السلام عليكم
وراني جييييت ^^ ، تم الاعتماد حبيبتي
وماشاء الله كأول موضوع ليك في هاد القسم نعطيك 9.99 / 10 هههههه
غير نضحك، ان شاء الله نشوفوك في هاد القسم مرة اخرى، لانو عندك ابداع ماشاء وخسارة يتخبا وماتشاركيناش بيه ^^
المهم نوليو للموضوع الحساس وهو المراهقة ولي طرحتيه بقالب جميل نشكرك عليه
وزدتي دمجتي معاه الكذب، ونشكرك على هاد النقطة، لأنو مرحلة المراهقة مرحلة حساسة تتطلب أخذ نصيحة ومصارحة
الأكبر سناً باه يقدر المراهق تجاوزها بسلام، ولكن لما يكذب ويخفي واش راهو يصرا معاه خلال هاد المرحلة قادر يدخل في دوامة
وباه مانكترش الهدرة بزااف رايحة نروح للأسئلة مباشرة باه نتكلم بوضوح اكتر
نبداو بسم الله وعلى بركة الله
واش تعرف على هادي المرحلة -باختصار رجاءا ؟
مرحلة المراهقة كيما سبق وقلت هي مرحلة حساسة، وانا باه نشرح بطريقة احسن رايحة نتكلم عن نفسي هههه
انا ربما ماحسيتش بمرحلة المراهقة مليح لأنو كنت عايشة ظروف أصعب من أنهم يخليوني نحس بهاد الفترة، يعني تحمل المسؤولية
خلاني ننسى تفاصيل هاد الفترة
ولكن واش نشفى انو الانسان يولي حساس بدرجة أكبر وعصبي، انا لما نقارن نفسي دركا وقبل مدة من الزمن نشوف بلي راني عقلت خلااااااص ، ماش معناها كنت قبيحة بصح كاين فرق كبير، أيضا تولي تحسي روحك وحدك وكأنو كل العالم ضدك هههه
يعني لما نتفكر الفترة هاديك نشبع ضحك على روحي، لكن في وقتها كانت تبانلي مرحلة صعبة، على هادي لازم نفهمو ابناءنا خلال هاد المرحلة، لأنو ماشي الكل يتجاوزوها بسلام
واش رايك في البنات ولا ذكور اللي يكذبو في هادي المرحلة ؟ عندها نتائج على مستقبل ؟
كيما قلت من قبل، هي مرحلة حساسة وين الإنسان يحس روحو وحدو، ولازم هاديك المشاعر والأحاسيس نخبرو بيهم لي أكبر منا سنا
ولما يلقى الشخص المعرض لمرحلة المراهقة حدود بينو وبين والديه رايح يكذب وربما يمشي في طريق خاطىء
وهنا مانقولش رايي في الشخص لي يكذب، نقول رايي في الوالدين والمعاملة تاعهم لي خلات هاد الإبن ولا الإبنة يكدبو
في رايك الوالدين لازم يشددو الرقابة في هذه الفترة ؟ علاش ؟ كيفاش؟
هنا نوجه تحية للأخت قمر الوادي لانها البارح دارت موضوع على ثقافة الحوار في مجتمعاتنا فبارك الله فيها، لأنو في هاد النقطة نحتاجو للحوار
أكثر من العنف ولا الرقابة المشددة، لما تحب تربح إبنك وتخليه يكون معاك كي الصفحة البيضاء عليك وعلى الحوار
اتناقش معاه حتى في الأمور لي تبانلك تافهة، بصح هيا راهي عندها معنى عندو، حاول تفهمو، حاول تخليه يحسك انك تسمعلو وتعاونو
لما بنت في مرحلة المراهقة تبدا تشوف بلي العلاقات مع الشباب حاجة مليحة شكون لي لازم تشاور في هاد الأمر؟؟
صحاباتها لي عمرهم مايتجاوزش 13 و 14 سنة؟؟ لوكان لقات امها لي تفهمها وتتحاور معاها كن راهي تحكيلها بكلشي
وتدي من عندها النصيحة الجيدة بدل ما تخبي وتروح تشاور لي ماعندهمش خبرة، انا ننصح كل أم تكون صديقة بالنسبة لبنتها
ربما وقت بكري ماكانش الثقافة وسط المجتمع، بصح دركا رانا عندنا امهات وآباء مثقفين، يعني خلي بنتك تحكيلك واسمعيلها
ونتي نفسك احكي معاها حول العلاقات العابرة لي تجمع الشباب بالبنات واسمعي لرايها وانصحيها خير ما تروح لأشخاص خلاف
ويصراو حوايج خلاف، يعني بطريقة تخليها تحكيلك بلا ماتسأليها وتحس بوقفتك كتر ماتحسك عساس عليها ينتظر في خطأ منها باه يعاقبها
نتمنى اني ماخرجتش على الموضوع، واذا تفكرت كاش اضافات راني نرجعلك بحول الله
بارك الله فيك غاليتي موضوع مميز
ننتظر جديدك، وراين غير هنا ندور م نبعد نولي ندير تعقيب على ردود البقية
تقبلي مروري
