- إنضم
- 18 سبتمبر 2012
- المشاركات
- 2,192
- نقاط التفاعل
- 5,223
- النقاط
- 111
- العمر
- 40
لاشك فيه انو كلكم امهات و آباء زادت مخاوفكم على ابنائكم اكثر مما واش رانا نسمعو من رعب الاختطاف للصغار . وقادرين لاسمح الله ننحطو في نفس موقف ام او اب اختطف ابنهم غدرا -ربي يحمي اطفالنا من شياطين الجن و الانس-..
و في هذا السياق ياريت نجتمع هنا و نحط بعض النقاط كنصائح نوجهها لبعضنا لحماية اطفالنا من الاختطاف او التحرشات .
ومني هذه بعض النصائح جمعتها لكم في انتظار تفاعلكم و اثراء الموضوع بنصائح اخرى لم اذكرها .
*اذا عاد ابنك في سن ما قبل المدرسة أو بدايتها متخلوهش وحدو ينزل للشارع و مايغيبش على عينيكم و ماتقولوش نخلوه يلعب عند باب الدار عادي، يما حالات اختطفوها من باب الدار.
*من الافضل انكم تتجنبو تخرجو للتسوق في الاوقات المزدحمة و اطفالك معاك باه متفقدوش السيطرة على ابنائكم و من الافضل انو الام متخرجش وحدها و تدي معاها شخص آخر اذا كان معاها أكثر من طفل.
*حفظي ابنائك اسمائهم كاملة و رقم تيليفون تاعك او وزوجك او اي رقم لشخص من العائلة ، و منطقة السكن حتى اذا وجدوه الشرطة او أي شخص فاعل خير يسهل عليهم ارجاعه لبيوتكم.
*و بالاك تروحو تشرو لاولادكم مثلا تيليفون غالي او تشنشني بنتك بذهب و تخليها تخرج هذا راح يلفت الانتباه ليهم .
*حذروهم من التكلم مع غرباء او أي شخص مش محل ثقة منكم . واذا تكلم مع ابنك شخص غريب على الطريق مثلا فعليكم الحذر لانو الكبار مش راح يطلبو مساعدة من طفل .و علميهم ماياخذوش هدايا من غرباء .
*علمو ابنائكم بعض الكلمات التي قد يلجأ اليها المختطف كحجه لاختطافه . كأن يقول له ان امه او اباه يناديه و راح ياخذو ليهم واجعلو بينكم وبين طفلكم كلمة سر تتفقوا عليها إن أرسلتم أحداً بطلبه، فليطلب صغيركم من هذا الشخص أن يخبره كلمة السر ليتأكد من أنه من طرفك.
*علميهم ارقام الهواتف الهامة مثلا الشرطة .الدرك ...
*علموهم ميتركوش اصدقائهم او يبتعدو عنهم و يكونو وحدهم في اللعب او في رحلات المدرسة او أي نشاط جماعي.
*علمو طفلكم معنى التحرش بانواعه بما يناسب سنه . واذا حس بخطر عليه ان يصرخ و يوهم من يعتدي عليه انا اباه قريب و ينادي علي ابيه او اخيه حتى و هم مش موجودين بقربو.حتى قومو بتمثيلية مسرحية عن محاولة لاختطاف في البيت يتعلم منها كيفاش يدير اذا طاح في نفس الموقف .
*كونو مستعدين دائما و خليو معاكم دائما في حافظة نقودكم صورلابنائكم تكون ملتقطة حديثا .
*اذا خليتو اطفالكم في البيت علموهم ميفتحوش الباب و مايردوش على لي يطبطب على الباب و اذا رد عل الهاتف ميقولش راهو وحدو.
*دخلو ابنائكم ال نوادي رياضية لتعلم العاب الدفاع عن النفس هاك يتعلم الجرأة و سرعة اتخاذ القرارات عند الحاجة .
*شددو عل ابنائكم انو ميغيروش اماكن اللعب لي تركتوهم يلعبو فيها حتى يقولو لكم انهم رايحين يغيرو مكان لعبهم و طبع مع كل اصدقاؤو.
*احتفضو بارقام هواتف اصدقاء و معارف ابنائكم لتتصلو بهم عند الحاجة.
*عودو ابنائكم ان يقولو لكم مشاويرهم كي يخرجو وين رايحين يروحو ؟و انتم تاني قولولهم كي تخرجو و تخلوهم في المنزل وين رايحين و ويكتاش راجعين .
*ابنائكم الكبار نبهوهم عدم السير في الشوارع المظلمة و الخالية خصوصا اذا عادو وحدهم.
*اذا تعرض طفلكم لمحاولة سرقة او نهب لاشيائه الثمينة مثلا هاتف عرفيه انو الاولى ان يعطيه اشيائه الثمينة احسن من تعرضه للايذاء .
*و اخيرا لا تبالغو في تخويف ابنائكم ..فالحذر واجب لكن احذرو ان تحولوهم الى جبناء.
ان شاء الله نكون افدتكم ببعض النصائح .
وياريت تتفاعلو مع الموضوع لاهميته و حساسيته .
شكرا مسبقا .
آخر تعديل:
