صاحبة مشكل ’الطاغي يريدني في الحرام و يهددني بابنتي ‏

[مشكلتي]

سلام الله عليكم

انا ام رزان الي حطيت موضوعي سابقا نتمنى تكونوا تفكرتوني
حبيت نقولكم سامحوني طال غيابي و مخبرتكمش على حالي راني الحمدلله
صرا جديد في حياتي بعد ما اتجهت لاختي توتة ربي يفضلها و قامت بيا ربي يحفضها هي و الوالد تعها ربي يبارك فيه و دلوني على ناس طيبين امثالهم و امثالكم و الحمدلله راني في عنابة عند عمي صالح هو انسان كبير حاج مع زوجتوا قايمين بيا انا و بنتي و شكاو معايا بالراجل اب بنتي و رانا مع المحكمة باذن الله قريب نجيب حقي منوا
حبيت نشكركم فرد فرد على وقوفكم معي و نشكر الاخت دلال ثاني الي فهمتني في الامور تع الشكوى ربي يجازيكم ثاني
راني في بيت عمي صالح راح نسجل في التكوين المهني كشما نتعلم حرفة و كاين انسان مؤمن من الناس الي بعثتني ليهم اختي توتة عطاني شقة في ميلة و انا منعلافش ناسها و ناوية نبيعها و نشري هنا في عنابة لهذا جيت نشاوركم وش تقولوا في هذا؟؟؟
انا خايفة شوي من اب بنتي و من والديا الي كانوا مربييني كشما يصرى في الحكم و يوليو يهددوني و في نفس الوقت ميلة منعرفش فيها اي حد وش تقولوا؟؟؟
اما على عمي صالح هذا الانسان الرائع الي راني عندوا قالي بيعيها و ارواحي نشريلك هنا هذا داروا باه نكون قريبة منو و من زوجتوا والله حسب وقفاتهم معي شايفة فيهم اناس طيبين
نتمنى تنصحوني وش نعمل؟؟
ربي يفرحكم و يرزقك كل مهموم و والله ربي مافيه غير الخير الحمدلله بكرة و اصيلة
شكرااااا للجميع والله ربي يبارك فيكم

 

[راضية حامدة]

رد: صاحبة مشكل ’الطاغي يريدني في الحرام و يهددني بابنتي ‏

تم الاعتماد
الحمد لله
مازال الخير في هاذي الدنيا
و انت كوني امراة و قابلي خيرهم بالخير ايضا
و الله ما عرفت واش ننصحك
نخلي المجال للاخوة الاعضاء يدبرو عليك

 

[لؤلؤة قسنطينة]

رد: صاحبة مشكل ’الطاغي يريدني في الحرام و يهددني بابنتي ‏

و عليكم السّلام أهلا بأختي ^^
أكيد مازلنا نتفكروك ومازال بالنا معاك في كل دقيقة
والحمد لله لما نشوف آخر أخبارك وبلي راكي بخير خير من الدنيا وما فيها
ربي يهنيك ختي ويبعتلك نفس مومنة لي تسترك كيما ستروك هاد الناس الطيبين
اجرهم عند ربي سبحانو ان شاء الله
اما فيما يخص موضوعك انا نظن ومن رايي وحسب واش قلتي على هادو الناس
نظن بيعي دارك لي في ميلة واشري قدام هاد الناس خير
صح ربي يحميك من فوق وتلقاي الناس هادو في جنبك من بعد ربي سبحانو
خاطر نتي مرأة ووحدك وفي ولاية غير ولايتك والناس ماترحمش
على هادي نفضل تشري قريبة من هاد الناس إذا كانو صح كيما راكي تهدري عليهم

هادا من رايي, بصح نفضل تزيدي تسمعي للإخوة خير هوما عندهم افكار أفضل بإذن الله
وربي يفرحك حبيبتي دنيا وآخرة
وإذا كاشما تحتاجي حنا رانا موجودين ورانا هنا باه ننصحوك بالشي لي نقدرو عليه
ربي معاك غاليتي, وطمنينا على حالتك عن قريب
ورب يفرج ان شاء الله
تقبلي مروري​

 

[Malware Analyzer]

رد: صاحبة مشكل ’الطاغي يريدني في الحرام و يهددني بابنتي ‏

الامام الشافعي رحمة الله عليه
ارْحَلْ بِنَفْسِكَ مِنْ أَرْضٍ تُضَامُ بِهَا

فتغيير البيئة كفيل بأن ينسيك همومك الماضية وتبدأين صفحة جديدة مع اناس جدد وبيئة جديد وحياة جديدة
والله اعلم
وفي الاخير الامر بيدك والله على كل شيء قدير توكلي عليه وربي يفرج عليك

ارْحَلْ بِنَفْسِكَ مِنْ أَرْضٍ تُضَامُ بِهَا وَلاَ تَكُنْ مِنْ فِرَاقِ الأَهْلِ فِي حُرَقِ
فالعنبرُ الخامُ روثٌ في مواطنهِ وَفِي التَّغَرُّبِ مَحْمُولٌ عَلَى الْعُنُقِ
والكحلُ نوعٌ منَ الأحجارِ تنظرهُ فِي أرضِهِ وَهْوَ مَرْمِيٌّ عَلَى الطُّرُقِ
لمَّا تغرَّبَ حازَ الفضلَ أجمعهُ فَصَارَ يُحْمَلُ بَيْنَ الْجَفْنِ وَالْحَدَقِ

 

[الزهرة الحمراء]

رد: صاحبة مشكل ’الطاغي يريدني في الحرام و يهددني بابنتي ‏

السلام عليكم اختي
مزية طمنتينا علييك والحمد لله راكي بخير انت وبنتك
وبالنسبة لموضوعك اختي مادامك انت مرا وحدك انت وبنتك ننصحك تبيعي دارك لي في ميلة وتشري دار قدام الناس هادو لي راهم قايمين بيك هكا كاش ماتسحقي تلقايهم قراب ليك
ورانا ديما هنا اختي نعاونوك يالوكان بالدعاء
ربي يهنيك ويفرحك اختي
دمتي في رعاية الله وحفظه ​

 

[الباندي]

رد: صاحبة مشكل ’الطاغي يريدني في الحرام و يهددني بابنتي ‏

اقعدي وين راكي و خليك غير معروفة حتى بشوية بشوية تولي تعرفي ناس ..
المهم دروك تجيبي حقك هذا هو الصح و هذا الناس اللي وقفو معاك ربي يجازيهم
اوقفي مليح و رتبي روحك و كملي حياتك بشكل عادي عيشي لبنتك و كبرها و ربيها قدام عيننك ..
هذا واش نقولك اختي و اللي تبالك ديرها المهم تبعدي البلاصة اللي كنتي فيها
ربي يوفقك و خبر كما هذا يفرح و يشرح الصدر سيرتو كي ربي يفرج على المغبنة

 

[ام أمينة]

رد: صاحبة مشكل ’الطاغي يريدني في الحرام و يهددني بابنتي ‏

ربي ما فيه غير الخير
​

 

[همس الوُرود]

رد: صاحبة مشكل ’الطاغي يريدني في الحرام و يهددني بابنتي ‏

السلآم عليكم~ ربي يكون في عونك أختي الغآلية ..

ربي يسترك ويحميك

أنآ مآعليآ غير الدعآء..وربي يرزقك جيرآن ملآح يتهلآو فيك ..

تحيآتي​

 

[bilel milano]

رد: صاحبة مشكل ’الطاغي يريدني في الحرام و يهددني بابنتي ‏

وعليكم السلام و رحمة الله تعالى و بركاته
اختي راق لي تفائلك كلمات تدل على انك متفائلة لابعد الحدود ما شاء الله و ربي يدومها
وان شاء الله دوم الاوقات السعيدة
انتي قلتي عمي صالح ناس ملاح و مرحب بيك
ماكش راح تلقي خير من هك والاهم كاين لي يحميك تم
في الاخير القرار راجع ليك
ديري لحاجة لي ترتاحي ليها
وادا مكتوب من عند الله
ضرك خمي في مستقبل بنتك
وانسي الماضي
موفقة ان شاء اختي
في انتظار اخبار اسعد​

 

[stelllo]

رد: صاحبة مشكل ’الطاغي يريدني في الحرام و يهددني بابنتي ‏

الحمدلله ع هذه النعمة
والدنيا مازال راهي بخير
ربي يوفقك

 

[زيزي احمد]

رد: صاحبة مشكل ’الطاغي يريدني في الحرام و يهددني بابنتي ‏

الحمد لله على ما أنت عليه
استخيري الله في قضاء حوائجك و شاوري عمي صالح و توكلي على الله و استعيني به فهو خير المستعان
ربي يوفقك و ينور دربك و يحميلك بنتك و يرزقك زوجا صالحا يعينك على تربيتها آمين

 

[أم أُنٌَيسة]

رد: صاحبة مشكل ’الطاغي يريدني في الحرام و يهددني بابنتي ‏

السلام عليكم و رحمة الله تعالى و بركاته
الحمد لله أنكي طمأنتنا عليكي أختي الكريمة
بارك الله في كل من ساعدكي و سندعو لكي بأن يوفقكي الرحمن في محاكمتكي و الله يمهل و لا يهمل يا غالية
و بخصوص البيت صلي صلاة استخارة أفضل غاليتي و إن شاء الله سيهديكي للطريق الصائبة
بالتوفيق غاليتي
تحياتي احترامي و تقديري​