خطيبي تبدل كلامه معايا

[مشكلتي]

السلام عليكم
باختصار شديد انا مخطوبة من شهرين عن عاقة حب والحمد لله
مشكلتي بدات قبل خطوبتي تفاهمنا على كلش حتى على اللبسة
وبعدما جا للدار وبقاو النسا يجيو عرفت بانه نساهم دايرين جلباب
لاعاينا فوتها عادي ودارنا تشوكاو فالاول لانه حنا يلبسو مستور لكن مش جلباب
المشكلة بدات بعد الخطبة قالي تديري جلباب قلتله لالا قالي نحبك تلبسيه بعد الزواج
ياخاوتي منيش ضد الجلباب لكني مش مقتنعة نلبسه ، نلبس حجاب فضفاض ومستور
لكن مش حابة نلبسو وهو مقتنع وقالي لازم عليك تلبسيه
لحقنا وين قالي نفسخو الخطوبة ومش ملزمة تلبسيه حياتك وانتي حرة فيها
انصحني وتفهموني والله ماني ضد الجلباب لكني منحبش نلبسه ياك نلبس لبسة كما يحبها
كفاه ندير نخمم نفسخ الخطوبة اليوم قالي الجلباب غدوة يقولي حبسي الخدمة
انصحوني وعاونوني في حسم قراري

 

[حكاية عطر]

رد: خطيبي تبدل كلامه معايا

وعليكم السلام ورحمة الله
انا تبالي ماهيش مشكلة هادي لان الحجاب فرض عين على كل مسلمة
والحجاب الشرعي هو الجلباب لانه فيه كل الصفات مجتمعة ما تستنايش راجلك يقلك البسيه لان من الواجب تلبسيه وحدك في وجه الله
مواصفات الحجاب الشرعي والشروط الواجب توفّرها مجتمعةً حتى يكون الحجاب شرعياً .
الأول: ستر جميع بدن المرأة على الراجح .
الثاني: أن لا يكون الحجاب في نفسه زينة .
الثالث: أن يكون صفيقاً ثخيناً لا يشف .
الرابع: أن يكون فضفاضاً واسعاً غير ضيق .
الخامس: أن لا يكون مبخراً مطيباً .
السادس : أن لا يشبه ملابس الكافرات .
السابع : أن لا يشبه ملابس الرجال .
الثامن : أن لا يقصد به الشهرة بين الناس .

 

[أم لينة]

رد: خطيبي تبدل كلامه معايا

ماعلاباليش واشنو هو المفزع في الجلباب ؟؟
انت علاه راكي مكبرة القصة وتوصل انك تفسخي الخطبة على جالها .كي قالك على الجلباب مش معناتو راح يقلك حبسي الخدمة هاذا شي و الخدمة شي آخر . عادي ديري الجلباب راه سترة ليك اختي و مافيها والو مش معناتو انك تولي معقدة و متخرجيش و غيرو من تهويل عن الجلباب .
انت تحوسي على الستر ياك هاهو ربي بعثلك راجل و من حبو و غيرتو عليك طلب منك الجلباب .تخيل لوكان تزوجتي خلاص و من بعد يروح يشريهلك بلا ما يقلك و يحطك امام الامر الواقع تطلقي على جالو ؟ ماجاتش .
هاهو جابهالك من البدايه ملا غير مكلاه تهوليها على روحك و متتشوكاي ما والو كي ديريه تحبيه و تكبري في عين راجلك و الاهم اجرو ذلك عند ربي لانك اطعتي زوجك في ما يرضي الله .

 

[Salam Fleur]

رد: خطيبي تبدل كلامه معايا

السلام عليكم

و الله يا اختي ماعلاباليش واش نقولك .... من وجهة نظري ماشي حق عليه خصوصا انه راكي لابسة حجاب شرعي و ماشاء الله عليك .. وانه يربط لبسك للجلباب باتمام الزواج هاذي ربي ماقالهاش ... نورمالموا كان يقولك من قبل ماشي حتى لدركة ...... و اني فاهمتك ... واش نقولك ادعي رببي سبحانه يفرج عليك ..... زيدي صليي صلاة الاستخارة ........ و مايكون غير الخير ان شاء الله​

 

[{مُدَلَّلَتُهُ}]

رد: خطيبي تبدل كلامه معايا

السلام عليكم و رحمة الله و بركاته

أختي ما طلبش منك حاجة حرام و لا مش مليحة معليش كيما اقتنعتي بالحجاب و راكي عارفة أنو فرض تقتنعي بالجلباب

صح تجيك واعرة في اللول باه توالفيه كيما جاتنا واعرة باه نوالفو الحجاب في ياماتنا الأولى لكن مبعد تولي ما تقدريش تستغناي عليه

ربي يسرلك الي فيه الخير
​

 

[Hakan]

رد: خطيبي تبدل كلامه معايا

احي على سوق الذر اذا كان الخطوبة تتفسخ على
جلباب تلبسيه مالا على الدنيا السلاام ونضن خطيبك
لما كان يعشق فيك كان ينصحك بالجلباب
وانت تقولي عن علاقة حب والحمد لله وين راهو هذا الحب
اللي تهدري عليه اذا كان جلباب ما تقدريش تلبسيه على جال حبيبك
والله نحير في شي عبااد
ياو قلك البسي حجاب مل قلكش اخرجي عرياانة
وزيد اللي دوختني داركم تشوكاو علاه يتشوكاو سبحان الله الجلباب رجع يشوكي نااسو
ربي يهديكم كااملا ننصحك تستغفري مولااك
باسكو علابالي بنات هذا الجيل لازم تخرج برا بجميع الالوان باش تعيش السعاادة
والحجابات نتاع الخرطي شبعتا منهم
انا صرااحة قررت اما نجيبها متجلببة ساترة روحها
اما نجيبها طالقة شعرها وخارجة صراحة راحة
اما المنافقات خليني مانكملش باسكو راهو خارج قلبي من البنات

 

[لؤلؤة قسنطينة]

رد: خطيبي تبدل كلامه معايا

السّلام عليكم
والله يا ختي لعزيزة تفكيري نفس تفكير الإخوة لي قبلي
مافهمتش اذا هادي حاجة تقلق صح؟؟ كن أنا نزغرت خاطر لقيت لي يشجعني ويحفزني
ولقيت راجل يحبني صح, ماش لي يشريلي طاقم ذهب ب 10 ملاين ويقولي نحبك
ماش لي يجيبلي كاميرا ديرلي تصاور ملاح نهار عرسي هو لي يحبني
ماش لي يشريلي فستان أبيض عريان يبين المفاتن هو لي يحبني
اذا تحبني استرني ماش تخليني تمثال يتفرج فيه لي يسوى ومايسواش
يعني إذا على الجلباب من المفروض راهو سترة نجريو ليها حنا قبل مايطلبوه منا أزواجنا ولا خاوتنا ولا والدينا
يعني هادي من جهة, ونتي لقيتي الفرصة لي تحفزك وتوصلك للصح وخايفة منها؟؟
يا ختي كاين رجال لي يطلبو من نساهم ورا الزواج ينحيو الخيمار ويخرجو بالماكياج واللبس الفاضح
وقبلو بيه غير على وجه الزواج وباه ماتبقاش بايرة
ونتي هاد الشخص طلب منك السترة خايفة منو؟؟
وزيد تفسخي الخطوبة؟؟؟ انا منك الراجل لي يسترني ويخاف عليا من نسمة الهوا مانبدلوش بكنوز الدنيا صدقيني
اذا تحبيه ويحبك وناويين تبداو حياة جديدة, تبدليه؟؟ وعلاواه؟؟ على لبسة محتشمة ؟
كن جيتي ماش متزوجة نقولو بالاك مديتها الدنيا وغلبها الشيطان, بصح خلاص لقيتي حلالك علاواه تحوسي؟؟
لي يعمرلك عينيك راهو قدام عينيك, وبينك وبينو البسيلو وتزينيلو وتاع برا علاه؟؟
ماش معناها راكي عريانة بصح والله كل مايستر العبد روحو قد ما تكون مليحة,
ودرك راكي رايحة تفتحي حياة وتولي أم, منك تبدا الأسرة,
يعني جيت نخمم علاه خايفة وماش قابلة حرت, درك ولينا نفتشو بالمجهر على راجل يخاف على مرتو ويغير عليها
ونتي لقيتيه وتتكبري عليه؟؟
والله يا ختي مالقيتش واش نقولك, انا من رايي, البسي الجلباب وزيدي سلميلو على جبهتو
هادا يحبك صح وخايف عليك حتى من نور الشمس
فمابالك بعيون الذئاب لي راهي برا
يعني مالقيتش واش نزيد, خمي بينك وبين روحك راكي غالطة بزاااف
تحياتي
​

 

[همس الوُرود]

رد: خطيبي تبدل كلامه معايا

السلآم عليكم

أختي نقولك حآجة ~ الخلل فيك أنت ووش قآلك هذآ خطيبك مآفيه غير الخير

علآش ترضآي بوآحد مآيغيرش عليك؟؟..ووش تحب المرأة فالرجل من غير غيرته عليهآ و حمآيته لهآ..

إتقي الله في نفسك

ووش فيهآ إذآ قآلك متخدميش؟؟

الرآحة والهنآء ههه ~ رآكي عآيشة في نعمة ومآعلآبآلكش بيهآ..ونهآر يروح من يديك مآتلقآي غير الندآمة

وهو الي نورمآلمو يخمم يفسخ الخطبة معآك مش أنت ~

الله يهديك ويهدينآ أجمعين

سلآم​

 

[mà_dikrà]

رد: خطيبي تبدل كلامه معايا

Slm ،،
معرفتش مخك واش فيه !!
قلتي خطبني بعد علاقة حب ،، أول دليل هو هدا
يعني جا ناوي لحلال ولانو يحبك مش باغي غيروا يشوفك
ونتي بالمقابل ع جال جلباب باه تفسخي الخطوبة ياخي حب ياخي ،،
وش فيها ايلا مخدمتيش تهنيتي ديجا ربي مفرضش على المرأة
العمل ،، لي يخدمها راجل
والله يبانلي ناس ملاح نتي لي ضالماتو
الله يهدي الجميع
سلام ~°

 

[GI Joe]

رد: خطيبي تبدل كلامه معايا

lhagna win famille nssahom mastourin w l hmdl yetchokew men khrin labssin jelbab
mala li mahich methajba kifeh !! w li non musulmane kifeh tchoufhom!! allah yahdina

ya3ni jiik normal ntia takhessri li thebih 3la jel labssa?? mliha lik en plus
ahedri m3eh b chwia bark y9an3ek bach dirih l rabi machi ta3 dirih 3la jalou zaama ordre, mm si fi haja mliha j ss contre

 

[بقايا إنسان]

رد: خطيبي تبدل كلامه معايا

( ياأيها النبي قل لأزواجك وبناتك ونساء المؤمنين يدنين عليهن من جلابيبهن ذلك أدنى أن يعرفن فلا يؤذين وكان الله غفورا رحيما)
كلام الله هو الفيصل بيني وبينك شوفي ختي وين هو وضعك من النساء الفضليات المذكورات في القرآن

 

[مريم.]

رد: خطيبي تبدل كلامه معايا

سبحان الله جاك راجل وبغا السترا ويسترك معجبكوش الحال

 

[Perle Blanche]

رد: خطيبي تبدل كلامه معايا

السلام عليكم
الصلاة و السلام عليك حبيبي يا رسول الله
هذا لي جا و خطبك و حابك مرتو في بالي عرفك كيما راكي يعني سوا بلبسك سوا بأخلاقك سوا في عقليتك مدامك تعرفيه
أنا نشوف فيها الا حاب يبدل من لبستك و تلبسي لباس مستور ايه البسي الباس المستور و مهوش شرط جلباب أكيد
علاه لازم يحصرو في جلباب
نتيا راكي تقولي منيش مقتنعة بالجلباب ايه مكيش حاباتو يعني متلبسيهش واش لي واعر فيها هاذي
ايه راهم كاينين و بزاف لي لابسين حجابات و في قمة الحشمة ماشاء الله
انا حكاية الجلباب هاذي منيش نشوف فيها حكاية لازم تكون و لازم تتفرض عليك
ساس الدار أنكم تكونو متخلقين و صح ناوين الحلال باه تسترو رواحكم
عادي اللبس مهوش مقترن بالأخلاق يكفي العين لي تشوفك تعرف بلي راكي محتشمة وراكي مرت راجل و فقط
والدينا رباونا كبرونا علمونا صرفو علينا تعبو علينا و يجي سي خونا كي يحب يديها يقلها أنا حبسي الخدمة هاذي اضافة للخدمة علاه باباك مش واعي لدرجة انو يحبسك و يقعدك فالدار
نتا تعرفني خدامة علاه تخطبني روح اخطب لقاعدة فالدار و تتشرط عليا كذا و كذا كاين شروط من شروط و أكيد الزواج فيه تنازلات و قبل أي حاجة راك مشاركة فالأافكار
عادي فهميه فكرتك بلي مش مقتنعة بالجلباب و رايحة تلبسي لباس محتشم كيما الحجابات
حاولي تفهمي علاه جلباب بالذات واش الفرق بينهم الا قنعك عادي الا مقنعكش انا نقلك تقدري ترجعي للوالد تاعك أطرحي عليه الأمر شوفي رايو واش يقلك أدي مشورتو عادي و صدقيني رايحة بربي تلقاي الطريق لي رايح تمشي فيه لأانو والدينا يعرفو خير منااا
و الا كانت هاذي السبة في أنو يفسخ الخطبة قولي مكانش ربي كاتبها و عادي
خيرها في غيرها و الزواج فاللخر مكتوب
​

 

[الباندي]

رد: خطيبي تبدل كلامه معايا

البنات تاع دروك عندهم فوبيا تاع حاجة يسموها "جلباب" ..( ماشي Gاع اوف كورس )
---
اذا تحبيه صح نورمالمون غي Gالك البسيه تلبسيه بدون اعتراض لانه ببساطة زوجك و انتي في ميزك علاه راه يقولك ديري جلباب
لانو يغير على الشرف و العرض التاعو (مانيش نقصد اللي راكم فاهمينو انتوما )
...يغيير على مرتو ميحبش واحد يشوف ليها ماغيرو هوا ..
مايحبش النظرات و السكانار اللي في الطريق من عند الناس خصوصا و انتي راكي تقولي خدامة ..يعني دايمن متواجدة خارج البيت ..

ببساطة يحوس يشوفك غي هوا فقط لاغير وهذا قمة القوامة عند الرجل (بالاضافة الى حوايج وحدوخرين طبعا)..

اختي شوفي انتي رابحة من لبس الجلباب

اولا من جهة ربي رابحة -
ثانيا تزيدي تكبري في عينين راجلك تاع بصح ..
------
ملاحظة للزوج ماشي ليك بالرغم من انو ماغاديش يشوف الموضوع مي معليش اتكلم متخليهاش في قلبك كما قال تاع جاك المرسول

من الافضل له يتبع اسلوب الترغيب و التحبيب و يطرح الموضوع بطريقة لينة لا التعنيف و التهديد مباشرة ..(مجرد راي طبعا)
------
كاينة وحد الجملة مفهمتهاش

"وبعدما جا للدار وبقاو النسا يجيو عرفت بانه نساهم دايرين جلباب
لاعاينا فوتها عادي ودارنا تشوكاو فالاول لانه حنا يلبسو مستور لكن مش جلباب ""؟؟

علاه تشوكاو الله اعلم ؟؟

 

[أحبك ياجزائر]

رد: خطيبي تبدل كلامه معايا

سلام الله على الجميع
بالعكس اختي طلب منك العفاف والحشمة ،أحسن شيء طلبه منك ، وأجمل هدية طلبها منك
ولكن المشكل فقط في الطريقة أو طريقة الإقناع ، أظن أنك لا تحتاجين للبس عادي الآن لأنك سوف تكونين مع رجل ومن حقه يخاف على زوجته ن والدين يقول هذا الشيء ويثمنه ،فكيف نرفضه أختي ،
من الأول قلت عائلتكم خافت منه ، أأصبح الجلباب والحلال يخيف ،
أظنه شيء عادي ن فقط تحتاجون لنصح بسيط ، وخليك وأتركي العائلة جانبا لأنه مصيرك أنت لا عائلتك
انت من ستعيشين هذه الحياة ، وليست عائلتك،
حاولي بالتي هي أحسن أنت تتحدثي مع خطيبك في هذه المسألة ، ومن هنا أنا أقول طلب منك شيء جميل جدا وسامي قل في هذا الزمان التي أصبح فيه تبرج أهل قابيل وقتل أهل الدنيا بالتبرج منها كثر اللغط والهرج أختي
عودي إلى رشدك ، والكارثة تريدين الحرام على حساب الحلال
فسخ خطوبتك ولأجل حرام هنا الخلل
لا أنت مخطأة أدعي المولى أن يفرج عليك
وأهم شيء الحوار ثم الحوار مع زوجك أقول لا أهلك لأنه شيء حلال ، وهو الشيطان لا غير والنفس الأمارة بالسوء تزين لنا هذا العمل وتشوه صورة الجلباب
ولكن ليس العيب كله عليك بل على المجتمع للأسف.
​

 

[شمس الاصيل2]

رد: خطيبي تبدل كلامه معايا

انا قولك استفتي قلبك انا مانيش ضد الجلباب بصح اللباس ماهوش مقياس التدين نعرف متجلببة تخرج بالخفية على زوجها