الثاني

وثانيا نشكروك على مشاركة وتقاسمك معنا مشاكلك اخت الطيبة

ندخل في تفاصيل

كما تفضل الاخوة من قبلي وردوا عليك بأحلى الرودود وقنعوك وما نقدر نظيف شيء غير نصيحة فقط


أخت الطيبة أولا لازم تكون عند الثقة في نفسك وثانيا انت تميلي للأحزان كثيرا يعني تحبي تنفردي بروحك لوحك وتفكري

وهذا خطأ أخت شاركي صديقاتك مشاكلك حولي تفهمي روحك وين حابة توصلي والاهم والاهم ولي ذكرتيه هو نجاحك

اهتمي بدراستك اولا قبل كل شيء وبعدين فكري في زواج .

المشكلة الثاني لعتعاني منوا انت الشكل يأختاااه ليس عذرا نهائيا هذا حاجة ربي يا طيبة ولازم تكوني واثقة في ربي سبحانوا

نهار وين يكتبلك الخطابة يجوا سيحضرون لهذا ما تقلقيش روحك وصدقيني الشكل عمروا مكان حجة أو عيب حاجة ربي لا هروب منها وعلينا بشكره دائما على اي شيء وكل النعم التي انعمها علينا .

اخت الطيبة كما سبق وقلت لك حولي فقط تسترجعي ذكرياتك الماضية لربما يكون مشكل هو لي خلاك تنتبهي لشكلك وتقلي تنو الخاطبة ما حبوش يحضروا وووو يعني لربما حصلك موفق من قبل او مشكلة مرتي بها اثرت فيك تركتك في بحر الاحزان وتغلغلت في قلبك ولم تستطيعي نسيانها يعني اصبحتي حبيستها نقلوا لربما .

لهذا اخت الطيبة مدامك متمسكة بربي سبحانوا واخلاقك يشهدوا عليها الناس فلا تيأسي ابدا ابدا


ولكل مشكل حل

لزم عليك تراجعي روحك وتراجي ردود الاخوة لأنهم فيهم الفائدة لي تفيدك وتكلي على ربي سبحانوا وحاولي قرأة القران لأن فيه شفاء للقلب وكل الواسويس ..
.
ديري حسابك راكي حبيسة وسوسة شيطان لعنة الله عليه هو لي عمر راسك وخلاك تفكري الافكار هذوا وخلاك تنساي كل شيء وتنتبهي لشيء تافه حتى يبعدك على غايتك وربك .


لهذا اخت الطيبة نتمنى تفكري مليح وتراجعي روحك وإن شاء الله ما يكون غير الخير

وربي يوفقك وربي يعطيك ما تتنمني يارب

وربي ينجحك ويجبلك ولد لحلال لي يقيمك ويعرف قيمتك يارب

وتقبلي شكري وتقديري

وشكرا كل من مر على صفحتك

تحياتي​

 

[RoseBonbon]

حبيبتي

حبي نفسك باش يحبوك الآخرين

واهتمي بنفسك

البسي ملابس جميلة

شوفي فقط النجمات والممثلات بلاماكياج كاين لي يعيفو

يعني أنت رجعي روحك جميلة

الا كان عندك مشاكل بالبشرة شوفي دارماتولوق

إلا كان شعرك مشي شباب كاين الزيوت.. الا عندك الدراهم ديري الكيراتين يولي ليس

كي تروحي للعرداس اضربي حطة ماكييي اضحكي ازهاي واضربكي الدنيا بكودبيي

ديري الاشسبور.تمتعي بحياتك ر

وأكيد أنكى ستجدين من سيقدرك و يضعك على عرش قلبه

 

[رابح66]

السلام عليكم

كنت أود النصح والتوجيه
لكن للأسف أنت وجهت مشكلت للبنات فقط والتأكيد في التحية
لكن يبقى أن أقول إن الأخت روز قد بينت ونصحت لك أتمنى أنك أقتنعت

تقبلوا تحياتي

 

[RoseBonbon]

اليوم تلقيت تعليق من مجهول/ة

يا ريتك ما نصحتي جيتي تكحليها عميتيها.

الأخت صاحبة المشكلة لديها مشكلة في تقبلها لشكلها

وللأسف هنالك الكثير من الفتيات لا تعرفن كيف تبرزن جمالهن

وأنا بهذا ليس قصدي أن تمشي في الشارع يكبلو ما كياج أو تلبس ملابس فاضحة

قصدي لما تكون في مناسبات تلبس ملابس أنيقة.. تتعطر.. تحط ماكياج يبرز جمال عيونها .. تعتني ببشرتها وشعرها

وين الغلط في هذا.. مادام أننا في مجتمع المناسبات فيه غير مختلط

وأصلا وين راح يشوفوهاىالخطابات أكيد فيالأعراس

حسن اختيار كل ما سبق رح يغير كثير من شكل الفتاة ولما تشوف نفسها جميلة رح تحب نفسها أكثر وتثق بنفسها أكثر


ولا يعني تخلي شعرها مكشرد ووجهها بمشاكل البشرة وتلبس ملابس ماني وممبعد تثق بنفسها

أعلم أن عقلية الكثيرات أن البنت كي تتهلى في نفسها وكأنها عصت الله


ياناس إن الله جميل يحب الجمال

والله نفسيتي تتأذي لما نكون في باص ونشم رائحة العرق من فتاة من وجه الصبح لو رجل كنا قلنا راجل الله غالب

ونشوف وحدة جزء من ملابسها مقطع أو متسخ أو لابسة ملابس غير متناسقة

أوان متضاربة.. بودرة تقولشي طاحت في الفرينة

الأناقة والبساطة ***** الجمال والأنوثة

 

[red rose]

ربي اهنيك

 

[@R@ZIK]

ومع العلم حتى الان لم يتقدم لخطبتي اي شحص حقيقة راني حابة نكم الدراسة مارانيش حابه نتزوج درك مي على الاقل
خطبة و تكون فترة حتى نكمل نقر ا او ..


سلام

في هذه الجملة يعني راكي تقولي بلي راكي حابة تكملي قرايتك ومن جهة تقولي لوكان خطبة برك

انت في قرارة نفسك ربطتي عدم تقدم أحد لخطبتك بالشكل والوسواس بدى يكبر
بالعكس كملي قرايتك وان شاء الله يجيك مكتب مليك يفرحك
انزعي هذه الافكار من راسك ونصيحة مني كل صبح تنوضي من النوم شوفي في المرايا وقولي اللهم حسن خُلقي كما حسنت خَلقي وقولي بلي انت شابة وراح تشوفي الفرق لأنو التغير يدأ من النفس
وبالتوفيق​

 

[anissa 13]

بالنسبة للزواج مزالك صغيرة ماتعمريش راسك بالزواج
اما شكلك مايهمكش الجمال الخارجي مكانش افضل من الجمال الداخلي
علاش حنا حور العين ؟ حتى حنا بنات مثلنا مثلك والحمد لله حتى واحد فينا ماكامل سواءا مراة او رجل الكمال لله وحدة
قولي الحمد لله ماعندك حتى اعاقة لادهنيا ولاجسديا
مالازمش نطلبو بزاف الحمد لله للنعم اللي اعطاهانا ربي لحد الان
موفقة حبيبتي
​

 

[بقايا إنسان]

السلام عليكم ورحمة الله وبركاته وبعد:أختي الكريمة إن الذي بيديك فعلتيه ولم تقصري فيه وهو سلوككي وتعاملتك من المجتمع لكن أن تنكري على الله خلقته فهذا الذي قد يكون والله أعلم محرم فقد صوركي الله على أحسن صورة ولحكمة الله أعلم بها أعطى لكي هذه الصورة واحمدي الله أن صورتكي لا يشارككي فيها أحد ثم ليس المهم أن نرى صورنا في المرآة جميلة وجذابة ولكن الآهم أن يرانا الاخرون بصورة أجمل
أما موضوع الخطبة فعليكي الانتظار في طابور المنتظرات الاتي يردن الزواج قبل الاجل
فمن استعجل الشيء قبل اوانه عوقب بحرمانها
نصيحتي لكي هي أن تعيشي حياة جد طبيعية وبقلب راض بقضاء الله وقدره ولا تستعجلي الشي فكم من مستعجل لم يصل إلى هدفه
دمتي جميلة الأفعال

 

[عيشة مرة قدور]

سلام ختي نحمكدو ربي مي راكي صغيرة انا 24 صغير وحاسة بيك واله كومام راكي تقراي انا لا قريا لا والو دوك والله وتشوفي خالتي وبناتها واش يقلو عليا راكي كبيرة ومتزوجتيش وكي نقلهم هدا مكتوب يقلولي نونو زهر معندكش ويولو يمعنو بلي حنى شبات عليك على هاك تزوجنا مع انو انا شابة والحمد لله والله ومع تالي ونقول الحمد لله لي راني مسقمة في خلقي كاين شي ناس وجهم محروق وحامدين ربي مي نقلك حمدي ربك برك