لغة jou sui نحن قادمون أيها العالم !!

[السلطانة]

إن شاء الله راكم بخير

وبيان بيان
أنا جيت اليوم نحكي على واحد الظاهرة هك من مدة وهي تخربشلي في الشوشة تاع راسي
يوما راسي شاب يوما راسي شاب

منها

بون راح نحكي على الفئة المثقفة والقارية في المجتمع الجزائرية
لي راه عندها مستوى معين
مشكلتي ماش هنا
مشكلتي في حكاية الفرونسي لي نحاولها باباها

بون راح تقوليلي في دزاير من بكري عندنا مشكلة تاع الفرونسي وولادنا ميقراوهاش ووو وي كاين منها
مي الطبقة هادي زعم راهي خالعة الدنيا
تحكي معاه يقولك انا راني ماستر 2
ماستر dou
وراني نقرى للدوكتورا
ياحلاوة ياجمييييييييييييييييييييييل

ركزولي على الدو
علاه ماكش تنطق في الكلمات تاع الفرونسي صحاح
مقلنالكش احكي بيها مي كي تنطق كلمات قولهم صحاح
يامحاينك
أنا شكيتها عادت موضة العصر
هادي هدرة الدو والجو !
مازال في 2015 لي يقول
نلعب ال jou
ونشرب ال ji
ونلعب dou foi
وشريت apice

هاي هاي هاي هاي خليوني نندب متحبسونيش

عند بالي جدودنا وآبائنا زمان الله غالب عليهم ماقراوش
وحفظو الكلمات غالطين على فرونسا وراحت فيهم .

مي باه يعود هادا الجيل الجديد لي نفسو لي راه يتسعمل التابلات والآيفون وميتحركش من النت ومالك الدنيا بالتيكنولوجيا يقول هك يعني رانا في حالة خطيرة .

تبهديلة قد السما مالا واش راك تدير بيهم !

متقدرش تتعلم بيهم كلمات وتصلح روحك
كانت تقريني استاذة تقول cervou
يعني كي كانت تقولها كان يصرالي ارتجاج مخمخي أستاذة في الجامعة

وخدمو معايا بنات ورجال
يقولو نقريو dou haires
طييييييييييييييييط اقطعولي البث خيرلي انا خلاص راح ندير جريمة

ولي قاتلهم اقعدو كل

تلقاها تتمايل وفرحانة بروحها

تقولي راني شريت arobe جديدة
وشريت ajip
وراح ندير عرسي في el assal
الله الله

أنا نروح للموزمبيق خيرلي
يعني علاه عليك قوليها بالعربية وهني روحك
علاه حتى تلعبيها راكي ماكانش قدك
ووحدة جابوها مرة في تقدر تربح قالها المذيع واش تقراي
قاتلو : masteur

هيا قولولي الظاهرة هادي راهي صح في انتشار كبير في المجتمع
زعم الفئة لي راهي قارية ولاعلاقة هك !!
علاه انتشرت هك ؟
اعطيونا امثلة حية من مجتمعكم ؟
هل صارت لغة ال dou و jou اللغة الرسمية بين المجتمع الجزائري الشاب !!

​

 

[♫الباحثة عن الحظ♫]

سلام عليكم
ههههههههههههههههههههههههههههههههههه شبعتيني ضحك والله يا شوشو من قلبي
فكرتيني بلي صرالنا العام هذا في الجامعة قالك ناس متعرفش تفرق النو من وي راهي الاولى في التخصص
وناس القارية الفاهمة الله غالب ههههههههههههههههههههههههههههه
ههههههه والاساتذة اه يا حوجي نشفا كانو يقروني استاذة ليسانس
اقسم بالله غير كنت الاستاذة تهدر وانا نقوريجي في هدرتها بيني وبين روحي

بعدا تاع dou و ji تقلتلني ضحك ياو والله صح متعرفيش تهدري متهدريش نورمال كاينه العربية
المشكل انا تاني روماركيت حاجة الي يعرف يهدر الفرونسي تلقايه خاطيه العربية و الدزيرية وطبع
والي يعرف زوج كلمات bonsoir و بونجور يجي يلخط علينا والكارثة والله ما يعرفو ينطقوها مليح

ربي يهدي ما خلق
​

 

[ضآحكة مستبشرة]

هههههههههههه و الله يا شوشو غير خلعني العنوان جيت نجري
مي مين دخلت شبعتينا ضحك ربي يخليك
و الله راكي كفيتي و وفيتي
هآد الظآهرة ولآت كآآآآآآآآآآينة بزآآآآآآآآآآف مآشي غير شوي
النآس كآمل تحكي فرونسي قآري و لآ مهوش
مي الغريب في الشيء دآ هو انو معلبآلوش وآش معنى القول لي يقول فيه و يغير المعنى تماما
او يقولهاآ مكسرة كآمل
بون نقولك ربي يخليك عالسوجي الشويب
و شكٍرآ​

 

[أم منيــــــر]

السلام عليكم:regards01:
يا ودي سكتي برك شحال منهم صحاب... jou sui... oro :down::down::down:
كما قلت صحاب بكري مقراوش الله غالب
بصح تلقاي جاااااااامعيين يتكلمو هكدا:-o كارثة وين رايحة يا بلادي وين؟:s
صح صح موضوع شباب وكاين امثلة بزاف من بعد نحكيها لكم دروك راني مزروبة:-r​

 

[Pyar]

السّـــلآام علييكم.. =)
هممممم يعني وعــلآه إيلآ مآرآهش يعرف يقرآهآ ينطقهـآا زعمـآا بآه يقولو مقلش ولآ..
ديجــآا الظآهرة لي لآزم صح نمحيوهآ مشي هــآادي ، لأنو هآدي غير جزء من الأجزآء
الي يتقدمو في كـــل جزء بـــ طريقة تــآاع جهـــل أكتررر ملي قبلهـآ
الظــآاهرة الحقيقية لي لآزم تتنحــآآ هي الفرنسية في الجزآئر
مـآنقولش مآتقرآوش لفرونسي بالعكس من تعلم لغة قوم أمِن شرهم
لكن يعني وعلآآه نحكيو بيهـآا ف بعضآنآ ؟ يعني محتقرين لغة القرآن لهآد الدرجة
لدرجة أنو نحكيو بـ لغة أخرى بآه يقولو بلي رآنآ قمة التقدم والثقآفة !!
لآ أي تقـــدم هآدآ،، والكآرثة الأكبر أن هآد اللغة هي تآع البلآد لي قتلت جدودنآآ
ونفت عآئلآتنآ وحرقت وهدمـــت بيوتنــآآآ
لآ ودوك ولآو يخلطوهـآا jou sui و Bardon
يعني لحتى لوكآن مآيعرفهـآاش يهدر بيهــآا بالسيف
بآه يقولو علييه متحضر ويبعد على العربية لأنو هي تخلـــــف ورجعية
لأنو وين يهدر فرونسي كتر وين يولي متحضر كتر
،، أي زمــآان هآدآ ~ رحمــك الله يآ لغة القرآن
أعتذر عن الخروج قليلاً عن الموضوع
شكراً على الطرح
سلآم
​

 

[الباندي]

خطرا استاذة تاع ميكانيك كانت تقريني في الجامعة و صعيبة بزاف مع الشاشرة و حد النهار زلجت و حكات مع وحد الشيرة Gالتلها

لــpبيست تاعي جيزي بلوكاوهالي و معنديش كيفاه نرجع النوامر و عاودتهالها شحال من خطرة

.........اكديلي على la piste djezzy...........واحنا الله يبارك كي عاقلين

جريمة في وضح النهار مع سبق الاصرار و الترصد

 

[¬Đỉaмơŋđ ✿]

وعليكم السلام و رحمة الله و بركاته


ههههههههه ضحكتيني يآساندي اضحك الله سنكِ ..
مرآت والله تسمعي كلمآت مخك يمآركي إيرور
اللي مآيعرفش ينطق الكلمة كيمآ يلزم يكرم النآس بسكوتو خير وعلآه يبهدل بروحو!
هاد النآس اللي هكذا يحبو يخلعو لعبآد لوخرين بزوج كلمآت ههههههه حتى هومآ حافظينهم غالطين كيمآ وحدة جآرتنا
الهمبرغر تقولو هُمبنــgـــر ههههههه وبزآف ...
​

 

[السلطانة]

حالياً الأعضاء النشيطين الذين يشاهدون هذا الموضوع : 21 (1 عضو و 20 ضيف) ‏ساندريلا زماني

نطيب كسرتني ونجي نعقب عليكم


هههه مرحبا بالضياف


​

 

[{مُدَلَّلَتُهُ}]

السلام عليكم و رحمة الله و بركاته

يعطيك الهنا يا شوشو و الله شبعت ضحك و انا نقرا في موضوعك . . . صحاباتي في la chambre نقوولهم ياا جدهم كي ما يعرفوش الفرونسي علااه يقهروها يعذبو victor hugo في قبره و يعذبونا حنا في الحياة

تجي عندك وحدة وحد لا فريييم ما نحكيلكش و تقولك أنااا الفرونسي ناكلها ماكلة هي تنطق و انت يشيب راسك من هاذيك الفرونسي الي تاكلها المشكل أنا يغلبني الضحك الله غالب ههههههه ما نقدرش نسكت !

نعقل العام لي فات حضرت 2soutenances ياا شا نقولك قريب ندبت وجهي .. حتى les jurés قالولها راكي 3 سنين و انت تقراي هاد الكلمات الـ scientifique راكي حفظتيهم normalement !

الي تعجبك و تديلك العقل نهار يضلو يزوخو بيها "sur tout جامعتنا كارثة تاع زوخ " و نهار الكونطرول تاع la langue يضربو 4 و 5 ! وين راهي الفرونسي ؟ هايا وريني شطارتك !

قلبي راه معمر بزاف شوية ... حطيتي يدك على الجرح هيهيهيهيهي

في لامان

 

[red rose]

هذا وان كنت راح نحط موضوع كيما هكا ههههه
سارقة الافكار نتي هههه
على العموم
راهم يهدرو هكا باش يضهروا حاجة كبيرة
كي شغل حنا مثقفين
على قولة استاذ الفرنسية مثقف صح مي علاه راك تهدرفي فرونسي كاسي خخخخ

هاذي عندها يومين منين كنت نهدر مع طفلة قاتلي اووه شتي سراول سوري لي خرجوا جدد خخخخ
احي نندب هاذي سيري ولات سوري خخخ
هي صح انا نهار تنفحلي في الفرونسي ولا اونكلي
نهدرها فالدار بيني و بين اختي
(باش نهبلها خخخخخ)
مي ماش لدرجة نخرج لبرة و نلعبها
مرسي ساندي موضوع قمة
بوركتي
​

 

[Ryry_Ndj]

السلام عليكم
اختي ساندي موضوع رووووووووعة
حكاية نتاع dou ديرلي لهبال يهدروها عادي وتاني jou ونزيدك كملة جديدة afamille ونتاع مستر 2 خليها لربي راهم هبلونا بيها
يلي ما يعرفش ينطق مليح يحكي عربية عادي نفهمو عليه ما يخترعش نطق جديد و يحبسنى بيه راسنا
تقبلي مروري اختي​

 

[نجيب]

هههههههه واش مزال ما تروحي للمزنبيق



خليهم بلاك راهم يثأروا للغة العربية لي حاربتها فرنسا 132 سنة


هههههههههه .


حنا مانحكيو العربية صح ما نحكيو فرونسي صح يعني لغتنا نتعنا وحدنا.

 

[anissa 13]

السلام عليكم
بعيدا على الاستهزاء صراحة ولامرة ضحكت على شخص مانطقش كلمة بشكل صحيح مع اني اتقنها ونتكلمها بشكل جيد
ادا جبنا واحد ينطق 2 دو وواحد اخر ينطقها deux مش معنتها اللي نطقها صح خير من لاخر اصلا كاين اللي يتعلم زوج كلايم يبقى غي يدور فيهم زعما انا نحكي مليح لفرونسي تجيبلو واحد يهدرها مليح هو يصفار يعرف راسو مايسلكهاش
فالجزائر اللي عندو الليسانس حاط راسو مثقف نعرف ناس عندهم برك باك ولا قل والله مثقفين اضعاف اللي عندهم الليسانس والماستر
المشكلة ليست هنا المشكلة كيما قالت اسراء هو ابتعادنا عن اللغة العربية شي صوالح لحد الان الناس ماعارفينش واش اسمهم بالعربية كيما لاكارت سيم الناس كلهم مسميينها لابيس وكل واحد وكيفاه ينطقها خاطرش المستويات ماشي كيفكيف كاين لكبير وكاين الصغير وتعرفو بلي كاين اللي جامي دخل للمدرسة اما جدي عمرو 89 عام يقول لابيس ومايعرفش ينطقها الله غالب كبير وماشي قاري بصح الكلمات العربية سهلة كل واحد يقدر ينطقها كبير وصغير
كيما العصير لكان جينا محافظين على لغتنا نقولو العصير لكن الناس كاين اللي مايعرفش تماما بلي اسمو عصير بالعربية يولي يعيطلو بالفرنسية
هادي على الناس اللي ماقراوش اما اللي دخلو للجامعة بغض النظر عن الثقافة الناس تجيهم عيب يقولك فالجامعة ومايعرفش ينطق بصح اللي ماقراش مانلوموش بلادنا هادي هي حابين يمحيو العربية
مرة كنت في قعدة وقلت كلمة بكتيريا هكدا بالفصحى شافو فيا قالولي لي باكتيري ؟ قلتلهم علاش بالعربية جاتكم حشومة
ربي يهدينا للطريق الصحيح يارب
​

 

[anissa 13]

هههههههه واش مزال ما تروحي للمزنبيق



خليهم بلاك راهم يثأروا للغة العربية لي حاربتها فرنسا 132 سنة


هههههههههه .


حنا مانحكيو العربية صح ما نحكيو فرونسي صح يعني لغتنا نتعنا وحدنا.

كيما قلت ما على ديك العربية العوجة انا غي من اللمة تعلمت اللهجات ماكنت نعرف والو بلاد وحدة مانفهموش بعضنا

 

[العروة الوثقى]

شوفي ختي مش ممكن تضحكي علا الواحد كي عاد يهدر هكا
هاذي راجعه للواحد ووين عاش انا شايفة ولايات ووكل واحد
والنطق نتاعو نتع الفرونسي وكاين لي خلاص سمعوها من المحيط
ولاو يهدروها وراحت فيهم حتى ممكن راهم نساوها بالعربية
وما همش يتقلشو ويلعبو فيها كي تخالطي الناس من ولايات منا ومنا
رح تعرفي علاه تقبلي تحياتي

 

[نجيب]

كيما قلت ما على ديك العربية العوجة انا غي من اللمة تعلمت اللهجات ماكنت نعرف والو بلاد وحدة مانفهموش بعضنا

أظن أنك لم تتقبلي تعليقي على الموضوع مع أني كنت أظحك و فقط


ليكن في علمك يا سيدتي أنني لم أدرس كما درستي أنت من أجل ظروف عائلية


تركت المدرسة يوم 12 نوفمبر 2002 بمستوى الثامنة متوسط أنداك بكيت على حظي


لاكن الحمد لله لم تتوقف ثقافتي عند دالك التاريخ المر أقرأ كل شيء

أتكلم اللغة العربية الفصحى و بطلاقة و أفهم اللغة الفرنسية و أتكلم بها مع من يتكلم معي و لست شاطر.


و كل جمعة أقرأ فيها من كتاب الله و الحمد لله


هوايتي الشعر

حقا لم أتمكن في الدراسة لاكن اشتغلت و مازلت أشتغل و الحمد لله و عمري 27 سنة.


لم تخطىئ عندما قلت هناك من يتخرج من أكبر الجامعات و ليس لديه ثقافة


و صاحبة الموضوع لم تكن تستهزء بهم بل جلبت موضوع لكي نصحح أخطائنا سواء في اللغة العربية أو اللغة الفرنسية.


و مشكورة على دالك

 

[anissa 13]

لالالا اخ نجيب حشا ولله انا من ردي الاول ولا الثاني ماقصدت حتى واحد
انت قلت العربية مانتكلموهاش صح هاك انا فهمت انا قتلك هاديك العربية العوجة تاعنا يعني لهجاتنا مش كيفكيف ماطيحتش باللهجات حاشا
وماقصدتش صاحبة الموضوع ماقلتلهاش راكي تستهزئي انا هدرت بصفة عامة على روحي وعلى الكل
وراك تقولي خرجت من القراية هاد الشي ماشي عيب كل واحد وضروفو يمكن انت راك مثقف على ناس عندهم دكتوراه هادي قلتها فردي اخي الكريم
سمحلي يمكن انت مافهمتش ردي

​

 

[ام اشراق]

السلام عليكم ازول فلاون بونسوار tout le monde
شا غدى نgولكم رانا فى الطيريطوا algerien دوميل كانز مازال ملقاوش كود لهذ اللغة المشفرة مع الفرونسى كاسى وزيد العربية كاسى يامحاينك المريكان وحاروا فيها يعنى الجميع فى مرميطة جيبوها من الساسة حتى لشعب وزراء قاريين بالفرونسى مايعرفوش العربية بهدلونا مع العرب والشعب قارى بالعربية مايعرفش الفرونسى كرفص لها قاع جدها يرحم جدكم من مخلفات الاستعمار زيدولها المنظومة التربوية اللى فى الدرك الاسفل
مكاش gاع لاباز صحيحة كيطلعو للجامعة كيفاه حبيتوهم يهدروا ياك يتعاندو ويلبقوا شوية كلمات بالفرونسى باه اقولو مثقف نيشان ولا لا:s
احنا صريلنا كالغراب اللى حب يعاند الحمامة وتلف مشيتوا

ان الغراب وكان يمشى مشية***فيما مضى من سالف الاجيال
حسد القطا واراد يمشى مشيها***فاصابه ضرب من العقال
فاضل مشيته واخطاء مشيها ***فلذالك سموه ابا مرقال
حتى انا اليوم رانى دخلت اللهجات قاع مع بعضها رانى خايفة نعشى كابا مرقال حتى لهجتى وننساها:p:d
مشكورة حبيبتى ساندى على الموضوع الزوين اسمحيلى على الاطالة عجبنى موضوعك ياسر:up:

 

[ilina loulou]

سلاام اختي ..
كيما العادة موضوع في القمةو هادف .. هادي الظاهرة رانا كامل حايرين فيها . زعما النيفو يخلعوك بيه واش من شهادات مي تتخلع منهم اكثر كي تسمع هدرتهم المعوجة .:s. ياولوكان تهدرو بالعربية (قصدي الدارجة خير و خير) مي هادي نفوتو عليها و نروحو .. بويسك كاين عيباد الله لاتشوفك فيهم .. يهدرو بالغالط و يزيدو يفيخو عليك علاه؟؟ :sهدا الي راه محيرني .. رانا صح عايشين في زمان ولا فيه كل شي يمشي بالعكوس ..
مي مالازمش تتخلعي بزاف ختي لعزيزة .. you're welcom in algeria .:d.. هادي هي بلادنا و هادوك هوما شعبها ..
عموما ربي يهدينا و يجبر احوالنا ..
تقبلي مروري ..سلااااااااااااااااااااااااام

و كيما يقول عمو هتلر .. لا استطيع احتلال شعب .. :-h :-h

 

[آمِيْرَتُه]

السلام عليك
كانوا يقروا معايا وحدين خارج الولاية بصح هما يسكنوا في نفس الولاية بصراحة الفرنسية نتاعهم مشقلبا يقولو دوصوميل و سوركيلاصيون طرنطيا و حتى نطق اسماء الفلاسفة بصح راجع المشكلة للهجة لأن كاين بزاف ولايات في الجزائر يتكلموا بالجا الي هي بالفرنسية عندهم jou
بكل صراحة نفضل نحكي العربية حتى و نكون نتقن الفرنسية هذي عادة فيا نتكلم العربية حتى ولي كانت نتحدث معها تتكلم معايا فرنسية
و كيما قالوا كاين شي كلمات عربية ينطقوا فيها ماشي صح و كاين كلمات هي مش فرنسية وحاطين أنها فرنسية المهم تشوفي العجائب و الغرائب