ارجو منكم النصح

[مشكلتي]

سلام اهل اللمة ان شاء الله تكونو بخير
اتمنى انكم متحذفوش موضوعي لاني و الله محتاجة النصيحة بزاااف

عندي مشكلة كبيرة
و لي هي

انا طفلة عمري 18 سنة كي كان عمري 15 سنة زوجت زوجني بابا بالقوة مع اني صغيرة و منقدرش نحمل المسؤولية تاع دار
الراجل لي مزوجة بيه صح يحبني و يحققلي رغباتي لي نبغيها بصح مقدرتش نبادلوا نفس الشعور و دائما نحاول منحسسوش بهاذ الشئ راني عندي معاه حاليا طفلة و طفل المشكل بغا الثالث ثاني و انا و الله مني قادرة
بلوس بابا كرهتوا لدرجة كبيرة لانو بطلني من قرايتي و انا 1 ثانوي و زوجني بلا رضايتي و انا صغيرة حتى وليت كيما نروح لدارنا منهدرش معاه كامل غير نسلم على يما و خياتي صغار و نخرج

تعيشو انصحوني كيفماه ندير من جيهة راجلي مقدرتش نحبو و محبيتش نزيد لولاد و من جيهة بابا راني منيش قادرة نحكي معاه
و الله راني نبكي ليل و نهار و كرهت من حالتي هاذي تعيشوا انصحوني كاني اختك الصغيرة

 

[راضية حامدة]

تم الاعتماد ماكانش سبب يخلينا نرفضو مواضيعكم
اختي الحبيبة
ماعلاباليش علاش راكي تعذبي روحك بمور ما تقدري تغيري فيها والو
و كانك راكي تحوسي على المشاكل
الان كي تكرهي باباك او غيره او تكرهي روحك او من حولك وش رح يغير فيك؟
وش رح تستفادي؟
باباك فكر بطريقتو و زوجك و خلاص
الان كي راكي تبكي علاش؟ تقدري تغيري شي؟؟؟؟؟؟؟؟؟؟؟؟؟؟
تبكي كي يكون عندك حل و ما تقدريش تديريه
لكن انت راكي تقولي ما عندكش اي مشكل لا مع زوجك و لا اي شي
مشكلتك راهي مع نفسك مازال ما تقبلتيش فكرة انك تزوجتي
و مازلتي شادة فيها رغم انه فات عليها 3 سنوات و ماشاء الله راكي بطفلين
نسقسيك سؤال: اذا ما عجبتناش الاقدار لي كتبهالنا ربي وش نديرو؟
ما عندنا ما نديرو حنا مومنين و متاكدين انه ربي يقدرلنا لي فيه الخير لينا
و مهما كانت الاحوال نقولو ديما الحمد لله

باش تقدري تعيشي في سلام اتقبلي وضعك و احمدي ربي على نعمه الكثيرة
على الزوج و الاولاد و وووووو
ربما راكي تشوفي فيهم نقمة لكن هوما نعمة من عند الله اتخيلي حياتك للحظة بلا بيهم تعرفي اهميتهم

هذا كله من الشيطان راه يوسوسلك و يخسر عليك اجمل سنوات عمرك
ما تقضيش وقتك في الامور التافهة و التفكير لي ما ينفعك و ما يغير فيك والو
استمتعي بزواجك و بحياتك و باولادك و بواليديك
و بباباك مادامو عايش اذا غابت عينو مش رح ينفعك البكى عليه و تقولي يا ريتني شبعت منو

قدر الله و ماشاء فعل و مادامك بخير ما عندكش سبب يخليك تكوني تعيسة
الان ما تشوفيك موراك خلاص ما تقدريش تولي للوراء و تحبسي هذا الزواج

بالعكس
شوفي للقدام و شوفي لزوجك و تاكدي انه كل احاسيسك هاذي توصلو حتى لو ما تبينيش لكن هو يقدر يعرف بزاف امور على مشاعرك و قادرة تكوني تضري فيه و بالتالي تضري نفسك و زواجك

استمتعي بصغرك و بولادك دوك يفوت الوقت يجري و تلقايهم كبرو و انت ما عندكش ذكريات جميلة معاهم
عيشي حياتك و سامحي باباك
و سامحي نفسك تريحي و تعيشي بسلام
لي فات فات و ما نبقاوش نرثو في الماضي
الماضي فات
و ربي قدر
و عندنا الحاضر نعيشوه و نستمتعو به و ما نعطوش لانفسنا اسباب تخلينا نفقدو المتعة في الحياة


اما عن الطفل الثالث اتناقشي مع زوجك
الحمد لله عندكم طفلين و انت مازلت صغيرة كبريهم شوي و زيدي ان شاء الله
حاولي تقنعيه بلي مليحة ليك و ليهم
انت ترتاحي شوي و تتلهاي بنفسك و زوجك
و ليهم هوما باش تربيهم كيما تحبي و تغرسي فيهم وش راكي متمنية من قيم و اخلاق وووو

ربي يقدرك اختي
و استغفري ربي و انعلي بليس
و اتسامحي مع نفسك اولا و قبل كل شيء
و قبل ما تشوفي الامور لي مش مليحة شوفي الامور المليحة و احمدي ربي يزيدك من خيره
ربي يطمن قلبك و يشرح صدرك و يبعد عليك هذه ضيقة النفس يا رب

و اذا حبيتي اتواصلي معايا على الخاص اذا حبيتي و اذا عندك انشغالات اخرى

 

[♫الباحثة عن الحظ♫]

سلام عليكم

اختي نقولك زوج كلمات مكتوب ربي
صح حرمك من صغرك بصح زوجك تقول ناس ملاح
خلاص عيشي و حوالي تشوفي الشىء الايجابي
راح تحبيه مع الوقت و عيشي مع اولادك
واحمي دارك قصة الولد ناقشي زوجك معندناش دخل

منقدرش نزيد اكثر من هكا
نقولك اختي الاب اب لوكان يدير واش يدير بلاك كان يشوف في الوقت هداك مصلحة ليك
وهو مش ارماك راكي عايشة الحمد لله
متكرهيش بوك هو مهما يكون كبرك و خلاك امراة و راكي ام
دورك تكرهيه الناس تعمرلك راسك تشوفي غيرلك كمل لقراية وانت لالا
صغيرة و زوجوك وام يقولولك ضعيتي روحك
لالا مكانش منها ربي يعطي كل واحد نصيبه
حرمك من لقراية لكن اعطاك زواج ودار في القمة ماشاء الله

اشبعي من بوك قبل ما تغمض عينه

ناس تحوس على بوها لوكان يرجع غير لوكان دقيقة برك تشم ريحته
وناس تكره فيه

ربي يعطيك ما تتمني
​

 

[زيزي احمد]

بنيتي سلام الله عليك أما بعد :
هل تحبين ولديك ؟ أكيد كثيرا
هل تخافين عليهما ؟ أكيد كثيرا
هل ترضين لهما الهلاك و العذاب ؟ أكيد مستحيل
كذلك أبوك عندما زوجك لم يرد لك العذاب و الدليل أن زوجك يحبك و يحقق لك ما تتمنيه
إعلمي أن ما تحبينه لولديك هو ما يحبه لك أبوك لك و لا يتمنى لك سوى السعادة و العيش مع زوج يحافظ عليك قبل أن يغادر الدنيا
هم الوالد هو ستر ابنته مع رجل يأتمنه عليها و يراه قادرا على حمايتها قبل أن يموت .فلا تكرهي أباك حتى لا يكرهك أولادك .
بالنسبة لزوجك فهو فراشك و غطاءك فلا ترفضي نعمة الله و حاولي تغيير نظرتك له و أحبيه حتى يكون عونا لك في هذه الدنيا
أبوك سبب حياتك فواجبك طاعته و حبه و إرضاءه حتى تنعمين برضاء الله
زوجك سبب جنتك فواجبك طاعته و الحفاظ على بيته و ماله و أولاده حتى تنعمين بالسعادة و راحة البال
أعلم أن الدنيا من غير حب لا تحب لكن ضعي نصب عينيك أن زواجك قضاء و قدر و مكتوب من عند الله فالا تعترضي قضاء الله و لكن قولي اللهم لا نسألك رد القضاء و لكن العفو فيه
ربي يهديك و يصلح لك زوجك و ولديك و يرضى عليك أبوك و تقدري تسامحيه و تحبيه سوف يتغير كل شيئ و تحسين بالفرح عندما يضمك أبوك إلى صدره و يقبلك و لا تنسي أن ولديك هما أعز ناس عند أبيك
أنا جدة و لدى ابنتي ولد و بنت أحس بفرح شديد عندما أراهما و أضمهما
لو لم يكتب لك الله الزواج المبكر من هذا الرجل لما تزوجت إذن تذكري أنه لن يصيبنا إلا ما كتب الله لنا
تفاءلي خيرا و انزعي الحقد من قلبك و استقبلي الحياة بصدر رحب و عيشي لحظات السعادة مع عائلتك و لا تنسي أن تسامحي أباك و تطلبين منه العفو قبل أن يفرق بينكما الموت فتندمين حيث لا ينفع الندم
تمنياتي لك عزيزتي حياة هنيئة و سعيدة . سلام

 

[أم عبد الله]

لي عودة ان شاء الله اختي
سلامي​

 

[*amina*]

السلام عليكم
والله يا اختي قصتك اثرت فيا بزاف يعني كان عمرك 15 سنة و تزوجتي غصبا عنك
معليش يا اختي هدا مكتوب ربي ولي مكتوب على الجبين لازم تشوفو العين
باباك اعذريه يمكن كان يخمم في مستقبلك و شاف بلي زوجك ناس ملاح
يا اختي ادا زوجك يحبك و يقدرك طيعيه و حبيه في جال اولادك
ضرك انتي كي راكي تقولينا انصحوني و مكيش قادرة تحبي زوجك حابتنا نقولولك اطلقي؟؟؟؟؟؟ وين تروحي؟؟لدار باباك؟؟؟ياك راكي تقواي منقدرش نحكي مع بابا
يا اختي ارضاي بمكتوبك و كيما قاتلك الاخت اشبعي من باباك قبل ما يموت رضا الوالدين راهي من رضا الله سبحانه و تعالى
انا بابا راه حي و لاباس عليه كي نتفكر بلي جاي نهار و منشوفوش غير وحدي نشبع بكا وكي نروح نزورو و نولي راجعة لداري تاني نشبع بكا
وتاني كي نتفكر بلي راجلي يروح الصباح للخدمة نخاف كاش ما يصرالو ياك الموت مقدرة على كل واحد نخاف غير من الطريق بعيد الشر نظل نعيط الا وصل ولالا
انتي كون يموت باباك تبقاي نادمة على النهارات لي محكيتيش معاه
وكون كاشما يصرا لراجلك ميغيضوكش ولادك يترباو بلا باباهم
العني بليس يا ختي وراجعي نفسك مليح ربي مقالش لازم الطفلة تقرا و تخدم و تكمل قرايتها يعني احنا كي قرينا واش درنا؟؟رانا في ديارنا نخدمو في زواجنا ونرضو الله سبحانه
حبي زوجك يا اختي راه عهو سندك في الحياة كون تدقك شوكة تلقايه هعو معاك و قدامك
و احكي مع باباك النهارات راهم يجرو يا اختي متخليش الندم يسيطر عليك
انتي مكيش حابة تحبي زوجك و مكيش حابة تحكي مع باباك؟؟؟؟ و شكون يبقالك السند كي تخسري هدو زوج؟؟
الوقت لي لحقنا ليه راه واعر الناس كامل راهي غير نفسي نفسي مينفعك غير راجلك ولا باباك

 

[HAMZA USMA]

يآ أختي آرضاي بوآآش كتبلك ربي
هذا مكتوب وقسمة ونصيب
وأنتي قلتي بلي زوجي هآيل
وآآش تحوسي أكثر من هذا ؟؟
هآذي كآمل وسآوس شيطان ؟؟
اما بخصوص باباك ياأختي والله غير نورمال هو لي يعرف صلآحك
وشي لي راكي تديري فيه عيب نورمالمون تبوسي راسو صباح وعشية
ومسآلة الدراسة ما الدراسة _ والله ما واجب انتي لحقتي ل1 ثانوي :up:
نورمآآآآل شيئ عادي فيها بركة
اما بخصوص الطفل الثالث هاذيك مسالة بينك وبين زوجك سيي احكي معاه وتناقشي معاه
وتحلوها ان شاء الله

​

 

[red rose]

و الله يا ختي قصتك بزااااف تاثرت بيها
مي اعرفي بلي باباك كان يرضالك الخير
روحي اهدري معاه و انعلي بليس و ان شاء الله تحبي زوجك
و تعيشي هانية
​

 

[التائب الخاشع]

مشكل مو صعب المشكل كاان في وقت ماضي لكن االان حدث ماحدث ووصاار المكتوب و الي انك تزوجتي واكملتي نصف دينك والحمدلله من زوح راكي تقولي عليه باانو نعم الزوج والي نااس اكل تتمناه المبادرة بالحب لاتكمن بالرومنسياات وغيرها بل بالعشرة والمودة والرحمةووغيرها اما بمناسبة ابوك الي زوجك قهرا واصرارا منه ندعولو احنا ربي يهديه ونتمنى تساامحيه فبسااامحةمنك تنفتح في وجهك ابواب السعادة وليكن في العلم بان ابن ادم انما هو ايام فكلما ذهب يومه ذهب بعضه ...فالرااحة والسعادة الابدية تكمن وتتجلي في الدار الاخرى ... ربي يعينك ان شاء الله تحيااتي التائب الخااشع​

 

[@R@ZIK]

سلام أختي الكريمة
الوالدين نعمة
انت راكي تقولي في عمرك 18 سنة يعني مازلتي صغيرة ومازالت الدنيا طويلة وعلاش راكي تقلقي في روحك
يمكن يكونو واش صرا ليك خير لك
بالعكس مادم ربي عطاك راجل مليح احمدي ربي وشكري باباك مع انو غصب عليك لكن هو اكيد كان يتمنالك الخير
وعسى أن تكرهوا شيئا وهو خير لكم اتمنى ان تنسي كل هذا واحمدي ربي وسامحي باباك​

 

[RoseBonbon]

الزواج مكتوب.. ونتي ديتي مكتوبك

بالنسبة للأولاد.. قولي لزوجك بلي حابة تستراحي شوية وممبعد تزيديلو الثالث مزالك صغيرة

واقنعي زوجك يخليك تكملي دراستك بالمراسلة أو اعملي تكوين في حرفة تحبيها

حتى تشغلي نفسك بشيء تحبيه

حاولي تحبي زوجك.. شوفي الأشياء الجميلة فيه
أنت لم تذكري أشياء بغيضة فيه

فأكيد أنه جيد معك

واتركي عنك قصص حب المسلسلات التركية

أحبي زوجك وأطفالك فهم من يستحقون حبك

 

[adel._dz]

من ال 15 لل 18 جبتي 2 أطفال فارق السن بينهم أقل من عام ؟؟؟؟

لا تعليق أفضل

 

[NADA ELWARD]

اختي نصحتي ليك تصالحي مع باباك مهما غلط معاك يبقا باباك وزيد هذا مكتوب وتقدر عليك ودوك لازم تخممي في ولادك ومستقبلهم وزوجك قلتي بلي يحبك يويحققلك واش تحبي واش تحوسي فوق الشيء هذا مزلتي صغيرة و بالاك مع الوقت تحبيه وتتقبليه

 

[أم عبد الله]

الزواج مكتوب.. ونتي ديتي مكتوبك

بالنسبة للأولاد.. قولي لزوجك بلي حابة تستراحي شوية وممبعد تزيديلو الثالث مزالك صغيرة

واقنعي زوجك يخليك تكملي دراستك بالمراسلة أو اعملي تكوين في حرفة تحبيها

حتى تشغلي نفسك بشيء تحبيه

حاولي تحبي زوجك.. شوفي الأشياء الجميلة فيه
أنت لم تذكري أشياء بغيضة فيه

فأكيد أنه جيد معك

واتركي عنك قصص حب المسلسلات التركية

أحبي زوجك وأطفالك فهم من يستحقون حبك

الاخوة والاخواتـ والله ماخلاو شيء ينحكا واصلا ماكاش كلام ينقال فوقو والاهم كلام هذا

اتهلاي ف داركـ وولادكـ ​

 

[abdo404]

و عسى ان تكرهوا شيئا و يجعل الله فيه خيرا كثيرا
​

 

[آهات القلب]

اخوة و الاخوات ما قصروش معاك هوما يفهموا اكثر مني
لكن نعطيك حكاية تاع وحدة نعرفها باه نشوفي الفرق بينها و بينك و تحمدي ربي على العيش اللي عيشتها
شوفي زوجوها خوتها بالغصب بواحد يسكر و العياذ بالله و ما عندها ليماها لا باباها
و ما ترحش عند خواتها خلاص و هو نهار كمل و هو يضرب فيها عندها 5 دراري كل عام تجيب واحد
و مسكينة كون تشوفيها تقول ماعندها والو ربي يهديه برك
و انت قلتي زوجي مليح هذا الأهم
اما بالنسبة لباباك ممكن غلط في الوقت هذاك و زوج و انت صغيرة بصح راكي عايشة مليح
اللهم اني بلغت اللهم فالشهد
تقبلي أختك في الله

 

[zozo firem]

يا ختي كاين قصص بزاف يشبهو لقصتك ميي كاين فرق بينك و بينهم هما متعدبين من طرف الزوج و حتى الاب بروحو و لكن انت الحمدلله راه رب حنين معاك و طحت في واحد ناس ملاح و لوكان ما يبغيكش ما يبغيش يزيد معاك الدراري + و على العدد كي قلت مكيش قادة ننصحك يا ختي حاولي توصليلو مفهومك بطريقة لبقة و فهميه لي صحتك و وقتك و تان باش يكون عندك الوقت با تفرغيلو زعمة باه ما يسرقوكش لولاد منو :p و من هاد الكلام sur راح يتفهمك و يعذرك

و اخيرا لي نقولهالك هدا الاحساس راكي عايشاتو تالمو ما سييتيش تبغيه حكمي 2 ورق و ستيلو الاولى كتبي فيها حسناتو معاك و التانية سيئاتو و شوفي وش من ليستة كبيرة و على حساب وش قلت متاكدة رح تكون حسناتو كتر

و على باباك في بالي حبك تتخطاي مرحلة المراهقة (كيما راهي لمود دوكا يسموها مرحلة تلقاااط الذنوب ) قصدو يحميك من الوقت لي رانا فيه مبغاكش تعيشي واش راهم يعيشو المراهقين تاع دوك بكري كنا نسمعو دوك رانا نشوفو بعينينا رب يحفظنا
و هدا غي شيطان ره مغمدلك عينيك باش ما تحمديش ربي على النعمة لي راكي فيها كيما سبق و قلتلك راكي طحت في وضعية خير من بزاف ناس

و انشالله ما نكونش طولت عليك يا ختي سلاامي

 

[بقايا إنسان]

سلام الله عليكم ورحمة الله وبركاته وبعد: أختنا الفاضلة أنتي رأيتي نفسك على أنكي ضحية في حين أن زوجكي هو الضحية لآنه تزوج من امرأة نشرت غسيله على العامة وجعلت منه قضية فبالرغم من حبه لكي وجمائله عليكي إلا انكي كرهتي الانجاب منه لا لسبب إلا لأنكي تزوجتي منه وانتي صغيرة السن
بالله عليكي جل النساء يحسدنكي على ما أنتي فيه وأنتي تشتكي فلا يخفى ان من حسن حضك انكي تزوجتي من رجل يقدس التراب الذي تمشي عليه ورضاه عنكي قد تنالين الجنة إن شاء الله فأي نعمة بعدها تريدين ؟؟؟
ولآجل هذا كرهتي الانجاب منه؟؟؟؟؟ والله هذا هو العجب بعينه ...يعني انجبتي منه 2وكرهتي الثالث؟؟؟؟
اما ابوك فقد يتحمل الوزر في حاجة واحدة فقط وهي لو لا قدر الله طلقكي هذا الرجل ورجعتي له بولدين هنا تحملينه المسؤولية بكاملها
اما ما دون ذالك فأنتي برأيي على خطأ ...فلكم من رجل تمنى الزواج من امرأة تحبه ولو ضفر بها لنال زينة الحياة الدنيا لكن هيهات
اسمحيلي اختي اذاتجاوزت معاك حدودي فهذه هي ردودي

 

[خديجة 19]

انا اختصر عليك اختي العزيزة الله رزقك بثلاث اسباب وان احببت بثلاث ابواب لدخول الجنة رضاالوالدين ورضاالزوج وولد صالح يدع لك فهل ترفضين كل هذه الابواب لتغتري بابواب الشيطان التي فتحتهالنفسك يا اختي العزيزة اطيعي اباك وزوجك وان كتب الله لك ولدا اخر لعله خير لك في دنياك واخرتك والسلام عليكم

 

[stelllo]

دام يحبك ويقدرك ماتخسريهش والحمدلله ربي رزقك بالطفل والطفلة... والثالث تناقشي مع راجلك وقوليله نأجله هالموضوع شوي اخاطر هاد الزوج يحتاجوا تربية واهتمام....ودامه يحققلك اللي تحبيه ماضنيتوش بيرفض ان يتناقش معاك بهذا الموضوع