السلام عليكم جميعا
نتمنى تكونو كامل بخير
سوغتو سوغتو المتزوجات اللي عايشين مع دار شيخهم _ ماشي كامل mais اللي مارهمش متهنيين كيفي -
ع العموم
انا وحدة متزوجة من ولاية لولاية .. وبعدت على ولايتي يعني من البرج 34 ل تبسة 12
في بداية زواجي قعدت شهر برك عندهم و كنت بداري وحدي بحكم الخدمة نتاع زوجي
من بعد فاجئتنا الظروف و زوجي جاتو خدمة مستعجلة في الصحراء في ايليزي لمدة 6 شهور
صح عندو سكنة نتاع brégade بحكم lgrade
بعد تخمام للاسف خفت اني نسافر وانا بالحمل في الشهر السادس فقررت انا و زوجي اني نقعد في دارهم حتى نولد ان شاء الله
الحكاية هادي عندي براسك شهرين .. قعدت شهر في دارنا و شهر في دار بيت شيخي
ودوكا مازالني عندهم
انا ملي تزوجت براجلي كنت على علاقة مليحة معاهم
مي يا خاوتي من نهار رفدت الحمل تبدلو عليا خلاص خلاص
و وصلو وين قالولي علاه تم تم رفدتي الحمل .. سبحان الله حاجة نتاع ربي يا جماعة
صح انا عندي 8 شهور زواج و6 شهور حمل والحمد لله الحمد لله على كل نعمه
المشكل ماشي هنا ... انا عارفة حقيقتهم و الله ما نحب نحكي لراجلي و هو وحدو وحدو بدا يفيق بيهم
امو و اختو اللي عمرها 47 سنة يعني دوبل نتاع عمري و زيدولها 4 سنين
كي يكون راجلي معايا حاجة ما تخصني الحمد لله متفاهمين ومدللني و عايشة معاه باحترام
و انا مرضياتو وقايمة بواجباتي ..
يعني صراحة من ناحية والديا راضيين عليا على بيها لقيت الخير في حياتي معاه و الحمل
وحتى ربي سبحانو رزقني ب بنوتة يعني كانت حلمنا انا وهو ..
مي هوما قاسوني بزاف بالكلام وربي يشهد جامي وصلتهم
يتبلاو عليا بالهدرة و مايحوسوش عليا وووو
راجلي دوكا راح يخدم وخلاني عندهم .. والله ياكلو ومايحوسوش عليا
ساعات من التعب والجهد نتاع الحمل ندير شغل الدار حتى نبكي والله ما علابالهم بيا
وكي نحكي مع ماما تقولي يا بنتي ديري الخير ووكلي عليهم ربي
في الاول كنت نقول ماعليش بصح درك وليت نتعب بزاف كيما درت ما رضاو
وفي المقابل عندي زوجة اخ زوجي قبيحة معاهم و قاسمة بدارها وحدها في حوش واحد
و تشارشي فيهم مي متهليين فيها
وقدامي يحاولوها باش تاكل .. زعما زكارة فيا ..
و الخير لقيت في صحاب راجلي .. يجو يطبطبو ويقضولي نطيب ويشرولي ناكل الله يحفظهم هوما بنساهم
علابالي بلي غير فترة قصيرة وتفوت مي والله تعبت برك نفسيا سوغتو راني في مرحلة نفسية وجسدية حساسة بحكم صغر العمر و تجربتي الاولى في الحمل
صراحة تربى في قلبي الحقد والكره وساعات نحلف نقول درك نروح بداري و يجو ليا و ندير فيهم الشي
اللي داروه معايا بصح ماما ماتحبش تقولي لالا يا بنتي خافي ربي في راجلك
وحتى راجلي حنين معاهم وراجل معاهم بصح والله ماعلابالهم بيه ..
يشريلهم و خدم الدار و زوج خوه اللي كثر منو اللي قلتلكم مرتو قبيحة معاهم و زوج ختو
وهكاك والله ما هم مستعرفين بخيرو
بصح ربي من فوق عاطيلو على قلبو .. من خيرو ومن المعارف والحباب والراحة وكل شي
الحمد لله الحمد لله .. حتى والديا راضيين عليا وعليه وعلى زواجنا .. الحمد لله
بصح علاه هوما دايرين هكا برك ...
سامحوني طولت و خلطت الكلام مي متقلقة بزاااف ... من تصرفاتهم معايا
لدرجة انو جابولي العسل الحر ناكلو .. وانا حامل ووربي سبحانو عيطت لمرة صاحب راجلي قاتلي راهو ماهوش مليح راهو يسقط البيبي
ادعولي ربي يهنيني و نخرج بسرعة ... مانيش حابة نزيد نكرهم و نقطع علاقتي بيهم
الله يستر كل من يدعيلي .....
وربي يهني المتزوجات و يرزقهم الدرية الصالحة
وربي يرزق العازبات ازواج كيما زوجي ان شاء الله يا رب
تحياتي واسفة على الاطالة ... اختكم في الله
