بنات الغرب الفحلات

[halagh]

السلام عليكم ممكن تبعتولى وصفاتكم باه نطيب لحريرة انا ذقتها مرة في وهران من النهار هذاك وانا ميتة عليها عجبتتي بزاااااااااااااااااااااف حابة نتعلم نطيبها فدار احنا في سكيكدة مانطيبهاش
لي تعاوني ربي يعطيها ما تتمنى

 

[بنت السلطان]

السلام عليكم الحريرة نتاع الغرب ديري لحم او دجاج حبة بطاطا حبة بصل حبة طماطم والجزر نتي و ماحبيتي يعطي لبنة وديري لملح والزيت راس الحانوت وقلي مليح ضيفي الطماطم مصبرة و مرقي وضيفي القصبر وتوابل نتاع الحريرة الي يكون فيها الزعتر والنوخة هادو هوما السر نتاع الحريرة بلا بيهم مجيش كي يطيب اللحم نحيه وضيفي التشيشة تكوني شليتيها حوالي فنجان على حساب المرقة وخليها تطيب كي تشوفي التشيشة طابت والمرقة ثقالت طفي عليها وضيفيلها القصبر ورحيها وضيفيلها شوية توابل الحريرة و بالصحة والعافية

 

[نبض الحياة]

السلام عليكم
هاي ليك طريقتي في طبخ الحريرة،
في لاكوكوت نحط اللحم، بصل مقطع دوائر ماشي رابي، حبة طماطم نقطعها، ملح، حرور، سكنجبير، زعفران، كروية، كركب، راس الحانوت،ما نعرف هادوا لا تسموهم كيما كيفنا ولالا، حوالي م ك طماطم مصبرة، نحطها على نار هادئة تتقلى مليح ونقطع الجزر، بطاطا، الحشيش: قصبر معدنوس وكرافس هادو نحزمهم باه ما ينحلوش ويطلقوا البنة مليح، بعد ما تتقلى مليح القدرة نضيف الخضر+ شوية عدس وجلبان وارز ماتكثريش باه ما تجيش ثقيلة ونكمل بالماء، نخليها نص ساعة على حساب اللحم، بعدها ننزع اللحم ونطحن كل شيء في الطحانة اليدوية ماشي الميكسور، نطحن كامل ديك الخضر ونرجعها للنار تغلي، نضيفلها شوية تشيشة ديفوا لالا، قصبر نقطعوا صغير،ماجيقو، و توابل خاصة بالحريرة، نخليها تغلي 10د ونطفي عليها وخلاص
​

 

[halagh]

شكرا على الرد انا مافهمتش حاجة التشيشة هي لفريك ولا NON والقصبر يخي هو الدبشة عنا فالشرق
وذكرولي التوابل نتاع الحريرة جزاكم الله خيرا

 

[anissa 13]

ملح، sel
حرور، poivre noir فلفل اسود
سكنجبير، gingembre
زعفران، safran
كروية، cravi
كركب، curcuma كركم او خرقوم
راس الحانوت ras el hanout هو خليط من التوابل

حتى فالغرب الحريرة تختلف من دار للاخرى كل واحد وبنتو
ان شاء الله نكون ساعدتك فالتوابل
كتبيهم فغوغل باه تشوفي صورهم
هادو اللي دكرتهم الاخت رقية

​

 

[anissa 13]

طريقتنا فدارنا نفس طريقة الاخت رقية
​