مشكلة خيااااااانة

[مشكلتي]

سلام الله عليكم جميعا
قبل ما نبدا نحكي .. حبيت ندعيلكم دعوة من كل قلبي
الله يهني مؤسس هذا المنتدى
وكل الاطارات من مراقبين ومشرفين
وكل الاعضاء .. الله يثبتكم على الحق و ينور طريقكم كل واحد باسمو
وان شاء الله العظيم في اقرب وقت نسجل في منتداكم الغالي

بون نبدالكم حكايتي ... انا شابة جزائرية بالتحديد من سطيف ولكن اصلي من قسنطينة
في عمري 21 سنة .... نقرى في الجامعة ماستر وفي نفس الوقت خدامة
الحمد لله عايشين احسن عيشة ..حنا 2 بنات واخ كبير... بحكم انو والدي طبيب وماما تاني و تزوجو بعد قصة حب
من ناحية والدي هوما متفهمين و نحسبهم اكتر من والدي ..
عندي 2-مشاكل صادفوني حاليا ومالقيت حتى حل ...
1-مشكلتي الاولى عندي خويا الكبير خاطب مي يخون في مرتو
رايحين تسقسوني كيفاش عرفت ... :s:s
خويا عندو من جوان خاطب ومن قبل جا قالنا على وحدة تسكن في بليدة باش يخطبوهالو
مي الوالد رفض بعد ما راح سقسى على الطفلة وعرف سيرتها وزدنا اكتشفنا انو هي اكبر من خويا وبالطبيعة خويا ماقالناش .
من بعد شفنالو وحدة و راح وشاف وعجباتو وحنا حطينا ف بالنا بلي هو صايي تبدل
دار فيونصاي ودركا يستنى ف لونكات تخرج ويعقد
السمانة اللي فاتت جا رايح للخدمة بعد كونجي بويسك هو lieutenant f l'armée
نسى فلاش ديسك نتاعو ف الدار
ايا كي وصل وين يخدم عيط للدار قالهم بلي فلاش ديسك راحلي الا راهو فالدار
حوسنا عليه لقيناه .. يوصي ويعاود واحد ما يتوشيه
صراحة توسونا فالدار سوغتو انا واختي .. منين يعيط يقولنا خبوه
قلت لاختي قصة الفلاش فيها ان قاتلي ماعندو ما دخلك وحاجة ما تخصكش علاه نتي تحبي لي يشوفلك خصوصياتك
انا ما سمعتش كلامها ويا ربي اغفرلي كلاني قلبي وش فيه هاد الفلاش
ايا سرقتو وركبتو فpc
ويا ريت ما درتو ولا شفتو
شفت دي فوطو نتاع خويا مع هديك الطفلة نتاع البليدة مواضع مخلة
في hotél
وشفت فوطوات اخرين نتاع بنات متصور معاهم

المشكلة مش هنا .. المشكلة انو لادات نتاع لي فوطو جدد ديسمبر 2014
والمشكلة اللي صح شوكاتني فوطو مع طفلة هي بنت عمة خطيبة خويا
......
راني عارفة ماحقنيش ندير هكداك مي والله توسوت وهو يوصي فينا عليه
منيش عارفة وش ندير .... حرام عليه خويا
الطفلة خاطبها وهو يلعب بيها .. رانا كامل وليات ونخافو من الزمان عقوبة
قولولي وش ندير بالاك رايكم يخرج عليا
بويسك مانقدرش نسكت ... والله ما عندي حتى مصلحة باش نفضح خويا راهو خويا
مي الطفلة اللي خاطبها غاضتني

----------------
ربي يهدينا كامل ... يا شباب خافو ربي في بنات الناس
ويا بنات خافو ربي في ولاد الناس
وديما نقول بلي مازال الخير في هاد الدنيا وكيما كاين بنات الحلال كاين الرجالة وليدات بلادي
سلامي للجميع ....

​

 

[حكيك]

تم الاعتماد

 

[شرفي لمياء]

اول شي نشكرك على جراتك انك حكيتي موضوع خوك قليل الي يعملها اختي وش نقلك الحق يجي نهار ويبان وانتي واختك ولايا قولي لامك وهي تتصرف وانشاء الله ماتكبرش الحكاية وخوك يفهم انو بنات الناس مش لعبة والله حرت هداك خوك وهديك بنت الناس ولية كيفك -_-

 

[Asmaa2020]

حاولي تتقربي من خطيبتو واحكيلها كامل اللى شفتيه بشرط توعدك كى تخليه تعرفو بانها عرفت من مكان اخر غيرك لانو حرام مسكينة ماكان لاه تتورط في الزواج من خاين

 

[راضية حامدة]

استري وش ستر ربي
و اياك تفضحي خوك
انت غلطت اصلا علاش تتدخلي في خصوصياتو
و حياة العازب تقريبا هاذي هي
وش تتخيلي رح يبقى عفيف حتى يتزوج
خلينا من عالم المثالية و خلينا في الواقع
هو راه غالط و اكيد رح يجي يوم يدفع ثمن غلطتو ما تخافيش ربي كاين و عادل
كل واحد يدي على حساب قلبو

انا وش نقترح عليك
انو تخبري امك فقط
لا خطيبو و لا شي و اياك تخربي بيوت الناس
خبري امك و هي بطريقة ما تعاتبو و تقولو بلي ربي يعطي لكل واحد على حسابو
الطيبون للطيبات و الخبيثون للخبيثات
هذه قاعدة في الحياة و ما تغركش المظاهر ابدا
حذاري تخبري خطيبتو لانو خوك عمرو ما رح يسامحك
و ربما خطيبتو تكون حاسة اكيد بلي خطيبها لعوب خليها هي تشوف كيفاش تتصرف معاه

خبري امك و حاولي تقنعيها انها توصللو ميساج كل شي بالحساب في هاذي الدنيا بطريقة مباشرة ام لا
انتم ادرى بطبيعة خوك و طبيعة العلاو بيناتكم في الدار
المهم لي قريب منو يحاول ينصحو و خلاص
قولولو بلي ربي يمهل و لا يهمل
و هل يقبلهالكم ليكم انتم خواتاتو ؟ تكونو مخطوبين و رجالكم عايشين في عالم اخر مع النسا؟
حاولو و على ربي ان شاء الله
ربي يجيب الخير

 

[*amina*]

السلام عليكم
اختي انا نشكرك على موقفك هدا قليل في هدا الزمان لي تحوس على مصلحة مرة خوها و خوها
المهم كيما قالت الاخت راضية نصيحتي خبري يماك ويماك تخبر باباك و ميدخلوكش انتي في الوسط قولي لوالديك هوما لي يعاتبوه و يرجعوه للطريق الصحيح
ربي يهديه و ربي يجيبلكم الخير

 

[touta04]

السلام اختي
الامر هذا الي دخلتي فيه ننصحك احكميه بينك و بين نفسك و ادعي لخوك بالهداية و الصلاح
اما تع انك تصارحي اي حد غير مكلاه لانوا الهداية بيد ربي سبحانو
هذا اخوك غلط لكنو يمكن ناوي يتزوج و يتريغل و يمكن كان ندم على افعالو و انت تجي تحطميلو كلش
لا اختي ماتدخلي و خلي الامور على مجراها
و متنسايش ادعي ربي و اذا كنتي قريبة من خوك حاولي تحكيلو حكايات تمعنيلو بيها بلي الدنيا كما تدين تدان
نتمنى تهمي كلامي و ما تتسرعي في امر كيما هذا
و ربي يهدي خوك و يهدينا كامل

 

[nanoche]

السلام عليكم و رحمة الله
والله يا اختي غير جابلي ربي راكي مديتي للموضوع اكتر من حقو ، ماشي رايحة نعاتبك و نقلك علاش رحتي لحاجة خاطيك و كل واحد حر في حياتو و عندو خصوصياتو لاني رايحة نخرج على الموضوع مي رايحة نقلك بليك القلة القليلة من الشباب اللي راهم يخافو من ربي و ما يروحوش للحرام رانا عايشين في مجتمع واحد و كامل رانا نشوفو كيف كيف ايمالا ما نغطيوش الشمس بالغربال و هو طلع او حبط يبقى راجل راهو عايش حياتو بطريقتو ادعيلو ربي يهديه ماشي تروحي تفضحيه قدام يماك او قدام خطيبتو و بالاكي برك يحس بليك شفتي واش كاين في الفلاش ديسك لأنك رايحة تطيحي من عينو و ممكن يجرحك بشي كلام ، حافظي على علاقتك مع خوك و تصرفي عادي كلي حاجة ما صرات و قولي ان شاء الله ربي يهديه بعد الزواج و يتوب عليه على الاقل هو راهو يخون قبل الزواج ايوا راهم كاينين اللي شبعو زواج و زوجو اولادهم و راهم ماشيين في هاديك الطريق، كوني وفية ليه بالدعاء و ان شاء الله ربي يهديه و يبقي عليه الستر

​

 

[zozo firem]

انا رايي من راي الخت راضية حامدة و انشالله ما يكون غي الخير

 

[stelllo]

ربي يهديه ويكمله بعقله.....

 

[Ra Off]

والله يا ختي درتي لروحك محنة

هاذي مجرد شفتي حاجة فقط من خصوصيات خوك .. فما بالك اذا شفتي أسرار ناس آخرين
واش دراك بلي خطيبتو ماعندهاش خصوصيات ؟ ممكن تقوليلي لا ماعندها والو
بصح خوك تاني كان صافي في عينك قبل ما تشوفي ( الفلاش ديسك ) !!!

اذن كيما قالولك الاخوة والاخوات لفوق .. خبي سرك بينك وبين روحك واذا ماقدرتيش تسكتي
فرغي قلبك لربي سبحانو وثقي بيه

ادعي لخوك بالهداية فقط
لأنك لو فضحتيه ولا تكلمتي معاه .. ماشي 100 % رح يتوب .. بل ربما يكمل في أخطاؤو
مع مزيد من الحذر

ماتقدريش تكوني القاضي في كل شي وكوني ذكية باش تريحي بالك
وانصحي خطيبتو بذكاء حتى تكون اكثر فطنة وهي اللي تعرف كيفاه تحافظ عليه وتخليه يبطل كلشي.

بالتوفيق
​

 

[adel._dz]

موضوع ضحكني ماندري اعلاش
المهم ربي يجيب لي فيه الخير

 

[anissa 13]

اختي ادا فضحتيه راح تربحي غي المشاكل
تقربي منو قوليلو شفت الصور وحاولي تهديه للطريق الصحيح قوليلو حتى انت عندك اخوات ومراحش تحب علينا لهدا ماتظلمش بنت الناس ادا ماسمعش منك خبري والديك هما يتكفلو
ان شاء الله ربي يهديه
مشكورة غاليتي على الدعوة ولك بالمثل
​

 

[سجل أنا جزائري]

ايه هذي هي هذا انذار ليه من عند ربي اليوم تفضح قدام خاوتو و غدوة ذرك يتفضح قدام الناس كامل

من رايي حاولي نتي تنصيحه بلا ما تبيني بيلي راكي شوفتي فلاش ديسك

-- كاينة حاجة أخرى أختي راكي مديتي بزاف معلومات على روحك و داركم و و و غير مهمة في الموضوع ما فهمتش على حطيتهم ننصحك حاولي ما تمديش معلومات عليك ما تدريش شكون يقرى الموضوع تعك

 

[foued1986]

السلام عليكم ورحمة الله تعالى و بركاته
غادي نختصر في كلامي
أولاً بنات الناس لبس لعبة
ثانياً ما قمتي به هو سبب ليكشف الله ستره و هو محظوظ جداً انه أخته هي الفاعلة
ثالثاً اللي رآه يقولك خصوصياتو لوكان ما خربتيش في صوالحو أنا نقولك هو يعني أخوك اللي خلاك تشوفي صوالحو بسبب حرصه الشديييييد وإن لم يكن فما كان أن تفتشي
رابعاً والأهم من هذا حوسي تتقربي من يفهم الوضع وهو يعرف كيف يتعامل معه لانه ليس بالأمر الهين
وإن شاء الله يهديه ربي
أما آللي رآه يقول و ماذا عنها بالاك هي ثاني خايناتو أنا نقولك و ما أدراك ربما الله سبحانه وتعالى كشف أمره لتنجو الفتاة منه فلا علم لنا بها ربي يهديه الطفل لكن القليل من يهديهم ألله ممن يخونون زوجاتهم
اللهم اجعل هذا خيراً
والسلام ختام​

 

[عيشة مرة قدور]

سلام عليكم ختي نعطيك نصيحةة ممكن فات علينا حنى هاك شوفي حولي خوفي خوك بانو شفتو منام ومش مليح وحاولي متخرجيش سر داركم يا ختي متخبريش خطيبتو ممكن تتكبر حكاية وتندمي نتي ومتبينيش بلي واش شفتي حاولي خوفي خوك انو شفتو منام مش مليح عليه وحالو ذكروه كما تدين تدان وقلولو الطيبون للطيبات والخبيثون للخابيثات اختي خوفوه برك مي جمي سر داركم تخرجيه ممكن عديان يستشفاو فيكم وشوفي عازب قاع يدير هاك مي نهار ليتزوج يهديه ربي انا خالي كان كثر من هاك مي كي تزوج وحدة كبيرة عليه مب بنت ناس بصح الحمد لله خطا كلشس مي خوفناه وربي يهيده ويهدينا

 

[بقايا إنسان]

سلام الله عليكم ورحمة الله وبركاته وبعد:اختنا الكريمة إن الله أمر بالستر ونهى عن التجسس فأنتي رأيتي مشكلتة أخيك ونسيتي الحرام الذي فعلته وهو التجسس
ومن جهة أخرى إن كان أخوكي قد صور نفسه وهو يجاهر بالمعصية فعليكي انتي ان تصححي خطأك بمصارحته وانا اعلم انها كبيرة عندكي لكن هذا جزاء من تجسس وعليكي بالنصح له ولا تخبري غيره فإن اعترف بالخطأفهو باب التوبة وان لم يعترف فهو على ما اضن من قبل ما يخطب الاولى كان يفعل مثل هذه الافعال
فعلا انتي في محنة وانا بكل صرحة ملقيتش حل واضح نقولولك
سامحين

 

[نجيب]

ان كيدهن لعظيم واش داك تشوفي صوالح خوك هدي غلطة درتيها.

أما موضوع الخيانة أنا في رأي مادام يروح معاها hotel نورمال يجي نهار و يفوتها و مكان لاه تكبري الموضوع.

الحاجة الثالة لا تكلمي زوجة أخيك المستقبلية في هدا الموضوع نهائيا ستعرف وحدها و بدونك أحسن

و المرأة تحس بكل شيء و هي تحن التصرف في هده المواضيع.

ثالتا كلنا تورطنا في هده المشكلات و أخوك سيتجاوزها قبل زفافه و سترين دالك.


و يبقى هدا مجرد رأي

 

[Hakan]

المشكلة ما شي في خوك المشكلة في الكلبات اللواتي يلهثن وراءه كانهن لم يرين رجلا قط
صور مخلة معناتها البنات هادون راهم في القبضة نتاعو يدير بيهم واش بغا
ومن بعد تجيك طفلة وتقلك انا دايرة الرجال كامل في صبعي
يااختي روحي موتي على روحك مع الراجل البنات كامل محشيتلهم
والطفلة الي تسلم عرضها هكاك
ونزيد نقلك حاجة روحي سقسي مليح على الطفلة اللي خطبتوهالو اذا ما لقيتوهاش تخون فيه في الفايسبوك ولا النت ولا اي بلاصة لاخاطر هذي الدنيا دين تسلف لازم تخلص وكما تدين تدان
مي خوك علاه مسكين لقا البنات كامل اللي يدومونديها تقلو راني هنا وهوا راهو زاهي في ضنو
لكن تبقى البنت هي الغبية والخاسر الاكبر
والحل نتاع خوك خليه هكاك يجي نهارو ويخلص
والدنيا دالات سلام.​

 

[طموح الامل]

عليك بالدعا في ظهرا لغيب لخوووك بالهداية ويردو ربي لطريق الصوااب
ربي يهدي جميع شباب المسلمين
الصراحة انعدمت الثقة في وقتنا خلاااااص