بين السمنة والرشاقة مستقبل مجهول لمجتمع جزائري غريب ادخلوا تشوفو

[السلطانة]

هيا موضوع اليوم يحكي على وحدة العفسة هك عادت تقلقني


قناة سميرة الكبيرة المشهورة
ولي حققت نجاح كبير

وجابت وصفات وشيفات
قولولي هيه

هي نفسها القناة لي ساهمت في جعل :s:s:s:s
متشوفوش بلي كاين من النساء الجزايريات بطبوطات سمينات
قبل وبعد الزواج وكاين لي يكونو رشيقات ويرجعو بطبوطات بعد الزواج

يعني هي قناة مليحة وكلشي

بصح النساء تاعنا تهسترو بيها

مع تشوف طبخة تجري تطبقها وتنسي اضرار هاذيك الطبخة

واش من طارت وواش من حلويات وواش من معجنات وواش من مكسرات وواش واش

هيا راح تقولولي ديجا حصلتيها في قناة سميرة

عفوا كيما قال الطفل لي في ماروكو
:مهلا ألا أقول الحقيقة هاهاهاها

مننساش تجربة خالتي
لي كانت كور مانكان كيما يقولو
مع تزوجت بدلت العقلية
فرحانة بدار راجلها
بدات تاكل بالفرط
واش من قاطو وواش من دجاج ولحومات
بعدها عادت تطبق في الوصفات تاع النت
كي نروحو عندها نحيرو
وزادت كملتها عليها قناة سميرة
حتى جات تفيق لقات روحها قنطار وواش
وبدات في ريجيم
واجري من ومن هيه

لاعلينا
-واش رايكم في طبخات قناة سميرة ؟
-انا نشوف فيهم زادو في ميزان سيداتنا وآنساتنا ؟
-ولا نقوللكم انا نقول حنا الشعب لي ميعرفش ياكل معندوش ثقافة الأكل
ومايمارسش الرياضة وميعرفش يستحفظ بروحو
-وسؤالي تاني موجه ليك ياراجل
تحب مرتك تكون سمينة هك ؟
ولا انت من الرجال لي يحبو المرى تحافظ على رشاقتها لأنو الرشاقة تعني الصحة والعافية والسمنة تعني المرض والمورال الطايح

ومنها ندير اشهار لموضوعي هاذا :


حملة بروبلام تاع ارادة برك-تجمّع خاص بسيدات وآنسات المنتدى-


دمتم

​

 

[NASRO DZ]

رد: بين السمنة والرشاقة مستقبل مجهول لمجتمع جزائري غريب ادخلوا تشوفو

السلام عليكم والله واش نقلك اختي
احنا في العائلة ماكنش لي يشوف في القناة هذي
واحد مااهو دايرها في الحساب
مي كاين بنات لي متزوجات ماعندهمش بزااف
تحب تخترع شوية تقلك نبدع على الاقل باش يفرح بيا زوجي
مي المشكل تلقى روحها من بعد سمينة بزااف
ويعود زوجها من كان يشوف فيها رشيقة اصبحت سمينة
يعني تتبدل النضرة تع الزوج في زوجته

انا نضن لي صح تعرف تخمم تاكل منا نورمال مي دير الرياضية هكا ماتزيد ماولو تعود يوميا رياضية
مام لاطاي تعها يتعدل لانه الرياضة تريقل لاطاي من تجربة مني ههه
وبخصوص شعب تعنا خلي ماكلا نحكيلك راكي تعرفيها وحدك ههه
لا ع لا ق ة ل ه .*******

والسؤال الاخير هه هو محرج شوية هه
انا نقلك عندي عادي سمينة نورمال مي ماشي سمينة بزااف
لانو ان (كانت سمينة بزااف قادر تقتلني ولا تخنقي ههه)
وميرسي على موضوع
​

 

[مابقاش بزاف.Dz]

رد: بين السمنة والرشاقة مستقبل مجهول لمجتمع جزائري غريب ادخلوا تشوفو

salaaam
ya3tiik sa7a 3la lmawdoo3
oui absolument kima golti hadi la chaine ta3 samira tv ana ba3d nchouf bèli bzf rahoum ytèb3ouha w yhazou les recettes ta3 les plats mèn tèma mais kayèn li ya3rèf wèch ydir w wèch yakool au contraire kayèn bzzf lii rahoum ghir yjarbou n'importe quelle recette l'essentiel ta3jebhom w tkoun bnina hadik hiya w maychofouch ida hadik lmèkla ra7 dharhom w t9iis sa7èthom srt l'obisité li kathrèt 3and lebnat en général w tweli m3a lwa9t danger w dir des autres maladies ... mala mli7 lwa7da tkoun r9i9a w dir sport w ta3ref wech takoul ...
mrc pr le sujet w la publicité l la5or

 

[الحلم الوردي]

رد: بين السمنة والرشاقة مستقبل مجهول لمجتمع جزائري غريب ادخلوا تشوفو

وعليكي الســلآم والرحمة

-واش رايكم في طبخات قناة سميرة ؟
طباخات قناة سميرة كاينة الي نوغمال وكاينة الي شوية زايد الوزن ديالها
وصح لاحظت هد الفترة نتاع شهر طباخات الجدد كامل الوزن نتاعهم زايد
-انا نشوف فيهم زادو في ميزان سيداتنا وآنساتنا ؟
بالنسبة ليا انا مين ذاك نشوف طبخة تعجبني نطبقها نوغمال والوزن نتاعي كيمـآ راهو نوغمال
هدا بالنسبة ليا
-ولا نقوللكم انا نقول حنا الشعب لي ميعرفش ياكل معندوش ثقافة الأكل
ومايمارسش الرياضة وميعرفش يستحفظ بروحو
نوغمالمو الواحد كي ياكل اوموا يحرك روحو شوية ياو لوكان حتى يطلع ويهبط في الدروج باش الماكلة الي تاكلها تتهضم مليح
ماشي الواحد ياكل ويريح ومن بعد كي يسمان يحوس كيفاش ينقص الوزن نتاعو ويرجع في مشاكل صحية
والي عندها تابي ولا الة نتاع سبور كي تكمل ماكلتها تريح فيها اوموا نص ساعة

 

[بنت الـ25]

رد: بين السمنة والرشاقة مستقبل مجهول لمجتمع جزائري غريب ادخلوا تشوفو

اهلا شوشو راكي تدير فالبيبليسيتي لموضوعك لاخر ههههههههههههههه
معليناش
انا نشوف بلي المشكل مش في قناة سميرة
المشكل فينا احنا
ما عندناش ثقافة الماكلة وثقافة الرياضة
وزيد بزيادة كون يسمعوك تقولي ندير ريجيم يموتو عليك بالضحك ، يقولولك هادا وش بقالك يا معوجة لحناك
هههههههههههههههههههههههه مصراتليش ليا طبعا مي صرات لوحدة نعرفها وصرات قدامي تاني

المهم المرا اللي حابة تحافظ على رشاقتها وبالتالي صحتها تنقص من الأكلات الدسمة والعجائن
وتمارس رياضة المشي مفيدة بزاف
تيفيتي السكريات على قد ما تقدر ومنها المشروبات الغازية اللي تحتوي على ملايين السعرات الحرارية
وتاكل الخضروات واللحوم البيضاء ولكن كلو بقدر

وان شاء الله توصل للوزن المثالي اللي راهي تفتش عليه
شكرا على الموضوع يا فراشة
​

 

[آمِيْرَتُه]

رد: بين السمنة والرشاقة مستقبل مجهول لمجتمع جزائري غريب ادخلوا تشوفو

السلام عليك
الرشاقة و السمنة أحلام البنت الجزائرية
أنا عجبتني قناة سميرة تعلمت منها بزاف وصفات بصح ندي غير لي تفيدني أما البقية نونو
نبغي الأطباق العصرية بزاف
و عن السمنة أنا و ياها مستقيمان غير متقاطعان ههه منتفاهمش معها
نحوس ناكل برك بصح نسمن لالا تعجبني روحي
المشكل ماشي في القناة لالا المشكل فينا حنا كاين بعض شيرات نحير فيهم معايا وحدة صحبتي انا ناكل سبيسيال واحد و قرعة بيبسي مثلا و نكمل و نقعد نخزر فيها تاكل سبيسيال و تزيد زوج بيتزا اه دا وين راكي ديري يا اختي
خطرات تقولي عطيني دوارتك راجلي يظل يضحك عليا هه
لازم نكونوا في الوزن المثالي ناكلو بصح في حدود المعقول كاين لي يتعاندو على الماكلة هذي حالة حمبوك ههه
كون نقعد نحكي عام و منكملش و راني استنتجت حاجة أن لي تقعد في الدار غير رقاد و ماكلة و تفراج تزيد في الوزن و راني لاحظتها في روحي
يعطيك الصحة على الموضوع

 

[أم منيــــــر]

رد: بين السمنة والرشاقة مستقبل مجهول لمجتمع جزائري غريب ادخلوا تشوفو

السلام عليكم
المشكلة مش قناة سميرة لان مشكل السمنة من زمان وهو كاين
احنا مانعرفوش ناكلو و ما عندناش نظام غدائي صحيح وكي يكون الخير بزاف تاني يزيد من نسبة مشكل السمنة
بارك الله فيك عزيزتي
اما موضوعك لاخر شفتو حاجة مليحة و تحفز لبنات والنسا باش يديرو الريجيم
بارك الله فيك
​

 

[Amine7N]

رد: بين السمنة والرشاقة مستقبل مجهول لمجتمع جزائري غريب ادخلوا تشوفو

السمنة مرتبطة أساسا بالنظام الغذائي
وعلى الرغم من سنة نبينا صلوات الله وسلامه عليه
قد بينت لنا كيفية الأكل والشرب
إلا أن أغلب الناس تهملها
السمنة لها دوائين
الرياضة والحمية الغذائية معا
وإما الحمية الغذائية لوحدها ( هنا الحمية الغذائية تكون قاسية جدا وقلة من يتابعون فيها )
لكن بما أن الأغلبية منا لايعرفون أي نوع من الرياضة مناسبة لفقدان الوزن
وكم من سعرة حرارية نحتاج لحرقها لفقدان 1 كغ من الوزن
وماذا نأكل ومتى نأكل
نجد أن أنهم يفشلون في تحقيق مبتاغهم
وممارسة الرياضة بدون حمية غذائية ستزيد من قوة التحمل
وستبرز العضلات لكن لن تفقد الكثير من الوزن
نستطيع فقدان الوزن بالحمية الغذائية لوحدها
لكن الجسم لن يكون مشدود كالذي يمارس الرياضة

بارك الله فيك على هذا الطرح

 

[روز]

رد: بين السمنة والرشاقة مستقبل مجهول لمجتمع جزائري غريب ادخلوا تشوفو

اواه شوشو راكي تعقدتي من السمينات ههه
في الحقيقة مانتفرجش في قناة سميرة
الوصفات نتبع فيهم في الانستغرام والفيس بوك
اما علی البطبوطات دركة قع يدخلو يقولولك حنا تحت 50
ورانا نحوسو علی حاجة تزيدلنا في الوزن ههه
لا علينا
لابد ولابد الوحدة تعس روحها وتوزن روحها مرة في الاسبوع علی الاقل
باش تقضي علی الكيلاوات او الغرامات الزائدة
قبيل في الفيس یوك وحدة حطت وصفة تخسيس
من هاذيك نتاع الليمون والزنجبيل ووو
وسألت اذا كانت تنحف صح ولا لا ؟
طبعا ناس بزاف غالطين تعملك هذ الوصفة وتشربها
وامبعد تروح تتربع علی هاذيك الطابلة وهات يا اكل
حتی ماتقدرش تتنفس امبعد تقلك الوصفة مش ناجحة وماجابتش نتيجة !

اظن لازم يكون في توعية ويعملو في المستشفيات اخصائيات تغذية
ويتبعو النساء لي وزنهم زائد
في اليابان اذا مش غالطة في البلد يعملو غرامة مالية علی لي وزنو زائد
سواء نساء او رجال
وهذا حل فعال بزاف كن يطبقوه عندنا ههه
صحيتي حبيبتي..

 

[*amina*]

رد: بين السمنة والرشاقة مستقبل مجهول لمجتمع جزائري غريب ادخلوا تشوفو

السلام عليكم
يعطيك الصحة اختي شوشو على الموضوع
انا شخصيا زدن فالميزان بعد الولادة وبحكم اني كنت نرضع وليدي من صدري باباه كان لي يسمع بيها تدر الحليب يجيبهالي وخيتك منا تاكل بلا حساب هههههه حتى انتبهت على روحي والمشكل لي مقدرتش عليه هو بطني لي خرج

نرجع لموضوعك بالنسبة لقناة سميرة منشفاش روحي طبقت منها ولا اكلة ههههههه كنت نتفرج برك ونسجل في مخي نقول كي ندير داري نطيب ههههه "وييييييينها الدار يا ربي"
بصح مزية ولهتيني الا كتبلي ربي بسكنة ماشي نروح ديركت كل مرة نطبق هههههه
وهنا في دار العجوز عندي نظام نمشي عليه في الطبخ يعني من الاحد الى الاربعاء ندير فطور عادي وعشاء خفيف ومن الخميس للسبت نوعلهم وندلهم اطباق بريزونتابل بويسك راجلي يكون هنا

 

[¬Đỉaмơŋđ ✿]

رد: بين السمنة والرشاقة مستقبل مجهول لمجتمع جزائري غريب ادخلوا تشوفو

وعَليْكمْ السَلآم ورَحمَة اللهِ وبرَكآتُه​

​

​

كيمآ قآلُوا اللِي قبْلي المُشكل مش فالقنآة المشْكل فينآ حنآ ، اللِي عندُو شهيّة مفرطَة للأكلْ لآزمْ يعسْ روحُو ينقصْ وحتى كي يآكلْ يتبعْ نظآم غذآئي صحِي ومتكآمل ومع ممآرسَة الريآضَة يتحصلْ على جسم صحِي ومثآلي .. ​

- حنآ شعب مآعندُوش ثقآفَة غذآئيّة يموت عَلى الأكل الثقِيل كي يقعُد علَى طآولَة الأكْل يقضِي على الأخضَر واليآبسْ ومْبعد يقُولكْ آني زدْت فالـpـوآ والله مآني نآكل بزآف ​

( طيبْ من أين لكَ هذآ ؟؟ ) ​

- ​

- السَمنَة تعنِي إتبآعْ نظآم غذآئي خآطىءْ ومآكآنش كيمآ الوسَطيّة لآ سمينْ لآرقيقْ ..​

​

وسؤالي تاني موجه ليك ياراجل
تحب مرتك تكون سمينة هك ؟
​

​

​

​

​

​

​

​

سآندِي وحنآ مآعنْدنآشْ حقْ الإختِيآرْ

​

مشكُروه على الموْضوع الـ

​

 

[السلطانة]

رد: بين السمنة والرشاقة مستقبل مجهول لمجتمع جزائري غريب ادخلوا تشوفو

السلام عليكم والله واش نقلك اختي
احنا في العائلة ماكنش لي يشوف في القناة هذي
واحد مااهو دايرها في الحساب
مي كاين بنات لي متزوجات ماعندهمش بزااف
تحب تخترع شوية تقلك نبدع على الاقل باش يفرح بيا زوجي
مي المشكل تلقى روحها من بعد سمينة بزااف
ويعود زوجها من كان يشوف فيها رشيقة اصبحت سمينة
يعني تتبدل النضرة تع الزوج في زوجته

انا نضن لي صح تعرف تخمم تاكل منا نورمال مي دير الرياضية هكا ماتزيد ماولو تعود يوميا رياضية
مام لاطاي تعها يتعدل لانه الرياضة تريقل لاطاي من تجربة مني ههه
وبخصوص شعب تعنا خلي ماكلا نحكيلك راكي تعرفيها وحدك ههه
لا ع لا ق ة ل ه .*******

والسؤال الاخير هه هو محرج شوية هه
انا نقلك عندي عادي سمينة نورمال مي ماشي سمينة بزااف
لانو ان (كانت سمينة بزااف قادر تقتلني ولا تخنقي ههه)
وميرسي على موضوع
​

اهلا اخي تهنيتو من القناة هادي هههه
صح المشكل في الشعب تاعنا
والمرأة السمينة راهي ماش غير يكون شكلها ماش مليح
راهي تمرض تاني
مع الوقت بسبب السمنة
شكرا اخي نورت

 

[ضيوف وسـنغادر]

رد: بين السمنة والرشاقة مستقبل مجهول لمجتمع جزائري غريب ادخلوا تشوفو

قناة سميرة كيما نشوف ماعندهاش ذنب او عيبــ
راهي خدمة يخدمو فيها
العيب راهو في السيدات المفرطات لمحرك السرعة صح اكيد نشوفو وصفات ونتعلمو ويا محلاها من شغلة مي بالشوية او الميزانية تع الدار من جهة والوقت من جهة ماش غير الطياب شغل البيت كاين حاجات اخرى نعرف وحدة ديما مع سميرة وولادها ناسيتهم خلاااصــ اهنا مانقولوش سميرة غالطة الام هي للي غالطة بيسك هي اللي مهملة ولادها سميرة راهي قناة كباقي القنوات تع المسلسلات والدين والقران وكلشيــ
واكبر هم السيدات اللي يطبقو ويقعدوا ساعات امام تلك الشاشة وياكلوا بركــ...السمنة ماش عيب ولا غيرها مي شوية فكري مع روحك اختي لانو الراجل يقدر يدوبلي الزواج ماتنسايش هههه لازم ديما متحوفة قدامو واكيد كل وحدة وكيما يحبها راجلها
المهم المراة لازم تطبق بعقلانية انا مثلا راني صغيرة ونحب نطبخ خاصة العامين هادو لاني عدت نميل للاعمال المنزلية بزااف نشوف مرات طبخات سهلة وحتى ان كانت صعبة ماش عيب كي نجرب حاجة كل شهر او اقل المهم مانكثرش ونحاول ناخد ايضا ملاحضات على واش يقلوه النساء المقدمات مي بعقلانية
باختصار النساء لازم هوما يهتموا برواحهم وماعيبش لو تطبق واش كاين اذا كانت قادرة عليه علاش لا ؟ المهم كلشي باعتدال اذا زاد الشيء عن حده انقلب لضدهــ
​