- إنضم
- 13 أفريل 2013
- المشاركات
- 14,618
- نقاط التفاعل
- 54,537
- النقاط
- 1,756
- العمر
- 31
- محل الإقامة
- قسنطينة
- الجنس
- أنثى
السلآم عليكم يا ناس لمّتي الأعزاء والكرام
علابالي كل يوم مهبلتكم بموضوع جديد من مواضيعي
والله هاد الأيام راهم ينزلو عليا الأفكار ما شاء الله هههه
المهم ندخلو في الموضوع مباشرة
علابالي مع شفتو العنوان حكمكم الفضول ودخلتو تقراو
اليوم عندكم ما تقراو اقراو و رتحو ههه
المهم علابالنا أنو كل جزائري عندو عقدة في قلبو من جملة "الأفلام والمسلسلات الجزائرية"
وأنا تاني عندي عقدة وحبيت نفرغها هنا
ولا نسميها الكوميديا الجزائرية أحسن
لأنو نأكدلكم 90 بالمئة من الجزائريين لي تلقاهم يتفرجو في فيلم جزائري عندهم 3 أسباب
يا إما راحلو البارابول وبقاتلو غير القناة الجزائرية ههه
ويا إما الإنسان هاداك مغموم وحاب يضحك ويرفه عن نفسو
ويا إما الإنسان هادا مقلق وما لقاش فاه يبرد قلبو يولي يحط مسلسل جزائري ويعلق عليه
هادو هوما الأسباب و إلا لي راهو يتفرج شيخ كبير وعجوزة كبيرة مايسمعو وما يشوفو مليح هههه
المهم حاجة تتحرك في التلفاز وخلاص
وأنا راني مع هادو الناس لأنو الأفلام تاعنا كارثة , كن نجيو نهدرو على عنوان الفيلم برك
واحد اسمو " نور الفجر" ولاخر " شمس الحقيقة " ولاخر "شمس الصباح"
تحس روحك تتفرج في أحوال جوية وتعس في شروق الشمس :-o
كن زادو ذكرولنا درجة الحرارة وخلاص هههه :d
ولا تلقى اسم المسلسل
"يا الماشي في الليل" زعم هادا من فصيلة الخفافيش يخرج غير في الليالي ؟
ولا "شفيقة بعد اللقاء" أصلا وكتاه صرا اللقاء باه نشوفو بعد اللقاء
من لي نعرف شفيقة مسكينة وهي مغمومة ومشاكل الدنيا طايحة عليها
وكي يخلص عليهم الاسامي يسميو "وهيبة" ولا "مريم" ولا "نعيمة" بنات الجزائر كامل يجبدوهم :down:
هادا العنوان تاع الفيلم برك ولازملو تحليل من طبيب نفسي فمابالك بالمحتوى؟
حنا فالحين غير في الكوميديا أما الدراما حدث ولا حرج , اصلا الدراما انتحرت لما سمعت بلي ولينا نديرو دراما
لا قصة تصلح ولا سيناريو يصلح , نفس القصة يعاودوها , ديما لازم كاينة مرت الاب الشريرة
وكن ماتحضرش مرت الأب ما يصلحش الفيلم, الأمهات الجزائريات كامل قتلوهم ,
تحس روحك تتفرج في والت ديزني هوما لي فيهم مرت الأب الشريرة ويتزوج الأمير بالأميرة في الأخير ويعيشو بسعادة
وحنا الافلام تاعنا تلقى نفس الممثلين في كل الافلام وفي نفس الأدوار يبدلولهم غير الديار والفيلات والشركات والسيارات
حتى تتوسوس تقول هادا فيلم خلاف ولا الممثلين باعو دارهم وشراو دار خلاف؟ :-o
و يا يما على هاداك التمثيل :tongue02: تلقى الممثل يحكي مع صاحبو بصح يشوف مع الكاميرا ويهدر معاها
تقول يقدم في الأخبار , قريب تخرجلو من الشاشة تاع التلفاز وتقولو اهدر مع صاحبك علاه تهدر معايا ؟؟
تمسخير في تمسخير
يزيدلو شعر مستعار هههه :d ويا ريتو مازاد هاداك الشعر, بالاك عش العصفور أرحم هههه
معرف منين جابو الشعر هاداك تقول عليه مخلفات تاع كاش قبيلة من العصور الحجرية هههه
حتى تتوسوس وتولي تشوف مع شعرك
ولدرجة في الأفلام تاعنا مايلقاوش كيفاه يجبدوك بقضية مهمة يولي يدخلك المخدرات
ياو المخدرات راحت لامود تاعها جيبلي حاجة جديدة
تكون تتفرج لمدة 20 حلقة في عائلة طيبة وعايشين حياتهم لاباس ومن بعد كي يبقاو زوج حلقات ويخلص المسلسل تكتشف بلي العائلة هاديك أكبر مروجة للمخدرات ؟؟ واش هادا تخلعو فينا ولا كاميرا كاشي ؟؟ :s
يبدلك محتويات الفلم في زوج حلقات ههه, مرة شفت مسلسل فيه شاب اكتشف في الحلقة ما قبل الأخيرة بلي والديه ماشي والديه الحقيقيين , وفي الحلقة الأخيرة لي مدتها 15 دقيقة لقى والديه الحقيقيين ولقى بنت الحلال وتزوج وجاب الولاد وقريب ينعتلك كيفاه زوج ولادو , آو في 15 دقيقة دار هاد الشي كامل؟ أنا نعرف الشاب الجزائري مسكين 20 سنة قبل مايزيد في الدنيا وهو يوجد باه يتزوج ومعرف لاكان يلحق ههههه والله مهزلة :tongue02:
وزعما هاداك المافيا ولا زعيم المروجين تاع المخدرات باه يبينلك القساوة تاعو واش يديرلو؟؟
يطولو شعرو ويحطلو قارو في يديو, وهو والله يصلح يكون مربي في حضانة الأطفال لدرجة وجهو حنين
ولما توصل الحلقة الأخيرة وما يلقى كيفاه يدير للشرير تاع المسلسل يولي يقتلو وخلاص
هكا يقضي عليه نهائيا وما يزيدش يظهر, ماشي كيما في الافلام الهندية يحرقو العبد ويحطو الرماد تاعو في قرعة ويربطو القرعة هاديك بسنسلة تاع حديد ويرميو القرعة هاديك من قمة جبال الهيمالايا ويزيد يبعت فوقها قنبلة نووية و غدوة تلقى الشخص هاداك رجع وبصحتو وحي ويزيد يغني وصوتو مليح هههه ( خلي المرة الجاية نديرلكم موضوع على الأفلام الهندية ههه)
نوليو للأفلام الجزائرية , حنا الأفلام تاعنا ديما الحلقة الأخيرة لازم تخلص بعرس, تقعد 30 دقيقة ونتا تتفرج في الناس تشطح
جامي يخلصلك مثلا نهاية مفتوحة ويخليك تستغرب:-o, أصلا لما تحط مسلسل جزائري وقبل ماتبدا الحلقة الأولى ونتا تشوف في الجينيريك تفهم الحكاية كامل وواش يصرا ههه تولي تطفي التلفاز وتقعد بلا ماتعب روحك وتتفرج راك فهمت كل شي
ونزيدكم حاجة لما يحبو زعما يديرو فيلم أكشن ويحب يفجرلك زعما سيارة, في الأفلام تاع الخارج حتى تغيضك السيارة لي رايح يفجرها لدرجة آخر طراز, بصح حنا يجبلك سيارة مسكينة بقالها نهار وتموت بالاك فرعون وساقها ههه
ويديرلك بيها الأكشن زعما ويفجرها, وبالاك حشمو يجيبو دراجة يفجروها هههه
ويعجبني لما يطلع الجينيريك وتلقى التشكرات فيها غير المطاعم والمستشفيات
شعب ياكل ويمرض طول هههه , لا حول ولا قوة إلا بالله
يتخربطو أفكاري لما نشوفهم, أصلا جامي بكيت
مشاعري ودمعتي وحجروهملي
وفي الأخير نذكرلكم موقف ولقطة شفتها في حلقة أخيرة من حلقات إحدى المسلسلات الجزائرية
شفت شاب واقف وهو أعمى زعما وقدامو طفلة ويتفرجو على البحر ومن بعد وفجأة دورت الطفلة وشافت مع الشاب وابتسمت
وفجأة زاد دور الشاب الأعمى وشاف فيها وابتسم :-o
سبحان الله ؟؟ زعما اعمى ولا نسى على روحو ؟؟ ولا عندو الحاسة السادسة تاع الابتسامات؟؟
ولا باه يبين بلي راهو حافظ السيناريو والله شي يدوخ :down:
درك خلصو الأفكار تاعي نخليلكم الدور باه تعبرو على واش في قلبكم
وتشكيولنا شوي من الأفلام الجزائرية
والله كتبت كامل هاد الموضوع غير باه نرسم الإبتسامة على وجهكم ^^
ان شاء الله مايكونش الموضوع تقيل عليكم وتحيا الأفلام الجزائرية ههه :regards02:
ســـــلآم
آخر تعديل بواسطة المشرف:
