مرحبا باللماويات والزائرات الرائدات لهذا القسم الجميل
في موضوعي الخاص بنوع جديد من الغريبية يسموها غريبية الورقة
هاد النوع شفتو في بعض المناسبات عجبني ذوقو فـ تعلمت الطريقة وطبقتها
وجات روووووعة وبنينة بشكل لا يوصف ولست أبالغ:bravo01:
هي تختلف شوية عن الغريبية التقليدية لكن هذا اسمها
للأسف ما صورتش المراحل ، حتنى انتهيت باش تولهت خخخخخخ:$
ولكن الطريقة سهلة جداااا والمقادير بسيييييييطة أيضا
على بركة الله
المقادير
فرينة
زبدة ذائبة
ملح
ماء
كاوكاو بدون قشور محمص مليح
سكر عادي
بياض بيضة
كاكاو مرحي خشين للتزيين
الطريقة
بالنسبة للعجينة
ديري 4 كيلات فرينة بكيلة مش معمرة زبدة ذائبة من الأفضل فلوريال
(أنا كيلت بغرفية تع حليب متوسطة)
تضيفيلها قرصة ملح وتلميها بالماء
تخليها على جنب ترتاح وقد ما تطول تجيك مليحة
الحشو
(وهنا تبعوني مليح)
تشري هداك الكاكاو المقشر تحمصيه مليح فالفرن حتى يرجع لون بني مي مش بني غامق هكدادك او يتحرق ويجي طعمو مر
ممبعد تكيلي بأي حاجة ، ديري 3 كيلات كاوكاو بكيلة مش معمرة سكر احرش
انا عملت 1 كغ كاوكاو بـ 300 غ سكر تقريبا (هاد الكيلة ديرلك حوالي 70 حبة)
تخلطيهم وترحيهم مع بعض جيدا يعني حتى يوليو كي الكفتة يعني لما تلميها تتلم
لأنو كما هو معروف الكاوكاو يطلق الزيت والسكر كي يترحى يطلق سائل
الآن نجيو للتشكيل
تفتحي العجينة بيدك رقيقة أو بالآلة الخاصة بيها
انا ورقتها بالماشينة يعني نطرحها ومبعد نطبقها ونزيد نطرحها 3 مرات باش تجي مورقة ومقرمشة درتها فالرقم ما قبل الاخير
نحربش هداك الحشو ممبعد نحطو فوق العجينة ونطليه ببياض البيض ملفوق ونرولي مرة وحدة
نطلي النهاية (العجينة) ببياض البيض ونغلق ونزيد نحربش باش تتغلق مليح وتجيني الكل متساوية
نطلي بياض البيض ملفوق ونذر شوية كاوكاو خشين او فستق كل على حساب ذوقو
نقطعها عادي مقروضات وندخلها طيب على درجة حرارة منخفضة يعني كل وحدة على حساب الفرن تعها
انا الفرن تاعي بزاف سخون ندخلها على درجة حرارة 150 ، طيب 5 - 8 دقائق ونخرجها
وهذا شكلها النهائي
زووووووووووووووم
صدقوني تجي خفيفة وبزااااف بنينة
نتمنى تجربوها وتدعيولي
في أمان الله
