كبرت بنتي ... خلاص نزوجوها

[جليلوس]

السلام عليكم
اسعد الله صباحكم بكل خير
واش ياخي لاباس ... راكم ملاح
ارواحو تشوفوا موضوعي اليوم
راه باين من عنوانو ..
فاشلة في دراستها.. خلاص زوجوها..
راهي كبرت بنتي و راه في عمرها 15 سنة اواه لازم تتزوج..
نشوفولها راجل ... خلي نتهناو منها ... الطفلة هم في الدار
البنت مالازم تهتم غير بزواجها..لاشهادات ولا دراسات..
فتاة بعمر ال16 سنة وعندها طفل..
دير دارها وتتهلى في ولادها ...

عبارات بزاااف في هذا الموضوع..
يحبسولك راسك ... :down::down:
والله تغيضك عمرك تلقى طفلة بعمر الورد..
متزوجة وتحمل مسؤوليات على عاتقها
زوج ومنزل وحياة وأطفال..
وهي مازالت صغيرة ماعاشت والوا من دنيتها..!
وهل الطفل يربي طفل..!؟:s

وأي أهل عاقلون..
يرضاو على بنتهم هاد الشي..
لا وفوق هادا ..
كاين ناس هومالي يسعاو لهاد الزواج..:down:
أي عقول هذه..
فتاة بعمر ال16 سنة تتزوج رجل بعمر ال40 سنة ومافوق..:-o
اي منطق يتقبل هذا التصرف..
وأي رجل يرضاها على نفسه ان يتزوج فتاه..
بعمر ابنته او اخته..

راح نحبس هنا خلاص راسي ضرني
اسكو راني على صواب ولا غي نشكل في الهدرة :-r
نخليلكم المجال لردودكم
خيكم جليلووو
​

 

[لؤلؤة قسنطينة]

رد: كبرت بنتي ... خلاص نزوجوها

السّلام عليكم أخي الكريم ^^
تمّ الاعتماد وموضوعك شباب الله يبارك, والله جاني في بالي الموضوع هادا قبل ايام
خاطر درك في وقتنا طفلة 20 سنة مازالت ماتزوجتش راحت عليها ههه
حتى لما نجي نحكي مع البنات يقولولي كاش جديد؟؟ نقولهم راني نقرا ولا مثلا رحت لبلاصة معينة
يقولولي علاه هادا جديد؟؟ نولي نقولهم بصح فلانة تزوجت, يقولولي هادا هو الجديد هههه
المهم لا علينا ,نتا يا خويا في موضوعك حبيت توصلنا الفكرة تاع الآباء والأمهات لي غير تكبر بنتهم شوي
يزربو يمدوها يا لوكان يزوجوها بكارطونة المهم تروح من الدار وخلاص, كلي راهي عار ولا معرف واش
كاين حتى لي يزوج بنتو ويمدها وهي في عمرها عام, وغير تلحق 14 ولا 15 يمدها ولا نقول يطيشها بعبارة افضل
لكن نظن هاد الفكرة نقصت دركا مقارنة بوقت بكري, خاطر دركا ولات الطفلة حتى تكمل قرايتها بعقلها
وتخدم بعقلها باه تتزوج يعني ولا عندها حرية التعبير ماش كيما بكري
وزيد صراحة بنات بكري وبنات درك ماش كيف كيف, تلقى بكري مولات 14 تهز دار كاملة
ودرك بنت 30 مازالت ماتعرفش حوايج بزااف, لكن هادا ما يعنيش نشجع الزواج المبكر للبنات
خلي الطفلة تقرا وتتعلم والزواج راهو جاي منين يكتبو ربي, يعني مافهمتش النقص هاداك لي عندهم
تاع الطفلة لي ماتتزوجش يديرو عليها حكاية
ربي يهديهم برك
بارك الله فيك خويا على الموضوع
اعتذر كنت حابة نجاوب احسن من هكا
بصح كاشما نتفكر راني نولي ان شاء الله
تحياتي​

 

[adel._dz]

رد: كبرت بنتي ... خلاص نزوجوها

هيه باينة
مادام كاين ناس حاط الأنثة عار في البيت ماعابلهمش مقولة قوم والا طلق
ماعابلهمش بلي بنت واحدة ترباها وتحسن ليها تكون سبب في دخول الجنة
عندي واحد يقربلي رزقو ربي ربعة ذكورة ماشاء الله
كي هو كي الزوجة تاعو يدعو ربي ليلا نهار يرزقهم ربي ببنت وهكذاك كانت

موضوعك تفكرت فيه آية واذا المؤودة سئلت بأي ذنب قتلت
هذي مولات 16 سنة دفنوها وهي حية

 

[جليلوس]

رد: كبرت بنتي ... خلاص نزوجوها

السّلام عليكم أخي الكريم ^^

وعليكم السلام ورحمة الله وبركاته
اهلا بيك نورتي اختي لؤلؤة قسنطينة ... عساك بخير

تمّ الاعتماد وموضوعك شباب الله يبارك, والله جاني في بالي الموضوع هادا قبل ايام

شكرا لإعتمادك بارك الله فيك
يعطيك الصحة

خاطر درك في وقتنا طفلة 20 سنة مازالت ماتزوجتش راحت عليها ههه

والله غير عندك الحق .... هههههه
مي مازال ربي يفرج ان شاء الله وكلش بالمكتوب

حتى لما نجي نحكي مع البنات يقولولي كاش جديد؟؟ نقولهم راني نقرا ولا مثلا رحت لبلاصة معينة
يقولولي علاه هادا جديد؟؟ نولي نقولهم بصح فلانة تزوجت, يقولولي هادا هو الجديد هههه

هههههه التقرعيج داير حالة ... :d

المهم لا علينا ,نتا يا خويا في موضوعك حبيت توصلنا الفكرة تاع الآباء والأمهات لي غير تكبر بنتهم شوي
يزربو يمدوها يا لوكان يزوجوها بكارطونة المهم تروح من الدار وخلاص, كلي راهي عار ولا معرف واش
كاين حتى لي يزوج بنتو ويمدها وهي في عمرها عام, وغير تلحق 14 ولا 15 يمدها ولا نقول يطيشها بعبارة افضل

ايه هادي هيا ... الزواج هادا مكتوب
بصح كاين تاني حاجة ... اسكو هاد البنت قادرة على تحمل مسؤولية اسرة بأكملها وهي في هذا السن
اواه ماشكيتش :down:

لكن نظن هاد الفكرة نقصت دركا مقارنة بوقت بكري, خاطر دركا ولات الطفلة حتى تكمل قرايتها بعقلها
وتخدم بعقلها باه تتزوج يعني ولا عندها حرية التعبير ماش كيما بكري

مي كاين وحدين نعرفهم والله غير زوجوهم في سن 18 وهي لا تعرف للمطبخ مين يدخلوله
درك تلقاها عندها 3 دراري واختها في سن 35 لم يلحقها القطار بعد
وا اسفاه على وقت وصلناه .... بصح واش نقولوا هادا مكتوب ربي سبحانو

وزيد صراحة بنات بكري وبنات درك ماش كيف كيف, تلقى بكري مولات 14 تهز دار كاملة
ودرك بنت 30 مازالت ماتعرفش حوايج بزااف, لكن هادا ما يعنيش نشجع الزواج المبكر للبنات
خلي الطفلة تقرا وتتعلم والزواج راهو جاي منين يكتبو ربي, يعني مافهمتش النقص هاداك لي عندهم
تاع الطفلة لي ماتتزوجش يديرو عليها حكاية
ربي يهديهم برك

هاداك مانقولوا غير ربي يهدي ويداوي الحال
باسكو هاد الناس سبحان الله ... فهامتهم بالمقلوب .... :s

بارك الله فيك خويا على الموضوع
اعتذر كنت حابة نجاوب احسن من هكا
بصح كاشما نتفكر راني نولي ان شاء الله
تحياتي​

لالا بالعكس اعجبني ردك يعطيك الصحة
بورك فيك ومرحبا بيك في اي وقت
فالموضوع لكم وتحت تصرفكم
دمتِ بخير

 

[جليلوس]

رد: كبرت بنتي ... خلاص نزوجوها

هيه باينة
مادام كاين ناس حاط الأنثة عار في البيت ماعابلهمش مقولة قوم والا طلق
ماعابلهمش بلي بنت واحدة ترباها وتحسن ليها تكون سبب في دخول الجنة
عندي واحد يقربلي رزقو ربي ربعة ذكورة ماشاء الله
كي هو كي الزوجة تاعو يدعو ربي ليلا نهار يرزقهم ربي ببنت وهكذاك كانت

موضوعك تفكرت فيه آية واذا المؤودة سئلت بأي ذنب قتلت
هذي مولات 16 سنة دفنوها وهي حية

اهلا بيك خويا عادل نورت
وي خويا شفت كيفاه ربي يهدي ماخلق
ايه نساو بلي ممكن تكون سبب دخول احد والديها الى الجنة
وكيما قلت كاين لي مشتاق نعمة البنات في البيت .... يا لي عاف اللقمة يشتاقها
الله يسترنا من اللي جاي وخلاص ... الله يهدينا ويثبتنا
شكرا لتواجدك اخي

 

[racha001]

رد: كبرت بنتي ... خلاص نزوجوها

oui c vari

 

[جيهان جوجو]

رد: كبرت بنتي ... خلاص نزوجوها

السلام عليكم ورحمة الله وبركاته والله الموضوع اللي درتيه مهم جدا وحساس بارك الله فيك كل هاذ الكلام اللي قلتيه كاين منه ومنتشر ياسر عندنا ........صراحة راي كيما راي الاعضاء وحنا عندنا جارتنا بنتها عمرها 14 سنة خرجت من القراية وراحت للسونطر وزيد عام ولا عامين تلقايها تزوجت والله مجتمعنا هذا معرفتش كيفاش ولا. لازم على الاهل هوما اللي يشجعو ولادهم على الدراسة وحب التعلم باش غيكبرو يولو اهلهم يفتخرو بيهم ويولو عندهم مستقبل والسلام عليكم

 

[جليلوس]

رد: كبرت بنتي ... خلاص نزوجوها

oui c vari

وي راكي تشوفي ... ربي يجيب الخير
والهداية يارب للجميع

 

[جليلوس]

رد: كبرت بنتي ... خلاص نزوجوها

السلام عليكم ورحمة الله وبركاته والله الموضوع اللي درتيه مهم جدا وحساس بارك الله فيك كل هاذ الكلام اللي قلتيه كاين منه ومنتشر ياسر عندنا ........صراحة راي كيما راي الاعضاء وحنا عندنا جارتنا بنتها عمرها 14 سنة خرجت من القراية وراحت للسونطر وزيد عام ولا عامين تلقايها تزوجت والله مجتمعنا هذا معرفتش كيفاش ولا. لازم على الاهل هوما اللي يشجعو ولادهم على الدراسة وحب التعلم باش غيكبرو يولو اهلهم يفتخرو بيهم ويولو عندهم مستقبل والسلام عليكم

وعليكم السلام ورحمة الله
اهلا بيك اختي جيهان جوجو نورتي
الله يبارك فيك .... وي كاينة وتكون رانا في مجتمع لا يعرف المستحيل
تقبل كلش منه ... :s:s صراحة يعجز اللسان عن الكلام ...
الله يهدينا ويثبتنا ... هادا مانقولوا
شكرا لتواجدك

 

[AmiR@RoRo]

رد: كبرت بنتي ... خلاص نزوجوها

السلام عليكم
والله يا جليلو مالقري التقدم لي رانا فيه وكلشي مزال كاين فئة تخمم بهاد العقلية
يلقا بنتو بدات تبان شوي خلاص يبدا يدور ويحوسلها على راجل باه يتهنى منها
وكما نقولو حنا تحسب كرفي راه فوق راسو يبدا يحوس غي لي جا يطيشهالو المهم يتهنى منها سيرتو الا كانو عندو بنات بزاف
تشوفهم مزال في عمر الزهور ريربو زهور تحير:s
وحدة كانت تسكن قدامنا بيناتنا دار برك
هي تزوجت هادي 3 سنين وتخيل كي تزوجت كانت حتى 17 وماكملتهاش حنا حرنا فيها
والله تشوفها ما تقنعش كامل ماتعطيهاش حتى 17 تقول شي 14 سنة ولا
ودرك راه عندها بنت في عمرها عامين كي تشوفهم برا تقول ختها ماشي بنتها
وكما قالت مريم بكري حتى كانو شاطرات وكلشي يخدموه مش كما تع درك غي الشيكي والتفنيين
انا جداتي حكاتلي قاتلي كنت ندير الصوف ونحلب البقر ونسرح الغنم وندير وندير انا عمبالي كانت كبيرة لحتى قاتلي كنت 13 سنة خلعت ههه
+تزوجت مولات 14 سنة حتى ما حبوش يعقدولها فلول خاطر صغيرة بزاف ومالقري كانت صغيرة بصح دارت الدار وربات الولاد كانت قادره على شقاها مش كما تع درك 14 سنة مازالت ترقد مع ماماها تخاف هههه
الله يهدي ما خلق العباد لي هكا تحير فيهم يحوسو يتهناو من بناتهم بلي كان
ربي يصلح الاحوال
يعطيك الصحة جليلو عالطرح الجيد:regards01:

 

[Malika Tlm]

رد: كبرت بنتي ... خلاص نزوجوها

السلام عليكم اخي
والله كانش عباد صح يحبسولك مخك بتفكيرهم
والله يا اخي يغيضوني كي نشوف طفلة صغيرة صحاباتها
مزالهم عايشين حياتهم يقراو يضحكو ناشطين
وهي مسكينه مسؤولية الرجل والدار و الاطفال
هنا كاين اراء مختلفة كاين طفلة هي تحب تتزوج ويكون الرجل
كبير تقولك مايهمنيش المهم عندو الدراهم ويعيشني مليح
الحالة التانية كاين مسكينة لي يغصبوها والديها علي الزواج
ويلا قالت لا يا ويلها وعلاه حرام والله حرام يطفيولها عمرها
الله يهدينا يارب
مشكور اخي المحترم تقبل تحياتي الخالصة

 

[جليلوس]

رد: كبرت بنتي ... خلاص نزوجوها

راجعلكم للرد عليكم ... فمعذرة من الجميع

 

[امورة المنتدى]

رد: كبرت بنتي ... خلاص نزوجوها

موضوع قآسني في الصميم :d !

بزآف بنات نعرفهم متزوجين وقل من 18 سنة !

وليد عمي اصلآ تزوج هآد الصيف بوحدة 17 سنة :-r

وانآ 20 سنة ونحس بشعور البوران :tongue02:

 

[الزهرة الحمراء]

رد: كبرت بنتي ... خلاص نزوجوها

السلام عليكم أخي
يعيطك الصحة على ا لموضوع تاعك ولي راهو شايع بزاااف
والله يا أخي هاذي ظاهرة وين رانا نروحوا وين راهي تزيد درك عدنا نلقاو وحدة مسكينة صغيرة خلاه وكيما قلت انت مازالها طفلة ماتوفقتش في قرايتها تحبس تقعد فالدار والديها يقولولها مادام ماكانش قراية ازوجي خيرلك واتستري في دار راجلك الطفلة مسكينة ماعندها ماتقول تقبل وفراات بالاك تلقاها اصلا معنى الزواج ماتعرفوش يزوجوها بأي واحد يجي يخطبها تروح عروسة تقعد شهور من بعدة يبداو المشاكل وتطلق والوالدين تلقاهم يندبوا ويقولولك بنتنا صغيرة رجعتلنا مطلقة للدار لبنات لي في عمرها هداك وين يزوجوا وهي مسكينة مطلقة وهدا كامل يرجع للوالدين وعلى سيرة الموضوع تاعك فكرتني في شحال من حكاية اول حكاية فكرتني في وحدة نعرفها قدي كي كنت انا رايحا نفوت شهادة التعليم المتوسط هي زوجت ولكن هي كان عندها ظروف لي دفعتها للزواج هذا وهو انوا الاهل تاعها مطلقين وكانت عايشة عند يماها من بعدة الام توفاة قررت انها تزوج والحمد لله طاحت في راجل وعليه لكلام يحبها ويخاف عليها ولكن قليل وحدة تززوج وهي صغيرة وطيح في واحد كيما الطفلة هادي
وزيد وحدة جارتنا في عمرها 20 سنة تزوجت مولات 15 سنة زوجوها دارهم الاول لي جا خطبها مدوها دركا راهي عندها 20 سنة عندها 4 دراري وراجلها مسكينة بلا مانحكوا كيفاه يعاملها يعني علاه عليهم لي قدها هدا وين يبنيو حياتهم وهي في رقبتها 4 ذراري
ووحدة تاني خلاف هكا دخلت عروسة في حومتنا مولات 15 سنة تاني مادارتش 5 اشهر زواج راجلها قالها نطلقك والسبب انو ماتعرفش طيب من نيتو يعني انت قبلت تديها صغيرة لازم علييك تقبل واش فيها ومادامك فت وزوجتها اصبر عليها حتى تتعلم علاه تفسدلها حياتها وطلقها على عفسة كيما هكا وخلي بزااف حكايات كيما هكا شايفتهم في حياتي اليومية
ربي يهدينا ويصلح احوالنا
اخي يعطيك الصحة على موضوعك
دمت في رعاية الله وحفظه ​

 

[Salam Fleur]

رد: كبرت بنتي ... خلاص نزوجوها

السلام عليكم

ارواح عند عائلة عمومي و تشوف ... بنت عمي لي قدي راهي ب5 اولاد ....... ولي بيناتنا 5 سنين راهي ب زوج ولاد ......

عندي ما سوفريت في الحكاية هاذي ... الحمد لله والديا ...خصوصا الاب تاعي كان رافض تماما حكاية زواجي المبكر ... كانت عند قرايتي هي الاهم ... ندير شهادة تكون عون ليا في المستقبل ... و الحمد لله ....

لما تخطبت واش قالولوا .... راك تهنيت منها ...... !!!!

تقول كنت قاعدة على قلابيهم

وواش يعجبك و يحيرك .... لما قلتلهم بلي رايحة نعيش في اعالي اعالي الجبال قالولي مالا قبلتي بيه برك باه تزوجي .... و قبل كانوا يقولولي .. علاه راكي تشرطي ....

كيما تدير ماشي مليح

اما حكاية الراجل لي يزوج بنته لراجل قده ... هذا راه باعها .... وواحد مايجي يقولي علاه الرسول زوج السيدة عائشة لانه راك تقارن اولا باشخاص مانوصلوش حتى ظفر منهم و ثانيا البيئة تختلف ....

وللاسف كاين بزاااف من بنات تلقاهم مطلقين وراهم اقل من 20 سنة ....

ربي يهدي ما خلق خويا جليل

​

 

[ثَسْكُورْثْ نَثْدُوكْلِي]

رد: كبرت بنتي ... خلاص نزوجوها

سلام عليكم خويا جليلو
يعطيك الصحة ع الموضوع
صح هذي الظاهرة مزالت منتشرة
خصوصا كي تحبس الطفلة من قرايتها
نعطيك مثال في الدشرة لراني ساكنة فيها
عندهم عقلية الطفلة اذا حبست قرايتها يقولو دار راجلها هو ليصونها وليسترها عندهم الحق لكن الشيئ الغريب في هذا انو الطفلة كيما قلت حتى لو حبست قرايتها في سن مبكرة 14 ...15 رايحين يمدوها تتزوج
حتى اصبحت الفتاة تفكر وتضع الدراسة كسلاح لتاجيل الزواج والهروب منه وكيما نشوفو الان معظم الفتيات ناجحات في دراستهن واكثرهن من اجل هذا السبب
كيما قلتلك وحدة من بين لنعرفهم عندها دوكا 17 سنة تخطبت في 15 كي حبست قرايتها ف السيام
قالتلي وهي تبكي ياريتني كملت قرايتي باه مايمدونيش نتزوج ...

يعني هناك حالات كثيرة ربي يفرج وربي يسعدهم ف حياتهم..
كاين عائلات تتحجج وتقول لاه تع بكري جداتنا تزوجو ف 12 و14 ودارو دار مي ماشي كيف كيف سبحان الله كل وقت ووقتو وكيما قال علي ابن ابي طالب : ربو أولادكم لزمان غير زمانكم .
يعني من الاخطاء التي يقع فيها الآباء والعائلات بصفة عامة يقولو عبارة لاه احنا كنا هاك ولاه تع درك مايقدروش ... لاه جدي تزوج في عمرو 18 وتع درك مايقدروش ولاه جدتي تزوجت في 12 وتع درك مايقدروش بكل بساطة كل زمان وزمانو وربي يجيب اللي فيه الخير

شكرااا اخي جليلو واتمنى اني ماخرجتش م ا لموضوع

بالتوفيق

تحياتي
​

 

[بنت الـ25]

رد: كبرت بنتي ... خلاص نزوجوها

الموضوع هدا حكاو عليه بزاف
زواج القاصرات ، دارو عليه مسلسل داروه موضوع مرة لحصة خط أحمر
كاين لي يأيدو وكاين لي يعارض
ممكن بكري كي كانت الطفلة تتربى فالدار وتنشأ تعرف وش معنتها الشقا تع الدار ، طيبي واغسلي وسيقي وربي خاوتك الصغار
تخرج تشعل من نهارها حتى لو تتزوج في سن 16 تلقى روحها واجدة للمسؤولية تع راجل ودار واولاد
مي الجيل الحالي طايرين برك وهايجين على الزواج وهي عضمة ما تعرفش تقليها ، يحسبو فالزواج رومنسية المسلسلات التركية وتفاهة المسلسلات الكورية
والوالدين تاني كي توصل بنتهم لسن المراهقة تبدى المخاوف ويتمناو يزوجوها ويتهناو
وربما السبب للكوارث لي يعيشها مجتمعنا والانفلات الأخرقي والطفلة تشرعو عينيها وتانيعادت تمشي وسط انعدام الأمن والذئاب البشرية تتربص بيها من كل صوب
الوالدين معذورين أحيانا ، خاطر الطفلة ملي تخرج من الدار وهوما حاطين يديهم على قلوبهم لحتى ترجع سالمة
يقلك نزوجوها تحكم دارها ونتهناو عليها مش نتهناو منها ، مي من جهة خلاف ما تركبش هاد العقلية خاطر بنات اليوم هوما والمسؤولية زوج موحال يتفاهمو
خاصة مع التطور هدا لي عايشين فيها تلقى الطفلة (ولا أعمم ) لاصقتلك فهداك البوغطابل ولا الطابلات ولا البيسي ما تتحركش غير باش تاكل ولا ترقد ولا تروح لهديك الجيهة إلا من رحم ربي
القراية تروح تقرا بالدراع ولكان قاتلها امها اغسلي لمواعن ولا سيقي تقوم الحرب العالمية الثالثة جيل فاشل صراحة وربي يستر منو
ولهذا انا من جهتي نعارض وبشدة ويبقى هدا رأيي الخاص لأنو احنا والحمدلله ما عندناش هاد العقلية وعندنا انو الطفلة نهار يجي مكتوبها تروح تتزوج
وجامي تكون عالة بالعكس نهار العيد الكبير كي جابولي ماين راجلي (المهيبة) وقالولي ان شاء الله هاد العيد اللخر والعيد الجاي ان شاء الله تكوني معانا حسيت بالدمع في عينين بابا
اما امي تقولي ديما نهار تروحي انتي علينا نستوحش فالدار هادي ، رغم اني 27 سنة يعني بالنسبة للعقلية للي حكيت انت عليها راني مش بايرة ، راني بايرة مستوى 3 هههههههههه
والحمدلله على كل حال

 

[Oum Loukmane]

رد: كبرت بنتي ... خلاص نزوجوها

موضوع شائك منتشر في مجتمعنا الله يهديهم ويهدينا
أمين

 

[Hakan]

رد: كبرت بنتي ... خلاص نزوجوها

والله ياخويا جليلو ما تحير ما والو نقدر نقول انو من جانب صح واش راك تقول ومن جانب اخر
من حق الابااء وااش راهم يديرو
يعني رانا نمشيو ونشوفو تفوت على المتوسطة بنات ١٤ و ١٥ بوحد العقلية تقول عليها بنت ٢٥
الماكيااج واللبسة والمشية يعني البنات كبرو قبل الوقت وزيد هاديك العلاقات وممكن راك سمعت
وقوع المراهقات في المحضور وهنا الابااء حبو يحلو المشكل بالزواج يزوج بنتو على البكري ويتهنى من الخوف عليها باسكو وقتنا ما يرحمش وبناتنا ولينا نخافو عليهم من الفتن نتاع دركا يعني بنت ١٤ تلقى الثقافة الجنسية نتاعها نتاع بنت مولات ٢٧. تعرف كل شيء من الساس للراس يعني هنا رايحين نقولو انو
شيء يخوف ونحكيو صراحة رغم انو الزواج مسؤولية وكل شيء الا انو يستر من بزااف حوايج
والمجتمع اذا خاف من حاجة راهو خاف من حوايج اخرى
يعني يخاف على بنتو انو لا قدر الله مع كبرها وبلوغها انو الزمن يخليها مع بنات اخرين قي قطار العنوسة
دونك لازم يقرر مع اول خاطب انو يزوج بنتو وانا على حسب رايي الشخصي يااخي ما نمدش ختي بنت ١٧ والعشرين حتان يعرفو صوالحهم لكن كاين بنات ماشاء الله في عمرها ١٥ مي تستاهل تكون زوجة
وما نحكيلكش على بنات ال٢٥ اللي مازالو والديهم يشريلهم الدمى باش يلعبو بحجة. مازالو صغار
شكراا على موضوعك..​

 

[مستر ميدو]

رد: كبرت بنتي ... خلاص نزوجوها

ومشكل هذا الزواج المبكر. من اسباب الطلاق وبي كثرة في الاونة الاخيرة خاطرش هي عاد طفلة مش قد مسؤلية الزواج هذا