مشكلتي صحية أرجو النصح اخواني و أخواتي

[مشكلتي]

السلام عليكم و رحمة الله و بركاته


مشكلتي بسيطة ما نطولش عليكم لكن الحل صعيب و طلبت النصح لأني عييت من التفكير و اعيش صراع داخلي

انا فتاة من الشرق عمري بين 25 و 30 سنة عازبة ..... إبتلاني الله بمرضين و الحمد لله لا اعتراض على حكم الله

المرض الاول هو السكر النوع الاول و راني متعايشة معاه و الحمد لله كاين الدواء

أما المرض الثاني نغص عليا معيشتي .... منقدرش نشرحو بالتفصيل لكن نتيجته أني و للأسف نسبة الانجاب عندي ضئيلة ان لم أقل منعدمة حسب رأي الطبيب

واش ندير انا دكا ؟؟؟ نعيش حياتي عادي كيما البنات و لا ننسى امر الزواج نهائيا ؟

مش من حقي نحب ؟؟ و نطلب العفاف و السترة ؟ و لا نتصرف عادي .... و اذا كتب ربي نتزوج و نقول لزوجي حقا راني منجيبش الاولاد ؟؟ شكون يقبلها هادي

واش ندير ؟؟

مؤخرا و بلا قصد و نية مسبقة .....تعرفت على شاب في النت و خفت الموضوع يكبر لانو كاين اعجاب و مودة بيناتنا ... نقطع العلاقة قبل ما تكبر ؟ لانو ما عندهاش مستقبل

مستحيل نكذب عليه و نطور العلاقة لحاجة رسمية .... نفضل نقطعها دكا الله غالب مش نيتي نتعرف عليه و الله صدفة

أفيووني و كل واحدة تحط نفسها في بلاصتي .... أنقذوني من هذا الموقف كرهت من التخمام مخي رح يتحرق

و شكراااااا مسبقا

​

 

[GI Joe]

رد: مشكلتي صحية أرجو النصح اخواني و أخواتي

و عليكم السلام
sah ki nhot rohi fi plasstek waaa3ra,
makanch haja pire
wahda na3refha le mm cas 24ans, rahi theb wahed w yhebha mais galelha lazem ba3d manezewjou nzid 2eme femme 3la louled :-o:-o
khamet khamet wellat gatli n3ich kima keteb rabi, nchllh yerze9ni w khlass

w nti thani khami hakda, rah kolech bel mektoub, sah c raaaare radjel ye9bel mais قدر الله و ما شاء فعل
nti li yji yet9adem ahkiwlou f sujet ,
3la hsseb les mentalités thani, kayen les personnes hadouk l metkhalfin, li dayrin mra matjibech mahich mra, w ykhafou men hadrett nass ,
w kayen li yahtarem le cas w ya9bel y3ich sans enfants wala yetkeffel

hada li binetkom"مودة "
allah ysahel
​

 

[لؤلؤة قسنطينة]

رد: مشكلتي صحية أرجو النصح اخواني و أخواتي

السّلام عليكم
ختي لعزيزة ان شاء الله راكي لاباس؟؟
ربي يشفيك ان شاء الله غاليتي
اولا نحيي فيك هاداك الصبر, لأنك قلتي الحمد لله وقابلة بالشي تاع ربي سبحانو نقولك بارك الله فيك
وهكا تكون بنت الاصول والبنت المسلمة على حق, الحاجة تاع ربي عمرو العبد مايكره منها
لما ربي سبحانو خيرك نتي من بين مجموعة من الناس وابتلاها بالمرض ماش هكاك برك
اكيد ربي عندو حكمة وحاب يشوف هاد الانسانة اذا تتقبل المرض هادا وتصبر وتقول الحمد لله ولا تتكبر وتبدا تشكي
المهم مرض السكري راكي قلتي لقيتيلو علاج وربي يشفيك ان شاء الله غاليتي
اما المرض الثاني انا نقول لختي استرخي خلاااص وارخي اعصابك, مكتوبك حبيبتي يلحقك ولو حتى في راس الجبل
شوفي نقولك حاجة واسمعيني مليح, نتي قبل ماتزادي في هاد الدنيا ربي مكتبلك كااامل واش رايح يصرالك
سواءا من مرض ولا زواج ولا اي شي, اذا ربي مكتبلك يجي نهار وتتزوجي مالا علاه تقلقي روحك وتحرقي اعصابك
ريحي روحك حبيبتي ومكتوبك يلحقك للدار, اما اذا ربي ماكتبلكش تتزوجي لوكان حتى تكون صحيحة ماتتزوجيش
واصلا عيب عليا نقول كن جيتي صحيحة خاطر مع ربي ماكانش يأس, اذا ربي سبحانو يخلق ملايين وملايين حشرات تمشي على يدينا
وحنا مانشوفوهمش فمابالك بالشفاء؟؟ يعني حاجة سهلة جدا جدا بالنسبة لربي سبحانو, بصح واش تحتاج الحاجة هادي؟
تحتاج دعاء والحاح منك حبيبتي, انا صح ننصحك ونوقف معاك بصح ماعنديش القدرة باه نديرلك حاجة
على عكس الله سبحانه وتعالى راه ويقولك يا فلانة بنت فلانة هزي زربية وصلي زوج ركعات وراني هنا نحققلك كل امنياتك
يعني وين تلقايها هادي, سواءا شفاء ولا زواج بيد ربي سبحانو
هادا من جهة اما حكاية تخافي مايقبلش بيك راجل, شوفي حبيبتي من حقك ككل انثى تتمناي تتستري في دارك مع شخص
يعزك ويخاف عليك وتعيش معاه اسعد ايام حياتك, اذا ربي شافلك في الزواج خير رايحة تتزوجي واذا ماجاكش نصيب
ماتقلقيش فربما هادا شر بعدو عليك ربي سبحانو, الزواج ماش دايما جنة ساعات يكون سبب للتعاسة
المهم لا علينا,و حكاية الفايس بوك, غاليتي وحبيبتي ماتخليش الشياطن يلعبو بيك, نتي راكي ربما في وضع حساس
واي شخص تشوفيه تقرب ليك تبداي تبني في احلام بصح قادر هاد الناس راهم يستغلو نقطة ضعفك ويلعبولك بعقلك
قادرة شخص ناوي الشر وغير يشوف بلي عندك مشكل يقولك راني قابل بيك مهما واش كاين غير باه يلعبلك على مشاعرك
غير الحب في الفايس بوك بالاكي منو والله يديوك للهلاك ونتي في وضع حساس حبيبتي
غير هاد الشي علاه تقلقي في روحك بالاك مستقبل زاهر راهو جاي ونتي لاخبر
بالاك بعد ايام يجي شاب ناضج وواعي يطلب يدك للزواج وتكوني حلالو وبعد اعوام ربي يكتبلك الذرية الصالحة
اتفاءلي خير حبيبتي والله غير الخير يلحقك ان شاء الله وبإذن المولى
اتوكلي على ربي وعيشي حياتك كأي بنت خاطر ماناقصك والو, واذا على المرض واش فيها؟؟
انا تاني راني كن مانديرش الصباح بخاخة الربو مانقدرش نروح نقرا نورمال وعادي
ربما موضوعك حساس كتر على تاعي بصح ماكانش يأس مادام لي يرعى امورنا هو الله القادر على كل شيء
ربي يهنيك حبيبتي ويوفقك ويفرحك وتوصلي لواش حابة ان شاء الله
تحياتي وسامحيني على الرد الطويل ​

 

[الزهرة الحمراء]

رد: مشكلتي صحية أرجو النصح اخواني و أخواتي

السلام عليكم أختي
ربي يشفيك غاليتي
أختي العفسة لي عجبتني فيك أنك صابرة على الإبتلاء وهدا هو الصح يعني ماجيتيش هنا تحكي وقلقانة من المرض تاعك بالعكس راكي قابلتيه بكل صدر رحب وهادي هي روح المؤمن حتى عند الإبتلاء يحمد الله عزوجل على خاطر علابالو انو ربي سبحانه لا يبتلي عبدا إلا اذا احبه والله يعلم ونحن لا نعلم ...يعني أختي في مرضك حكمة لا يعلمها الا الله سبحانه وتعالى
وبالعودة لواش قلتي اختي من حقك تحبي ومن حقك تطلبي العفاف والستر ولو... مرضك مايمنعكش أنك ديري لعفايس هادو ولكن اختي يبقى هدا مكتوب ربي ولي مكتوب عالجبين تشوفوا العين يمكن ربي كاتبلك تتزوجي بشخص رايح يحطك في عينيه ولكن مازال مالحقش الوقت والله اعلم
أختي ماتقنطيش من رحمة ربي وين تحسي روحك ضايقتلك وماكيش قادرة روحي اتوضاي وصليلك 2 ركعات وفي سجودك فرغي قلبك لربي هو يسمعك أحسن منا ادعي وادعي وان شاء الله أختي ربي يفرج علييك
أختي انا من بلاصتي مانقدر نديرلك والو غير ندعيلك وهو اضعف الايمان
ربي يفرجها عليك اختي ويرزقك الزوج الصالح لي يصونك ويخاف عليك
دمتي غاليتي في رعاية الله وحفظه ​

 

[Hakan]

رد: مشكلتي صحية أرجو النصح اخواني و أخواتي

السلام عليكم اختي والله من بين جميع المشاكل
نقدر نقول انو مشكلة صعبة الحل لاكن هي ماتحتاجش حل بقدر ما تحتاج
ايمان وصبر وفقط مشكلتنا يااختي هي نظرتنا السلبية للحياة
ونتوقع غير السيء ربي سبحانو ابتلاك لحب
لكن كما دايما نآمن انو الرجل اذا تعلق بفتاة احبها بكل شيء فيهااا
وكما انت لازم تطلبي العفاف والله يرزقك ربي براجل يقبل بيك باي شيء فيك
قادر يتزوج بيك وممكن حتى تتافقو اذا لم تنجبي انك تتكفلي بيتيم ولا زوج
لوجه الله والله كاين بزااف نااس اما عن السكري نضن تتعايشي معاه وزوجك يتعايش معاه
اما قضية الفايسبوك يااختي الفايسبوك لا يحل مشكلاا
انت لازم تتواصلي مع مولاك واللي فيها خير ربي يقدمهالك مالازمش تاياسي
وتقبل اخر الحلول يعني بلاك ربي يشوفلك خيراا من معارف الفايسبوك
ونزيد نحكي لاختي اغلب علاقات الفايسبوك ماهيش جدية
ربي يفتح عليك ويفرج عليك من طريقة كلامك فهمت بلي انت عقليتك وطيبة قلبك كبيرة
لانو تسلسل كلماتك يدل على ذالك ربي يهنيك ويفتح عليك ننتظر اخبارا مفرحة
ولا تعدي رجلاا باشياء وهمية باسكو ممكن يجرحك وتجرحيه اذا اكتشف انك مريضة
هذا اذا كان جدي في العلاقة نتاعو ربي يفتح على ختي..

 

[Perle Blanche]

رد: مشكلتي صحية أرجو النصح اخواني و أخواتي

السلام عليكم
الصلاة و السلام عليك حبيبي يا رسول الله
المعذرة بلاك ردي رايح يكون كالتالي _الله يفرحك و يلاقيك بالشخص اللي يفهمك _
في بالي لي قالوه الاعضاء لي قبلي رايح يفيدك خوذي بنصيحتهم
الله يسهل ختيتا
​

 

[Salam Fleur]

رد: مشكلتي صحية أرجو النصح اخواني و أخواتي

السلام عليكم

الاعضاء ماشاء الله راهم في القمة ... ماعنديش واش نويد على واش قالوا

ربي مايخلي حتى واحد شدي فيه و احسني الظن به ... راه قادر على كل شيء .... داومي الاستغفار فهو مفتاح تحقيق الاماني

و ربي يعطيك ماتمناي

​

 

[حكاية عطر]

رد: مشكلتي صحية أرجو النصح اخواني و أخواتي

ربي يشافيييييييييييييييك ان شاء الله

 

[ولــــد الـDZ]

رد: مشكلتي صحية أرجو النصح اخواني و أخواتي

باختصار اختي
كيما يقولونا والدينا ديما... اللي خلق ما يضيع
قوي ايمانك واصبري ما تدري واش اللي جاي لغدوا
والشي اللي راكي تطلبي فيه ماشي حرام بالعكس ان شاء الله تلقاي ولد الحلال اللي يوقف معاك
الشي اللي كنت حاب نقولهولك..قالوه الاعضاء اللي قبلي كفاو و وفاو ما شاء الله عليه
...وربي يشافيك
​

سلام

 

[جوزاء]

رد: مشكلتي صحية أرجو النصح اخواني و أخواتي

ربي يشفيك يا اختاه والحمد لله على كل شئ لا انصحك بان تنسي التفكير في الزواج قريبتي كانت تعلم انها لن تنجب ابدا وكان اهل زوجها يعلمون وهي الان تعيش حيا مستقرة والحمد لله المهم ان تصارحي الشخص الدي سيتقدم لخطبتك فقط وعندما يكون يحبك سوف يقتنع بادن الله
وفقك الله

 

[منايا الجنة]

رد: مشكلتي صحية أرجو النصح اخواني و أخواتي

ربي يشافيك اختي و ديري مهما كانت مشكلة ديالك عندها حل عند ربي سبحانه اكثري من الاستغفار و الدعاء ربي يفرجها عليك

 

[وردة أوراسية]

رد: مشكلتي صحية أرجو النصح اخواني و أخواتي

و عليكم السلام و رحمة الله و بركاته

الله يشفيك و يعافيك اختي داااائما خلي أملك بربي كبير و ان شاء الله ربي يقدملك لي فيه الخير

و لا تنسي قوله صلى الله عليه و سلم : ما أنزل الله داء إلا أنزل له شفاء
​

 

[مريم.]

رد: مشكلتي صحية أرجو النصح اخواني و أخواتي

من حقك تتزوجي طلبي ربي يسهللك والله ربي مايضيعك كاين رجاال تزوجو بمعووقات وعايشين وراضيين بقسيمة الله اهم الشئ الرضا اسال الله رب العرش العظيم ان يسهلك في الستر والعفة ​

 

[همس الوُرود]

رد: مشكلتي صحية أرجو النصح اخواني و أخواتي

السلآم عليكم

ربي يشفيك أختي صح وآعرة بزآف ~ لكن يآ أختي شحآل من وحدة تزوجت وهي مآتجيبش أطفآل

شحآل مرة شفت هذي الحكآية تصرآ وتلقآي الفتآة هذيك تتزوج وعآدي

مآعليش اختي هذآ إبتلآء من عند ربي لازم عليك تصبري

عندي وحدة قريبتي متزوجة لمدة دآمت عشرآت السنين بلآمآتجيب أطفآل لأنهآ عقيمة وقآلولهآ مستحيل تجيب أطفآل

ولأنهآ صبرت على هذآ الإبتلآء صدقيني دوك رآهي بتوأم مآشآء الله

هذآ أمر الله وإن أرآد لشيء أن يكون سيكون بإذنه عز وجل فلآ تقنطي من رحمة الله

واصبري لأن الله ابتلآك والله لآ يبتلي إلآ من يحب ..تحيآتي ~واحترآمي لك أختي

سلآم^^​

 

[مستر ميدو]

رد: مشكلتي صحية أرجو النصح اخواني و أخواتي

اختي الانجاب امر من عند الله. انت ديري في حساب وربي سبحانوا عندو حساب تاني
توكلي علي ربي انت مزال متزوجتيش وتقولي منجيبش الاولاد ربي كبير. سبحانوا