وآش رآيكم في الرآجل الي يعآون مرتوآ ؟

[ضآحكة مستبشرة]

السلآم عليكم و رحمة الله و بركآته

وآش حوآلكم

عندي مدة مدرتش موضوع لهنآ اليوم قررت ندير موضوع جديد
ان شاء الله يعجبكم يا الزينين

وآش رآيكم في الرآجل الي يعآون مرتوآ ؟

هل هآد الشيء عآدي لدى الرجآل ؟

هل المرأة تقبل ام ترفض مسآعدة زوجهآ لهآ ؟

وآش كلآم المجتمع على الرآجل الي يعآون مرتوآ ؟ ​

 

[4algeria Network]

السلام عليكم ورحمة الله وبركاته

اذا الرجل عاون مرتو رأفة بيها ودلال ليها حاجة عادية وما فيها عيب .

العيب أنو الراجل يشوف مرتو حاصلة ومريضة وتعبانة وما يساعدهاش بأتفه حاجة لدرجة يرجع عبئ عليها .

من الرجولة أنو الراجل يساعد زوجتو وقت الحاجة .

المساعدة تكون بين الظروف والتدليل أما يرجع يساعد في كلش معناها راح فيها .

يعني المساعدة ليها أوقاتها .

شكرا .

 

[السلطانة]

وعليكم السلام
أهلا أختي نورتي
الراجل لي يعاون مرتو بالنسبة ليا
حاجة عادية
كي تكون من باب المساعدة والمحبة
مافيها حتى مانع
أنا عن نفسي نقبلها هههه
غير يساعدني برك منقولش لا :d
أما المجتمع فأكيد كاين لي يقبل وكاين لي يعلق
أنا نقول الراجل كي يعاون مرتو تبقى بيناتهم ميروحوش يبرحو بيها للناس
تقبلي مروري أختي
وأرجو أن تتوسعي في الموضوع في المرة القادمة
طولي شوي الموضوع وديريلو مقدمة وعرض وخاتمة باه يجيك باهي
في انتظار جديدك أختي

​

 

[secret de coeur]

السلام عليكم
في بلادنا الي يعاون مرتو يقولك جايح
شووووووف آ سيدي لفهامة وين ولات ؟ -_-
ياخي الرسول صلى الله عليه وسلم أعظم الخلق وكاين يساعد نسوانو مابالكم العبد العادي
انا من جهتي هي مش يخدم عليها شغل الدار مي مافيها والو اذا عاونها في حاجة خفيفة تكون اصلا من باب المداعبة مش غي يأمر وأوامرو مجابة باش مايكونش ثقيل
نعرف وحدين كاس ما مايجيبوش وحدو :/ وصلت لهاد درجة
ايا نسناو رأي شباب اللمة الناضج
سلام

 

[أم عبد الله]

اهلين اختيتي
ياسيدي والله مليح الراجل يعاون مرتو احنـآ كبرنـآ ع التعاون يعني بابا يعاون ماما يعاونـآ احنـآ لبنـآتـ وبالنسبة لخاوتي اداو هادي العقلية
صح ماشي ديما مي الوقت لي تحتاجي يد المساعدة تلقايهم حاظرين ومستعدين وماذا بيا يكون خطيبي عندو هاذي العقلية ههه
كاين لي يشوفوهـآ جياحة الراجل يعاون مرتو وسوغتو لي ساكنين ف الاريـآف بصفة خاصة
وانا بالنسبة ليا الا حب يعاوني ماذا بيا جامي نقول لالا ولو نشجعو:-r هههههههه
مرة اخرى ميرسي ع موضوعك
سلامي​

 

[Ma$Ter]

السلام عليكم ورحمة الله
مش عيب كى الراجل يعاون مرتو بصح مالازمش المراة تحتم عليه
باه نا يحسش انها تفرض في روحها عليها


​

 

[أم منيــــــر]

السلام عليكم
حاجة مليحة الراجل يعاون مرتو ما فيها حتى احراج بصح في حدود المعقول
كاين شي رجال الله يهديهم يشوف مرتو غارقة ما بين شغل الدار والدراري
وهو عاطيه قلبو قاعد على النت او التلفزيون ولا على بالو
ايا بن عمي واش هذا على الاقل شد عليها الدراري وخليها تخدم طرانكيل
وكاين لي يعمل معاها يد بيد
وكل واحد وعقليتو
بارك الله فيك على الموضوع:up:


​

 

[ام اشراق]

ما فيها والو كالراجل يعاون مرتو فى البيت طبعا اعمال تكون خفيفة دون المبالغة فى ذلك اقرى ولادو يحط معاها ويرفد كاش حاجة كاين اللى عندو هواية الطبخ منين ذاك يطبخ وجبة لافراد اسرتوا من هذا القبيل ماشى هو يقوم باعمال البيت وهى تروح تتفرج ولا تخرج تحوس لالا ولازم المراءة تقدر هذه المساعدة لانو حتى هو عندوا عمل راه اقوم به خارج البيت وهذه المساعدة لتدعيم اواسر المحبة والالفة بين الزوجين واستمرا ر الحياة بينهما
وهذى عقليات كاين اللى اجى حاجة عادية
وكاين اللى اجيه حاجة طايحة وتقلل من قمتوا
وراي ادم يبقى الفاصل فى هذ النقطة

 

[آمِيْرَتُه]

السلام عليك
آهلا حبيبتي
مافيها والو إذا راجل عاون مرته مكان حتى عيب لكن من باب المساعدة و الرأفة و الحب
ماشي هي تسركل في الزنقة و هو يخدم شغل البيت

 

[ضآحكة مستبشرة]

شكرآ لكم على المرور العطر
بارك الله فيكم​

 

[: Imane :]

من المفروض هذي حاجة عادية و ما فيها حتى عيب
العائلة لازم تكون مبنية على التعاون ^^
شكرا على طرح الموضوع : )

 

[ضآحكة مستبشرة]

نورتي الاخـــــــــت​

 

[ماكانش]

يعطيك الصحة على الموضوع الباهي
النبي صلى الله عليه وسلم ارجل الرجال وكان يخدم في بيتو ويخيط ثيابه ويطهي طعامه وعادي
الراجل يعاون في امور وأشغال الدار ولكن بشروط :
لازم الزوجة تكون لبيبة ويكبار الزوج في عينيها،
ثانيا : مالازمش يلبس الطابلية ويعاون في امور ماتليقش بيه كالنشافة ولا ينصب البرمة ههههه
يعاون خفيف برك قهوة حليب يشلل لماعن والسلام
​

 

[ضآحكة مستبشرة]

شكرآ ع المرور
هههههههه و الله عجبتني انت راجل و نص
نورت الموضوع خو​

 

[@R@ZIK]

يعطيك الصحة ختي على الموضوع
ما فيها والو الراجل يعاون مرتو من باب الرأفة والحب والاحترام لها ولكن في حدود مشي هو يخدم وهي قاعدة تتفرج ولا على النت
ففي مجتمعنا الاغلبية يعتبرون الراجل لي يعاون مرتوا ضعيف الشخصية ​

 

[Imaya 2015]

و عليكم السلام ورحمة الله تعالى وبركاته

موضوع مليح
ف نظري هاذي من معالم " الرجولة "
طبعا المساعدة ما تكونش كبيرة لدرجة تلغي هيبة الرجل ف دارو

أنا عن نفسي ما نقبلهاش دائما ...
دائما الرجل يبقى رجل
هذا ليس تعظيما له لكن للحفاظ على التوازن

وؤسولنا الكريم صلى الله عليه وسلم قدوة.


شكرآ​

 

[♫الباحثة عن الحظ♫]

سلام عليكم
راني جيت الراجل الي يعاون مرتو

يعمري عمري فور بزاف الفكرة هادي تخدم الشغل و هو يسيق في الارض ههههههه
انت طيبي وهو يغسل لمواعين

حاجة هايلة بزاف يخلي جو جميل في بينهم من جهة و يخلق المودة و شوي جو تاع ضحك وتمهبيل من جهة اخرى

واعلاه لالا مش ساعدها العكس خاصة مين تمرض و لا حاجة تقدر تعزم عليه
و حاجة تاني بينيكم لبنات مام يخدم اعلابالي تعاودو رواه الخدمة متقدروش ههههه

يعطيك الصحة موضوع حلو بزاف​

 

[ضآحكة مستبشرة]

يعطيك الصحة ختي على الموضوع
ما فيها والو الراجل يعاون مرتو من باب الرأفة والحب والاحترام لها ولكن في حدود مشي هو يخدم وهي قاعدة تتفرج ولا على النت
ففي مجتمعنا الاغلبية يعتبرون الراجل لي يعاون مرتوا ضعيف الشخصية ​

شكرآ ع المرور
و الله غير صح يعودوآ يعآيروآ فيه كي يعآون مرتوآ
نورتي​

 

[ضآحكة مستبشرة]

و عليكم السلام ورحمة الله تعالى وبركاته

موضوع مليح
ف نظري هاذي من معالم " الرجولة "
طبعا المساعدة ما تكونش كبيرة لدرجة تلغي هيبة الرجل ف دارو

أنا عن نفسي ما نقبلهاش دائما ...
دائما الرجل يبقى رجل
هذا ليس تعظيما له لكن للحفاظ على التوازن

وؤسولنا الكريم صلى الله عليه وسلم قدوة.


شكرآ​

شكرآ ع المرور
الله يخليك ختي نورتي بنت المدية
شكرآ لك على الكلآم الزين​

​

 

[ضآحكة مستبشرة]

سلام عليكم
راني جيت الراجل الي يعاون مرتو

يعمري عمري فور بزاف الفكرة هادي تخدم الشغل و هو يسيق في الارض ههههههه
انت طيبي وهو يغسل لمواعين

حاجة هايلة بزاف يخلي جو جميل في بينهم من جهة و يخلق المودة و شوي جو تاع ضحك وتمهبيل من جهة اخرى

واعلاه لالا مش ساعدها العكس خاصة مين تمرض و لا حاجة تقدر تعزم عليه
و حاجة تاني بينيكم لبنات مام يخدم اعلابالي تعاودو رواه الخدمة متقدروش ههههه

يعطيك الصحة موضوع حلو بزاف​

شكرآ ع المرور
الله يخليك نتي لحوة نورتي موضوعي بحلآوتك
و الله صح كي يعآون مرتوآ يولي غير تمهبيل و ضحك و سمير
مي لي يعرف قيمة المرآ
مآشي لي يعطيهآ طريحة صبح و لخرى لعشية
نورتي​