رد: أعاني ولا اجد الحل
السّلام عليكم
أهلا بأختي لعزيزة ان شاء الله خير ختي ماتقلقيش
رايحة نقولك حاجة ختي شوفي إذا على الحياة تبانلك صامطة وماعندها حتى معنى, انا نأكدلك بلي الحياة صامطة وماعندها حتى معنى
خاطر حتى انا يجيني نفس الإحساس تاعك بالضبط , نقول الدنيا تافهة نقول الدنيا ماعندها حتى معنى, اشري ولا البس ولا كول
ولا أشرب, يعديو عليك سنين قليلة حتى تلقى روحك في قبر مظلم ومعرف إذا واش رايح تلقى فيه رايح يعجبك ولالا
صدقيني عندي مدة طويييلة من لي حسيت بلي الدنيا ماعندها حتى معنى, يعني نوافقك في هاد الإحساس
بصح ...
هادا ماشي سبب باه ندخل في الاكتئاب , ربما نتي راكي عايشة روتين على هادي تحسي بلي الحياة متشابهة ومملة
يعني عندك فراااغ
شوفي نقولك, أولا صلاتك والقرآن ديريهم أصحاب ماتصليش فقط من اجل الصلاة وماتقرايش القرآن فقط باه تكرري بعض الكلمات على لسانك
يعني اذا صليتي حسي انك تحكي مع الله سبحانه وتعالى اشكيلو في سجودك احكيلو عبري على واش كاين داخلك , انا هكا ندير
تاني القرآن اتخيلي بلي كلام ربي سبحانو راهو قدامك يعني كلي راكي تحاوري في الله تعالى
يعني اعتابري كاين لي يسمعلك ويغيرلك افكارك للأحسن وراهو يسهر على راحتك وحمايتك و كل خطوة من خطواتك مكتبلك فيها الخير
شوفي هادي من جهة العقيدة, نروحو لجهة الملل, شوفي ختي ربما ماكانش تطورات في حياتك تخليك تحسي بطعم الحياة
لكن كاين حوايج قدامك بسيطة جدا وماراكيش حاستلهم وهوما اجمل طعم للحياة, مثلا والديك, لما تنوضي الصباح وتلقاي يماك وباباك قدامك من المفروض ترجعلك الرغبة في الحياة, تولي تقولي والديا لازم نفرحهم لازم نخليهم يفتاخرو بيا, تلقاي حاجة جديدة في حياتك تتعبي عليها
عندك خاوتك , والأهم من هاد الشي كاين لي ماعندهمش إخوة وماعندهمش أهل, يعني هوما اولى بالاكتئاب وبكره الحياة
اتفكري شبابك, كاين لي راهم يتمناو يرجو للوراء باه يديرو شي ندمو كي ماداروهش وهوما صغار, يعني شوفي مع روحك برك ومع عايلتك ومع دراستك, راكي تملكي حوايج ناس راهي تتمنى تملك جزء منها
شوفي حبيبتي ديري قعدة مع نفسك واحكي معاها مليح, اذا الحياة ماعندها حتى معنى وعايشين ويجي موت هادي ماش غير عليا ولا عليك هادي على الناس كامل
حتى أحسن خلق الله حبيبنا محمد صلى الله عليه وسلم ومات, يعني الموت علينا كامل, واذا كان وجودنا في الحياة ماعندو حتى معنى مالا
واش هاداك لي خمس مرات في اليوم يأذن ويقول الله أكبر, هاداك ربي سبحانو ينادينا خمس مرات باه نتقربو ليه ونحكيولو ونشكيولو
ونتخلصو من الاكتئاب لي حاب يزرعو الشيطان في قلبنا و زيدي اتفكري هاداك لكتاب لي ماكانش لي يقراه الا وتنشرح نفسو وكيف لا وهو كلام لي خلقني ولي يعرف كل شي في داخلي
قولي هادو الناس لي دايرين بيا ويبكيو لبكائي ويفرحو لفرحي مايستحقوش خلاص نقلقهم ولو بكلمة خاطر راهم نعمة تحرم منها كثير من الناس, ختي ديري قعدة مع نفسك وفكري في واش قلتلك وان شاء الله خير
ربي يهنيك حبيبتي وسامحيني على الاطالة
وان شاء الله نشوفوم ووضع آخر تحكي فيه انك بخير وعادتلك الرغبة في الحياة
