واش درت بقرايتك ؟؟؟

م

مسك وعنبر

:: عضو مُشارك ::
إنضم
29 جويلية 2015
المشاركات
231
نقاط التفاعل
627
النقاط
21
السلام عليكم ورحمة الله واش راكم يا ناس اللمة إن شاء الله بخير ولاباس:) حبيت نبدا الموضوع هادا بعبارة نسمعوها ديما في مجتمعنا الجزائري وين ما رحنا وهي واش درت بقرايتك ؟؟ :sيعني نصيبو ناس عندهم مستوى ثقافي وفكري ما شاء الله تقدر تناقش أي موضوع معاهم بكل سلاسة ومرونة :up:بالصح حالتهم المادية ليست بالجيدة كي الواحد يقارنها مع مستواهم التعليمي العالي يعني لمخير فيهم يقبض خدمة يسلك فيها 3 ملاين على أبعد تقدير أما صنف آخر من الناس تصيبو عندو ورث ولا يخدم مارشي نوار وتراباندو طالعا بيه يجي يدحك على القاري على خاطر ماقدرش بالدخل المتواضع اللي يديه يدير الإستقرار والتاويل العمرو مع الأسف الشديد ...:(والسؤال المطروح هو هل القاري واللي ماشي قاري في بلادنا عندهم تفس القيمة ولا هل واش راهو يصرى من تجاهل وتهميش للثقافة والعلم في بلادنا هو السبب في تراجع قيهةالإنسان القاري والله تبقى حاير في الجزاير :s
 
رد: واش درت بقرايتك ؟؟؟

يعطيك الصحة ختي على الموضوع الباهي
لازم نفرقو بين لقراية والخدمة والمال ..............
القراية والعلم لا يستلزم الخدمة والمال
لكن لا يستوي أبدا الذين يعلمون والذين لا يعلمون كما قال تعالى في الأيات الكثيرة ... أفمن يعلم كمن لا يعلم ..... وغيرها الكثير....
فعقل القاري والمثقف ليس كعقل الجال ولو كسب الملايير ...
لكن الناس ملي كانت الدنيا والدين مخلوعين من صاحب المادة ويظنو انو هو الي يتقادر ويحكم حتى اؤلائك الذين قال الله عليهم " قالو أنا يكون له الملك ولم يؤت سعة من المال "
قالو كيفاه يحكم وماعندوش الدراهم تبالهم الي عندو الدراهم هو الي يحكم فرد عليه الله عز وجل " إن الله أتاه بسطة في العلم والجسم"
بينلهم ربي بلي صاحب العلم هوا الي يحكم ................
​
 
رد: واش درت بقرايتك ؟؟؟

السلامة عليكم

اهلا اختي

هاذي فكرتني بتاع هذا لي يشوف في الجامعي ...غوغل ماشي على رجليه ..منين يساله لازم يجاوب ولو مايجاوبش يقولوا ديك القراية لي قريتها ................. مممم

واش ديرت بقرايتك ............

الحمد لله مادامنا قرينا و ماراناش جاهلينا رانا ديجا درنا حاجة .... اما حكاية انه لي قاري لازم يكون عندوا المال فهاذي ماشي حاجة تقيس عليها ... كاين ناس ماقاريينش و راهم اغنى الاغنياء .................

يقول عز وجل .. " قل هل يستوي الذين يعلمون و الذين لا يعلمون " ...

كيما انا قرايتي رغم اني خدامة بصح حتى ماكنتش خدامة راهي فايدة كبيرة ليا .... اقلها اني غذوة ولادي انا لي نقريهم .... تقولي بكري كانزا الوالدين ما قاريينش و الابناء ما شاء الله ........ نقولك المعلمين تاع بكري ماشي كيما تاع دركة الا من رحم ربي

و يظهرلي انه الشهادة هاذيك هي لي تنفع في الظروف الصعبة خصوصا للمراة ........

و شكرا على الموضوع القيم

تقبلي مروري ​
 
رد: واش درت بقرايتك ؟؟؟

نعم لديهم نفس القيمة ان نحن فكرنا جيدا

القاري و لي متخرج قرا و نجح و ممكن راه يخدم و ممكن مراهش يخدم ؟؟

و الشخص لي مقراش و قلتي عليه يخدم ترابندو و مارشي نوار هو حقا مقراش لاكن تعب و خدم و طاح و وقف باش يكون

بمستوى مليح في حياته ادن في وجهة نظري ليس هناك فارق .

أعطيك مثال في سنة 2002 تركت المدرسة و حتى من كانوا معي في نفس القسم من الشباب تركوا المدرسة من بعدي

و هناك من واصل دراسته لاكن الشيء العجيب أن من واصل دراسته تخرج و هو الان أستاد في اللغة العربية و هناك

من هو نائب لمدير مركب سياحي و من لم يدرسوا و تركوا المدرسة لأسبابهم الخاصة حتى هم في أحسن أحوالهم

منهم من هو تاجر كبير و منهم كما قلتي يشتغل ترابندو و لديه كل متطلبات الحياة السعيدة و اغلبهم كونوا أسرة و كل

واحد منهم لديه بيته الخاص . لهدا أقول ليس هناك فرق بين من درس و من تعب في الحياة من أجل ان يكون نفسه

بدون دراسة .

و لنتكلم للجانب الثقافي أقسم لك بالله يا صديقتي هناك من درسة حتى تخرج لاكنه لا يعرف حتى معاملة الناس بالشكل

المطلوب و الائق بهم و عندما تبادلينه الكلام تتأسف لأنه درس و تتعجب كيف تخرج ؟؟

و هناك من لم يدرس يوما واحدا في حياته و تجديه مثقف لدرجة أنك لا تصدقين أنه لم يعرف المدرسة من قبل

و هدا راجع للأخلاق و التربية الحسنة و الاعتماد على الاسلام أولا من طرف عائلته في تربيته.

لا يجود فرق كبير ان نحن فكرنا جيدا .

أما الجانب المادي فأقول لك شيء الرزق على الله أعرف الكثير من الشباب يشتغلون في أكبر الشركات الوطنية

و عندما ينتهي من عمله في المساء تجيدينه يشتغل بسيارته كلونديستا ؟؟؟.

أعرف شخص هو أستاد و زوجته أستادة و ابنته غير متزوجة أستادة و يشتغل كلونديستا كل يوم في المساء

و لا توجد لديه عائلة كبيرة زوجته و أبنتيه و ولد مادا تسمين هدا الشخص ؟؟؟؟

الرزق على الله و الثقافة من الاسلام حتى الرسول الكريم علم الكثير من أصحابه القراءة و الكتابة و هم في سن الشيوخ

لاكن الأخلاق الحميدة هي من جعلت من ثقافتهم بحر لا يستطيع أي متخرج من أكبر الجامعات في العالم أن يغوص فيه

أو يتفوق عليهم .

أتمنى ان تكوني قد فهمتي كلامي

شكرا على الموضوع أختي

و دمت مبدعة بأفكارك ​
 
رد: واش درت بقرايتك ؟؟؟

السلام عليكم اختي
يعطيك الصحة على موضوعك ولي راهو يحكي على عفسة كثرت في مجتمعنا
لحقنا وين الواحد عاد يقرا يقرا من بعدة تلحق بيه يقولك واش رايح ندير بالقراية رانا شفناهم ماقراوش ويلعبوا بالدراهم لعب
ولا يقولك لي قرا قرا بكري ولا يقولك علاه عليا انا نضيع حياتي نقرا فالجامعة نحبس قراتي احسن ونروح نشوف خدمة ندير بيها المستقبل تاعي ورانا نشوفوا فيهم بزاااف هكا
الحقيقة هي انوا لعلم حاجة والدراهم حاجة .يعني الدراهم يجي وقت ويروحوا والواحد مايلقى في يديه غير العلم تاعو لي يفتحلو ابواب ويقدر يدير واش يحب قال الله تعالى: (يَرْفَعِ ٱللَّهُ ٱلَّذِينَ ءامَنُواْ مِنكُمْ وَٱلَّذِينَ أُوتُواْ ٱلْعِلْمَ دَرَجَـٰتٍ) [المجادلة:11].
يععني انا من وجهة نظري الواحد يفرط في كل شي غير العلم تاعو ومن قيمة العلم كاين ناس الظروف تاعهم حتمت عليهم يحبسوا لقرايا ويتوجهوا للحياة العملية ولكن مع الوقت عرفوا قيمة العلم وعادوا يسجلوا احرار ويقراو
حيث يقول الشافعي اختي رأيت العلم صاحبه كريمٌ ... ولو ولدته آباء لئامُ فلولا العلم ما سعدت رجالٌ ... ولا عُرف الحلال ولا الحرام
غاليتي عذرا على الاطالة ومرة اخرى بارك الله فيكِ على الموضوع
دمتي في رعاية الله وحفظه
​
 
رد: واش درت بقرايتك ؟؟؟

يعطيك الصحة ختي على الموضوع الباهي
كل واحد ماعطالو ربي

كاين ناس كي تتخرج ومايلقاش خدمة يقلولو
واش درت بقرايتك
وكي يلقى خدمة يحسدوه هههه
شعب بعيد جدااا
​
 
آخر تعديل:
رد: واش درت بقرايتك ؟؟؟

سلام
قستيني في الجرح كان سؤالك موجه ليا
مرات نقول قريت و ندمت ضيعت حياتي بلا فائدة
ليسانس وماستر وووو وفي الاخير نخدمو عند ناس بدون مستوى باه ندو مليون و لا 800 يجي انت وافهم
ربي يجيب الخير
 
رد: واش درت بقرايتك ؟؟؟

يعني من الاخير لازم نسقسيو رواحنا
هل العلم للاكل
اذا فهمنا هاذي رايح يسهل الاجابة
واش درت بقرايتي وانت واش درت كي ماقريتش
رايح تقلي راني خداام وندخل الدراهم هنا نقلك يااخي احبس ودير ستوب باسكو ماراكش فاهم واش معناتها تقرى
كاين عباد تلقاهم مال وجاه وسلطان مي ماقرااش ونهار يناقشو اي واحد قرى يبقى مذهول
دونك القرايا ماهيش للخدمة
وزيد تانيك علاه تشوفو غير اللي قرى وما خدمش علاه ماتشوفوش الطبيب اللي راهو يدخل خمس ملاين في النهار علاه ماتشوفوش الشاف نتاع البانكة والشاف نتاع البترول علاه ماتشوفوش الجماعة اللي راهي خدانة في اروباا ويحلو فيهم باش يقعدو في اروباا
علاه ماتشوفوش الاسااتذة والنااس اللي قرات وراهي خداامة هنا لازم تفهمو بلي ماهيش مشكلة قرايا المشكلة في الموازنة بين الشغل والقراياا وهذي سقسيو الدولة عليها شكراا على الموضوع
 
رد: واش درت بقرايتك ؟؟؟

موضوعك مهم
بصح هادي هي البلاد
اتخيلو زوجي محامي
يخدم محاسب شركه وقالي المدير نتاعو مستواه الثقافي حدث ولا حرج
المهم كبير .... ولابس كوستيم هههه
الرجل المناسب في المكان الغير المناسب
 
رد: واش درت بقرايتك ؟؟؟

الى حد الان أراقب التعليقات و الكثير منها أصحابها منزعجة لأنهم يشتغلون عند شخص لم يدرس أو مستواه الدراسي

محدود ؟؟؟ لم كل هدا ؟؟ لم لا تبحثوا عن السبب الدي لم يجعله يدرس أو جعله يترك دراسته ؟؟؟

لم لا تبحثوا و تسألوا عنه كيف كون نفسه بدون دراسة ؟؟؟؟

لم تتهمونهم بنقص الثقافة و كون نفسه احسن من الدين يدعون الثقافة بحد داتها ؟؟؟

هناك من قتل هده الفئة من الشباب و أستدل بكلام الله في أعلى التعليقات .

أقول لك شيء هناك حقا من درس ليسانس وماستر لاكنه للأسف لا يحفظ حزب واحد من كلام الله

هناك من تعلم كل لغات العالم لكنه لا يتقن لغة القرأن أو يخجل بأن يتكلم بها.

هناك من رزقه الله العلم و هناك من رزقه العقل و الفكر و عرف كيف يكون نفسه و يستحق الاحترام

و لو لم يكن مثقف لم نجح في حياته .

الموضوع كله يطرح سؤال واحد هل هناك فرق ؟؟؟

لاكن بدل ما تجيبون عن السؤال طعنتم بخناجركم المثقفة كل انسان بنى نفسه بنفسه و ربما زرع مناصب عمل للمثقفين

الدين لم يسعفهم الحظ ليشتغلوا عند الدولة .
​
 
رد: واش درت بقرايتك ؟؟؟

قال نجيب:
الى حد الان أراقب التعليقات و الكثير منها أصحابها منزعجة لأنهم يشتغلون عند شخص لم يدرس أو مستواه الدراسي

محدود ؟؟؟ لم كل هدا ؟؟ لم لا تبحثوا عن السبب الدي لم يجعله يدرس أو جعله يترك دراسته ؟؟؟

لم لا تبحثوا و تسألوا عنه كيف كون نفسه بدون دراسة ؟؟؟؟

لم تتهمونهم بنقص الثقافة و كون نفسه احسن من الدين يدعون الثقافة بحد داتها ؟؟؟

هناك من قتل هده الفئة من الشباب و أستدل بكلام الله في أعلى التعليقات .

أقول لك شيء هناك حقا من درس ليسانس وماستر لاكنه للأسف لا يحفظ حزب واحد من كلام الله

هناك من تعلم كل لغات العالم لكنه لا يتقن لغة القرأن أو يخجل بأن يتكلم بها.

هناك من رزقه الله العلم و هناك من رزقه العقل و الفكر و عرف كيف يكون نفسه و يستحق الاحترام

و لو لم يكن مثقف لم نجح في حياته .

الموضوع كله يطرح سؤال واحد هل هناك فرق ؟؟؟

لاكن بدل ما تجيبون عن السؤال طعنتم بخناجركم المثقفة كل انسان بنى نفسه بنفسه و ربما زرع مناصب عمل للمثقفين

الدين لم يسعفهم الحظ ليشتغلوا عند الدولة .
​
إضغط للتوسيع...

انا معك في كل ماقلت
لكن الامر الذي يزعج هو انك لما توقف مع هدا الشخص سواءوفي اجتماع او اي شيئ يكون الحديث:tongue02:
وزيد ايماجيني تقرا وتتعب و و و
ماجيستار والدكتوراه والله يبارك
يجيك واحد ماتعبش وماجدها يامر ويتأمر
والسبب كلنا نعرفوه
ماندرقوش الشمس بالغربال
قالك لوكان ماكتافي ما رفعت راسي ...
 
رد: واش درت بقرايتك ؟؟؟

خويا نجيب الموضوع يناقش بصورة كبيرة

ونظرة انت تاعك رفدتها محدودة احنا مقلناش الي مش قاري يعني جاهل ومنعرف واش

احنا نحكو على الفئة الي تخرج بديبلومات ورانا قاعدة اصلا اغلبية الفئة تاع الشباب الي شوماج عندهم شهادات

والسبب ان يتخرج من الجامعة كبير في عمره لازمه منصب عمل ديراكت وين يلقاه في الدولة تاعنا

اما قصة العمل عند شخص بدون مستوى هادي كاينه منها وبزاف تلقاه مش فاهم حاجة يجي يرفد روحو ويتكبر على الناس انت متشوفش فئة فقط وتعلق

شكرا اخي الكريم
 
رد: واش درت بقرايتك ؟؟؟

الله يوفق الجميع ،،
طلب العلم كلفنا الله به على مآ أعتقد قالوهالي ف أولى ابتدائي .. يعني نقرأ باه نؤجر عند ربي
الخدمة منبعد الله يسهل .. لانو كل منديرو وش يرضي المولى يجي لي نحوسوا عليه يجري

ماغسي خيتي ^^
 
رد: واش درت بقرايتك ؟؟؟

لا معندهمش نفس المستوى انا منحكيش عل الناس لي عندها دبلومات بالرشوة و مهيش فاهمة راسها من ساسها
ومام كيف تقعدي مع واحد قاري راح تثقفي اكثر و راح تفهمي امور كبيرة
وبالنسبة للناس لي مهيش قارية و لا مديتها بالرشوة و لا بالمعريفة تقعدي معاه دقيقة يقلك مهيش بلاد اديا
انا نيفو تاعي جامعي و راني قاعد كيفي كيف واحد جاهل معلابالوش انو معندو وين راح يوصل باها اديك الهدرة
اختي بدون اطالة انا نقلك لا اختي لي يسعلى يلقى المهم الصبر و ميحطش كلام الناس على انو هو الصواب على خاطر
المكتوب معلبالناش بيه و رهنا رام يدخلو في الغيب وربي راو يعطي على قد القلوب
جزاك الله خيرا على الموضوع الراقي
تقبلي مروري
تحياتي​
 
رد: واش درت بقرايتك ؟؟؟

السّلام عليكم
بارك الله فيك اختي الغالية على الموضوع

والله السّؤال تاعك طرحتو علينا استاذة في الجامعة العام الماضي وقاتلنا بلي القراية ماعندها حتى معنى
وكانت نشفى عليها حصة تطبيق يعني كنا في قلال وكانت فرصة باه كل واحد يعبر على رايو
وبداو الشباب لي يقراو معايا يقولولها ماهيش بلاد وقرينا بلا فايدة ومن بعد ماتلقاش الخدمة ومعرف واش

انا بصراحة اول مرة في حياتي نتكلم ونعبر على رايي وسط الناس خاطر نحشم بزااف هههه
وليت قلت للاستاذة " علابالك علاه ولينا نتداولو كلمة ماعندي مادرت بقرايتي ؟؟ خاطر نقراو باه نخدمو
ماشي نروح نقرا باه نتثقف ونتعلم ونحس فعلا بمصطلح القراية" أصلا ولينا نروحو نقراو وفي بالنا طول الخدمة
حتى ولينا كي نجيو نخيرو الشعب نخمو على الخدمة قبل , انا والله كي نروح نقرا ونتعلم معلومة جديدة
نفرح بزاف ونجي نعلمها لوالديا ونفرح بيها, والأهم من هاد الشي كامل اني قريت وخطرة خلاف نقري ولادي
يعني راني درت حاجة بالقراية ومابقيتش امية ونعرف نقرا الحروف ونقرا كتاب ربي وم نبعد عرفت الاقتصاد والبنوك وبالشوي زادت ثقافتي والحمد لله

يعني الخدمة وحدها والقراية وحدها, كاين لي ماقراوش ويخدمو, يعني هنا حبيت نقول بلي جامي جات في بالي نقول واش درت بقرايتي , يعني الحمد لله

وعندي وحدة من العائلة قرات وكانت من الأوائل وماكتبش ربي عليها بالخدمة ودرك رايحة تتزوج وماش ناوية تخدم خلاص وفرحانة بنفسها, تقولي كي نشوف الشهادات وكي يجي واحد يتكلم معايا ونعرف نجاوبو اصلا فرحة ليا وفخر

يعني هادي من رايي فقط

ونشكر على الموضوع حبيبتي
تقبلي مروري​
 
رد: واش درت بقرايتك ؟؟؟

يعني الخدمة وحدها والقراية وحدها
كاين الي ماقراش ويخدم وكاين الي قرا وتعب باش يخدم وماكاين والو
 
رد: واش درت بقرايتك ؟؟؟

خويا نجيب واشبيك راك حامي علينا هكا .. بلعقل ..فريني .....:d:d

شوف خويا ........

كاين ناس قراو وتعبوا صح ... و مارايحينش ننقصوا من قيمة الشهادة تاعهم ... يعني في رايك بدون القراية كنت رايح تلقى الطبيب و المهندس و المعلم و المحامي وووووو ........ القراية عندها مكانتها مهما تكون ...

اما حكاية انه كاين ناس ماقارياش خير من ناس قارية ......... هذاك ماشي هو الموضوع تاع العضوة ..... هذا موضوع اخر

الثقافة ماهيش مربوطة بالقراية ...كاين ناس تلقاهم بالشهادة بصح الثقافة 0000000000 ...... و العكس صحيح كاين ناس تلقاها ماقراتش لظروف بصح تلقاها مثقفة ماشاء الله ...........

اما حكاية واحد بالشهادة تلقاه يخدم عن واحد بدون شهادة ...........

شوف خويا نجيب مانغطيوش الشمس بالغربال .............

و هاذي صاريا بزااااااااف ....

تلقى واحد فاتح شركة تاع مقاولات مثلا وهو و الله مافاهم فيها غرام ... علاه فتحها لانه علابالوا تجيب الدراهم ..و يجيب ناس بالشهادة يفهموا في الخدمة هاذيك ... و يبدا يتفلسف عليهم .

كاين تاني تلقاه يفتح مدرسة خاصة وهو لاعلاقة و يولي بتامر على المعلمين و يدخل في الخدمة نتاعهم ......... وناس بزاااف ماشية بالعقلية هاذي ....

كيفاه تسميها هاذي ؟؟؟؟؟؟

نتمنى اني نكون وصلتلك الفكرة ........... تقبل مروري
​
 
رد: واش درت بقرايتك ؟؟؟

موضوع قوية
المال - القراية (العلم) - الخدمة
(المال و البنون زينة الحياه) ندرك قوة و تأثير المال ...
أما العلم يقربنا إلى الله ..... إقرأ
الخدمة المشكل الأكبر في بلادنا ....
 
رد: واش درت بقرايتك ؟؟؟

بارك الله فيكم على التفاعل الجميل والمشاركة القيمة في هذا الموضوع بالفعل كل واحد عندو وجهة النظر ديالو والأحترام واجب للجميع شكرا على المرور الطيب مع تحياتي لكم :)
 
رد: واش درت بقرايتك ؟؟؟

المستوى العلمي للشخص لا يقاس بشهادته
قادر يكون شخص ماقراش و ما وصلش لبعيد في مستواه الدراسي افضل من شخص متخرج بدبلوم وشهادة جامعية لان ببساطة الاول يحب القراءة والاطلاع على الكتب وغيرها فيما يشمل جميع مجالات الحياة اما الثاني يكتفي فقط بواش يقروه في الجامعة ... وياعيني على هاديك القراية هههههههه
اما بالنسبة للقاري مش خدام هادي راجعة للدولة تعنا مهمشة الطلبة المتخرجين لي يخلص قرايتو يشد الحيط حدا خوه ولا تلقيه يخدم مي مش في الدومان تاعو ... وكاين لي مش قاري وخدام وعندو هدا يا اما عو كتف قادرة متكي عليها ولا قافز خدم منا و منا حتان لم روحو وفرج عليه ربي
وربي يفتح علينا ويوفقنا كامل :)​
 
يجب عليك تسجيل الدخول أو التسجيل للرد هنا.
لإعلاناتكم وإشهاراتكم عبر صفحات منتدى اللمة الجزائرية، ولمزيد من التفاصيل ... تواصلوا معنا
العودة
Top