أمي و قلقها الشديد

[مشكلتي]

السلام عليكم ورحمة الله تعالى و بركاته
انا شاب عمري 28 سنة و متزوج و الحمد لله
انا كنت حكيت من قبل على أمي و قلقها لكن ما جرى بيننا و هو الشجار فعلاً على أتفه الاشياء
غادي نحكيلكم القصة كيفاش بدأت
أولاً أديت مآ تشري بعض الخضر و مستلزمات البيت و في الطريق قاتلي أنا نشري الخضر و أنت تشري اللحم قلتلها لا اشري انتي اللحم لانني منذ يومين اشتريت لها اللحم و لم يعجبها و بدأت تصرخ في وجهي و ترمي الأشياء و السكين اللي في يدها رماتو المهم اللحم اللي جبتهولها ما عجبهاش فلهاذا السبب رفضت أن اشتريه اليوم للالا أقع في مشاكل و مع هذا و ما سلكتش
المهم قالتلي و علاه ما تشريش أنت ما تعرفش تختار؟
قلتلها راني خايف نجيبهولك ماشي شباب و ما يعجبكش روحي انتي خير باش تشوفيهsur place و تشريه
قالتلي بصح كون ادير دارك وحدك تشريه شباب و مليح!!!!!!!
فقلت لها أنا ما نحوسش أنا بروحي ما عندي صالحة فاللحم
و هنا تقوم القيامة
قالتلي امالا تأكل الرهج مين ما علابالكش و تقول فيها بالعياط و مرتك زعما طيق تزعف عليها راك عارفها بللي ما تردش عليك
فقلت لها و شكون اللي يبغي الزڤا يا ما انا شفتك ما عجبكش اللحم نهار اللي جبتهولك ما عجبكش c pour ça قلتلك روحي اشري انتي خير...
و مين شفتها تغلي على سبب كهذا والله حرت و قلتلها كون عرفت هادي الكلمة تزعفك كاع كيمن هاك والله ما نقولهالك.و نتشاجر على سبب تافه كهذا!!!!!!
و بدات تجبدلي على صوالح خارج عن الموضوع تماما.
حرت كيفاش ندير معاها.
نهدر ماني في خير, نسكت ما ني في خير
تقولنا ارواحو معايا صريحين انت تقولها كلمة تقولنا جرحتوني حتى ولينا نخبوا عليها شحال من حاجة(انا و إخوتي ) فكيف نصارحها والله نجيبوهالها غي بالعقلية تقولك انت حرايمي يطيڨ عليك غي ربي
المهم راهي معاديتني دورك
والله رانا غي نتساءلوا كيفاش نتعاملوا معاها
والسلام عليكم ورحمة الله تعالى و بركاته​

 

[راضية حامدة]

تم الاعتماد
صعيب الحال
و كي يكون الخص احد الوالدين الواحد ما يعرفش وش يدير

ربي يجيب الخير

 

[ديسق]

السلام عليكم ورحمة الله وبركاته

تحية طيبة لك اخي المحترم وللجميع ..

اممم المشكل نتاعك مش ساهل وفي نفس الوقت ساهل لانه حساب كلامك جاي في حوايج انت تقول عليها
تافهة، فقط حاول تخمم قبل ما تقول اي حاجة، قاتلك اللحم نتاعك مش مليح قولها هيه مش مليح انت تعرفي
تخيري وانا ما نعرفش وش ندير، وشوف النوع الي تحبو هي، تبانلي راهي تقولك فيهاعظام بزاف والشحمة
وو لان الاغلبية عندهم نفس المشكلة نتاع هذا الموضوع اشريلها بيفتاك وارتاح.

لما يكون الموضوع على الوالدين يعني خط احمر، وانت ما شاء الله عليك راك تتفهم الامر، ومن الافضل انه
ما تدخل مع والدتك في جدال، لما تشوف الامور مع البداية بدات تاخذ مسرى خطير غير الموضوع وقولها
ايه عندك الحق في كلش.

ربي يهديها ويهدينا اجمعين وادعي ربي يوفقها ويثبتها، وخاصة ان الناس الكبار حسب مجتمعنا يقولو اذا واحد
كبار تتبدل عقليتو وكاين الي يقول الي يكبار ترجع عقليتو كما نتاع الاولاد الصغار، ونقصد هنا كبار السن
فقط سايسها بالعقلية والهدوء وكون دبلوماسي معاها.

وبالتوفيق لك ان شاء الله
​

 

[ابو مازن]

السلام عليكم ورحمة الله و بركاته

واش راح نقولك خويا مهما غلطت الأم معاك ماهيش غالطة خويا اصبر عليها و عاملها بأحسن و أحن معاملة فهي باب من أبواب الجنة ان لم تكن هي الجنة بأكملها يقول الله تعالى على الوالدين ( وإن جاهداك على أن تشرك بي ما ليس لك به علم فلا تطعهما وصاحبهما في الدنيا معروفا ) هذا اذا أمرتك بالكفر و الإشراك بالله و قس انت على ذلك .
ما عجبتهاش اللحم نروح نزيد نشريلها ما عجبتهاش نزيد انروح نشريلها يا أخي نصيحة لوجه الله .
و الله راك راح تندم يوما لو فقدتها ربي يطول في عمرها راه الأمور صعيبة ياسر لما تغيب الوالدة عندي شهرين فقدت الوالدة انتاعي و الله يا أخي واش راح نقولك خايف يجي نهار تندم حتى على هذا الموضوع لي راك كتبتو اصبر و نويها فعل خير فأمك أولى به

بالتوفيق ​

 

[حياة هانئة]

قال صلى الله عليه وسلم امك ثم امك ثم امك
اخي ينقصك تحديد الكلمة المناسبة في الوقت المناسب هذا مشكلتك وسهل حلها لو مثلا قلت لامك ايه انا اشتري اللحم لكن انت تختاريه وفرصة تعلميني كيفاش نختارو. وهذا مثال يصلح لباقي الاحداث والمناوشات
اخي قد تكون انت الان نائم وامك تتالم لكلمة قلتها ولم تحسب حسابها


الجنة تحت اقدام الامهات والعمر يمر تدارك الامر واسرع اليها قبلها وتاسف منها ولو لم تخطا معها الرجل عندو عقل ويفكر كثيرا بموضوعية لذلك حاول الا تترك لامك مجال تحس فيه بانك تميل لزوجك وربي يثلح احوالنا جميعا

 

[روز]

السلام عليكم

واضح ان أمك حساسة ومش مبينة
وعندها شي شاغلها ومخلي تصرفاتها تكون هكذا ونتم ماعرفتوهش
حوسو على السبب لي مخليها تتصرف هكذا وريحوها
لانو كل لي تعمل فيه هو نتيجة الضغوطات لي عاشتها أو راهي عايشة فيها
واعرف انو مش ساهلة باش كبرتكم ورجعتكم رجالة
راها تحملت امور بزاف رانا صغارات ونتقلقو من امور صغيرة
وين هي شابت في الدنيا !

ولازم تعرف انو الواحد تجيه لحظات وين يولي مايحملش كلمة
لازم تحاولو تكونوا أذكياء معاها في التعامل مادام عرفتو عقليتها
ساعفوها وشوفو لي ناقصها ووفروهلها ممكن ماهوش شيء مادي
ممكن شي معنوي
يمكن راكم مقصرين في الاهتمام بيها والقعدة معاها وتحكو معاها يمكن ماعطيتوهاش الحنان
حاولو تهتمو بيها واعملولها مفاجاءات مفرحة وساعة على ساعة فرحوها بهدية
هذا راح يخفف عليها الامر لي راه واجعها مش تقلكم عليه
ماكانش حاجة ماعندهاش سبب، واذا عرف السبب بطل العجب

ربي يشدلكم في الوالدة راها هي كل شي في الدار حتى لو كانت ماتهدر ماتتكلم
ماتعيا متوحش تقلاقها هذا بعد ما ربي يدي أمانتو بعد عمر طويييييل ان شاءلله

كل تصرفاتها خذوها بضحكة وتبسيمة
وكي تتقلق بوسلها راسها وقلها خاطرك برك هو لي يمشي ولي يقلقك نمحوه نتي برك ماتتقلقيش
الأم تستاهل شوي دلال ماعيات دلل فيك في صغرك ونتا مش واعي للدنيا
ربي يحفظكم ليها ويحفظها
​

 

[الباندي]

ساعف امك و الله خويا مهما دير و امك راهي حساسة بزاف اديها كاش نهار حوس بيها غير انت و ايها و حكي تاوياها بلعقل و حاول ترضيها و تعطيها وجة النظر تاعك و اسمعها حتى للاخر و بينلها بلي غير هيا و لا مكاش في الدنيا و الله صدقني راه G لبها عليك كل دقيقة....ربي يرضي علينا الوالدين و يقدرنا باش نرجعولهم ذرة و الله صدقني خويا رانا مقصرين في حقهم.ربي يجيب الخير

 

[visiteur]

السلام عليكم اخي العزيز هذه ليست مشكلة بل دروس تعلمك اياها امك لا تنزعج من تصرفاتها فهي طبيعية جدا اساءلني انا بحكم تجربتي مع والدي لازلت الى الان اتعلم و اعنف تارة و امدح تارة اخري ان لم تعجبني سلعة تركتها او غيرتها عند التاجر عندما يكون لك اسرة صعيرة سوف تتدكر ان كل ما حصل لك هو في مصلحتك ارجع الى امك مازحها اشتري لها شئ تحب اكله و ادخل السرور الى قلبها ولا تفتح معها موضوع يزعجها فتعود الى نقطة الصفر و استمر علي دلك وتعلم كيف تقتني البضائع ادام الله الحب و الهناء بينكم

 

[روز]

تم التعقيب علي المشكلة

http://4algeria.com/forum/threads/418280/