كبش العيد ؟

[مشكلتي]

السلام عليكم

مشكلتي هي انا امرأة مزوجة من عامين
اكتشفت ان اهل زوجي لايشترون الاضحية
ويقولون انهم لايملكون المال في جين انهم يعملون ولهم اجرهم الشهري عادي مثل بقية الناس

اما عن زوجي فهو يقتسم دراهم الاضحية مع والدته يشتروها نصف بنصف
وبقية اخوانه لايشترون ويأتون يوم العيد عند اهل زوجي وانا وزوجي من يسكن مع والدته

انا صراحة صدمت كيف لرجال متزوجين ولهم اولاد لايشترون العيد ويتحججون انهم لايملكون نقود في حين يستطيعون تخصيص مبلغ مالي بسيط لشراء خروف صغير فقط

عجبت منهم 13 سنة زواج والاخر 8 سنوات والاخر 10 سنوات ... ولامرة اشتروا الاضحية

هل هو امر عادي في رأيكم ؟

اانا رايته من ناحية اخرى بروفيتاج

وعدم القيام بما امرنا به الرسول عليه الصلاة والسلام

 

[أحبك ياجزائر]

رد: كبش العيد ؟

الدين نصيحة اختي
حاولي تحكي معاهم من جانب الدين وعقوبة المستهزء بأمر الله وسنة حبيبه خاصة في الأضحية وفضلها تلميحا فقط لعلهم يعودون مسارهم والله المستعان
​

 

[بنقابي افتخر]

رد: كبش العيد ؟

ههههه راكي كيفي
خليها على ربي يفرج ربي وخلاص
ونويها في سبيل الله
صح بروفيتاج بصح تهدري تحصلي
الوغ غير غمضي عينك وكولي وصح عيدك وادعي هذا الايام راها مباركه الله يفرجخا عليك وعلينا

 

[لؤلؤة قسنطينة]

رد: كبش العيد ؟

السّلام عليكم
والله يا أختي عجيب صح
لو كان مقدورهم المادي ضعيف
مثلا مايقدروش على غلاء الاضاحي نقولو معليش كل واحد وظروفو
" لا يكلف الله نفساً إلا وسعها"
بصح باه شهريتك الله يبارك تكفي باه تذبح وتشري كبش
يعني علاه لالا؟؟
معليش اذا حاب تحافظ على الأسرة وصلة الرحم وتعيد مع يماك بصح اشري الأضحية تاعك وروح عيد مع يماك هكا تجي مليحة
علابالنا بلي الضيق في القلوب ونورمال نتعاونو
بصح اذا ربي فتح عليك علاه تغبن روحك
مالقيت مانقول يا ختي, المهم ماعندكش مشاكل اذا على الاضحية يجيب ربي الخير
ان شاء الله
تقبلي مروري​

 

[Perle Blanche]

رد: كبش العيد ؟

السلام عليكم
الصلاة و السلام عليك حبيبي يا رسول الله
الله يهدي ما خلق هذا واش نقولو الا قادرين علاه ميشروش ؟؟؟؟؟؟؟؟
هنا لازم ناس يحكو معاهم و يفهومهم و خلاص
أما حكاية البروفيتاج في بالي قصدك كي راجلك راه يشري بالنص مع أمو و هوما يجيو يعيدوو
من هاذ الناحية أنا نقلك نشوف فيها حاجة عادية يعني و اسمحيلي بدون حساسيات ختي نتياا رايحة تشري الكبش رايحة تشريه و مش رايحة تاكليه كامل و الا جاو عيدو عندكم حاجة عادية اعتبريهاا كي سائر الأايام درتي عرضة و جاو لعندكم بلا متحسبيلهاا انا هكا نشوف فيها يعني بكل بساطة دنياا فانية واش رايحين ندو معاناا غير حاجة الخير متضايقكش هاذ الحاجة
ربي يهنيكم هذا المهم صراحة الهناا تاني أهم حاجة يكفي هذيك اللمة لي راهم يتلمو عندكم بسبة هذاك الكبش راهي الدنياا و مفيهاا
صحاا عيدكم مسبقااا
الله يدوم هناكم
​

 

[Hakan]

رد: كبش العيد ؟

السلاام عليكم
يااختي حاجة عادية ونضن اغلب البيوت الجزاائرية تعاني منو
قبل 6 سنوات
كان الاب نتاعي هو والعم نتاعي يشريو اضحية
ونعيدو كامل في بيت الجد حفظه الله
لكن الآن
غير حنايا والجد بحكم عمي بعيد عليناا ويشري اضحية وحدو
لكن والله اضحيتو وحدو ونخلولو حقو
معليهش ياك الاضحية للاجر ولله في سبيل الله
انويوها اجر وربي يعوضكم
اما على البروفيتااج والله يااختي ما يسلكو راكي تشوفي في دراهم الاضحية
ياك 4 ملاين والله غير يعاقبهم ربي بامرااض ومشااكل على طول العاام تخليهم
يخسرو كثر من الاضحية باضعاف مضااعفة
وممكن راكي شفتيها وانتوما اللي تضحو اكيد ربي يباركلكم في مالكم وصحتكم
والحاجة المهمة وما تنسايش
ابعثيلي حقي وهو
** العين اليمنى والاذن اليمنى وشويا مخيخ من البوزلووف هههه**
سلاام.​

 

[ام أمينة]

رد: كبش العيد ؟

السلام عليكم
الواحد يكبر خاطرو و يخليها على ربي
​

 

[ماكانش]

رد: كبش العيد ؟

والله اذا شهارة وقدهم قد حالهم وعلاه عليه يشري كبش ب 5 ملاين ؟؟؟؟؟؟؟؟
ولا علاه عليه يسلف ويتكلف ويشري .................

 

[**laila**]

رد: كبش العيد ؟

لا حول ولا قوة الا بالله

شر البلية ما يضحك

الناس كي تطبق أمر رب سبحانو تفرح و يتمنو القرب منو

و هوما يحسبوها دراهم وخلاص سبحان الله

رب يهديهم

 

[mà_dikrà]

رد: كبش العيد ؟

السلام ورحمة الله وبركاته
عجيبه صح ،، مي نورمال نتي اكلي ونويها لربي صدقة جارية هكا وتهناي
هوما يبخلوا مثلاً ع رواحهم نتي ديريها حاجة بينك وبين ربي سبحانو ،، والله يحسن العون

 

[بنت الـ25]

رد: كبش العيد ؟

السلام عليكم اختي
طبعا امر غير عادي ، كاين ناس في بالهم العيد الكبير تخمة ؤمن اللحم وطبق لهيه
لا مش هادي هي الحكمة من أضحية العيد، الأضحية هي قربان نتقربو بها إلى الله تعالى وهي شكر له على نعمة الحياة في هاته الأيام الفاضلة
لكن للأسف قليل لي يفهم هاد الحكمة أ الهدف منها ويظنوا انها واجبة غير على المقتدر
كيفاش كيما قلتي عام كامل وهوما يخدمو على كسوة الأولاد وعلى التحواس وعلى كروشهم مي الرزق هدا بكل منين؟ ياك من عند ربي
استخسرت في ربي 4 ملاين تصرفها باش تتقرب ليه؟ وتنفع نفسك يوم لا ينفع مال ولا بنون ؟
تقول ناس تخمم برجليها؟
انتي يا اختي احتسبي أجرك لله وما تقوليش بروفيطاج خاطر كل واحد فهاد الدنيا يدي غير لي قسملو ربي والحمدلله لي ربي طيحك في راجل يفهم معنى الأضحية وينحيها على فمو ويضحي
احنا خويا عايش معانا في نفس الدار وعندو عام زواج وهاد لعام ان شاء الله رايح يدبح كبش تعو وحدو خاطر دوكا تزوج وولى مسؤول ورب أسرة محتمة عليه يضحي
صبرك لربي وحاولي تقعدي معاهم وتشرحيلهم بالاك الناس هادو مش فاهمين علاش نضحيو؟
لعام لي فات فالعيد جى ولد خالتي وابنو صغير عمرو 7 سنوات سقسيتو قتلو أكرم علاش ندبحو الكبش؟
قالي باش ناكلو اللحم خخخخخخخخخخ قتلو لالا ، خمم ومبعد قالي هدا سؤال يطرح نفسو خخخخخخ دوك نسقسي بابا ونجاوبك
وكيما كان الحال سقسى باباه وباباه فهمو علاش ندبحو ، كيما قتلك بالاك ناس راجلك معلابالهمش
سلام

​

 

[Melia azedarach]

رد: كبش العيد ؟

الله المعين... لوجه الله اجعليها ..
ممكن عندهم ظروفهم يلي ما تسمحلهمش باه يضحيو
وغيرها رب راه يشوف

 

[~ غيث ~]

رد: كبش العيد ؟

الله المستعان
والله حال الكثير منّا تشفّ ...
الأيفون والجالاكسي والتابلات ، والحوايج تاع العيد تاع الدراري الصغار وحدهم يطلعوا للملايين
من بعد كي يلحق الكبش ، تبدا تسمع الشكاوي من كلّ حدبٍ وصوب ...
وهذا لعدم تعظيم شعائر الله في قلوبنا

لا أقصد أهل زوجكِ بالضبط لأننا لا نعرف ظروفهم رغم أنّك قلتي أنهم ميسوري الحال والله أعلم ، المهم أختي ، حاولي مع راجلك يذكرهم بفضل الأضحية وعلاش لازم ماشي غير باش الواحد ياكل اللحم برك وأنّها من تعظيم الله ، وكلّ واجد يشري كبش قيسوا ماشي لازم واحد كبير باش يباهي بيه...
وأحتسبي اضحيتكم عند الله ، فالأقربون أولى بالمعروف
وربي يفتح عليكم

 

[حكاية قمر]

رد: كبش العيد ؟

السلام عليكم
حرام عليهم هوما وادا بغيتي تنصحيهم خلي حتى يفوتو شهر ولمحي بلي كل واحد قادر ماديا لازم يعيد
اما دروك تهدري يقولو راكي ناكرتهم
والصح نت ماكان مادخلك مدام ولدهم لي راه يشري ويمد ليهم وممكن دراهمهم ماشي كافيتهم لمعيشة راهي غالية

 

[adel._dz]

رد: كبش العيد ؟

شوفي من ناحية اللمة والجماعة تتلم كامل جو العيد يكون عندو طعم أخر طعم هايل

بصح أضحية واحدة بين 4 والا 5 عائلات
أمر عجيب فعلا .......
بصح اياكم والدخول بين الاخوة
رحتيلهم لقيتيهم كيما هكذاك خليهم كيما هكذاك حتى تستقلي بزوجك ..............