بنت طاطا رونق

[أشــواق 19]

السلام عليكم ورحمة الله وبركاته

وش حوالكم ناس اللمة وناس منتدى وش راك تهدر ! هذا أول موضوع ليا هنا وان شاء الله ميكونش آ خر موضوع.

مجتمعنا مسكين ولا غارق ف الظواهر لي مزال ملقاولهاش حل بصح الظاهرة لي عندي مدة وأنا نشوف فيها هبلتني صح حبيتوا تعرفو وش هي تبعوا معايا :-o

لحكاية ..هادي جارتنا علابالي متعرفوهاش وكون تعرفوها مخكم يحبس أيا وحد نهار تلاقيتها في لبيس قلتلها وش راكي و وشراهي طاطا ربيعة ولي هي ماماها وهنا طفلة تحولت من الطفلة العاقلة الى الكائن المخيف هيييه كائن مخيف شافت فيا بوحد النظرة يومين بعدها مرقدتش وقاتلي شكوووون ربيعة هاذي :s !!

وقاتلي في ودني قولي طاطا رونق ماتقوليش طاطا ربيعة قدام ناس نحشم واون بليس اسم ربيعة يبهدل ! اوه ماي قود وات ايز ذيس ! طفلة هاذي راهي مليحة في راسها !!!!

تحشم باسم ماماها علاجال الناس !! وماشي غير هكدا ياو جامي لبست مونطو ف الشتا في لبرد هذ اك تلبس دي غوب تاع صيف وكي نسقسيها تقولي نحشم بحوايج شتا يبهدلو ومش انيقين و حوايج الصيف كي نلبسهم يقولولي راكي انيقة...ورجعنا من جديد لارضاء الناس..

والطفلة هادي كانو يسكنو في منطقة ريفية اووو ودوكا كون تسمع كلمة لبلاصة لي كانو يسكنو فيها تقتل لعباد نورمال تقولي يضحكو عليا كون يعرفو بلي كنت نسكن ف دواار ! كل يوم تحفظ كلمة جديدة ف لفرونسي وتحكي بيها وتقول اووه وش نكره لي يهدر بلعربية في فيسبوك نحسهم متخلفين لازم نهدرو بلغة التطور، حتى هدرتها وتتصنع فيها !!! وليت نحس بلي لهوا لي تتنفسو ولازم يكون هوا سبيسيال باش يرضاو عليها الناس و...

يعني تتصنع في كلش حياتها مبنية على ارضاء الناس ونفسها مش مرضيتها ..

ربي يهدي ماخلق !
اسمحولي طولت عليكم

تقبلو تحياتي القلبية​

:regards01:

 

[لؤلؤة قسنطينة]

رد: بنت طاطا رونق

السّلام عليكم ^^
أهلا بأختي الغالية , ومنورة قسم واش راك تهدر وأصلا القسم هادا راهو كي المخدرات تفوتي تكتبي موضوع حتى تلصقي هنا ههههه

المهم ضحكتيني كي قاعدة تحكي على هاد الإنسانة, خاطر هاد الناس مراض نفسيا وماعندهمش الثقة بالنفس
ماش معناها حنا كاملين, حتى انا ساعات نمر بظروف تخليني نحتقر نفسي, خاصة لما نشوف بنات اليوم كيفاه يمشيو و ألوان قوس قزح خارجة منهم سواءاً من اللبسة أو التجميل , نولي نقول انا راني ماشي أنثى خلاص بالنسبة ليهم
ومن بعد نستغفر ونقول ربي خلقني في أحسن صورة وهاد المساحيق واللباس يضيف درجة برك للجمال ماشي يخليك جميلة, يعني بيني وبين نفسي بعد نقتنع, والحمد لله أنا من النوع لي نمشي بقش قديم عادي خلااااص حتى ولو من العصور الحجرية, المهم يكون مستور وخلاص هادا من جهة
ومن جهة اخرى نوليو لهاد البنت المسكينة لي مريضة بالناس ولسانهم وماعلابالهاش بلي هدرة الناس ماتخلصش ولو توضعي نفسك في العسل , واصلا إذا اسم ماما ربيعة واش فيها؟؟ نحشم بماما ؟؟ ولا الإسم ولا هو المعيار لثقافة وتربية وأخلاق الإنسان , ولا لازم يكون إسمي ميليسا باه نبان متطورة , والله تمسخير
واصلا واش فيها كي نسكن في دوار ؟؟ عيب ؟؟ درت الحرام؟؟ وناس الدوار ماش عباد؟؟ أصلا واش دارو فيها ناس المدينة؟
راهم غير مع دعاوي الشر يا لطيف
كانت عندي صديقة مقربة بزاااااف راهي تزوجت ربي يهنيها كانت عايشة في الدوار بصح والله نعم البنت, سواءاً في الأخلاق ولا الحشمة ولا التربية ولا كل شي , نعيش حياتي كاملة معاها ومانكرهش
وواش حكاية لبست الصيف والشتا هادي ؟؟ اواه الطفلة هادي مرفوع عليها القلم نهائيا ههههه
ومريضة بهدرة الناس بزاااااف , هادي مالا كن يقولولها ارمي روحك ترمي روحها على جال الناس؟؟

لازم الإنسان تكون عندو ثقة بنفسو لربما يمر بظروف صعبة تخليه يضعف بصح من بعد يرجع وحدو للصح
هدرة الناس مارايحة توكلني ولا تشربني, راني نشوف في بنات درك راهم يصبغو شعرهم وردي وزرق ويلبسو القش المقطع ( زعما لامود ) وماسمعوش بالناس وكملو في هبالهم وانا لي نمشي مستورة وقانعة بنفسي نتوسوس؟؟

ربي يهديها هادا ما نقولو
وشكرا على موضوعك حبيبتي نورتي هاد القسم وان شاء الله نشوفوك مرة اخرى هنا
تقبلي مروري​

 

[FØùfà Bïô]

رد: بنت طاطا رونق

آهلآ بيك ^^


معرفت لآ نضحك لآ نبكي !


كيمآ يقولوآ "هم يبكي وهم يضحك "


والله النآس هآذي نشوف فيهم يآآسسر .. سيرتو تآع القش ،، في الشتآء تلقيهم بآش يجمدوآ و هم بقش الصيف علآبآلهم رآهم النآس يشوفو فيهم خآطر عآجبينهم وهو العكس .. آنآ كي نشوف وحده تشفني نقول مسكينه معندهآش وآش تلبس -_-'


الفئه هآذي يدعولهآ ربي يشفيهآ .. + حرآم عليهآ على آمهآ و عيب تستعر بيهآ ! وش رآح تستفآد من كلآم النآس


مي مزآل مجتهاش الضربه يلي توقضهآ هههههههه


ربي يهديهآ آن شآء الله ^^​

 

[همس الوُرود]

رد: بنت طاطا رونق

السلآم عليكم ~

يآ أختي والله قريب خبطت لآسوري في جآلتهآ هآدي الطفلة كي رآني نقرآ فهذآ الموضوع

الله يسترك أختي والله قلبي يغلي وحآبة نتقآبض معآهآ جيبيهآلي ..

نبدآ من آخر حآجة ~

وش هآدي تحشم بلعربية ~ يآخي كآفية مندوبة يآخي نخبطهآ نجيبهآ فالموزمبيق تحكي مليح الفرونسي وجه البوقوقو هآدي

تروح لفرنسآ تبيعلهآ مآتحشمش تحكي هكآ على لغتنآ؟؟ لغتنآ الي نزل بهآ القرآن أصعب لغة ...

إيهييييييييييييييييييييييييييييه قوليلهآ تجي تتقن العربية وتجي تحكي بيهآ عرفت ألف بآء قآلتلك العربية يآخي جآهلة يآخي

العلم مش فاللغة يآ ................................أففف مآعليش

نزيدوا الدوزيآم ~ تلبس لبسة صيفية فالشتآ كآين بزآف هكآ نعرف وحدة تلبس الميني فالمطر يآو مرة سقسيتهآ قآلتلي نتعذب على روحي المهم نبآن فور

قريب خبطتهآ قلتلهآ المهم يشوفو معآك الرجآل يآ عآرضة الأزيآء ~ خخخ قلتهآلهآ في قلبي هآدي ~ ..

زيد الأولى ~ قآلتلك تحشم بإسم مآمآهآ.... يآبنتي قوليلهآ تروح تخطينآ برك تخلي أفكآرهآ الوسخة ليهآ وحدهآ

.. أسمحولي بزآااااااااااااااااااف على هآدو الألفآظ معلآبآليش مين قريت كيفآش تخمم هآديك الطفلة تقلقت~

سلآمي أختي أشوآق وغير خطيك من هآدي الطفلة


سلآم..​

 

[soro siri]

رد: بنت طاطا رونق

انا في رأي هذي البنت عايشة على جال الناس تحب المظاهر. هذي لي قالك كول واش يعجبك والبس واش يعجب الناس ربي يهدي واش خلق ويرجعها للصواب

 

[نجيب]

رد: بنت طاطا رونق

أنا راني نشوف هد البنت لي راكي تحكي عليها كاش نهار نلقاها في قسم مشكلتي

بعنوان دمر حياتي و هرب .

كاين بزاااف من هد لبنات و مام الشباب غير هوما بصح و الله ما يطولوا حتى يغرقوا

و هد البنت لي راكي تحكي عليها درك يجي نهار و تسمعي عليها.


شكرا على الموضوع​

 

[الزهرة الحمراء]

رد: بنت طاطا رونق

السلام عليكم اختي
يعطيك الصحة على الموضوع الباهي تاعك والله قتلتيني ضحك
وراني قاعدة نتخيل فالطفلة هادي قدامي وقاعدة تحكي معايا هكا لوكان راني كاش مادرت فيها راني نقرا برك ورجعتني نغلي فمابالك لوكان جات قدامي نخلطها في بعضاها (راني عاقلة تعودوا تقولوا هادي قبيحة )
المهم قولها يعطيك النوى يابهلولة لي ينكر اصلو ماعندو اصل
وزيد حابة تهدر لفغونسي اه قصدي لفرونسي باه تبان متحضرة قولها اكبري في مخك وفي ثقافتك ومن بعدة احكي على التحضر
انا صراحة يعيوني ناس كيما هادو وزيد واش فيها واحد ولا وحدة يسكنوا فالدوار علاه ماهمش عباد لوكان جات تعرف جماعة الدوار لي تسميهم هكا هوما لي داروا الثورة وجابولنا الاستقلال وخلاو عباد كيفها يعيشوا ويخموا التخمام تاعها لازم تسمعيها لغناية تع ولد الدوار وماننسا وين تربيت نسييت شكون يغنيها :d
وزيد صح صح حبستلي مخي كي قاتلك مانلبس حوايج الشتاء قولها يعني حبيتي طيحي خشينة وانت والو كاش وحدة تلبس لي غوب تع الصيف فالشتاء انا بدات تبانلي صح صح الطفلة هادي مريضة ولا مهبولة ربي يهديها ويصلح حوالها
اختي حنا نقولوا ربي يهدي ماخلق كاين شي بنات تعياي تفهمي منين يخموا
يعطيك الصحة على الموضوع الباهي تاعك
دمتي غاليتي في رعاية الله وحفظه ​

 

[عبير الجنان]

رد: بنت طاطا رونق

يا مخلوووووووووووووووووووووق راسي حبس

 

[Salam Fleur]

رد: بنت طاطا رونق

هههههههههه ............. ما قدرتش نحكم روحي .............. هاذي لازمني نفورماطيها ... باه تعاود تمشي مليح .................. بصح للاسف كاين ناس بزااف كيفها حتى رجال ماتقوليش غير بنات ........... سبحان الله .. يا بنتي ارضاء الناس غاية لا تدرك .......... وديري واش ديري و الله في الاخير تقعدي وحدك مقابلة حيط .... اما حكاية اسم ماماها ... هاذي قالتلهم رقدوا ..... ربيعة راه مليح مالا لو جا الطاووس لو شارتك من الطاقة تاع الbus ......هههههههه ............ ربي يهدي ما خلق ........ صح مخلوقات غريبة ..........​

 

[السلطانة]

رد: بنت طاطا رونق

وعليكم السلام

هاذي الطفلة موسوسة على روحها

علاه حتى تحشم باسم أمها !!
وباللبسة
وبالدوار

المشكل عمرو ماكان قضية ولد مدينة وولد دوار المشكل في العقلية والأخلاق

هادي لقات الرّخف من عايلتها حلولها عينيها حتى ولات تشوف في روحها حاجة

كون جات بنتي نكسلها بطريحة نرجعها للطريق

بارك الله فيك

 

[FATIMA 19]

رد: بنت طاطا رونق

ههههههه
عرفتها رميسة
نقراو في نفس لفاك وهذي الهدرة كل يوم نسمعها
ومزلتي مشفتيش في فايس وش دايرة
اذا عاد اسمك اون اراب راهي متاكسبتيكش ولا تكوني دايرة فوطو دو بروفيل مش من مقامهاا
لمهم مريضة تاع صح
صحيتي شوشووو

 

[Hakan]

رد: بنت طاطا رونق

يااختي يجي نهار هذ الطفلة نهار تشوفها البنت نتاعها تبدل الطريق ويجي نهار وين
يشوفو فيها الناس ويلعنو الفيgورة نتاعهاا شكرا على الموضوع ونضن العلااج نتاعو في بتاء الشخصية
النبي عليه الصلاة والسلام يقول /< لا يدخل الجنة من كان في قلبه مثقال ذرة من كبر > وقال احد المفكرين
عجبت لامر فقير متكبر ربي يهدينا شكرا ختي اشوااق عاشقة الملكي​

 

[ام أمينة]

رد: بنت طاطا رونق

لا تعليق....!!!
مشكورة على الموضوع
تحياتي
​

 

[وليد يحيى]

رد: بنت طاطا رونق

شحال في عمرها المصيبة هاد ي

 

[stelllo]

رد: بنت طاطا رونق

موضوعك روووووعه نستانو جديدك
اسلوبك حلو وشيق
استمتعت

 

[أشــواق 19]

رد: بنت طاطا رونق

اووو أسفـــة لم أرد على ردودكم
كانـتــ عندي مشاغيل
شكراا على مروركم ورودوكم الرائعة
نورتوو
لي عودة ​