- إنضم
- 13 أفريل 2013
- المشاركات
- 14,618
- نقاط التفاعل
- 54,537
- النقاط
- 1,756
- العمر
- 31
- محل الإقامة
- قسنطينة
- الجنس
- أنثى
السّلام عليكم يا ناس لمتي الغاليين
ان شاء الله راكم لاباس؟
اشتقتلكم بزااف واشتقت لهاد القسم وللمواضيع لي فيه
ولربما دايما ندخل لهاد القسم باه نمنشر :d لكن اليوم رايحة ندخل بحلة جديدة
لأنو الموضوع هاد المرة من العنوان واضح بلي فيه اعجاب ورسالة شكر
المهم ندخلو في الموضوع مباشرة ومانطولش عليكم
البارح وفي مدينتي " مدينة قسنطينة " نزلت أمطار قوية جدّاً , لدرجة كي تشوفها تقول
شلال ماشي أمطار سبحان الله , ولدرجة كانت قوية تسببت في موت 3 أشخاص حسب واش ذكرو في الأخبار, يعني سبحان الله أمطار غزيرة جرفت معاها حتى السيارات والناس
و هادا في بعض المناطق لي قريبة للجبال يعني المناطق القروية لي تتعرض لإنجراف التربة , وكن ماجاتش مدينتي فيها جسور وعالية كن البارح تعرضنا لفيضان كيما تاع باب الواد لا سمح الله, الحمد لله كي عدات سلامات وربي يرحم كل نفس جرفتها هاد الأمطار
المهم الحاجة لي لفتتلي نظري وجيت نحكي عليها اليوم هي صرات وسط هاد الكارثة تاع البارح, تبعوني نقولكم
البارح لعشية وفي وسط هاديك الأمطار القوية كنا راجعين للدار بحكم أني كنت غايبة هاد الايام على الدار , وكنا مضطرين في رجوعنا باه نعديو على منطقة كأنها قرية صغيرة , و هاد المنطقة من المناطق لي تضررو البارحة وكان فيها انجرافات كبيرة , و حنا كنا نمشيو بحذر
تحت هاداك الجو العاصف خاطر قوات الأمطار ودار الضباب, وحنا ماشيين حتى نلقاو فجأة قدامنا الطريق مغلوقة ببركة كبيرة تاع ماء, وأي سيارة تدخل تغرق تما ومستحيل تخرج ,
مالقينا مانديرو ولينا رجعنا للوراء وقلنا نحبسو تحت شجرة حتى تحبس شوي الأمطار
خاطر زاد نزل الحجر مع الأمطار , وبعد ما نقصت شوي قوة الأمطار رجعنا على ورانا باه نبدلو الطريق , لأنو الجهة لي رايحين منها مغلوقة كيما سبق وقلت
بصح وحنا راجعين على ورانا حتى نلقاو الطريق لي جينا عليها زادت تقفلت بسبب انجراف التربة ودارت بركة كبيرة من المياه وفيها الحجر, حنا قلنا خلاص درك نقعدو في الطريق
و نتضررو من الأمطار القوية لي نزلت , بصح حتى نلقاو مجموعة من الشباب ربي يحفظهم وربي يبعد عليهم السوء , واقفين في نص هاديك البركة ويساعدو في السيارات باه يعديو ,
صدقوني لما شفتهم حسيت بفخر واعتزاز بولاد بلادي
اتخيلو في وسط الماء والأمطار القاوية هاديك طايحة عليهم وهوما يجمعو في الحجر والأغصان تاع الشجر ويبعدو في التراب من الأرض ويساعدو فينا باه نعديو
بقيت نشوف معاهم لقيت لبستهم عادية خلاص وحتى الصبابط حاشاكم ماشي لابسين وحايد يحميوهم من المطر, والبلاصة لي واقفين فيها معرضة للانجراف والمياه تجري فيها بقوة ,يعني معرضين رواحهم للخطر على جالتنا
ولوكان تقرب ليهم تلقاهم لربما ماراهم قاريين لا والو وعايشين في قرية صغيرة, بصح المبادرة لي داروها تحسهم خير عليك بألف مرة وقيمتهم عالية, لربما واحد عندو شهادات عُليا ما يديرش هاد المباردة
يعني ماشاء الله ولاد بلادي ونفتخر بيهم, وكن ماش هوما كن رانا بالاك داتنا الأمطار ورحنا فيها , خاطر الجو تاع البارح تاع فيضان
هاد الموضوع ماراهوش موضوع تاع نقاش , لكن لما شفت هاد الشباب قلت يستحقو ندير عليهم موضوع وأكثر من موضوع لأنهم فرحوني بزااااف , لربما في المجتمع كاين شباب فاسدين بصح دايما نقولو كاين نص كاس مملوء ونص كاس فارغ, وان شاء الله يسبق المملوء الفارغ
وربي يحفظ ولاد بلادنا ويهنيهم كامل ويرزقهم الثبات والهنا
تقبلو مروري وربي يحفظكم كامل
وماتبخلوش عليا بردودكم القيّمة
تحياتي للجميع
