أريد رأيكم

[مشكلتي]

مشكلتي هي مشكلة بسيطة جدا وتحتاج رايكم واعتذر على وضعها هنا، والله انا في امس الحاجة اليها خاصة انها مرتبط بالمستقبل

انا تحصلت على البكالوريا كنت فيما سبق من النجيبات.. ونتيجة البكالوريا كانت صدمة بالنسبة لي حين تحصلت على معدل 12 لكن قدر الله وماشاء فعل
المهم بعد النتيجة سجلت وفقط ولم افكر ابدا في التخصص
سجلت في علوم المادة هناك من قال انه جيد وهناك من قال لا... فاحترت بين تخصص علوم المادة وتكنولوجيا... واصبحت افكر في التحويل الى تكنولوجيا
ارجوكم دلوني للراي الصائب ،التخصص الذي يضمن مستقبلي في مهنة تكون انسب للمراة/
وكيفية التحويل الى تخصص اخر؟

فهل اعلم المادة افضل ام تكنولوجيا ؟


وبارك الله فيكم وجزاكم خيرا

 

[Hakan]

رد: أريد رأيكم

السلااام عليكم اختي في رايي المتوااضع :
تخصص تكنلوجياا احسن بكثير من تخصص علوم المادة لانو الاول فيه
العديد من الخيارات باسكو نهار تكملي العاام الثااني يعطوك
بزااف اختيارات كيما قالي صاحبي
وزيدي العمل بديبلوم نتاع تكنلوجيا متوفر خااصة في الشركات وعلوم الماادة ما عندك ما تفيدك هذا رايي اما عن التحويلات فعادي جداا نورمالمون تحويل داخلي سهل برك لازم توفي الشرووط

ربي يسهلك اختي علوم المادة قراها ابن عمتي وراهو شاد الحيط وتخيلي انو رجع حاب يقرا آداب ولغة عربية
من كثرة ما طاحلو المورال من التخصص هذاا
وانت علااش تفقدي الامل اقراي تكنلوجيا في جامعة ولايتك وعاوديلك الباكالورياا
وان شااء الله ربي يفتح عليك وعلى غيرك ...السلاام عليكم..​

 

[أم أُنٌَيسة]

رد: أريد رأيكم

السلام عليكم و الرحمة و البركة
كل تخصص و كيفاه أختي الكريمة
و أول نصيحة دائما و أبدا هي الإستخارة ، إستخيري ربكي فهو يعلم بما هو خير لكي إن شاء الله
وأنا أدرس تخصص تكنولوجيا و الحمد لله ، وكل الشعب تقراي تلقاي وحاجة ماواعرة بإذن الله
و يا أختي نصيحة لوجه الله إن كنت درستي شعبة العلوم تجريبية فأنصحكي بأن لا تختاري شعبة التكنولوجيا لأنكي لن تجدي فيها نفسكي والله ، فقد كانت عندي مجموعة من الصديقات لم يجدن ما يدرسن لهدا السبب ، فأغلب ما درسناه قد قمنا بدراسته في شعبة التقني رياضي
و إن كانت شعبتكي تقني رياضي و خاصة هندسة ميكانيكية او كهربائية فلا بأس في التحويل لكلية التكنولوجيا
و لا يمكنني ان اعلق على شعبة علوم المادة فلا علم لي بها
وفقكي الرحمن بما تحبين فيما يحب و يرضى لكي
تحياتي

 

[لؤلؤة قسنطينة]

رد: أريد رأيكم

السّلام عليكم
أولا ألف مبروك حبيبتي
و12 ولا 16 مايهمش اي حاجة من عند ربي مرحبا بيها
ونتي الحمد لله بذلتي جهدك
أما في ما يخص الإختصاص
ما عنديش فكرة على الموضوع ختي لعزيزة
لأنو اختصاصي اقتصاد وعلوم التسيير
يعني بعيدة عليك شوي
على هادي نفضل تسمعي رأي الإخوة لي قالوه
ومن بعد توكلي على ربي وما يكون غير الخير
مستحيل ربي يبعتك لحاجة ومافيهاش خير ليك
وهاد الجملة تأكدت منها بعدما حطيت نفسي رحت للخيار الخاطىء
بصح الحمد لله ربي ما فيه غير الخير
وزيد تاني نصيحة شوفي حاجة لي تقدري عليها
ماشي تروحي تخيري حاجة صعبة ومن بعد تحصلي
نتمنالك التوفيق ختي
تقبلي مروري​

 

[مابقاش بزاف.Dz]

رد: أريد رأيكم

و عليكم السلام
اولا مبروك عليك ان شاء الله ربي يوفقك لكل ما فيه سداد و توفيق و خير
على حسب علمي انك راح تقراي في كليهما العام الاول un tronc commun
بالنسبة لتخصص ST بالاك أوسع في التخصصات ممبعد و عندك واش تخيري هندسة مدنية ..هندسة الطرائق..الكترونيك..هندسة كهربائية .. يعني فالنهاية تخصص تكنولوجيا غالبا ما يهتم بالهندسة ..
اما بالنسبة لتخصص SM فهو يهتم بفرعي الفيزياء و الكيمياء و كل ما يتفرع عنهما من كيمياء تحليلية ..صيدلانية ..وفيزياء نظرية..طاقوية ...
بين التخصصين الاتنين شوفي انتي واش يناسبك اكتر . .لو انك خممتي مليح قبل ما ديري اي تخصص
زيدي سقسي و استفسري الي راهم يقراوا في هدين التخصصين يفيدوك اكتر
بالنسبة للتحويل الداخلي في نفس الجامعة شوفي فترة التحويلات الي دارتها الجامعة الي راكي فيها نظن كامل في بداية سبتمبر روحي ل le doyen و لا le vice doyen تاع الكلية الجديدة و القديمة الي حبيتيها و خدي معاك استمارة التحميل بالاك تخرجيها من le site تاع الجامعة و بعد ما يوقعهالك تاخديها لنائب رئيس الجامعة و يتحول ملفك بين مصالح الانخراط بين الكليات ..ادا كان تحويل خارجي روحي للجامعة الي حابة تحوليلها و معاك الوثائق استمارة التحويل و نسخة من شهادة الباكالوريا و شهادة تسجيل ادا وقعولك على استمارة التحويل و قبلوك تدي ملفك عادي و تقراي بيه فالجامعة الاخرى ..
نصيحتي ادا حبيتي اقراي واحد فيهم و عاودي معاه الباك جيبيه بمعدل اعلى احسن بما انك تحوسي على حاجة تضمن مستقبلك و مهنة مليحة ..عاودي الباك و اتعبي عليه و ديري بيه école supérieure des profs ادا كنتي تحبي التعليم و الا خيري اي واحدة من les écoles supérieures ou bien préparatoires او حسب رغبتك انتي واش راكي حابة تقراي و ميولاتك
و ربي يوفقك ان شاء الله