لا اعرف كيف ابدأ لكني ساختصر
ساحكي لكم حكايتي و ادعولي معكم
ولدت اول فرحة عند والداي لكن شاء القدر ان تتوفى امي في الشهر الثاني من ولادتي ربي يرحمها و يوسع عليها
تزوج والدي بعدها امراة اخرى لكنها شرطت ان لا اكون معها حبت تعيش حياتها تركني والدي عند جدتي ترعرعت هناك مع مجموعة اعمامي الصغار كبرت هناك لا ارى والدي الا دقائق
كبرت مع اعمامي الئ ان بلغت عام البكالوريا كان عمي الصغير اكبر مني باعوام و كان مدمن مخدرات في ليلة الباك كنت راقدة في بيتي وحدي و و ادا بيه يتسلل عندي و صرات الكارثة بعد ضرب مبرح و اغتصاب لشرفي الي هو شرفو هو ثاني
مريت بفترة نفسية عصيبة و مفوتش الباك و دخل عمي للسجن و طلب مني نسامحو باه نخففلوا العقاب لكني خفت منوا و فعلا وليت مرعوبة منوا
بعد عام من الحادثة توفيت غاليتي جدتي و بقيت وحيدة في بيت جدي لانو جميع العائلة متزوجين في ديارهم و تحتمت علئ والدي يديني عندو اما زوجتوا محبتش و اول مسكنت عندو في الشهر الاول لقاتلي خطاب من ولاية اخرى بعييد علينا من معارفها و قنعت ابي انو يزوجني
راكم تتساءلو انا وين كنت نت كل دلك
انا كنت في صدمة ربي يعلم بيا مكنت حاسة باي شيء
من بعدها هدرت معايا زوجة والدي قاتلي لازم تتزوجي مدام هدا انسان قابل بيك و انت هكا بلا شرف :::::::::: كان كلامها يقيس و محملتش نزيد دقيقة معاها قبلت علئ اساس هي اي قالت لهدا السيد و وصاتني منحكيش معاه في موضوع و انساي الامر
انا قلت يمكن حبتلي الخير و مشيت بالنية
بعد شهرين تزوجت باسرع وقت دارتلي شوي حوايج بشرطي و دخلت عند هدا الانسان و انا منعرف عليه والو(لانها كانت تمنعني نحكي معاه في فترة الخطوبة تقولي باباك ميحبش و انا اصلا كنت كارهة من كلش محوستش نفهم)
و هناك كانت الصدمة دخلت عند زوجي و هو في بالو راني شريفة لكنو لقا العكس و طاحو فيا الضرب و السب و الشتم و الاهانة ملقيت ما نعمل الا البكاء بكيت بكيت من ظلم تع زوجة بابا الي جامي نسامحها و بكيت على نفسي وش من دنب درتوا
فوت اسبوع مع راجلي و هو ميشوفش فيا و في هداك الاسبوع كان يروح سكران للدار(اعدروني على مصطلح ) كنت نبكي كل ليلة تمر عليا و بعد مرور هداك اسبوع اداني لدارنا لقينا والدي باع سكنتو و رحل (علبالي متتخيلوش هدا الشيء لكني انا متخيلتوش مي حسيتو و شفتوا) بكيت و بكيت و راجلي يسب فيا و في اهلي و قالي درك وين نديك
غاضتني روحي علاه يصرالي هكا و منلقاش وين نروح آآآآآآآآآآآآآآآآه لو كانت امي حية راني معززة مكرمة لكن نهار راحت من دنيا هكا يصرا فيا
خميت قلت نروح عند عمامي او خوالي لكن ملقيتوش حل سكت و قتلو معندي وين نروح انت هو داري
ولا بيا للدار لكنو ولا شعور معايا مر شهر من زواجنا حاولت نحكيلو الحكاية لكنو مش سامعني و ظهر انسان تع شراب و خلاص بعد الشهر كنت نستنى فيه مبانش عليه خبر فاتو يومين و انا نسقسي عليه مبانش من بعد لقاتو الدولة مقتول على الشط تقابظ مع صحابو و هوما سكرانين و مات صدقوني بكيت حسيت روحي كنت سبب في قتلو
ربي يرحمو و يغفرلو خلاني ارملة فوت العدة في بيت شيخي و كان كل يوم يمر نقول وينو بابا (و بابا مجاش يعزي )
مرت العدة و كملت بعدها ايام و اتجهت لعمي الكبير قعدت عندو و راح جاب والدي و هدرت مع والدي لكنو خسر عليا كلمة وحدة قالي وش ندير بيك متصلحي لا للزواج لا لاي شيء آخر
انا زادت حالتي صحية دخلت للمستشفى حتى تعافيت و بقيت عند عمي قريت الخياطة و راني نخدم مند عامين في دار عمي و الحمد لله دارلي ربي القسم في بيت عمي اكثر من والدي
في اخير انا مأمنة بلي الله يمهل و لا يهمل سياتي الفرج ادعولي
السلام عليكم اختي
صراحة نقرا فالقصة تاعك ويديا يرجفوا وحدهم حسيت روحي في بللاصتك
اختي ياخي نقولوا لي خلق مايضيع امالا ديري في بالك ربي مايخليش العبد تاعو يعاني ودوام الحال من المحال
ربي يفرج علييك همك ويبعتلك وليد لحلال لي يسترك ويصونك
وبالنسبة لعمك حسبي الله ونعم الوكيل فيه
اختي ربي يعطيك ماتتمناي وكثري من الاستغفار تسهل امورك
دمتي في رعاية الله وحفظه
في هكذا مشااكل يقول الواحد يلعن هذي الحياة الحيوانية اللي رانا عايشينهاا
الله غالب هذا كلو من غياب الشرع نتاع ربي اللي لوكان جا كاينشرع لوكان رجعتلك حقوقك
ربي يكون معااك وان شااء الله تلقاي ابن الحلاال اللي يرفدك من هذا الهم اللي راكي فيه
مالقيت ما نقول غير ان شااء الله كيما ذاقت بيك يفرجها عليك ربي....
والله قطعتيلي لحمة من قلبي .... سبحآن الله هآدي مرت بآبآك مَ تحسش ؟ مَ تفكرتش ولآدهآ كي قآستك للمجهول بكل برودة ؟؟ لا حول ولا قوة إلآ بالله...... وآش نقولك يآختي ربي يفرج عليك و يعوضك في كل حآجة قآستك و أي حآجة في خآطرك أحكيلنآ و فآجي على روحك و الله تكتبي ب'عشرين صفحة مَ نملوش منك ... دمتي في رعآية الله .
السلام عليكم قصتك صح مأثرة فيها اكثر من مشكل مي رايحة نحكي من اللخر مش رايحة نطرق لواه عاودتي حكيتي يعني مع التالي قلتي راكي درتي دبلوم خياطة و راكي في دار عمك مليحة اللي فات عليك حاجة منقدرش نقلك انسايها و لا تناسايهاا يعني ربي يكون معاك و يعوضك بالفرحة الدنياا هاذي مرات تكون قاسية عليناا بالناس المقربين مناا مي تاني معندنا منديرو بالنسبة لباباك صدقييني مهما كان قاسي معاك متقسيش قلبك عليه نتياا حاولي في اي مناسبة تتقربي منوو متقوليليش خلاني و لا مقامش بياا يبقاا بوك يبقا هو اللي جابك لهاذ الدنياا باقي الناس اللي كانوو في حياتك و دمروو جزء منهاا سامحيهم و انساي باه نتياا تريحي الله غالب الظروف لي مريتي بيهاا ان شاء الله تزيد تقويك تزيد تخليك تكوني مؤمنة أكثر بأنو الدنياا هاذي مش دايمة و كلنا راناا ضياف فيها ربي سبحانو حنين كريم خليك قريبة منوو و انساي الناس الله يفرحك الله يهنيك الله يسامح كل شخص كان سبب في دمعتك و يهديه خليها على الله
عجزت وش نقول!
اكتشفت اني كي نشكي من حياتي نكون اسخف مخلوقةة
بالرغم مريت بفترات وجربت ف عمر صغير !
مي هادي كي زدتي ومكنتيش بماماك قيمة الأم بانت هكا ♥
الله يرحم لي ماتو ويغفر لي اذنبوا ونتي سامحي باه تربحي !
الله يفرحك ويحفظك .. الله إذا أحب عبدا ابتلاه ♥
هدي لي ديما نقول فيها لروحي ف أي ساعة لي تمر عليا صعيبة
الله يفرج عليك ~
عمبالك و الله دموع ينزلو من عيني و مش حاسة كي قاعدة نقرا الناس راها تشكي من حياتها اتفه الاسباب و انتي معاناتك لا توصف وش جاب لجاب في موضوعك هذا اكيد بزاف ناس عرفو قيمة الام الي بعض كاين يكرهوها وش نقولك اختي الغالية سامحي كل الي غلطو بحقك و حاولي ديما تفتحي صفحة جديدة و حاولي ثاني تنساي الي فات عليك مننصحكش تدعي عمك بشر لانو دمرلك حياتك ننصحك تدعيلو بالهداية ربي يهديه ان شاء الله و يجي يطلب السماح و ما باباك ايضا سامحيه و حاولي يما تتقربي منو مهما قابلك و مهما دارلك يبقى باباك الي سناك 9 اشهر بش تجي للدنيا سيفري بعد ماسناك اهملك مي متخميش خيتي اكيد من ورا الامك حكمة كبيرة و عبرة اكبر لهذا خلي يدك ديما متمسكة بحبل ربي اذا ضاقت بيك اتواي اقراي شوية قران صلي و استغفري و دك تتحسني اكيد و الاهم حاولي تعتمدي على روحك ديما اخدمي و حاولي توفري سكن تسكني فيه و متنسايش الالحاح بالدعاء فالله يحب العبد اللحوح و في الاخير ربي يفرج عليك و ربي يبعثلك ابن الحلال عحساب نيتك ~امين
لا ادري ماذا اقول .......... اختي ربي كبير ......حطي في بالك راه ما فيه غير الخير ... زيدي قربي منه استغفريه ادعيه ... راه قادر على كل شيء ...... واش راكي حابة اطلبيه منه و كوني واثقة فيه .... اختي و الله ماني لاقية كلام نقولهولك ..... ربي كتبلك انك تفوتي هذا البلاء ... و ربي لما يحب عبد يبليه ... تعرفين قصة سيدنا ايوب ........ زيدي صبري و زيدي اصبري و بربي ان شاء الله راه قريب يفرج عليك ربي ... و تجي عندنا فرحانة و تفرحينا معاك .... ربي يعينك و يرزقك الزوج الصالح لي ينسيك واش فوتي ... و ربي يبعد عليك ولاد الحرام و يسترك في الدنيا و الاخرة .................
"] ، يا أختي لن يبقى في الدنيا ، لا من عاش ذليل ولا زيز ولاغني ولا فقير ، لكن الذي يصبر ويحتسب الأجر هو الفائز في الآخرة ، الدنيا دار الزوال ،والله أنا أيضا أمر هذه الأيام بفترات عصيبة لكن عندما أتفكر بأن الدنيا فانية لا يبقا لا ظالم ولا مظلوم ، أفرح وأستبشر وأحتسب الاأر من عند الله والحمد لله رب العالمين/
السلام عليكم ورحمة الله وبركاته وبعد:اختي الكريمة عندي ما أقوله لكي ليس حل لمشكلة بل هو شد للعضد فأقول ومن الله التوفيق:قد صح عن نبينا عليه صلى الله وسلم أنه قال(إذا أحب الله عبدا ابتلاه)فأشد البلاء هم الانبياء ثم الصالحين ثم الذين يلونهم فانت اليوم منهم حسبانك والله حسيبك ولا نزكي على الله أحدا
قد تيتمتي يوم ولادتكي وتشردتي يوم أختار والدكي وزجة له بدلا من أن يختار أما كافلة لكي
حتى رمتكي الضروف إلى أفواه الحتوف فكانت جريمة عمكي لاكفارة لها إلا بهدر دمه لما انتهك من عرضه واحمدي الله الذي لم يخلق في أحشاءكي ولد قد لا نجد له نسب ولا يشفع له سبب وقد كادت لكي زوج والدكي ومكرت ومكر الله والله خير الماكرين إذ قدر لكي الزواج بسكير وقد تلقيت منه أذا كبير وقد لقي حتفه وأنتي على ذمته
فلله الحمد والمنة اقول:عند مجتمعنا الذي لا يرحم ...يقولون عنكي أرملة خير لكي من أن يٌقال عنكي مطلقة ومطلقة في عين المجتمع أفضل بكثير ممن غٌدر بشرفها
أختنا الكريمة على حسب ما قلته لنا فأنت أشرف من الشرف ذاته
أما والدكي وما فعله بكي فقد يجني ثماره يوما من ابنه الذي هو من صلبه
والايام بين الناس دول وعلى الله التوكل وامضي في طاعته فإليه الموعد وله المشتكى
السّلام عليكم
لا حول ولا قوّة إلاّ بالله
والله العظيم وليت نحير إذا راني نقرا في قصة صح وإلاّ مسلسل
لدرجة ولينا عايشين في غابة, اصلا حاشا الغابة
لما نشوف أُنثى أسد تربي غزال ونشوف أب عندو قلب لحمة ويدير هكا
يسما نروحو للغابة خير, لربما الرحمة نلقاوها في حيوانات مفترسة خير
لا حول ولا قوة إلا بالله
بصراحة ختي كن نقولك صعيب لي فوتيه وراكي تعذبتي وراكي غضتيني
نكون قاعدة نعاود في نفس كلام باقي الأعضاء وراهم وقفو معاك ما شاء الله
وتاني قصتك تقطع القلب بلا مانعبرو ولا نحكيو , أنا من قبلي وأنا نروح ونرجع على حكايتك ومالقيتش باه نرد
لدرجة أثرتي فيا
بصح عجبتيني لما قلتي أنك تعلمتي الخياطة , خاطر لازم توقفي على رجليك
علابالي جوزتي شي صعيب بزاف بصح لازم ترميه وراك
درك شوفي للمستقبل تاعك , يجي يوم تنزل فيه أمطار غزيرة ويبقى الجو مسحب
بصح هكاك تطلع الشمس مرة أخرى , هكاك نتي هادي سحابة وفاتت بالرغم من أنو هادي راهي اكبر من سحابة
بصح رايح يجي نهار تنساي فيه كل واش فات عليك ان شاء الله وبإذن ربي سبحانو
وهادا راهو ابتلاء من عند ربي باه يشوف اذا تجهلي وإلا تحمديه ونتي الحمد لله بالرغم من الشي لي فات عليك
هكاك وراكي حاكمة في ربي
وربي حبك ختي لعزيزة وعمرو ما رضالك الشر , ورايح يجيك الفرج يوما ما
كمالا اوقفي على رجليك وابداي حياة جديدة و ما تنسايش ربي سبحانو
غير ربي سبحانو ماتبعديش عليه هو لي ينورلك طريقك
السلام عليكم ورحمة الله تعالى وبركاته
أختي الكريمة مهما تكلمنا لمواساتها فهذا قليل في حقك
فانت تستحق الاحترام والتقدير أكثر من اي شخص
وما علينا الا الدعاء لك كثيرا
لعيك بالصبر أختي سوف يأتي الفرج
وهذا ما هو الا بلاء من الله ليختبرك
وعسى ان تكرهوا شيئا وهو خير لكم
كان الله في عونك
تحياتي أختي
