مرتحتلوش

[مشكلتي]

علاه الراجل كي يحب يتزوج لازم يخير المرا الزينة
و علاه حنا البنات معندناش الحق نخيرو
مهما كبرت الوحدة فينا في بالي من حقها تدي الشخص اللي هي تاني يعجبها
انا راني في منتصف الثلاثينات يعني عمر بلاك يشوفو الأغلب فيكم كبير
هاذو الايام جاني خطيب من شخص نعرفو في النظرة الشرعية انا معجبنيش هذا الصح
كي شفت ليه مرتحتش و في نفس الوقت دارنا راهم يقولولي كشما بقالك تخيري
ايه علاه مش من حقي نخير العمر هذا مهوش معيار صح منيش نشوف لزيني انا مي راني نشوف لشعوري لاحساسي ايه معجبنيش
راهم يستناو باه نردلهم الخبر و راني نصلي في صلاة الاستخارة و راني عند نفس موقفي اللول معجبنيش
نتوما هنا كأعضاء حابة نعرف رايكم من حقي اني يكون الشخص اللي رايحة نرتبط بيه شخص انا كي نشوف لوجهو نرتاح نحس بالطمئنينة و لا لازم نروح نزوج كيما راهم يقولو دارنا مبقاش تخيري

 

[راضية حامدة]

رد: مرتحتلوش

و الله ما لقيت ما نقول
لازم ترتاحيلو اكيد هذا شرط
شوفي اختي تاخذي رايي خذي بالاسباب و شوفي
قبل ما تردي الخبر حاولي ترقي رقية شرعية و استخيري مرة اخرى و شوفي
ما تعرفي ربما يتغير رايك و تلقاي الراحة
و اذا يقيتي في نفس الحال وش نقولو
كل شي بمكاتيب الله

 

[الباندي]

رد: مرتحتلوش

ها وخيتي ..عندك كامل الحق تخيري واش تحبي و الشخص اللي تبغي ..حقك مينحيهلك حتى واحد

لوكان نجو نحكو بلغة الواقع 35 سنة نورمالمون راكي ام لولد على الاقل ..نعرف كلشي بالمكتوب وكل واحد وقسمته في الدنيا هاذي ..

انتي راكي تقولي مرتحتلوش من اي ناحية هل شكله لم يعجبك اقصد ماهوش بوGوص ولا كيفاه ؟ ولا جاتك رهبة منه هكذا وخلاص بدون لا كلام ولا سلام

اختي كم من واحد نشوفو ليه اول مرة منرتاحولوش و لكن لما نعشروه تتبدل النظرة و يولي محبوب و تروح هاذيك التخوفات اللي كانت من قبل و احيانا الاحساس يكون في محلو تشوف واحد مترتحلوش

زيدي اشوري عقلك و تذكري تفاصيل ذلك اليوم جيدا الذي كانت فيه النظرة الشرعية ..ممكن يكون مجرد تخوف فقط من القادم ..زعما اللي نرتاحولو من اول نظرة يخرج صالح زعما ؟

انتي ادرى بنفسك و لك حرية الاختيار اما ترفضي او تقبلي .. ..ان شاء الله اذا رفضتي متندميش لاني راني نشوف فيك رافضة هذا الشخص نهائيا ..و الله اعلم ...

تحياتي و ربي يــgد رايك اختي

 

[Salam Fleur]

رد: مرتحتلوش

السلام عليكم

بالنسبة ليا الراحة النفسية مهمة بزااف ... و صراتلي مرة تقريبا نفس حكايتك ... تقدملي واحد كي شفته ماارتحتلوش خلاص .. و قتلهم في الدار .. بصح في الدار الام ضغظت عليا رغم انه الاب تاعي كان يقولها خلي الطفلة هي لي تخير ...... فوت شهر يوميا نبكي .. كنت في كل صلاة ندعي ربي .. و فوضت امري كله اليه ...... و سبحان الله .... لما فات شهر والسيد يتقلش عليا الى درجة كان يقولي مانيش متاكد اذا نديك .. كي فات شهر قلته يا وليد الناس المهلة تاع التخمام تاعك راهي خلاصت يا اما تكمل يا اما ربي يسهل عليك ... و الحمد لله تهنيت منه ............ و عوضني ربي راجل باتم معنى للكلمة .... راه هو حياتي .....

شوفي اختي من حقك تخيري لي يعجبك لانه انتي لي رايحة تزوجي .... ادعي ربي سبحانه هو لي قادر على كل شيئ ...... و ربي يعينك و يرزقك بولد الحلال لي تحبيه و يحبك و يكون راجل معاك ​

 

[وردة أوراسية]

رد: مرتحتلوش

السلام عليكم

و الله يا اختي لو قلتي انك ما ارتحتي لشكلو و جاك ثقيل كنت نلومك و نقوك لالا ... الراحة بعد العشرة تبان مليح و الشكل عمرو ما يهم
لكن مادام درتي استخارة ما لقيت ما نقولك .......أما من ناحية العمر واحد ما يضغط عليك و يقولك واش بقالك تخيري حتى زواج الهم و الندامة مش مليح و ربي يجب ليه فيه الخير ​

 

[opira99]

رد: مرتحتلوش

بالنسبة ليا السن ليس المشكل لان في الاخييييييير الاعمار بيد الله ممكن ربي مكتبلك تعيش 18 سنة كما مكتبلك تعيش 100 سنة
أدعوكي لعدم التسرع , في الاخير القرار لكي أختي ولتعلمي أنك يجب أن ترتاحي لشريك حياتك والشعور في هذه الامور لا يخطأ والله اعلم

 

[مريم.]

رد: مرتحتلوش

نطلب من الله يزوجك هدا الشئ لقدرت نرد عليك ندعيلك بالخير والخير من عند الله يجيك

 

[بقايا إنسان]

رد: مرتحتلوش

من حقك ترفضي اختنا الفاضلة وأنتي صاحبة الرأي ومتنظريش لسنك حتى يقولولك فاتك الحال باش تخيري
لكن انا نعمل بقول رب العالمين(وعسى ان تكرهوا شيئا وهو خير لكم)ويقول ايضا (وعسى ان تكرهوا شيئا ويجعل الله فيه خيرا كثيرا)
استخيري رب العالمين ولي فيه الخير ربي يهديك ليه

 

[حكاية قمر]

رد: مرتحتلوش

السلام عليكم
عندك الحق حبيبتي ترتاحيلو ويعجبك شكله وأخلاقه وتسقسي ع كل شي يخصه من عمله ولتصرفاته مع الناس لانو هاذي راح تكون عشرة عمر وماتحكميش من اللقاء الأول ممكن بعد مدة تعجبي به علبيها لازم تسقسي عليه هي صح من الناحية الدينية سواء لرجل أو امرأة الشكل ما يهمش اذا كانت اخلاق عالية فأهم هو جوهر الانسان ولكن من ناحية أخرى هذا شيء مثالي وقليل لي ديره ولا لي تديره بنات اليوم يحوسو ع واحد مدرهم وبلوتوه وسكنته وولاد ليوم باغينها شابة
مي مانيش نقولك كون هكا انما كوني راضية عليه واهم حاجة ع اخلاقه ولا يهم سنك حبيبتي لا يهم لانو تغضيك لو كان دنيا باقية وماشي فانية ونت خصك تتزوجي هنا واه قبلي كما جا مي لا كل شي فاني وماترغميش نفسك لمجرد أنك فتي ثلاثينات الزواج وان كان نصف الدين فهو برضا التام لطرفين قبل كل شيء واي اعتبار
ادعو لك الله بان يرزقك الزوج الصالح الذي تسرك أخلاقه قبل شكله​

 

[Hakan]

رد: مرتحتلوش

ما رتحتلووش
من اول نضرة
كاين وحد الكاليتي نتاع بنات ما تصلي ما راهي مع ربي سواسوة ونهار يجيها وااحد ما ترتاحلوش
حاب نسقسيك هل انت راكي مرتااحة لنفسك اولااا ؟

وكاين الله يبارك صلاة وتقى وصلااح وهذي نهار ماترتااحش نقدرو نقولو هذي من عند ربي

خيري اي البنات انت
اذا كنت الاولى نقلك راكي تهفي في روحك والشيطان راهو داير فيها رجل على رجل وداير فيك حالة
اذا كنت الثانية نقول هذا من علامات صلاحك وربي ماهوش حابك ترتبطي بيه
وماهيش نهاية الدنيا كيما تتزوجيش​

 

[ماكانش]

رد: مرتحتلوش

لوكان كنتي صغيرة نقلك ماتقبليش بلا تخمام لكن شوي السن لازم يخليك تخممي تخممي وتخيري بين المفاسد مفاسد العزوبية ومفاسد زواجك بهاذ الشخص وايهما اشد واطغى

 

[لؤلؤة قسنطينة]

رد: مرتحتلوش

السّلام عليكم أختي الغالية
أولا صح عيدك وربي يهنيك ويوفقك ختي لعزيزة في كل امور حياتك
أما فيما يخص موضوعك , أو مشكلتك بعبارة أوضح رايحة نتكلم من جانبين
الجانب الأول , المودة والمحبة واجبة في أي زواج, هادا راهو زواج وشخص تعيشي معاه حياتك كاملة, ماش تخدمي معاه ولا تتعرفي عليه ليومين فقط, ربما المحبة ماتجيش درك وتجي مع الوقت وبعد الزواج , لكن هاديك الراحة النفسية لازم تحسي بيها اتجاه الشخص لي رايح يكون زوجك المستقبلي, وهنا مانحكيش على جمال الوجه , خاطر كاين ناس ربما ماعندهمش جمال بصح غير يتكلم ينسيك في كلشي, غير من كلامو الموزون ومن الأخلاق والتربية لي تحسيها من كلامو , وإذا الشكل مليح وما ارتحتيش, هنا مانلومكش , وخاصة بعدما درتي صلاة الاستخارة
يعني زيدي فكري, واذا شفتي نفور من جيهتك ربي يسهل على كل واحد و وماكانش مكتوب ببساطة
اما الجانب الثاني, هو حكاية ماعندكش الحق تخيري, وزعما عمرك تجاوز الثلاثين, حتى ولو عمرك 50 عندك الحق تخيري, و35 نشوفها عادي, اصلا كاين لي تزوجو في عمر العشرين وحياتها كامل تمرميد, وكاين لي تزوجت في 40 وعاشت حياة كي الملوك لي تحرمت منها مولات العشرين, يعني عندك الحق تمدي رايك عادي , والمشكل في مجتمعاتنا حنا غير توصل المرأة ل 25 سنة يبداو يقولولها غير اتزوجي لا يفوتك قطار الزواج, مافهمتش انا العقلية هادي, اذا على القطار خلي يروح, المشكل ماشي في القطار اذا يروح ولا نركب فيه المشكل القطار هادا وين مديني, اذا مديني للهلاك مانتزوج وما نركب فيه, يعني لازم تكون عندنا قناعة و ايمان, لي ماتزوجتش ماش معناها فيها عيب, كاينة وحدة من العائلة صدقيني تحطيها على جرح يبرا, تربية واخلاق وجمال وحشمة ولبسة مستورة وصلاة وكل شي, وللدرك راهي في ال 40 وماتزوجتش, كي نشوف الناس يتحسرو عليها ويقولو مسكينة, نقولهم كيفاه؟؟ مسكينة؟؟ نقولهم المرا هادي حبها ربي وشاف بلي ماكانش راجل يعرف قيمتها على هادي قعدت بلا زواج, يعني واش مكتبلك ربي فيه خير, كاين لي تزوجو وعاشو لمرار
على هادي ختي بعقلك خمي ومازلتي عندك الحق باه تخيري, هادي حياتك وهادا زواجك , خلي امرك لربي وكتري الدعاء والاستغفار
ولي فيه الخير ربي يكتبو ان شاء الله
ربي يهنيك ختي ويفرحك وكي ليوم نفرحو بزواجك ^^
تحياتي​

 

[همس الوُرود]

رد: مرتحتلوش

السلام عليكم

أختي بمآ أنك استخرتي فما سيحدث هو الأفضل

إن رفضت ففي رفضك خير وإن وافقت في ذاك خير

ربي يهنيك ويثبتك على الصواب يا رب~

 

[محمد العباسي]

رد: مرتحتلوش

و الله العظيم يا أخت, قضية الأهل مع بناتهم قضية منفعة للجميع, ليك و ليهم ألخاطرش والدي يعرفوا بلي البنت المستقبل نتاعها مع راجلها هو الوحيد ألي يسترها. و مهما كانت الحجج و مهما كانت الأفكار نتاعك تبقي في نظرهم غير مستورة حتى تتزوجي
النقطة الثانية هي ماعجبكش ظاهريا لوكان حوستي و سقسيتي عليه فلربما يكون خير من بزاف رجال. الدين و الخلق هو معيارين فاصلين إدا كانوا فيه الله يبارك.
ختي ربي يسهل عليك أمورك و يرزقك الزوج المثالي و شكرا

 

[خفيفة الروح]

رد: مرتحتلوش

لازم حببتي تخيري الراجل لي ترتاحيلو و نشاله يجي مكتوبك بسرعة

 

[¬Đỉaмơŋđ ✿]

رد: مرتحتلوش

السلآم عليكم ورحمة الله وبركآته

من حقك إنتِ تاني تخيري الإنسآن اللي تحبيه
العمر مش مقيآس خلآص كآين اللي أكبر بكثير وتزوجو وراهم بأولآدهم،كل عطلة فيها خير وكيما يقولو ناس زمآن:تزرب لخبزتك تاكلهآ عجين !
بصح أختي تسرعتي حكمتي عليه من أول نظرة،على الأقل لوكآن مديتيلو فرصة ومديتيها لنفسك مادام والديك علآبالهم لوكان تكلمتِِ معآه 3 مرات وكملي في نفس الوقت صلي صلاة الإستخآرة ومن بعد قرري
لأنو مرآت نزربو نحكمو على الإنسآن من أول لقآء،أو من أول موقف وحتى من خلآل الشكل الخآرجي بحكم خاطىء وكي نعرفوه مليح تتوضح الفكرة وتتبدل نظرتنآ ليه ..
الله يوفقك باش تـآخذي القرار الصح وربي يرزقك الزوج الصآلح اللي يسعدك ويهنيك

​

 

[امورة المنتدى]

رد: مرتحتلوش

يا ختي هادي حيآتك و نتي حتعيشي معآه مش أهلك

مش معناها كي لحقتي للثلاثينات تتزوجي بلي جا وخلاص

المهم راجل ! لالا

مش هو الراجل التالي ف الدنيآ قاع

شايفة روحك مازالك عند رايك وماكيش مرتاحة معاه ، ارفضيه وماتخلي حتى عبد يقرر في بلاصتك

بالاك ربي باعتلك مكتوب زوين مالحقش وقتو برك ♥

صبرآ برك ختي وربي يزين سعدك

 

[Ľă Mîšš HîBă]

رد: مرتحتلوش

استخيري رب العالمين ولي فيه الخير ربي يهديك ليه

 

[seifellah]

رد: مرتحتلوش

أظن أنه عليك التوفيق بين ما يقوله القلب وما يقوله العقل
وإن شاء الله نسمعوا منك اخبار جميلة

 

[إلياس]

رد: مرتحتلوش

كل شي بمكاتيب الله