توحشتها وحياتي بلا بيها ظلمة

[مشكلتي]

السلام عليكم ورحمة الله وبركاته

أنا عمري 23 سنة ونحب وحدة قل عليا ب 4 سنوات

وعندي 6 سنين وأنا معاها هي هدي الفترة كامل وهي حابة تبعد عليا بحجة أنو حرام العلاقات هادو وتقولي بلي رايحة تسناني طول حياتها

بصح محاال تزيد تحكي معايا ولا تقابلني

وهي بعيدة عليا فالسكن ببزاف وعندي شحال مشفتهاش وحد 3 سنين هكذاك صدقوني راني متوحشها بزاف وحاس بلي حياتي ماعندها حتى معنى بلابيها

وكيما نعيطلها تكوبي عليا وتبعتلي ميساج تقولي سامحني مانقدرش نزيد نخليك تسمع صوتي راهو عورة

قلت مكانش حل غير أني نروح نحكي مع باباها ولازمني نأخذ إذنها قبل هذا كيما قلتلها في ميساج ردتلي قالتلي لالا مازلت صغيرة ومانقدرش نقبل بيك فهذا الوقت وأنت مازلت ماتخدمش ومتأكدة مش رايحين يقبلوا بيك

راني متحير بزاف مانيش قادر نزيد نصبر عليها أكتر من هكا الي قدي تزوجوا وتهناو وأنا الي نحبها بعيدة عليا توحشتها بزاف

هي الي كانت توقف معايا فالمحاني وغير هي الي كانت تقدر تضحكني كيما نزعف

راني كاره روحي مالقيت لا خدمة لا والو و القراية مزالت للقدام

وقتاه نزيد نحكي معاها ووقتاش نسمع صوتها مرة أخرى .حاس البيبان كامل مغلوقين في وجهي

حبيت ندخل للعسكر ونgاجي و ماقبلوليش تع الدار مانيش عارف كيفاش حياتي ماشية و مانيش متهني عليها خايف كاش مايصرالها ومانعرفش

توحشتها أعطوني حل مليح يهنيني من هدا العذاب الي راني فيه و يعطيكم الصحة

سلام.....​

 

[راضية حامدة]

رد: توحشتها وحياتي بلا بيها ظلمة

قلتها بفمك مالقيت لا خدمة و لا اي شيء
الاولوية للخدمة يا اخي
لما تتزوج بوحدة تحبها و تلقى روحك ما تقدرش تسعدها و تقومها وش من فايدة هكاك؟
روح خطوة خطوة و ربي يوفقك ان شاء الله
الان ركز على الخدمة و ان شاء الله ينقتحولك ابواب الخير و تدي لي راك متمنيها
ربي ييسر امرك اخي

 

[أبا الفضل]

رد: توحشتها وحياتي بلا بيها ظلمة

العمل ضروري من أجل الزواج وليس شرطا أن يكون عند الدولة المهم أن تعمل وتقدم لخطبتها ان قبلت بك فهي لك
وان رفضتك هل تتمسك بشخص يرفض التواجد معك

 

[Hakan]

رد: توحشتها وحياتي بلا بيها ظلمة

السلاام عليكم يا حبيبي وااش رااك ان شااء الله بخير
صحا خويا ممكن تعطيلي ابتساامة من فضلك ومن قبلك تاني وبااش نبداو نحلو المشكل باذن الله
ونحكيلك عن تجربة يااخي ..

انت تحبهاا ومن موضوعك ومن حرووفك نقدر نسمع كمية الالم اللي راهو يخرج منها ولوكان تهدر الحرووف رايحة تاكد بلي راك طاايح ملياار
خويا في هاد الدنياا كاين اقداار مقدرها ربي سبحانو ورزقك محسوب عندك 100 الف في نصيبك تديها يالوكان تعيش نهار وااحد او 100 سنة المهم تديه تديه
يا خويا الحب شيء والوااقع شيء آخر وفي كثير من مقالاتي او حتى بوحي كنت نقول
الفقير مالازمش يعشق باسكو رايح يآذي روحو
انت تحب الطفلة وتقول ما تقدرش تعيش بلا بيهاا نسقسيك كيفااش عست بلا بيها لمدة 3 سنوات
زيد الطفلة هادي نحييها بكل بسااطة لانها فاقت قبلك لكن المشكلة انت تحشااتلك
يعني فقط ريح مع روحك دقيقة وقول علااش هي قدرت تعرف بلي رانا في الحراام وانا والو
وهنا احمد ربي واشكروو

حب النت هذاا كان لي معه قصة لكن حطيت النقاط على السطوور حتى الوااحد يرفع روحو اولاا وزيد تاني ما يوقعش في الحراام
اللي ما يرضااهش لختو اذن علاش يرضااه لبنات النااس
في الحيااة هادي كاين نفحات من عند ربي سبحاانو تنزل بالعبد ونضن الطفلة طاحت عليها نفحة من النفحاات او
شافتك بهلول غير تسربي في المشااعر نتااعك كرهااتك
نجيو لتحليل الانثى اولاا :
يااخي البنات مهما كانت ومهما طاالت كي تكثر عليها رايح تسمط رووحك عندهاا
اذن انت راك غلطت اولااا وكلمات العسل والغزل ماكان لاه الواحد يروح ليهم



خويا وحبيبي ننصحك نصيحة نتااع اخ يحبك ويعاني وااش راك تعاني
نحلفلك ثلاثا والله ثم والله ثم والله ما ينفعك غير جيبك وخدمتك وماالك هوما الصح والنسااء هادو قد ما يضيعوو
قد ما يصلحوو

الطفلة هادي راهي في بيت بوها وانت راك تقوول قاتلك مازالني صغيرة اذن رووح ارفد رووحك خوياا واخطيك من الحب هذاا
ونحلفلك زوج خطراات وثلاث اذا حبيت اذا تملك كنوز الدنياا ما رايحاش الطفلة تكون ليك حتى يفتح ربي
اذن انت عليك ترفع من شأنك وتخلي سوق الحب لماليه واللي هوما طبعاا اولاد الجيب والماال
مي حنايا الزوالية وانا واحد منهم نكتفيو بالحب من بعيد
لكن لوكان صح نكونو رجاالة والله ما نلتفتو لهاد الحب
رووح شووف والديك رووح شووف خااوتك واللي متاكد انو لوكان جاو مرفهين شويا يعاونوك
مالا اخدم على جاال اللي ربااتك وسهرت علييك وفرحها بيك
مااش يشوفوك شااد الحيط وتبكي على حظك وزهررك

والنسااء اعود واكررهاا والله مادام ربي قال على الاربعة رايح ان شااء الله تصيب 3 خير من الطفلة هادي
واذا صبرت وخدمت على رووحك وفتح عليك ربي سبحاانو من فضلو وكنت مولا نية وكانت الطفلة مازالها
ان شااء الله نقولولك راهي خيرلك

ونصيحة اخيرة خير الطفلة اللي تحبك ماشي الطفلة اللي تحبها انت لانو الاولى تعيش معاها ملك والثانية تعيش معاها عبد
وانت خير


سلاام وربي يفتح على خويا ..​

 

[رابح66]

رد: توحشتها وحياتي بلا بيها ظلمة

السلام عليكم

تحية طيبة مباركة لك بني
أنت 23 هي 19 عندكم 06 سنوات في العلاقة
يعني في سنك 17 وهي 13 بدات العلاقة
هنا الإشكالية* هل كان حب أم إعجاب أم رغبة في ما*
أنا لاأقول لا ذا ولاذاك *أقول سن مراهقة*
حب المراهقة يا بني لايبنى عليه مستقبل عائلة
أنا لااقول لك ليس حب بل حب ولن تنساها أبدا لكن صدقني لو تتزوج بها سوف تبرد من نفسك بعد ايام
جرب روح ابحث عن اخرى من أجل بناء أسرى وتزوج وسوف تدرك أن العلاقة الأولى كانت غثاء
إن الحديث يطول لكن أكتفي بهذا لعله يفيدك إن فهمتني وماقاله إخوتي وأخواتي قبل كافي ومفيد​

تقبلوا تحياتي

 

[أم لينة]

رد: توحشتها وحياتي بلا بيها ظلمة

ربي يجيبلك لي فيه خير و صلاح ليك في دنيتك و آخرتك . أثرت فيا اخي و حسيت بمواجعك انت راك في ضيقة و ان شاء الله تعدي بسلام و في ما يرضي الله .
الحلول الانية مش حل ومش راح ترضيكم و ممكن توصلكم لمشاكل انتم في غنى عنها .راك حاب تهدر معاها في التيليفون و انا راني مع رفض الطفلة من المفروض تكبر في عينك اكثر لانها تحوس عليك في الحلال . لكن رفضها ليك مش معناها متحبكش لانها عارفة انو اهلها رايحين يرفضوك و السبب باين انك مش خدام و هاذ حال كل خطاب يتقدم اول ما يسأل عليه الخدمة .
خليها على ربي هو الرزاق انت مازالك في بداية مشوارك و هي ايضا ياسيدي اشطار و كمل قرايتك و ربي يفتح عليك بخدمة نافيgي انت على جالك و على جالها .
و كي تحكم خدمة - في حال انها تقبل تسناك لانو على حساب ماقلت مازالها صغيرة و مادامها تحبك تعطيك فرصة - تقدم ليها و بعدها لكل حادث حديث.و زيد هاذي دنيا مناش عارفين واش راهي مخبيتلنا ملا ماكلاه نحسبوها بزاف خليها تمشي و انت عيشها كيما راهو كتبهالك ربي .ربي يرزقك الزوجة الصالحة لي تسعدك .

 

[خديجة ph]

رد: توحشتها وحياتي بلا بيها ظلمة

السلام عليكم أخي
ربي يهدينا ويهديك إلى الطريق المستقيم . كلام الاخوة والخوات ما شاء الله عليه حبيت نزيد عليه انك تصوم أخي و كتر من الأصحاب الصالحين كثرة الفراغ تِدي بيك إلى التفكير فيها أشغل نفسك إدا ما لقيتش عمل أشغل نفسك بالعمل لله في الجمعيات الخيرية و غيرها .لا أقول هدا الكلام من فراغ فلقد جربته بنفسي هدا العمر اللي راك فيه صعب لازم الواحد يشغل نفسو باه ما يفكرش بزاف في هده المواضيع وكما قلت لك لما كنت في هدا العمر كانو معنا شباب وشابات نحسبهم من الصالحين والصالحات ولا نزكي على الله أحدا صدقني أخي كلما نشطنا في المجال هدا نسينا المواضيع تاع الزواج وكاين ناس جاتهم فرص شغل من وراء أعمال الخير هده. في الاخير أخي ابقى على تواصل معنا دائما وأطلعنا على أخبارك باستمرار.
هدا رأيي والله أعلم.
​

 

[ضآحكة مستبشرة]

رد: توحشتها وحياتي بلا بيها ظلمة

السلام عليكم اخي
صراحة و انا نقرا في الموضوع قلبي يتقطع لانو نعرف وحدة عاشت ربما واش عاشت هاد الطفلة لي حكيت معاها
عجبها واحد لمدة بلاك 3 سنين كي عرفاتو كانت رح تجوز البيام و هو الباك
جاب الباك و هي جابت البيام كي ربح الباك اعترفلها بحبو و هي تاني
امالا هو رفد روحوا و رآح gـآآجآ و راهو طالع فالجيش حاليا بعد ما كمل السطاج ديالو بعد عامين
حكا معاها و قاللها درك راني ناويك للحلال

امالا باش تدي هاد البنت لازم تخدم ترفد روحكـ
و الشيء المشترك بين الطفلة لي تحبها و بين لي نعرفها انا انو كلاهما محبوش العلاقات في الحرام
لانو كان في كل مرة يطلب منها رقم الهاتف تقولوا منقدرش بحكم انو حرام
كانوا فقط يتراسلوا بالنت و جا الوقت وين قاتلوا انا صح نحبك لكن هاد الشيء حرام
انا نعيش حياتي و انت تعيش حياتك ولا ربي كاتبلنا مكتوب رح نكونوا مع بعض ولا مكاش مكتوب الله يسهل علينا للزوج

الطفلة فاقت للشيء بلي حرام و كيما هاد الطفلة لي تحبها نورمالمون دركا تزيد تكبر في عينك اكثر لانها انسانة تخاف ربي

و انت خلي الطفلة تكبر في غرضها و انت ارفد روحك و روح تخدم اوما دير المستقبل
الدار متتبناش بالكلام لازم تكون انسان مسؤول
راني حكيت بزاف
لكن المغزى راهو باين
الله يوفقك اخي​

 

[رابح66]

رد: توحشتها وحياتي بلا بيها ظلمة

السلام عليكم

عجبا لمن لا يفرق بين ذا وذاك
* كانوا فقط يتراسلوا بالنت و جا الوقت وين قاتلوا انا صح نحبك لكن هاد الشيء حرام* ؟؟؟؟؟؟​

تقبلوا تحياتي

 

[بنفسج]

رد: توحشتها وحياتي بلا بيها ظلمة

السلام عليكم
على حسب ماقريت انو حبك ليها حقيقي لكنت صح ناويها في الحلال القى خدمة وكون روحك عندها الحق كي قاتلك قمتجيش لانو اكيد اهلها مش رح يقبلو لانو الزواج راه مسؤولية كبيرة ماشي غير حب رجال خدامين وما همش لاحقين انت دير النية وكيما قتلك دبر خدمة ودير شوي صوارد باش كي ترةح تخطب ميرفضوكش وفي الاخير راه كلش مكتوب انت تريد وهو يريد والله يفعل ما يريد يعني لوكان تعود ليك راه مينحهالك حتى واحد
تحياتي لك

 

[لؤلؤة قسنطينة]

رد: توحشتها وحياتي بلا بيها ظلمة

السلام عليكم
البارح كنت موجدة رد طويل وعريض ولكن للاسف راح كلشي
لكن لما رجعت راني لقيت ردود ماشاء الله من الاخوة والاخوات مالا ماعندي واش نزيد
نقولك ربي يوفقك وارجع لصوابك الدنيا ماتتوقف على حتى شخص، واذا نتا تقول 23 سنة
كبير ومتمني عايلة، كاين لي راهم في سن الثلاثين والاربعين يتمناو سنك غير باه يخدمو فيه وييبنيو حياتهم
الوقت مافاش ومازال العمر قدامك ، اتوكل على ربي ومايكون غير الخير ان شاء الله
بالتوفيق خويا
​

 

[خفيفة الروح]

رد: توحشتها وحياتي بلا بيها ظلمة

السلام عليكم
اخي تاكد اذا كانت تحبك راح تستناك لعمر كامل
في الحقيقة حكايتك تشبه لحكايتي جا لي راني معاه وخطبني و دارنا ماقبلوش وبصح هكاك وراني نستنا في النهار لي نكون معاه و و عدتو بلي نبقى نستناه

 

[ضيوف وسـنغادر]

رد: توحشتها وحياتي بلا بيها ظلمة

السلام عليكم يا اخي
اما بعد
يا اخي مابالكم وبالنا نحن الشباب....سن تغير منه باقي مراحل العمر
تفنوه فيما لا يفيد...مالفائدة نعم احببتها بما يسمى الحب..لمدة 2190 يوما.....
وفي النهاية تستيفظ هي من غبار وشبح الحرام وانت بقيت تطارد دكريات واشباح الماضي
اغتنم شبابك !اغتنم وقتك !اغتنم صحتك! هدا ما ستسال عنه ليس عن من احببت وكيف كان شعور الالم والحب والغرام ؟!
اخي تقرب الى الله فلن تجد نفسك محتاجا لغيره الا دعوة خير من والوالدين
اعمل...لا تتخد الحيط رفيقا لك...اياك اياك ثم اياك ان تخجل من اي عمل تعمله..نظف اغسل...اطبخ...ازرع
ان الله يحب اليد الخشنة من العمل يحب من يتعب يحب من يكسب
كل شيء مكتوب والحياة قضاء وقدر وفر الاسباب يا اخي
لنعد الى عنوان موضوعك حياتك ظلمة ادن ؟ كيف عشت 3 اعوام بدونها...هل ستعوض امك هل تعوض اختك هل ستعوض عائلتك ؟
حسنا لن ادخل في المجريات لكن اخي فقط..انظر الى الحياة بمنظار مختلف منظار تخلوه هده العلاقات منظار تخلوه الشوائب...
مازلت شابا اطال الله في عمرك...فاستمتع به يا هذا بل فوات الوان فمدة الفين يوم لن تعود من جديد بل ربما لن تعيشها انا او انت...
فانس ا\ن وانك والله ان شاء لقادر على ذلك...انس وتقرب لمن معك لله لعائلتك..لكل من حولك....
ويوما ما سيعيش الجميع نهاية سعيدة هنا او هناك
سلام!​

 

[marielys]

رد: توحشتها وحياتي بلا بيها ظلمة

شعل الضو يا ولدي

 

[Happy Girl]

رد: توحشتها وحياتي بلا بيها ظلمة

جوابي راح يكون قاسي لكن اقرى او خمم مليح
ان شاء الله تكون التزمت صح هاذ الطفلة رايي الا تعرفها وين تسكن اشقى ليها لكن شوفها من بعيد زيد سقسي عليها ربما راهي مرتبطة خافت تخبرك هكذا ترتاح مرة وحدة والا لقيتها صح الزمت زير روحك اخدم تقدملها بلا ما تخبرها تاني تبان الا باغياتك ولا لالا
توقع الاسوء حتى ما تنصدمش عمرك لا تربط حياتك كاملة بشخص فالزواج نصف دين و ما خلقنا الا لنعبد الله اولا و الباقي كله امتحان لبلوغ جنا العلى سبق العبادة على هوى النفس اكيد راح تلقى الحل سلام

 

[محمد تلمساني_13]

رد: توحشتها وحياتي بلا بيها ظلمة

تتكلمون عن العمل و كان العمل شيء سهل
الا تعلمون ان كل شيء بالمعريفه و لن يعترف بك احد حتى لو لديك مليار ديبولك
يا اخي صاحب المشكله
الكل هنا ينتقدوك وقد قرات كل التعليقات و الله هناك تعليقات لم تعجبني اسمعني ليا يا خويا

خويا اقسملك بالله الحب و الله نعمه كبيره
شوف كما هما انتقدوك و كما كل واحد اعطالك رايوو انا اولا منقولش معجبونيش اراء
و لكن
هولاء المعلقين مراهمشش حاسين بيك
يقولون لك
شوف زوجه حلال
اخر يقولك حرام ياخي رانا عارفين بلي حرام و الي راه يقول حرام يشوف روحو و يتفكر روحو مين علي علاقه في النت
يا اخي كل واحد يديها في صوالحه
اعوود بالله من كلمة انا
انا في عمري 26 و مازال ما تزجتش و شكون هادا الي يتزوج و عمرو 23 سنه
فقط ف هاد نقطه لي منتفاهمش معك
شوف
شوف
الي قالك
الزوالي ما يعيش الحب
و علاش يا خويا وين صرات ههادي
بالعكس
اصحاب الاموال هما لي حياتهم معمره بالمشاكيل و ما عايشينش سعداء
اسمعني راني نشوف و راني نفهم مليح واش كاين تبع هدرتي
البنت هادي متسمحش فيها ايك و اياك و تسمح فيها و الي قالك بلي كي تتزوج تكتشف بلي خرطي نو مكانش بنها
واضح وضوح شمس البنت راك تعشق فيها
من فضلك ما تسمحش فيها
ما تخليهاش ضضيع من يدديك
علابالنا بلي مكتوب ماراناش يهود

قصة المكتوب
يديروها البنات مين يحبو يطردو واحد من حياتهم يتمسخرو بيه و يقولولو اسمحلي خويا انا تزوجت عليك و هدا مكتوب
هاد قصه قاع نعرفوها

اه
قتلك لازم تتاكد مليح بلي هي تحبك
خطر ادا شفتها ما تحبكش
هنا
كلام الاخوة و الاخوات ط كلامهم صحيححححححححححححححححححححححححححححححححححححححح مئة بالمئة
اما اادا كانت تحبك ف تبع كلامي و انشاء الله يا ربي دير كل جهدك و متفقدش الامل
و انا ايضا تجاربي قاسيه بزاف مي رانا تاكلين علي ربي
و اما بال نسبه لي يقول علاقات محرمه
العلاقه المحرمه عي الزني
كلام ف بورتابل ادا كان عادي ماهوش حرام انت كي متقدرش تكلم بومها و هي بعيده عليك انت مظطر تصونيلاها
اما ادا ما ردتش عليك
عاود و عاود و عاود سمط كزنك سامط بزاف متملش
اخسر كلش و ما تخسرش واحد تحبو هادي هي
و الله يوفقك يا خويا
ب

 

[عبد الله 003]

رد: توحشتها وحياتي بلا بيها ظلمة

شوف كاين 2 فرضيات :

1/يئما الطفله تحبك : هنا الامر ممتاز جدا ... راك ضامنها ماعليك الا ان تقول لها : هل تقبلين بي كزوج منا عامين ولا أكثر .. المهم تشاورها هل تقبل بك و انت تتأكد بلي صح ... هنا اعقد العزم حبيبي 23 سنة راك فور حوس على خدمه و ارفد روحك حبيبي و العشق هذا تاع (لا استطيع العيش بدونها ) انساه لأن الطفله تحبك خلاص و متأكد من ذلك يعني راي ليك .. لازم تكون مسؤول على روحك قبل كل شيء و ترفد روحك مليح ثم توكل على ربي و تزوج.

2/ يئما هاذ الطفلة ماعلبالهاش بيك : لأنو حسب ما قلت باين بلي عرفتها في سن 13 سنة يعني كانت صغيره ...و الآن يعني كبرت عرفت تعرفت شافت و فهمت .. واستنتجت بلي انت انسان عيان و ليس ما تستحقه هي ... اي انها كانت معجبه بك لا اكثر ولا أقل ... وهنا لازم تعطي قيمة لروحك حبيبي ... ينعلبوا الحب لي يفشل و مايربحك ني في الدنيا و لا في الآخره ... يخليك تايه في الهموم ...
انسى جدها كامل و توكل على ربي ... دير ربي في قلبك ... و هذا كامل ناتج من الفراغ و البعد الكامل عن الله ... اذا سألتك هل تمراس الرياضة مثلا راح تقولي لا ... واذا قلت لك هل تصلي الفجر في وقته تقلي قطعا لا ... اذن ... لازم تبدل عقلييتك 180 درجه عزيزي و تحاول قدر المستطاع ان تكون افضل رجل

اعفس على قلبك حبيبي فأنت رجل

 

[zed green]

رد: توحشتها وحياتي بلا بيها ظلمة

سلام اخي انا في نفس عمرك و لدي نفس المشكله مع فتاه اكبر مني في السن
لكن الحمد لله كمما قال الاخوه كلشي بالمكتوب انا احس بمعاناتك لاني عانيت من التعلق لدرجه الجنون
لكن الحمد لله تقبلت الواقع ان كل شيئ بالمكاتيب و احيانا اقول لنفسي "واش داني "
الان انا مازلت ادرس و ان شاء الله ساجد عمل و ابدا بناء مستقبلي شيئا فشيء و عندما اجد نفسي مستعدا سادهب لخطبتها لانها اثبتت لي انها ستنتظرني رغم كل الظروف و المسافه التي بيننا
لا تقلق نفسك يا خويا في غرضك كمل قرايتك و خطيك مالعسكر و احمد ربي راهي خلاتك لوكان مازلتو في علاقه لوكان راك تتعدب اكثر من هكدا احمد الله ادرس اعمل تميزر شويا
دير الرياضه و ربي يفرجلك عليك
نصيحه من اخ عانى مثلك .... ♥

 

[iman-dz4ever]

رد: توحشتها وحياتي بلا بيها ظلمة

ربي يفرجها عليك خويا والله غير بكيتنييييييييييي
ربي يجعلها مننصيبك انا نقول تشاور داكم و تروح تحكي مع باباها واحكيلو ظروفك و دير ربي في بالك
و تفرج ان شاء الله وتبشرنا بعرسك ان شاء الله دعواتي ليك

​

 

[فيتامين سي]

رد: توحشتها وحياتي بلا بيها ظلمة

السلام عليكم ورحمة الله وبركاته

أنا عمري 23 سنة ونحب وحدة قل عليا ب 4 سنوات

وعندي 6 سنين وأنا معاها هي هدي الفترة كامل وهي حابة تبعد عليا بحجة أنو حرام العلاقات هادو وتقولي بلي رايحة تسناني طول حياتها

بصح محاال تزيد تحكي معايا ولا تقابلني

وهي بعيدة عليا فالسكن ببزاف وعندي شحال مشفتهاش وحد 3 سنين هكذاك صدقوني راني متوحشها بزاف وحاس بلي حياتي ماعندها حتى معنى بلابيها

وكيما نعيطلها تكوبي عليا وتبعتلي ميساج تقولي سامحني مانقدرش نزيد نخليك تسمع صوتي راهو عورة

قلت مكانش حل غير أني نروح نحكي مع باباها ولازمني نأخذ إذنها قبل هذا كيما قلتلها في ميساج ردتلي قالتلي لالا مازلت صغيرة ومانقدرش نقبل بيك فهذا الوقت وأنت مازلت ماتخدمش ومتأكدة مش رايحين يقبلوا بيك

راني متحير بزاف مانيش قادر نزيد نصبر عليها أكتر من هكا الي قدي تزوجوا وتهناو وأنا الي نحبها بعيدة عليا توحشتها بزاف

هي الي كانت توقف معايا فالمحاني وغير هي الي كانت تقدر تضحكني كيما نزعف

راني كاره روحي مالقيت لا خدمة لا والو و القراية مزالت للقدام

وقتاه نزيد نحكي معاها ووقتاش نسمع صوتها مرة أخرى .حاس البيبان كامل مغلوقين في وجهي

حبيت ندخل للعسكر ونgاجي و ماقبلوليش تع الدار مانيش عارف كيفاش حياتي ماشية و مانيش متهني عليها خايف كاش مايصرالها ومانعرفش

توحشتها أعطوني حل مليح يهنيني من هدا العذاب الي راني فيه و يعطيكم الصحة

سلام.....​

نقوك من الأفضل تنساها مؤقتا و تبدا تخدم و تبدا تصوم الاتنين و الخميس تعمر وقتك متخليش فرصة تخمام بلا فايدة و منا لي دير مستقبل :-rادا ربي كاتبهالك تلقاها و ادا ماشي من مكتوبك كون واش در متلقاهاش راك متوحشها باسكو كانت غير هي لي توقف معاك راك قلتها هي قالتلك محاباش نروح للحرام و نتا تعيطلها كون صح تحبها تخاف عليها و متعيطلهاش