رد: نقطة تحول في حياتك
السّلام عليكم
حبوبة قلبي ليدي, عندك واحد المواضيع يهبلو الله يبارك
ان شاء الله مزيد من الابداع
اما عن نقطة التحول في حياتي, انا عندي نقاط تحول في حياتي ماش غير نقطة ههه
لدرجة عديت بزاااف على حوايج, ولو نولي للوراء ونشوف شخصيتي نلقاها على مر السنين تبدلت اكتر من مرة
لدرجة كل مانكتسب حاجة جديدة في الحياة , تتغير بها شخصيتي تلقائيا
واكثر نقطة تحول في حياتي ولي خلاتني نحكم في ربي صح ونتأكد بلي الانسان كي يحكم في ربي مستحيل يخيبو
وخلاتني نعرف ماكانش حاجة اسمها مستحيل في الدنيا, مادام توكلت على ربي كل شي يجيك ساهل
المهم عام رايحة نجوز فيه الباك, كنت عازمة كيما باقي البنات ندخل بقوة من اول العام ونويت ندير دروس خصوصية لأول مرة في حياتي هههه
وهادا بإلحاح من والديا خاطر عام تاع باك وكل شي, وليت قلت لازمني في اول العام نشوف الاساتذة لي يديرو الدروس الخصوصية
نشفى عليها قريت اسبوع او اسبوعين فقط ولا 3 هكاك ومن بعد ظهر بلي عندي kyste وجاني في بلاصة حساسة تقريبا في العمود الفقري
يعني مانقدرش حتى نوض من الفراش , والسطر الله لا يشوف فيه مومن , تحسي عظامك يتقسمو على زوج , لدرجة وليت نشرب الدوا تاع السطر كي لحلوى لدرجة ماينفعش في السطر هاداك, ومن بعد كي رحت تقلبت قالولي بلي لازمك عملية جراحية بصح بحكم كان عندي باك ونقرا , قالولي حتى نخلص الباك, والمشكل الكيست هادا علاه يدير السطر؟ خاطر يتعمر حاشاك وكي يفرغ يروح السطر ونولي عادي
ماجا يفرغ قريب شهر وانا في الفراش ماناكل ما نشرب غير عرق بارد يصب من السطر, ومن بعد كي فرغ ورتحت شوي رحت نقرا عادي
لقيت الغاشي قريب يخلص الثلاثي الأول والاساتذة لي يديرو دروس خصوصية حبسو استقبال الطلبة, خاطر عدا الوقت وتحكمو لبلايص
وزيد الدروس فاتوني بزااف وقربو الامتحانات, وليت بقيت نخمم مع روحي قلت لوكان نبقى داهشة ونتفرج على الناس تقرا ماش رايحة تفرا ورايحة نعاود العام, وليت حطيت الثلاثي الاول على جنب, يعني نحضر كحضور برك مانهز والو في راسي قلت مادام فاتني نخليه ورايا ونبدا مع الثلاثي الثاني كلي جيت نقرا جديدة, ومن بعد كيج او الامتحانات ماحبيت نحفظ والو يعني خدمت بتفكيري الشخصي حسب واش لحقت من الدروس الأخيرة وقلت اذا جا معدلي نازل خلاااص ماكانش امل واذا انا هكا بدون مراجعة وجاني متوسط يسمى مازال امل
ونشفى عليها جاني معدلي 8 فاصل حاجة , ساع فرحت هههه قلت مازال كاين امل , هو دخل الثلاثي الثاني وانا ركزت معاه الف في الثانية
ونفس الشي في الثلاثي الثالث, بصح كنت كل امتحان نروح ماش حافظة عمدا ونخدم بواش في مخي برك غير باه نشوف مستوايا
ومن بعد غير خلصنا الثلاثي الأخير وحبسنا لقراية وليت للثلاثي الأول, جبت التمارين كامل لي يديروهم لبنات في ليكور ونعاودهم وحدي
ونعاود نحل الامتحانات تاع الاعوال السابقة, يعني مهما خلصنا لقراية كنت نجي لليسي من 8 حتى ل 4 وانا لتم نقرا مع لبنات
ومن بعد كي خلصنا المراجعة رجعت للحفظ, درك ختي كي تسقسيني وتقولي وكتاه بديتي تحفظي؟ نقولها بالاك في افريل, تتخلع ههههه تقولي نتي ماشي عبد, ومن بعد جبتها حفاظة ومراجعة وفي نفسا لوقت خفت الكيت هاداك يتعمر ونبقى طريحة الفراش ويروح كلشي يعني ربي لي ستر, ونشفى عليها ايام الباكالوريا نرقد على 11 هكاك بعد المراجعة ونوض على 3 نصلي الفجر وندعي ربي يوفقني ونبقى نحفظ ولا نراجع في المادة تاع هاداك النهار حتى خلصت والحمد لله, يعني سبحان الله غير خلصت ويتعمرلي من جديد ونطيح في الفراش
ونشفى عليها نهار خرجو نتائج الباكالوريا الشعب كامل يفرح غير انا كنت في الفراش نتوجع, وكنت حاطة بلي قادر ننجح وقادر لالا
مع اني متأكدة بلي خدمت في الامتحان, وكي خرجت النتائج ولقيت روحي ناجحة وبمعدل 13.31 خلعت جبتها غير بكا
وكانت اول مرة نجرب فيها دموع الفرح, خاطر ماتوقعتش ننجح بالنتيجة هاديك
ومن بعد درت العملية ورتحت ورانيه نا معاكم نثرثر ههههههه, يدهرلي كن حطيت الرد تاعي في موضوع خيرلي ههههه
وكملاحظة: العام هاداك كنت كل مانخرج من الدار الصباح ونروح نقرا وبحكم الليسي كان يتطلب 15 دقيقة مشي هكاك, كنت نمشي وندعي ربي من باب الدار حتى باب الليسي, وكنت نشفى عليها نقول ياربي نجحني وندي الباك , ومن بعد قلت انا داعية داعية علاه ماندعيش ننجح وبمعدل مليح ههههههه, وبالفعل اتخيلي كل يوم مع نخرج من باب الدار نبقى غير نردد يا ربي نجحني في الباكالوريا وبمعدل مليح
المهم كي تجي تقراي اقراي ورتحي راهي قصة حياتي هنا ههههههه
شكرا حبوبتي على الموضوعو وماتخافيش راني نولي ان شاء الله باه نحطلك الجرنان الجاي
والعبرة من هاد القصة انو كي تحكم في ربي حاجة ماتوقف في طريقك والله
تحياتي
