السّلام عليكم
راني جيييتك
مافهمتش علاه منين نكتب رد طويل يروح التريسيتي في وجهي هههه, درك تأكدت بلي ماعنديش الزهر :d
قلت مالا نصلي ونرجعلك نخلي رد على اصولو
المهم بارك الله فيك حبيبتي على الموضوع المميز
وكنت قبل مدة رايحة نطرحو في قسم واش راك تهدر خاطر شفت واحد الظاهرة جهلتني
وراني كنت نهدر فيها في موضوع الأخ الأمين محمد
لكن ماسمحتش الفرصة
المهم هاد الظاهرة انتشرت بزااف في وقتنا, تلقاي وحدة تقولك انا النسا مايعجبونيش في المشطة تاع الشعر
نروح عند راجل خير, والتانية تقولك اواه نجيب راجل خير يصورلي عرسي ويحكملي لقطات ملاح
والتالتة تقولك نروح ندير الماكياج عند راجل خير من مرا
يعني تحيري صح, انا مرة وحدة قاتلي لاتحتاجي كاش نهار تروحي عند حفافة ننصحك روحي عند واحد اسمو يوسف
قلتلها اها زيديلي توفيق وعمار ومحمود وخلاص وهي كملت ليكيب
يعني الخيمار مدايرينو ريدو فوق الراس برك, واصلا مانستغربش, لما نشوف وحدة تجي للعرس بالحجاب
ومن بعد تدخل تبدل وتخرجلك بلبسة مرأة متزوجة في دارها تحشم تلبسها ( واسمحيلي على هاد الكلمة )
وشعرها مطلوق وزيد تروح تقابل ال DJ وتشطح
يعني عادي خلاص باه تنحي الخيمار قدام حفاف
هادا من جهة ومن جهة أخرى مانلومش هنا المحجبات برك حتى لي ماشي محجبة ومقصودة في الموضوع
خاطر نهار شفت حصة فيها وحدة راحت لصالون التجميل عند واحد ووحدها؟؟ يعني كن ماش الكاميرا كن راهي وحدها معاه
وزيد رقدت وعطاتلو وجها وهو حكملها وجها بيديه وبدا يخربش , بقيت نشوف انا
تشوكيت صدقيني, نفضل نبقا مكشردة ووجهي خايب ولا نخلي المخلوق هاداك يحط يديه على وجهي
وصدقيني كن تشوفيه بهاديك المشطة وهاديك اللبسة وهاديك الوقفة وهادوك السناسل في رقبتو
نتقيا قبل مانقرب ليه, وفي اللخر الفحلة تاعنا زادت تصورت معاه سيلفي
مافهمتش انا اعرضيه لعرسك وخلاص راكم وليتو فاميليا
والله شي يدوخ ويحير صح, وتاني من خلال كلامك تفكرت ظاهرة خلاف هههه
مرة رحت ندير صور تاع البطاقة الشخصية هادوك الكاريات الصغار ههههه وعندها بزااف هادي قبل مايظهرو الهواتف الذكية
تقدري تقولي في 2005 ولا 2006 ماشفيتش
مالا مع دخلت بقيت نستنا حتى تجي دالتي, نلقى في وحدة جات من ورايا وكبيرة شوي تجي 35 سنة هكاك
دخلت نحات الخيمار وخرجت شعرها المصبوغ بلصفر هاداك و زادت نحات العباية قعدت بغوب ملونة هكا
وزادت جبدت الصاكة تاع الماكياج ودارت ماكياج كومبلي الحواجب ولونتهم هههه
ومن بعد راحت للصوار قاتلو ارواح صورني وديري تصاور ملاح
وانا بحكم تما جات دالتي نلقى في المرأة واقفة ودير في هادوك اللقطات
وهي هازة شعرها على الجنب وتتعوج والراجل يصور , بقيت نشوف مافهمتش اذا راني في بوليود ولا هوليود ولا mbc action هههههه
وكي خلصت محات الماكياج ولبست حوايجها وخرجت عادي, أفلام الأكشن وماش هكا
يعني واش تحبي نقول , راني هدرت وهدرت حتى تعبت
ربي يجيب الخير وفي الأخير نقول وينهو الراجل هادا لي قاعد في دارو ويتفرج في بنتو راقدة في صالون التجميل
وراجل غريب عليها حاكملها وجها وبينو وبينها سنتيمترات قليلة
يعني الغيرة تدفنت خلاص ربي يرحمها
شكرا حبيبتي على الموضوع, وراني درتلك مجلة ماش جريدة :d و دبري راسك نتي لي لعبتيلي على الوتر الحساس
اقراي ورتحي هههه
سلآم
